| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. தம்ப³புப்பி²யத்தே²ரஅபதா³னவண்ணனா
2. Tambapupphiyattheraapadānavaṇṇanā
பரகம்மாயனே யுத்தோதிஆதி³கங் ஆயஸ்மதோ தம்ப³புப்பி²யத்தே²ரஸ்ஸ அபதா³னங். அயம்பி ஆயஸ்மா புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பியத³ஸ்ஸிஸ்ஸ ப⁴க³வதோ காலே கேனசி புரே கதேன அகுஸலகம்மேன து³க்³க³தகுலே நிப்³ப³த்தோ வுத்³தி⁴ப்பத்தோ பரேஸங் கம்மங் கத்வா ப⁴தியா ஜீவிகங் கப்பேஸி. ஸோ ஏவங் து³க்கே²ன வஸந்தோ பரேஸங் அபராத⁴ங் கத்வா மரணப⁴யேன பலாயித்வா வனங் பாவிஸி. தத்த² க³தட்டா²னே பாடலிபோ³தி⁴ங் தி³ஸ்வா வந்தி³த்வா ஸம்மஜ்ஜித்வா ஏகஸ்மிங் ருக்கே² தம்ப³வண்ணங் புப்ப²ங் தி³ஸ்வா தங் ஸப்³ப³ங் கண்ணிகே ஓசினித்வா போ³தி⁴பூஜங் அகாஸி. தத்த² சித்தங் பஸாதெ³த்வா வந்தி³த்வா பல்லங்கமாபு⁴ஜித்வா நிஸீதி³. தஸ்மிங் க²ணே தே மனுஸ்ஸா பதா³னுபதி³கங் அனுப³ந்தி⁴த்வா தத்த² அக³மங்ஸு. ஸோ தே தி³ஸ்வா போ³தி⁴ங் ஆவஜ்ஜெந்தோவ பலாயித்வா ப⁴யானகே கீ³ரிது³க்³க³பபாதே பதித்வா மரி.
Parakammāyaneyuttotiādikaṃ āyasmato tambapupphiyattherassa apadānaṃ. Ayampi āyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle kenaci pure katena akusalakammena duggatakule nibbatto vuddhippatto paresaṃ kammaṃ katvā bhatiyā jīvikaṃ kappesi. So evaṃ dukkhena vasanto paresaṃ aparādhaṃ katvā maraṇabhayena palāyitvā vanaṃ pāvisi. Tattha gataṭṭhāne pāṭalibodhiṃ disvā vanditvā sammajjitvā ekasmiṃ rukkhe tambavaṇṇaṃ pupphaṃ disvā taṃ sabbaṃ kaṇṇike ocinitvā bodhipūjaṃ akāsi. Tattha cittaṃ pasādetvā vanditvā pallaṅkamābhujitvā nisīdi. Tasmiṃ khaṇe te manussā padānupadikaṃ anubandhitvā tattha agamaṃsu. So te disvā bodhiṃ āvajjentova palāyitvā bhayānake gīriduggapapāte patitvā mari.
7. ஸோ போ³தி⁴பூஜாய அனுஸ்ஸரிதத்தா தேனேவ பீதிஸோமனஸ்ஸேன தாவதிங்ஸாதீ³ஸு உபபன்னோ ச² காமாவசரஸம்பத்திங் அனுப⁴வித்வா மனுஸ்ஸேஸு ச சக்கவத்திஆதி³ஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே குலே நிப்³ப³த்தோ வுத்³தி⁴ப்பத்தோ ஸத்து² த⁴ம்மதே³ஸனங் ஸுத்வா பஸன்னமானஸோ பப்³ப³ஜித்வா நசிரஸ்ஸேவ அரஹா ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பரகம்மாயனே யுத்தோதிஆதி³மாஹ. தத்த² பரேஸங் கம்மானி பரகம்மானி, பரகம்மானங் ஆயனே கரணே வாஹனே தா⁴ரணே யுத்தோ யோஜிதோ அஹோஸிந்தி அத்தோ². ஸேஸங் பாகடமேவாதி.
7. So bodhipūjāya anussaritattā teneva pītisomanassena tāvatiṃsādīsu upapanno cha kāmāvacarasampattiṃ anubhavitvā manussesu ca cakkavattiādisampattiṃ anubhavitvā imasmiṃ buddhuppāde vibhavasampanne kule nibbatto vuddhippatto satthu dhammadesanaṃ sutvā pasannamānaso pabbajitvā nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento parakammāyane yuttotiādimāha. Tattha paresaṃ kammāni parakammāni, parakammānaṃ āyane karaṇe vāhane dhāraṇe yutto yojito ahosinti attho. Sesaṃ pākaṭamevāti.
தம்ப³புப்பி²யத்தே²ரஅபதா³னவண்ணனா ஸமத்தா.
Tambapupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. தம்ப³புப்பி²யத்தே²ரஅபதா³னங் • 2. Tambapupphiyattheraapadānaṃ
