| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২. তম্বপুপ্ফিযত্থেরঅপদানৰণ্ণনা
2. Tambapupphiyattheraapadānavaṇṇanā
পরকম্মাযনে যুত্তোতিআদিকং আযস্মতো তম্বপুপ্ফিযত্থেরস্স অপদানং। অযম্পি আযস্মা পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পিযদস্সিস্স ভগৰতো কালে কেনচি পুরে কতেন অকুসলকম্মেন দুগ্গতকুলে নিব্বত্তো ৰুদ্ধিপ্পত্তো পরেসং কম্মং কত্ৰা ভতিযা জীৰিকং কপ্পেসি। সো এৰং দুক্খেন ৰসন্তো পরেসং অপরাধং কত্ৰা মরণভযেন পলাযিত্ৰা ৰনং পাৰিসি। তত্থ গতট্ঠানে পাটলিবোধিং দিস্ৰা ৰন্দিত্ৰা সম্মজ্জিত্ৰা একস্মিং রুক্খে তম্বৰণ্ণং পুপ্ফং দিস্ৰা তং সব্বং কণ্ণিকে ওচিনিত্ৰা বোধিপূজং অকাসি। তত্থ চিত্তং পসাদেত্ৰা ৰন্দিত্ৰা পল্লঙ্কমাভুজিত্ৰা নিসীদি। তস্মিং খণে তে মনুস্সা পদানুপদিকং অনুবন্ধিত্ৰা তত্থ অগমংসু। সো তে দিস্ৰা বোধিং আৰজ্জেন্তোৰ পলাযিত্ৰা ভযানকে গীরিদুগ্গপপাতে পতিত্ৰা মরি।
Parakammāyaneyuttotiādikaṃ āyasmato tambapupphiyattherassa apadānaṃ. Ayampi āyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle kenaci pure katena akusalakammena duggatakule nibbatto vuddhippatto paresaṃ kammaṃ katvā bhatiyā jīvikaṃ kappesi. So evaṃ dukkhena vasanto paresaṃ aparādhaṃ katvā maraṇabhayena palāyitvā vanaṃ pāvisi. Tattha gataṭṭhāne pāṭalibodhiṃ disvā vanditvā sammajjitvā ekasmiṃ rukkhe tambavaṇṇaṃ pupphaṃ disvā taṃ sabbaṃ kaṇṇike ocinitvā bodhipūjaṃ akāsi. Tattha cittaṃ pasādetvā vanditvā pallaṅkamābhujitvā nisīdi. Tasmiṃ khaṇe te manussā padānupadikaṃ anubandhitvā tattha agamaṃsu. So te disvā bodhiṃ āvajjentova palāyitvā bhayānake gīriduggapapāte patitvā mari.
৭. সো বোধিপূজায অনুস্সরিতত্তা তেনেৰ পীতিসোমনস্সেন তাৰতিংসাদীসু উপপন্নো ছ কামাৰচরসম্পত্তিং অনুভৰিত্ৰা মনুস্সেসু চ চক্কৰত্তিআদিসম্পত্তিং অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে কুলে নিব্বত্তো ৰুদ্ধিপ্পত্তো সত্থু ধম্মদেসনং সুত্ৰা পসন্নমানসো পব্বজিত্ৰা নচিরস্সেৰ অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পরকম্মাযনে যুত্তোতিআদিমাহ। তত্থ পরেসং কম্মানি পরকম্মানি, পরকম্মানং আযনে করণে ৰাহনে ধারণে যুত্তো যোজিতো অহোসিন্তি অত্থো। সেসং পাকটমেৰাতি।
7. So bodhipūjāya anussaritattā teneva pītisomanassena tāvatiṃsādīsu upapanno cha kāmāvacarasampattiṃ anubhavitvā manussesu ca cakkavattiādisampattiṃ anubhavitvā imasmiṃ buddhuppāde vibhavasampanne kule nibbatto vuddhippatto satthu dhammadesanaṃ sutvā pasannamānaso pabbajitvā nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento parakammāyane yuttotiādimāha. Tattha paresaṃ kammāni parakammāni, parakammānaṃ āyane karaṇe vāhane dhāraṇe yutto yojito ahosinti attho. Sesaṃ pākaṭamevāti.
তম্বপুপ্ফিযত্থেরঅপদানৰণ্ণনা সমত্তা।
Tambapupphiyattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ২. তম্বপুপ্ফিযত্থেরঅপদানং • 2. Tambapupphiyattheraapadānaṃ
