| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၂. တမ္ဗပုပ္ဖိယတ္ထေရအပဒာနဝဏ္ဏနာ
2. Tambapupphiyattheraapadānavaṇṇanā
ပရကမ္မာယနေ ယုတ္တောတိအာဒိကံ အာယသ္မတော တမ္ဗပုပ္ဖိယတ္ထေရသ္သ အပဒာနံ။ အယမ္ပိ အာယသ္မာ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ပိယဒသ္သိသ္သ ဘဂဝတော ကာလေ ကေနစိ ပုရေ ကတေန အကုသလကမ္မေန ဒုဂ္ဂတကုလေ နိဗ္ဗတ္တော ဝုဒ္ဓိပ္ပတ္တော ပရေသံ ကမ္မံ ကတ္ဝာ ဘတိယာ ဇီဝိကံ ကပ္ပေသိ။ သော ဧဝံ ဒုက္ခေန ဝသန္တော ပရေသံ အပရာဓံ ကတ္ဝာ မရဏဘယေန ပလာယိတ္ဝာ ဝနံ ပာဝိသိ။ တတ္ထ ဂတဋ္ဌာနေ ပာဋလိဗောဓိံ ဒိသ္ဝာ ဝန္ဒိတ္ဝာ သမ္မဇ္ဇိတ္ဝာ ဧကသ္မိံ ရုက္ခေ တမ္ဗဝဏ္ဏံ ပုပ္ဖံ ဒိသ္ဝာ တံ သဗ္ဗံ ကဏ္ဏိကေ ဩစိနိတ္ဝာ ဗောဓိပူဇံ အကာသိ။ တတ္ထ စိတ္တံ ပသာဒေတ္ဝာ ဝန္ဒိတ္ဝာ ပလ္လင္ကမာဘုဇိတ္ဝာ နိသီဒိ။ တသ္မိံ ခဏေ တေ မနုသ္သာ ပဒာနုပဒိကံ အနုဗန္ဓိတ္ဝာ တတ္ထ အဂမံသု။ သော တေ ဒိသ္ဝာ ဗောဓိံ အာဝဇ္ဇေန္တောဝ ပလာယိတ္ဝာ ဘယာနကေ ဂီရိဒုဂ္ဂပပာတေ ပတိတ္ဝာ မရိ။
Parakammāyaneyuttotiādikaṃ āyasmato tambapupphiyattherassa apadānaṃ. Ayampi āyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle kenaci pure katena akusalakammena duggatakule nibbatto vuddhippatto paresaṃ kammaṃ katvā bhatiyā jīvikaṃ kappesi. So evaṃ dukkhena vasanto paresaṃ aparādhaṃ katvā maraṇabhayena palāyitvā vanaṃ pāvisi. Tattha gataṭṭhāne pāṭalibodhiṃ disvā vanditvā sammajjitvā ekasmiṃ rukkhe tambavaṇṇaṃ pupphaṃ disvā taṃ sabbaṃ kaṇṇike ocinitvā bodhipūjaṃ akāsi. Tattha cittaṃ pasādetvā vanditvā pallaṅkamābhujitvā nisīdi. Tasmiṃ khaṇe te manussā padānupadikaṃ anubandhitvā tattha agamaṃsu. So te disvā bodhiṃ āvajjentova palāyitvā bhayānake gīriduggapapāte patitvā mari.
၇. သော ဗောဓိပူဇာယ အနုသ္သရိတတ္တာ တေနေဝ ပီတိသောမနသ္သေန တာဝတိံသာဒီသု ဥပပန္နော ဆ ကာမာဝစရသမ္ပတ္တိံ အနုဘဝိတ္ဝာ မနုသ္သေသု စ စက္ကဝတ္တိအာဒိသမ္ပတ္တိံ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဝိဘဝသမ္ပန္နေ ကုလေ နိဗ္ဗတ္တော ဝုဒ္ဓိပ္ပတ္တော သတ္ထု ဓမ္မဒေသနံ သုတ္ဝာ ပသန္နမာနသော ပဗ္ဗဇိတ္ဝာ နစိရသ္သေဝ အရဟာ ဟုတ္ဝာ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ပရကမ္မာယနေ ယုတ္တောတိအာဒိမာဟ။ တတ္ထ ပရေသံ ကမ္မာနိ ပရကမ္မာနိ, ပရကမ္မာနံ အာယနေ ကရဏေ ဝာဟနေ ဓာရဏေ ယုတ္တော ယောဇိတော အဟောသိန္တိ အတ္ထော။ သေသံ ပာကဋမေဝာတိ။
7. So bodhipūjāya anussaritattā teneva pītisomanassena tāvatiṃsādīsu upapanno cha kāmāvacarasampattiṃ anubhavitvā manussesu ca cakkavattiādisampattiṃ anubhavitvā imasmiṃ buddhuppāde vibhavasampanne kule nibbatto vuddhippatto satthu dhammadesanaṃ sutvā pasannamānaso pabbajitvā nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento parakammāyane yuttotiādimāha. Tattha paresaṃ kammāni parakammāni, parakammānaṃ āyane karaṇe vāhane dhāraṇe yutto yojito ahosinti attho. Sesaṃ pākaṭamevāti.
တမ္ဗပုပ္ဖိယတ္ထေရအပဒာနဝဏ္ဏနာ သမတ္တာ။
Tambapupphiyattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၂. တမ္ဗပုပ္ဖိယတ္ထေရအပဒာနံ • 2. Tambapupphiyattheraapadānaṃ
