| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৬-৭. তণ্হক্খযসুত্তাদিৰণ্ণনা
6-7. Taṇhakkhayasuttādivaṇṇanā
২০৭-২০৮. ছট্ঠে এতদৰোচাতি ‘‘ইমিস্সং পরিসতি নিসিন্নো উদাযিত্থেরো নাম অনুসন্ধিকুসলো ভিক্খু অত্থি, সো মং পুচ্ছিস্সতীতি ভগৰতা ওসাপিতদেসনং ঞত্ৰা দেসনানুসন্ধিং ঘটেস্সামী’’তি পুচ্ছন্তো এতং অৰোচ। ৰিপুলন্তিআদি সব্বং সুভাৰিতত্তং সন্ধায ৰুত্তং। সুভাৰিতো হি সতিসম্বোজ্ঝঙ্গো ৰিপুলো চ মহগ্গতো চ অপ্পমাণো চ অব্যাপজ্জো চ নাম হোতি। সো হি পত্থটত্তা ৰিপুলো, মহন্তভাৰং গতত্তা মহগ্গতো, ৰড্ঢিপমাণত্তা অপ্পমাণো, নীৰরণানং দূরীভাৰেন ব্যাপাদরহিতত্তা অব্যাপজ্ঝো নাম হোতি। তণ্হায পহানা কম্মং পহীযতীতি যং তণ্হামূলকং কম্মং উপ্পজ্জেয্য, তং তণ্হাপহানেন পহীযতি। কম্মস্স পহানা দুক্খন্তি যম্পি কম্মমূলকং ৰট্টদুক্খং উপ্পজ্জেয্য, তং কম্মপহানেন পহীযতি। তণ্হক্খযাদযো তণ্হাদীনংযেৰ খযা, অত্থতো পনেতেহি নিব্বানং কথিতন্তি ৰেদিতব্বং। সত্তমং উত্তানমেৰ।
207-208. Chaṭṭhe etadavocāti ‘‘imissaṃ parisati nisinno udāyitthero nāma anusandhikusalo bhikkhu atthi, so maṃ pucchissatīti bhagavatā osāpitadesanaṃ ñatvā desanānusandhiṃ ghaṭessāmī’’ti pucchanto etaṃ avoca. Vipulantiādi sabbaṃ subhāvitattaṃ sandhāya vuttaṃ. Subhāvito hi satisambojjhaṅgo vipulo ca mahaggato ca appamāṇo ca abyāpajjo ca nāma hoti. So hi patthaṭattā vipulo, mahantabhāvaṃ gatattā mahaggato, vaḍḍhipamāṇattā appamāṇo, nīvaraṇānaṃ dūrībhāvena byāpādarahitattā abyāpajjho nāma hoti. Taṇhāya pahānā kammaṃ pahīyatīti yaṃ taṇhāmūlakaṃ kammaṃ uppajjeyya, taṃ taṇhāpahānena pahīyati. Kammassa pahānā dukkhanti yampi kammamūlakaṃ vaṭṭadukkhaṃ uppajjeyya, taṃ kammapahānena pahīyati. Taṇhakkhayādayo taṇhādīnaṃyeva khayā, atthato panetehi nibbānaṃ kathitanti veditabbaṃ. Sattamaṃ uttānameva.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৬. তণ্হক্খযসুত্তং • 6. Taṇhakkhayasuttaṃ
৭. তণ্হানিরোধসুত্তং • 7. Taṇhānirodhasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬-৭. তণ্হক্খযসুত্তাদিৰণ্ণনা • 6-7. Taṇhakkhayasuttādivaṇṇanā
