| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༦. ཏཎྷཀྑཡསུཏྟཾ
6. Taṇhakkhayasuttaṃ
༢༠༧. ‘‘ཡོ, བྷིཀྑཝེ, མགྒོ ཡཱ པཊིཔདཱ ཏཎྷཀྑཡཱཡ སཾཝཏྟཏི, ཏཾ མགྒཾ ཏཾ པཊིཔདཾ བྷཱཝེཐ། ཀཏམོ ཙ, བྷིཀྑཝེ, མགྒོ ཀཏམཱ ཙ པཊིཔདཱ ཏཎྷཀྑཡཱཡ སཾཝཏྟཏི? ཡདིདཾ – སཏྟ བོཛ྄ཛྷངྒཱ། ཀཏམེ སཏྟ? སཏིསམྦོཛ྄ཛྷངྒོ…པེ॰… ཨུཔེཀྑཱསམྦོཛ྄ཛྷངྒོ’’ཏི། ཨེཝཾ ཝུཏྟེ ཨཱཡསྨཱ ཨུདཱཡཱི བྷགཝནྟཾ ཨེཏདཝོཙ – ‘‘ཀཐཾ བྷཱཝིཏཱ ནུ ཁོ, བྷནྟེ, སཏྟ བོཛ྄ཛྷངྒཱ, ཀཐཾ བཧུལཱིཀཏཱ ཏཎྷཀྑཡཱཡ སཾཝཏྟནྟཱི’’ཏི?
207. ‘‘Yo, bhikkhave, maggo yā paṭipadā taṇhakkhayāya saṃvattati, taṃ maggaṃ taṃ paṭipadaṃ bhāvetha. Katamo ca, bhikkhave, maggo katamā ca paṭipadā taṇhakkhayāya saṃvattati? Yadidaṃ – satta bojjhaṅgā. Katame satta? Satisambojjhaṅgo…pe… upekkhāsambojjhaṅgo’’ti. Evaṃ vutte āyasmā udāyī bhagavantaṃ etadavoca – ‘‘kathaṃ bhāvitā nu kho, bhante, satta bojjhaṅgā, kathaṃ bahulīkatā taṇhakkhayāya saṃvattantī’’ti?
‘‘ཨིདྷ , ཨུདཱཡི, བྷིཀྑུ སཏིསམྦོཛ྄ཛྷངྒཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ ཝིཔུལཾ མཧགྒཏཾ ཨཔྤམཱཎཾ ཨབྱཱཔཛྫཾ 1། ཏསྶ སཏིསམྦོཛ྄ཛྷངྒཾ བྷཱཝཡཏོ ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ ཝིཔུལཾ མཧགྒཏཾ ཨཔྤམཱཎཾ ཨབྱཱཔཛྫཾ ཏཎྷཱ པཧཱིཡཏི། ཏཎྷཱཡ པཧཱནཱ ཀམྨཾ པཧཱིཡཏི། ཀམྨསྶ པཧཱནཱ དུཀྑཾ པཧཱིཡཏི…པེ॰… ཨུཔེཀྑཱསམྦོཛ྄ཛྷངྒཾ བྷཱཝེཏི ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ ཝིཔུལཾ མཧགྒཏཾ ཨཔྤམཱཎཾ ཨབྱཱཔཛྫཾ། ཏསྶ ཨུཔེཀྑཱསམྦོཛ྄ཛྷངྒཾ བྷཱཝཡཏོ ཝིཝེཀནིསྶིཏཾ ཝིརཱགནིསྶིཏཾ ནིརོདྷནིསྶིཏཾ ཝོསྶགྒཔརིཎཱམིཾ ཝིཔུལཾ མཧགྒཏཾ ཨཔྤམཱཎཾ ཨབྱཱཔཛྫཾ ཏཎྷཱ པཧཱིཡཏི ཏཎྷཱཡ པཧཱནཱ ཀམྨཾ པཧཱིཡཏི ། ཀམྨསྶ པཧཱནཱ དུཀྑཾ པཧཱིཡཏི། ཨིཏི ཁོ, ཨུདཱཡི, ཏཎྷཀྑཡཱ ཀམྨཀྑཡོ, ཀམྨཀྑཡཱ དུཀྑཀྑཡོ’’ཏི། ཚཊྛཾ།
‘‘Idha , udāyi, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ vipulaṃ mahaggataṃ appamāṇaṃ abyāpajjaṃ 2. Tassa satisambojjhaṅgaṃ bhāvayato vivekanissitaṃ virāganissitaṃ nirodhanissitaṃ vossaggapariṇāmiṃ vipulaṃ mahaggataṃ appamāṇaṃ abyāpajjaṃ taṇhā pahīyati. Taṇhāya pahānā kammaṃ pahīyati. Kammassa pahānā dukkhaṃ pahīyati…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ vipulaṃ mahaggataṃ appamāṇaṃ abyāpajjaṃ. Tassa upekkhāsambojjhaṅgaṃ bhāvayato vivekanissitaṃ virāganissitaṃ nirodhanissitaṃ vossaggapariṇāmiṃ vipulaṃ mahaggataṃ appamāṇaṃ abyāpajjaṃ taṇhā pahīyati taṇhāya pahānā kammaṃ pahīyati . Kammassa pahānā dukkhaṃ pahīyati. Iti kho, udāyi, taṇhakkhayā kammakkhayo, kammakkhayā dukkhakkhayo’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༦-༧. ཏཎྷཀྑཡསུཏྟཱདིཝཎྞནཱ • 6-7. Taṇhakkhayasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༦-༧. ཏཎྷཀྑཡསུཏྟཱདིཝཎྞནཱ • 6-7. Taṇhakkhayasuttādivaṇṇanā
