| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. தண்ஹாமூலகஸுத்தவண்ணனா
3. Taṇhāmūlakasuttavaṇṇanā
23. ததியே (தீ³॰ நி॰ டீ॰ 2.103) ஏஸனதண்ஹாதி போ⁴கா³னங் பரியேஸனவஸேன பவத்தா தண்ஹா. ஏஸிததண்ஹாதி பரியிட்டே²ஸு போ⁴கே³ஸு உப்பஜ்ஜமானதண்ஹா. பரிதஸ்ஸனவஸேன பரியேஸதி ஏதாயாதி பரியேஸனா, ஆஸயதோ பயோக³தோ ச பரியேஸனா ததா²பவத்தோ சித்துப்பாதோ³. தேனாஹ ‘‘தண்ஹாய ஸதி ஹோதீ’’தி. ரூபாதி³ஆரம்மணப்படிலாபோ⁴தி ஸவத்து²கானங் ரூபாதி³ஆரம்மணானங் க³வேஸனவஸேன படிலாபோ⁴. யங் பன அபரியிட்ட²ங்யேவ லப்³ப⁴தி, தம்பி அத்த²தோ பரியேஸனாய லத்³த⁴மேவ நாம ததா²ரூபஸ்ஸ கம்மஸ்ஸ புப்³பே³கதத்தா ஏவ லப்³ப⁴னதோ. தேனாஹ ‘‘ஸோ ஹி பரியேஸனாய ஸதி ஹோதீ’’தி.
23. Tatiye (dī. ni. ṭī. 2.103) esanataṇhāti bhogānaṃ pariyesanavasena pavattā taṇhā. Esitataṇhāti pariyiṭṭhesu bhogesu uppajjamānataṇhā. Paritassanavasena pariyesati etāyāti pariyesanā, āsayato payogato ca pariyesanā tathāpavatto cittuppādo. Tenāha ‘‘taṇhāya sati hotī’’ti. Rūpādiārammaṇappaṭilābhoti savatthukānaṃ rūpādiārammaṇānaṃ gavesanavasena paṭilābho. Yaṃ pana apariyiṭṭhaṃyeva labbhati, tampi atthato pariyesanāya laddhameva nāma tathārūpassa kammassa pubbekatattā eva labbhanato. Tenāha ‘‘so hi pariyesanāya sati hotī’’ti.
ஸுக²வினிச்ச²யந்தி ஸுக²ங் விஸேஸதோ நிச்சி²னோதீதி ஸுக²வினிச்ச²யோ. ஸுக²ங் ஸபா⁴வதோ ஸமுத³யதோ அத்த²ங்க³மதோ ஆதீ³னவதோ நிஸ்ஸரணதோ ச யாதா²வதோ ஜானித்வா பவத்தஞாணங்வ ஸுக²வினிச்ச²யங். ஜஞ்ஞாதி ஜானெய்ய. ‘‘ஸுப⁴ங் ஸுக²’’ந்திஆதி³கங் ஆரம்மணே அபூ⁴தாகாரங் விவித⁴ங் நின்னபா⁴வேன சினோதி ஆரோபேதீதி வினிச்ச²யோ, அஸ்ஸாதா³னுபஸ்ஸனா தண்ஹா. தி³ட்டி²யாபி ஏவமேவ வினிச்ச²யபா⁴வோ வேதி³தப்³போ³. இமஸ்மிங் பன ஸுத்தே விதக்கோயேவ ஆக³தோதி யோஜனா. இமஸ்மிங் பன ஸுத்தேதி ஸக்கபஞ்ஹஸுத்தே (தீ³॰ நி॰ 2.358). தத்த² ஹி ‘‘ச²ந்தோ³ கோ², தே³வானமிந்த³, விதக்கனிதா³னோ’’தி ஆக³தங். இதா⁴தி இமஸ்மிங் ஸுத்தே. விதக்கேனேவ வினிச்சி²னந்தீதி ஏதேன ‘‘வினிச்சி²னதி ஏதேனாதி வினிச்ச²யோ’’தி வினிச்ச²யஸத்³த³ஸ்ஸ கரணஸாத⁴னமாஹ. எத்தகந்திஆதி³ வினிச்ச²யனாகாரத³ஸ்ஸனங்.
Sukhavinicchayanti sukhaṃ visesato nicchinotīti sukhavinicchayo. Sukhaṃ sabhāvato samudayato atthaṅgamato ādīnavato nissaraṇato ca yāthāvato jānitvā pavattañāṇaṃva sukhavinicchayaṃ. Jaññāti jāneyya. ‘‘Subhaṃ sukha’’ntiādikaṃ ārammaṇe abhūtākāraṃ vividhaṃ ninnabhāvena cinoti āropetīti vinicchayo, assādānupassanā taṇhā. Diṭṭhiyāpi evameva vinicchayabhāvo veditabbo. Imasmiṃ pana sutte vitakkoyeva āgatoti yojanā. Imasmiṃ pana sutteti sakkapañhasutte (dī. ni. 2.358). Tattha hi ‘‘chando kho, devānaminda, vitakkanidāno’’ti āgataṃ. Idhāti imasmiṃ sutte. Vitakkeneva vinicchinantīti etena ‘‘vinicchinati etenāti vinicchayo’’ti vinicchayasaddassa karaṇasādhanamāha. Ettakantiādi vinicchayanākāradassanaṃ.
ச²ந்த³னட்டே²ன ச²ந்தோ³, ஏவங் ரஞ்ஜனட்டே²ன ராகோ³தி ச²ந்த³ராகோ³. ஸ்வாயங் அனாஸேவனதாய மந்தோ³ ஹுத்வா பவத்தோ இதா⁴தி⁴ப்பேதோதி ஆஹ ‘‘து³ப்³ப³லராக³ஸ்ஸாதி⁴வசன’’ந்தி. அஜ்ஜோ²ஸானந்தி தண்ஹாதி³ட்டி²வஸேன அபி⁴னிவேஸனங். ‘‘மய்ஹங் இத³’’ந்தி ஹி தண்ஹாகா³ஹோ யேபு⁴ய்யேன அத்தக்³கா³ஹஸன்னிஸ்ஸயோவ ஹோதி. தேனாஹ ‘‘அஹங் மமந்தீ’’தி. ப³லவஸன்னிட்டா²னந்தி ச தேஸங் கா³ஹானங் தி²ரபா⁴வப்பத்திமாஹ. தண்ஹாதி³ட்டி²வஸேன பரிக்³க³ஹகரணந்தி அஹங் மமந்தி ப³லவஸன்னிட்டா²னவஸேன அபி⁴னிவிட்ட²ஸ்ஸ அத்தத்தனியக்³கா³ஹவத்து²னோ அஞ்ஞாஸாதா⁴ரணங் விய கத்வா பரிக்³க³ஹெத்வா டா²னங், ததா²பவத்தோ லோப⁴ஸஹக³தசித்துப்பாதோ³. அத்தனா பரிக்³க³ஹிதஸ்ஸ வத்து²னோ யஸ்ஸ வஸேன பரேஹி ஸாதா⁴ரணபா⁴வஸ்ஸ அஸஹமானோ ஹோதி புக்³க³லோ, ஸோ த⁴ம்மோ அஸஹனதா. ஏவங் வசனத்த²ங் வத³ந்தி நிருத்தினயேன. ஸத்³த³லக்க²ணேன பன யஸ்ஸ த⁴ம்மஸ்ஸ வஸேன மச்ச²ரியயோக³தோ புக்³க³லோ மச்ச²ரோ , தஸ்ஸ பா⁴வோ, கம்மங் வா மச்ச²ரியங், மச்ச²ரோ த⁴ம்மோ. மச்ச²ரியஸ்ஸ ப³லவபா⁴வதோ ஆத³ரேன ரக்க²ணங் ஆரக்கோ²தி ஆஹ ‘‘த்³வார…பே॰… ஸுட்டு² ரக்க²ண’’ந்தி.
Chandanaṭṭhena chando, evaṃ rañjanaṭṭhena rāgoti chandarāgo. Svāyaṃ anāsevanatāya mando hutvā pavatto idhādhippetoti āha ‘‘dubbalarāgassādhivacana’’nti. Ajjhosānanti taṇhādiṭṭhivasena abhinivesanaṃ. ‘‘Mayhaṃ ida’’nti hi taṇhāgāho yebhuyyena attaggāhasannissayova hoti. Tenāha ‘‘ahaṃ mamantī’’ti. Balavasanniṭṭhānanti ca tesaṃ gāhānaṃ thirabhāvappattimāha. Taṇhādiṭṭhivasena pariggahakaraṇanti ahaṃ mamanti balavasanniṭṭhānavasena abhiniviṭṭhassa attattaniyaggāhavatthuno aññāsādhāraṇaṃ viya katvā pariggahetvā ṭhānaṃ, tathāpavatto lobhasahagatacittuppādo. Attanā pariggahitassa vatthuno yassa vasena parehi sādhāraṇabhāvassa asahamāno hoti puggalo, so dhammo asahanatā. Evaṃ vacanatthaṃ vadanti niruttinayena. Saddalakkhaṇena pana yassa dhammassa vasena macchariyayogato puggalo maccharo , tassa bhāvo, kammaṃ vā macchariyaṃ, maccharo dhammo. Macchariyassa balavabhāvato ādarena rakkhaṇaṃ ārakkhoti āha ‘‘dvāra…pe… suṭṭhu rakkhaṇa’’nti.
அத்தனோ ப²லங் கரோதீதி கரணங், யங் கிஞ்சி காரணங். அதி⁴கங் கரணந்தி அதி⁴கரணங், விஸேஸகாரணங். விஸேஸகாரணஞ்ச போ⁴கா³னங் ஆரக்க²த³ண்டா³தா³னாதி³அனத்த²ஸம்ப⁴வஸ்ஸாதி வுத்தங் ‘‘ஆரக்கா²தி⁴கரண’’ந்திஆதி³. பரனிஸேத⁴னத்த²ந்தி மாரணாதி³னா பரேஸங் விபா³த⁴னத்த²ங். ஆதி³யந்தி ஏதேனாதி ஆதா³னங், த³ண்ட³ஸ்ஸ ஆதா³னங் த³ண்டா³தா³னங், த³ண்ட³ங் ஆஹரித்வா பரவிஹேட²னசித்துப்பாதோ³. ஸத்தா²தா³னேபி ஏஸேவ நயோ. ஹத்த²பராமாஸாதி³வஸேன காயேன காதப்³போ³ கலஹோ காயகலஹோ. மம்மக⁴ட்டனாதி³வஸேன வாசாய காதப்³போ³ கலஹோ வாசாகலஹோ. விருஜ்ஜ²னவஸேன விரூபங் க³ண்ஹாதி ஏதேனாதி விக்³க³ஹோ. விருத்³த⁴ங் வத³தி ஏதேனாதி விவாதோ³. ‘‘துவங் துவ’’ந்தி அகா³ரவவசனஸஹசரணதோ துவங்துவங். ஸப்³பே³பி தே ததா²பவத்ததோ³ஸஸஹக³தா சித்துப்பாதா³ வேதி³தப்³பா³. தேனாஹ ப⁴க³வா ‘‘அனேகே பாபகா அகுஸலா த⁴ம்மா ஸம்ப⁴வந்தீ’’தி.
Attano phalaṃ karotīti karaṇaṃ, yaṃ kiñci kāraṇaṃ. Adhikaṃ karaṇanti adhikaraṇaṃ, visesakāraṇaṃ. Visesakāraṇañca bhogānaṃ ārakkhadaṇḍādānādianatthasambhavassāti vuttaṃ ‘‘ārakkhādhikaraṇa’’ntiādi. Paranisedhanatthanti māraṇādinā paresaṃ vibādhanatthaṃ. Ādiyanti etenāti ādānaṃ, daṇḍassa ādānaṃ daṇḍādānaṃ, daṇḍaṃ āharitvā paraviheṭhanacittuppādo. Satthādānepi eseva nayo. Hatthaparāmāsādivasena kāyena kātabbo kalaho kāyakalaho. Mammaghaṭṭanādivasena vācāya kātabbo kalaho vācākalaho. Virujjhanavasena virūpaṃ gaṇhāti etenāti viggaho. Viruddhaṃ vadati etenāti vivādo. ‘‘Tuvaṃ tuva’’nti agāravavacanasahacaraṇato tuvaṃtuvaṃ. Sabbepi te tathāpavattadosasahagatā cittuppādā veditabbā. Tenāha bhagavā ‘‘aneke pāpakā akusalā dhammā sambhavantī’’ti.
தண்ஹாமூலகஸுத்தவண்ணனா நிட்டி²தா.
Taṇhāmūlakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. தண்ஹாமூலகஸுத்தங் • 3. Taṇhāmūlakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. தண்ஹாமூலகஸுத்தவண்ணனா • 3. Taṇhāmūlakasuttavaṇṇanā
