| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
3. д̇ан̣хаамуулагасуд̇д̇аван̣н̣анаа
3. Taṇhāmūlakasuttavaṇṇanā
23. д̇ад̇ияз (д̣̇ий. ни. дий. 2.103) зсанад̇ан̣хаад̇и бхог̇аанам̣ бариязсанавасзна бавад̇д̇аа д̇ан̣хаа. зсид̇ад̇ан̣хаад̇и барияидтзсу бхог̇зсу уббаж̇ж̇амаанад̇ан̣хаа. барид̇ассанавасзна бариязсад̇и зд̇ааяаад̇и бариязсанаа, аасаяад̇о баяог̇ад̇о жа бариязсанаа д̇ат̇аабавад̇д̇о жид̇д̇уббаад̣̇о. д̇знааха ‘‘д̇ан̣хааяа сад̇и ход̇ий’’д̇и. руубаад̣̇иаарамман̣аббадилаабход̇и савад̇т̇угаанам̣ руубаад̣̇иаарамман̣аанам̣ г̇авзсанавасзна бадилаабхо. яам̣ бана абарияидтам̣язва лаб̣бхад̇и, д̇амби ад̇т̇ад̇о бариязсанааяа лад̣̇д̇хамзва наама д̇ат̇ааруубасса гаммасса буб̣б̣згад̇ад̇д̇аа зва лаб̣бханад̇о. д̇знааха ‘‘со хи бариязсанааяа сад̇и ход̇ий’’д̇и.
23. Tatiye (dī. ni. ṭī. 2.103) esanataṇhāti bhogānaṃ pariyesanavasena pavattā taṇhā. Esitataṇhāti pariyiṭṭhesu bhogesu uppajjamānataṇhā. Paritassanavasena pariyesati etāyāti pariyesanā, āsayato payogato ca pariyesanā tathāpavatto cittuppādo. Tenāha ‘‘taṇhāya sati hotī’’ti. Rūpādiārammaṇappaṭilābhoti savatthukānaṃ rūpādiārammaṇānaṃ gavesanavasena paṭilābho. Yaṃ pana apariyiṭṭhaṃyeva labbhati, tampi atthato pariyesanāya laddhameva nāma tathārūpassa kammassa pubbekatattā eva labbhanato. Tenāha ‘‘so hi pariyesanāya sati hotī’’ti.
сукавинижчаяанд̇и сукам̣ висзсад̇о нижчинод̇ийд̇и сукавинижчаяо. сукам̣ сабхаавад̇о самуд̣̇аяад̇о ад̇т̇ан̇г̇амад̇о аад̣̇ийнавад̇о ниссаран̣ад̇о жа яаат̇аавад̇о ж̇аанид̇ваа бавад̇д̇ан̃аан̣ам̣ва сукавинижчаяам̣. ж̇ан̃н̃аад̇и ж̇аанзяяа. ‘‘субхам̣ сука’’нд̇иаад̣̇игам̣ аарамман̣з абхууд̇аагаарам̣ вивид̇хам̣ ниннабхаавзна жинод̇и ааробзд̇ийд̇и винижчаяо, ассаад̣̇аанубассанаа д̇ан̣хаа. д̣̇идтияааби звамзва винижчаяабхааво взд̣̇ид̇аб̣б̣о. имасмим̣ бана суд̇д̇з вид̇аггоязва ааг̇ад̇од̇и яож̇анаа. имасмим̣ бана суд̇д̇зд̇и саггабан̃хасуд̇д̇з (д̣̇ий. ни. 2.358). д̇ад̇т̇а хи ‘‘чанд̣̇о ко, д̣̇зваанаминд̣̇а, вид̇агганид̣̇аано’’д̇и ааг̇ад̇ам̣. ид̇хаад̇и имасмим̣ суд̇д̇з. вид̇аггзнзва винижчинанд̇ийд̇и зд̇зна ‘‘винижчинад̇и зд̇знаад̇и винижчаяо’’д̇и винижчаяасад̣̇д̣̇асса гаран̣асаад̇ханамааха. зд̇д̇аганд̇иаад̣̇и винижчаяанаагаарад̣̇ассанам̣.
Sukhavinicchayanti sukhaṃ visesato nicchinotīti sukhavinicchayo. Sukhaṃ sabhāvato samudayato atthaṅgamato ādīnavato nissaraṇato ca yāthāvato jānitvā pavattañāṇaṃva sukhavinicchayaṃ. Jaññāti jāneyya. ‘‘Subhaṃ sukha’’ntiādikaṃ ārammaṇe abhūtākāraṃ vividhaṃ ninnabhāvena cinoti āropetīti vinicchayo, assādānupassanā taṇhā. Diṭṭhiyāpi evameva vinicchayabhāvo veditabbo. Imasmiṃ pana sutte vitakkoyeva āgatoti yojanā. Imasmiṃ pana sutteti sakkapañhasutte (dī. ni. 2.358). Tattha hi ‘‘chando kho, devānaminda, vitakkanidāno’’ti āgataṃ. Idhāti imasmiṃ sutte. Vitakkeneva vinicchinantīti etena ‘‘vinicchinati etenāti vinicchayo’’ti vinicchayasaddassa karaṇasādhanamāha. Ettakantiādi vinicchayanākāradassanaṃ.
чанд̣̇анадтзна чанд̣̇о, звам̣ ран̃ж̇анадтзна рааг̇од̇и чанд̣̇арааг̇о. свааяам̣ анаасзванад̇ааяа манд̣̇о худ̇ваа бавад̇д̇о ид̇хаад̇хиббзд̇од̇и ааха ‘‘д̣̇уб̣б̣аларааг̇ассаад̇хиважана’’нд̇и. аж̇жхосаананд̇и д̇ан̣хаад̣̇идтивасзна абхинивзсанам̣. ‘‘маяхам̣ ид̣̇а’’нд̇и хи д̇ан̣хааг̇аахо язбхуяязна ад̇д̇аг̇г̇аахасанниссаяова ход̇и. д̇знааха ‘‘ахам̣ маманд̇ий’’д̇и. б̣алавасаннидтаананд̇и жа д̇зсам̣ г̇аахаанам̣ т̇ирабхааваббад̇д̇имааха. д̇ан̣хаад̣̇идтивасзна бариг̇г̇ахагаран̣анд̇и ахам̣ маманд̇и б̣алавасаннидтаанавасзна абхинивидтасса ад̇д̇ад̇д̇анияаг̇г̇аахавад̇т̇уно ан̃н̃аасаад̇хааран̣ам̣ вияа гад̇ваа бариг̇г̇ахзд̇ваа таанам̣, д̇ат̇аабавад̇д̇о лобхасахаг̇ад̇ажид̇д̇уббаад̣̇о. ад̇д̇анаа бариг̇г̇ахид̇асса вад̇т̇уно яасса васзна барзхи саад̇хааран̣абхаавасса асахамаано ход̇и буг̇г̇ало, со д̇хаммо асаханад̇аа. звам̣ важанад̇т̇ам̣ вад̣̇анд̇и нируд̇д̇инаязна. сад̣̇д̣̇алагкан̣зна бана яасса д̇хаммасса васзна мажчарияаяог̇ад̇о буг̇г̇ало мажчаро , д̇асса бхааво, гаммам̣ ваа мажчарияам̣, мажчаро д̇хаммо. мажчарияасса б̣алавабхаавад̇о аад̣̇арзна рагкан̣ам̣ аарагкод̇и ааха ‘‘д̣̇ваара…бз… судту рагкан̣а’’нд̇и.
Chandanaṭṭhena chando, evaṃ rañjanaṭṭhena rāgoti chandarāgo. Svāyaṃ anāsevanatāya mando hutvā pavatto idhādhippetoti āha ‘‘dubbalarāgassādhivacana’’nti. Ajjhosānanti taṇhādiṭṭhivasena abhinivesanaṃ. ‘‘Mayhaṃ ida’’nti hi taṇhāgāho yebhuyyena attaggāhasannissayova hoti. Tenāha ‘‘ahaṃ mamantī’’ti. Balavasanniṭṭhānanti ca tesaṃ gāhānaṃ thirabhāvappattimāha. Taṇhādiṭṭhivasena pariggahakaraṇanti ahaṃ mamanti balavasanniṭṭhānavasena abhiniviṭṭhassa attattaniyaggāhavatthuno aññāsādhāraṇaṃ viya katvā pariggahetvā ṭhānaṃ, tathāpavatto lobhasahagatacittuppādo. Attanā pariggahitassa vatthuno yassa vasena parehi sādhāraṇabhāvassa asahamāno hoti puggalo, so dhammo asahanatā. Evaṃ vacanatthaṃ vadanti niruttinayena. Saddalakkhaṇena pana yassa dhammassa vasena macchariyayogato puggalo maccharo , tassa bhāvo, kammaṃ vā macchariyaṃ, maccharo dhammo. Macchariyassa balavabhāvato ādarena rakkhaṇaṃ ārakkhoti āha ‘‘dvāra…pe… suṭṭhu rakkhaṇa’’nti.
ад̇д̇ано палам̣ гарод̇ийд̇и гаран̣ам̣, яам̣ гин̃жи гааран̣ам̣. ад̇хигам̣ гаран̣анд̇и ад̇хигаран̣ам̣, висзсагааран̣ам̣. висзсагааран̣ан̃жа бхог̇аанам̣ аарагкад̣̇ан̣д̣аад̣̇аанаад̣̇ианад̇т̇асамбхавассаад̇и вуд̇д̇ам̣ ‘‘аарагкаад̇хигаран̣а’’нд̇иаад̣̇и. баранисзд̇ханад̇т̇анд̇и мааран̣аад̣̇инаа барзсам̣ виб̣аад̇ханад̇т̇ам̣. аад̣̇ияанд̇и зд̇знаад̇и аад̣̇аанам̣, д̣̇ан̣д̣асса аад̣̇аанам̣ д̣̇ан̣д̣аад̣̇аанам̣, д̣̇ан̣д̣ам̣ аахарид̇ваа баравихзтанажид̇д̇уббаад̣̇о. сад̇т̇аад̣̇аанзби зсзва наяо. хад̇т̇абараамаасаад̣̇ивасзна гааязна гаад̇аб̣б̣о галахо гааяагалахо. маммагхадданаад̣̇ивасзна ваажааяа гаад̇аб̣б̣о галахо ваажаагалахо. вируж̇жханавасзна вируубам̣ г̇ан̣хаад̇и зд̇знаад̇и виг̇г̇ахо. вируд̣̇д̇хам̣ вад̣̇ад̇и зд̇знаад̇и виваад̣̇о. ‘‘д̇увам̣ д̇ува’’нд̇и аг̇аарававажанасахажаран̣ад̇о д̇увам̣д̇увам̣. саб̣б̣зби д̇з д̇ат̇аабавад̇д̇ад̣̇осасахаг̇ад̇аа жид̇д̇уббаад̣̇аа взд̣̇ид̇аб̣б̣аа. д̇знааха бхаг̇аваа ‘‘анзгз баабагаа агусалаа д̇хаммаа самбхаванд̇ий’’д̇и.
Attano phalaṃ karotīti karaṇaṃ, yaṃ kiñci kāraṇaṃ. Adhikaṃ karaṇanti adhikaraṇaṃ, visesakāraṇaṃ. Visesakāraṇañca bhogānaṃ ārakkhadaṇḍādānādianatthasambhavassāti vuttaṃ ‘‘ārakkhādhikaraṇa’’ntiādi. Paranisedhanatthanti māraṇādinā paresaṃ vibādhanatthaṃ. Ādiyanti etenāti ādānaṃ, daṇḍassa ādānaṃ daṇḍādānaṃ, daṇḍaṃ āharitvā paraviheṭhanacittuppādo. Satthādānepi eseva nayo. Hatthaparāmāsādivasena kāyena kātabbo kalaho kāyakalaho. Mammaghaṭṭanādivasena vācāya kātabbo kalaho vācākalaho. Virujjhanavasena virūpaṃ gaṇhāti etenāti viggaho. Viruddhaṃ vadati etenāti vivādo. ‘‘Tuvaṃ tuva’’nti agāravavacanasahacaraṇato tuvaṃtuvaṃ. Sabbepi te tathāpavattadosasahagatā cittuppādā veditabbā. Tenāha bhagavā ‘‘aneke pāpakā akusalā dhammā sambhavantī’’ti.
д̇ан̣хаамуулагасуд̇д̇аван̣н̣анаа нидтид̇аа.
Taṇhāmūlakasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 3. д̇ан̣хаамуулагасуд̇д̇ам̣ • 3. Taṇhāmūlakasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 3. д̇ан̣хаамуулагасуд̇д̇аван̣н̣анаа • 3. Taṇhāmūlakasuttavaṇṇanā
