Library / Tipiṭaka / ཏིཔིཊཀ • Tipiṭaka / དྷམྨཔད-ཨཊྛཀཐཱ • Dhammapada-aṭṭhakathā

    ༢༤. ཏཎྷཱཝགྒོ

    24. Taṇhāvaggo

    ༡. ཀཔིལམཙྪཝཏྠུ

    1. Kapilamacchavatthu

    མནུཛསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཀཔིལམཙྪཾ ཨཱརབྦྷ ཀཐེསི།

    Manujassāti imaṃ dhammadesanaṃ satthā jetavane viharanto kapilamacchaṃ ārabbha kathesi.

    ཨཏཱིཏེ ཀིར ཀསྶཔབྷགཝཏོ པརིནིབྦུཏཀཱལེ དྭེ ཀུལབྷཱཏརོ ནིཀྑམིཏྭཱ སཱཝཀཱནཾ སནྟིཀེ པབྦཛིཾསུ། ཏེསུ ཛེཊྛོ སཱགཏོ ནཱམ ཨཧོསི, ཀནིཊྛོ ཀཔིལོ ནཱམ། མཱཏཱ པན ནེསཾ སཱདྷིནཱི ནཱམ, ཀནིཊྛབྷགིནཱི ཏཱཔནཱ ནཱམ། ཏཱཔི བྷིཀྑུནཱིསུ པབྦཛིཾསུ། ཨེཝཾ ཏེསུ པབྦཛིཏེསུ ཨུབྷོ བྷཱཏརོ ཨཱཙརིཡུཔཛ྄ཛྷཱཡཱནཾ ཝཏྟཔཊིཝཏྟཾ ཀཏྭཱ ཝིཧརནྟཱ ཨེཀདིཝསཾ, ‘‘བྷནྟེ, ཨིམསྨིཾ སཱསནེ ཀཏི དྷུརཱནཱི’’ཏི པུཙྪིཏྭཱ ‘‘གནྠདྷུརཾ ཝིཔསྶནཱདྷུརཉྩཱཏི དྭེ དྷུརཱནཱི’’ཏི སུཏྭཱ ཛེཊྛོ ‘‘ཝིཔསྶནཱདྷུརཾ པཱུརེསྶཱམཱི’’ཏི པཉྩ ཝསྶཱནི ཨཱཙརིཡུཔཛ྄ཛྷཱཡཱནཾ སནྟིཀེ ཝསིཏྭཱ ཡཱཝ ཨརཧཏྟཱ ཀམྨཊྛཱནཾ གཧེཏྭཱ ཨརཉྙཾ པཝིསིཏྭཱ ཝཱཡམནྟོ ཨརཧཏྟཾ པཱཔུཎི། ཀནིཊྛོ ‘‘ཨཧཾ ཏཱཝ ཏརུཎོ, ཝུཌྜྷཀཱལེ ཝིཔསྶནཱདྷུརཾ པཱུརེསྶཱམཱི’’ཏི གནྠདྷུརཾ པཊྛཔེཏྭཱ ཏཱིཎི པིཊཀཱནི ཨུགྒཎྷི། ཏསྶ པརིཡཏྟིཾ ནིསྶཱཡ མཧཱཔརིཝཱརོ, པརིཝཱརཾ ནིསྶཱཡ ལཱབྷོ ཨུདཔཱདི། སོ བཱཧུསཙྩམདེན མཏྟོ ལཱབྷཏཎྷཱཡ ཨབྷིབྷཱུཏོ ཨཏིཔཎྜིཏམཱནིཏཱཡ པརེཧི ཝུཏྟཾ ཀཔྤིཡམྤི ‘‘ཨཀཔྤིཡ’’ནྟི ཝདེཏི, ཨཀཔྤིཡམྤི ‘‘ཀཔྤིཡ’’ནྟི ཝདེཏི, སཱཝཛྫམྤི ‘‘ཨནཝཛྫ’’ནྟི, ཨནཝཛྫམྤི ‘‘སཱཝཛྫ’’ནྟི། སོ པེསལེཧི བྷིཀྑཱུཧི ‘‘མཱ, ཨཱཝུསོ ཀཔིལ, ཨེཝཾ ཨཝཙཱ’’ཏི ཝཏྭཱ དྷམྨཉྩ ཝིནཡཉྩ དསྶེཏྭཱ ཨོཝདིཡམཱནོཔི ‘‘ཏུམྷེ ཀིཾ ཛཱནཱཐ, རིཏྟམུཊྛིསདིསཱ’’ཏིཨཱདཱིནི ཝཏྭཱ ཁུཾསེནྟོ ཝམྦྷེནྟོ ཙརཏི། ཨཐསྶ བྷཱཏུ སཱགཏཏྠེརསྶཱཔི བྷིཀྑཱུ ཏམཏྠཾ ཨཱརོཙེསུཾ། སོཔི ནཾ ཨུཔསངྐམིཏྭཱ, ‘‘ཨཱཝུསོ ཀཔིལ, ཏུམྷཱདིསཱནཉྷི སམྨཱཔཊིཔཏྟི སཱསནསྶ ཨཱཡུ ནཱམ, ཏསྨཱ པཊིཔཏྟིཾ པཧཱཡ ཀཔྤིཡཱདཱིནི པཊིབཱཧནྟོ མཱ ཨེཝཾ ཨཝཙཱ’’ཏི ཨོཝདི། སོ ཏསྶཔི ཝཙནཾ ནཱདིཡི། ཨེཝཾ སནྟེཔི ཐེརོ དྭཏྟིཀྑཏྟུཾ ཨོཝདིཏྭཱ ཨོཝཱདཾ ཨགཎྷནྟཾ ‘‘ནཱཡཾ མམ ཝཙནཾ ཀརོཏཱི’’ཏི ཉཏྭཱ ‘‘ཏེན, ཨཱཝུསོ, པཉྙཱཡིསྶསི སཀེན ཀམྨེནཱ’’ཏི ཝཏྭཱ པཀྐཱམི ། ཏཏོ པཊྛཱཡ ནཾ ཨཉྙེ པེསལཱ བྷིཀྑཱུ ཚཌྜཡིཾསུ།

    Atīte kira kassapabhagavato parinibbutakāle dve kulabhātaro nikkhamitvā sāvakānaṃ santike pabbajiṃsu. Tesu jeṭṭho sāgato nāma ahosi, kaniṭṭho kapilo nāma. Mātā pana nesaṃ sādhinī nāma, kaniṭṭhabhaginī tāpanā nāma. Tāpi bhikkhunīsu pabbajiṃsu. Evaṃ tesu pabbajitesu ubho bhātaro ācariyupajjhāyānaṃ vattapaṭivattaṃ katvā viharantā ekadivasaṃ, ‘‘bhante, imasmiṃ sāsane kati dhurānī’’ti pucchitvā ‘‘ganthadhuraṃ vipassanādhurañcāti dve dhurānī’’ti sutvā jeṭṭho ‘‘vipassanādhuraṃ pūressāmī’’ti pañca vassāni ācariyupajjhāyānaṃ santike vasitvā yāva arahattā kammaṭṭhānaṃ gahetvā araññaṃ pavisitvā vāyamanto arahattaṃ pāpuṇi. Kaniṭṭho ‘‘ahaṃ tāva taruṇo, vuḍḍhakāle vipassanādhuraṃ pūressāmī’’ti ganthadhuraṃ paṭṭhapetvā tīṇi piṭakāni uggaṇhi. Tassa pariyattiṃ nissāya mahāparivāro, parivāraṃ nissāya lābho udapādi. So bāhusaccamadena matto lābhataṇhāya abhibhūto atipaṇḍitamānitāya parehi vuttaṃ kappiyampi ‘‘akappiya’’nti vadeti, akappiyampi ‘‘kappiya’’nti vadeti, sāvajjampi ‘‘anavajja’’nti, anavajjampi ‘‘sāvajja’’nti. So pesalehi bhikkhūhi ‘‘mā, āvuso kapila, evaṃ avacā’’ti vatvā dhammañca vinayañca dassetvā ovadiyamānopi ‘‘tumhe kiṃ jānātha, rittamuṭṭhisadisā’’tiādīni vatvā khuṃsento vambhento carati. Athassa bhātu sāgatattherassāpi bhikkhū tamatthaṃ ārocesuṃ. Sopi naṃ upasaṅkamitvā, ‘‘āvuso kapila, tumhādisānañhi sammāpaṭipatti sāsanassa āyu nāma, tasmā paṭipattiṃ pahāya kappiyādīni paṭibāhanto mā evaṃ avacā’’ti ovadi. So tassapi vacanaṃ nādiyi. Evaṃ santepi thero dvattikkhattuṃ ovaditvā ovādaṃ agaṇhantaṃ ‘‘nāyaṃ mama vacanaṃ karotī’’ti ñatvā ‘‘tena, āvuso, paññāyissasi sakena kammenā’’ti vatvā pakkāmi . Tato paṭṭhāya naṃ aññe pesalā bhikkhū chaḍḍayiṃsu.

    སོ དུརཱཙཱརོ ཧུཏྭཱ དུརཱཙཱརཔརིཝུཏོ ཝིཧརནྟོ ཨེཀདིཝསཾ ཨུཔོསཐགྒེ ‘‘པཱཏིམོཀྑཾ ཨུདྡིསིསྶཱམཱི’’ཏི བཱིཛནིཾ ཨཱདཱཡ དྷམྨཱསནེ ནིསཱིདིཏྭཱ ‘‘ཝཏྟཏི, ཨཱཝུསོ, ཨེཏྠ སནྣིཔཏིཏཱནཾ བྷིཀྑཱུནཾ པཱཏིམོཀྑ’’ནྟི པུཙྪིཏྭཱ ‘‘ཀོ ཨཏྠོ ཨིམསྶ པཊིཝཙནེན དིནྣེནཱ’’ཏི ཏུཎྷཱིབྷཱུཏེ བྷིཀྑཱུ དིསྭཱ, ‘‘ཨཱཝུསོ, དྷམྨོ ཝཱ ཝིནཡོ ཝཱ ནཏྠི, པཱཏིམོཀྑེན སུཏེན ཝཱ ཨསུཏེན ཝཱ ཀོ ཨཏྠོ’’ཏི ཝཏྭཱ ཨཱསནཱ ཝུཊྛཧི། ཨེཝཾ སོ ཀསྶཔསྶ བྷགཝཏོ པརིཡཏྟིསཱསནཾ ཨོསཀྐཱཔེསི། སཱགཏཏྠེརོཔི ཏདཧེཝ པརིནིབྦཱཡི། ཀཔིལོ ཨཱཡུཔརིཡོསཱནེ ཨཝཱིཙིམྷི མཧཱནིརཡེ ནིབྦཏྟི། སཱཔིསྶ མཱཏཱ ཙ བྷགིནཱི ཙ ཏསྶེཝ དིཊྛཱནུགཏིཾ ཨཱཔཛྫིཏྭཱ པེསལེ བྷིཀྑཱུ ཨཀྐོསིཏྭཱ པརིབྷཱསིཏྭཱ ཏཏྠེཝ ནིབྦཏྟིཾསུ།

    So durācāro hutvā durācāraparivuto viharanto ekadivasaṃ uposathagge ‘‘pātimokkhaṃ uddisissāmī’’ti bījaniṃ ādāya dhammāsane nisīditvā ‘‘vattati, āvuso, ettha sannipatitānaṃ bhikkhūnaṃ pātimokkha’’nti pucchitvā ‘‘ko attho imassa paṭivacanena dinnenā’’ti tuṇhībhūte bhikkhū disvā, ‘‘āvuso, dhammo vā vinayo vā natthi, pātimokkhena sutena vā asutena vā ko attho’’ti vatvā āsanā vuṭṭhahi. Evaṃ so kassapassa bhagavato pariyattisāsanaṃ osakkāpesi. Sāgatattheropi tadaheva parinibbāyi. Kapilo āyupariyosāne avīcimhi mahāniraye nibbatti. Sāpissa mātā ca bhaginī ca tasseva diṭṭhānugatiṃ āpajjitvā pesale bhikkhū akkositvā paribhāsitvā tattheva nibbattiṃsu.

    ཏསྨིཾ པན ཀཱལེ པཉྩསཏཱ པུརིསཱ གཱམགྷཱཏཀཱདཱིནི ཀཏྭཱ ཙོརིཀཱཡ ཛཱིཝནྟཱ ཛནཔདམནུསྶེཧི ཨནུབདྡྷཱ པལཱཡམཱནཱ ཨརཉྙཾ པཝིསིཏྭཱ ཏཏྠ ཀིཉྩི པཊིསརཎཾ ཨཔསྶནྟཱ ཨཉྙཏརཾ ཨཱརཉྙིཀཾ བྷིཀྑུཾ དིསྭཱ ཝནྡིཏྭཱ ‘‘པཊིསརཎཾ ནོ, བྷནྟེ, ཧོཐཱ’’ཏི ཝདིཾསུ། ཐེརོ ‘‘ཏུམྷཱཀཾ སཱིལསདིསཾ པཊིསརཎཾ ནཱམ ནཏྠི, སབྦེཔི པཉྩསཱིལཱནི སམཱདིཡཐཱ’’ཏི ཨཱཧ། ཏེ ‘‘སཱདྷཱུ’’ཏི སམྤཊིཙྪིཏྭཱ སཱིལཱནི སམཱདིཡིཾསུ། ཨཐ ནེ ཐེརོ ཨོཝདི – ‘‘ཨིདཱནི ཏུམྷེ སཱིལཝནྟཱ, ཛཱིཝིཏཧེཏུཔི ཝོ ནེཝ སཱིལཾ ཨཏིཀྐམིཏབྦཾ, ན མནོཔདོསོ ཀཱཏབྦོ’’ཏི། ཏེ ‘‘སཱདྷཱུ’’ཏི སམྤཊིཙྪིཾསུ། ཨཐ ནེ ཛནཔདམནུསྶཱ ཏཾ ཋཱནཾ པཏྭཱ ཨིཏོ ཙིཏོ ཙ པརིཡེསམཱནཱ ཏེ ཙོརེ དིསྭཱ སབྦེ ཏེ ཛཱིཝིཏཱ ཝོརོཔེསུཾ། ཏེ ཀཱལཾ ཀཏྭཱ དེཝལོཀེ ནིབྦཏྟིཾསུ, ཙོརཛེཊྛཀོ ཛེཊྛཀདེཝཔུཏྟོ ཨཧོསི།

    Tasmiṃ pana kāle pañcasatā purisā gāmaghātakādīni katvā corikāya jīvantā janapadamanussehi anubaddhā palāyamānā araññaṃ pavisitvā tattha kiñci paṭisaraṇaṃ apassantā aññataraṃ āraññikaṃ bhikkhuṃ disvā vanditvā ‘‘paṭisaraṇaṃ no, bhante, hothā’’ti vadiṃsu. Thero ‘‘tumhākaṃ sīlasadisaṃ paṭisaraṇaṃ nāma natthi, sabbepi pañcasīlāni samādiyathā’’ti āha. Te ‘‘sādhū’’ti sampaṭicchitvā sīlāni samādiyiṃsu. Atha ne thero ovadi – ‘‘idāni tumhe sīlavantā, jīvitahetupi vo neva sīlaṃ atikkamitabbaṃ, na manopadoso kātabbo’’ti. Te ‘‘sādhū’’ti sampaṭicchiṃsu. Atha ne janapadamanussā taṃ ṭhānaṃ patvā ito cito ca pariyesamānā te core disvā sabbe te jīvitā voropesuṃ. Te kālaṃ katvā devaloke nibbattiṃsu, corajeṭṭhako jeṭṭhakadevaputto ahosi.

    ཏེ ཨནུལོམཔཊིལོམཝསེན ཨེཀཾ བུདྡྷནྟརཾ དེཝལོཀེ སཾསརིཏྭཱ ཨིམསྨིཾ བུདྡྷུཔྤཱདེ སཱཝཏྠིནགརདྭཱརེ པཉྩསཏཀུལིཀེ ཀེཝཊྚགཱམེ ནིབྦཏྟིཾསུ། ཛེཊྛཀདེཝཔུཏྟོ ཀེཝཊྚཛེཊྛཀསྶ གེཧེ པཊིསནྡྷིཾ གཎྷི, ཨིཏརེ ཨིཏརེསུ། ཨེཝཾ ཏེསཾ ཨེཀདིཝསེཡེཝ པཊིསནྡྷིགཧཎཉྩ མཱཏུཀུཙྪིཏོ ནིཀྑམནཉྩ ཨཧོསི། ཀེཝཊྚཛེཊྛཀོ ‘‘ཨཏྠི ནུ ཁོ ཨིམསྨིཾ གཱམེ ཨཉྙེཔི དཱརཀཱ ཨཛྫ ཛཱཏཱ’’ཏི པརིཡེསཱཔེཏྭཱ ཏེསཾ ཛཱཏབྷཱཝཾ ཉཏྭཱ ‘‘ཨེཏེ མམ པུཏྟསྶ སཧཱཡཀཱ བྷཝིསྶནྟཱི’’ཏི སབྦེསཾ པོསཱཝནིཀཾ དཱཔེསི། ཏེ སབྦེཔི སཧཔཾསུཀཱིལ༹ཀཱ སཧཱཡཀཱ ཧུཏྭཱ ཨནུཔུབྦེན ཝཡཔྤཏྟཱ ཨཧེསུཾ། ཏེསཾ ཀེཝཊྚཛེཊྛཀཔུཏྟོཝ ཡསཏོ ཙ ཏེཛཏོ ཙ ཨགྒཔུརིསོ ཨཧོསི།

    Te anulomapaṭilomavasena ekaṃ buddhantaraṃ devaloke saṃsaritvā imasmiṃ buddhuppāde sāvatthinagaradvāre pañcasatakulike kevaṭṭagāme nibbattiṃsu. Jeṭṭhakadevaputto kevaṭṭajeṭṭhakassa gehe paṭisandhiṃ gaṇhi, itare itaresu. Evaṃ tesaṃ ekadivaseyeva paṭisandhigahaṇañca mātukucchito nikkhamanañca ahosi. Kevaṭṭajeṭṭhako ‘‘atthi nu kho imasmiṃ gāme aññepi dārakā ajja jātā’’ti pariyesāpetvā tesaṃ jātabhāvaṃ ñatvā ‘‘ete mama puttassa sahāyakā bhavissantī’’ti sabbesaṃ posāvanikaṃ dāpesi. Te sabbepi sahapaṃsukīḷakā sahāyakā hutvā anupubbena vayappattā ahesuṃ. Tesaṃ kevaṭṭajeṭṭhakaputtova yasato ca tejato ca aggapuriso ahosi.

    ཀཔིལོཔི ཨེཀཾ བུདྡྷནྟརཾ ནིརཡེ པཙྩིཏྭཱ ཝིཔཱཀཱཝསེསེན ཏསྨིཾ ཀཱལེ ཨཙིརཝཏིཡཱ སུཝཎྞཝཎྞོ དུགྒནྡྷམུཁོ མཙྪོ ཧུཏྭཱ ནིབྦཏྟི། ཨཐེཀདིཝསཾ ཏེ སཧཱཡཀཱ ‘‘མཙྪེ བནྡྷིསྶཱམཱ’’ཏི ཛཱལཱདཱིནི གཧེཏྭཱ ནདིཡཱ ཁིཔིཾསུ། ཨཐ ནེསཾ ཨནྟོཛཱལཾ སོ མཙྪོ པཱཝིསི ། ཏཾ དིསྭཱ སབྦེ ཀེཝཊྚགཱམཝཱསིནོ ཨུཙྩཱསདྡམཀཾསུ – ‘‘པུཏྟཱ ནོ པཋམཾ མཙྪེ བནྡྷནྟཱ སུཝཎྞམཙྪཾ བནྡྷིཾསུ, ཨིདཱནི ནོ རཱཛཱ བཧུདྷནཾ དསྶཏཱི’’ཏི། ཏེཔི ཁོ སཧཱཡཀཱ མཙྪཾ ནཱཝཱཡ པཀྑིཔིཏྭཱ ནཱཝཾ ཨུཀྑིཔིཏྭཱ རཉྙོ སནྟིཀཾ ཨགམཾསུ། རཉྙཱཔི ཏཾ དིསྭཱཝ ‘‘ཀིཾ ཨེཏ’’ནྟི ཝུཏྟེ ‘‘མཙྪོ, དེཝཱ’’ཏི ཨཱཧཾསུ། རཱཛཱ སུཝཎྞཝཎྞཾ མཙྪཾ དིསྭཱ ‘‘སཏྠཱ ཨེཏསྶ སུཝཎྞཝཎྞཀཱརཎཾ ཛཱནིསྶཏཱི’’ཏི མཙྪཾ གཱཧཱཔེཏྭཱ བྷགཝཏོ སནྟིཀཾ ཨགམཱསི། མཙྪེན མུཁེ ཝིཝཊམཏྟེཡེཝ སཀལཛེཏཝནཾ ཨཏིཝིཡ དུགྒནྡྷཾ ཨཧོསི། རཱཛཱ སཏྠཱརཾ པུཙྪི – ‘‘ཀསྨཱ, བྷནྟེ, མཙྪོ སུཝཎྞཝཎྞོ ཛཱཏོ, ཀསྨཱ ཙསྶ མུཁཏོ དུགྒནྡྷོ ཝཱཡཏཱི’’ཏི?

    Kapilopi ekaṃ buddhantaraṃ niraye paccitvā vipākāvasesena tasmiṃ kāle aciravatiyā suvaṇṇavaṇṇo duggandhamukho maccho hutvā nibbatti. Athekadivasaṃ te sahāyakā ‘‘macche bandhissāmā’’ti jālādīni gahetvā nadiyā khipiṃsu. Atha nesaṃ antojālaṃ so maccho pāvisi . Taṃ disvā sabbe kevaṭṭagāmavāsino uccāsaddamakaṃsu – ‘‘puttā no paṭhamaṃ macche bandhantā suvaṇṇamacchaṃ bandhiṃsu, idāni no rājā bahudhanaṃ dassatī’’ti. Tepi kho sahāyakā macchaṃ nāvāya pakkhipitvā nāvaṃ ukkhipitvā rañño santikaṃ agamaṃsu. Raññāpi taṃ disvāva ‘‘kiṃ eta’’nti vutte ‘‘maccho, devā’’ti āhaṃsu. Rājā suvaṇṇavaṇṇaṃ macchaṃ disvā ‘‘satthā etassa suvaṇṇavaṇṇakāraṇaṃ jānissatī’’ti macchaṃ gāhāpetvā bhagavato santikaṃ agamāsi. Macchena mukhe vivaṭamatteyeva sakalajetavanaṃ ativiya duggandhaṃ ahosi. Rājā satthāraṃ pucchi – ‘‘kasmā, bhante, maccho suvaṇṇavaṇṇo jāto, kasmā cassa mukhato duggandho vāyatī’’ti?

    ཨཡཾ, མཧཱརཱཛ, ཀསྶཔབྷགཝཏོ པཱཝཙནེ ཀཔིལོ ནཱམ བྷིཀྑུ ཨཧོསི བཧུསྶུཏོ མཧཱཔརིཝཱརོ ལཱབྷཏཎྷཱཡ ཨབྷིབྷཱུཏོ ཨཏྟནོ ཝཙནཾ ཨགཎྷནྟཱནཾ ཨཀྐོསཀཔརིབྷཱསཀོ, ཏསྶ ཙ བྷགཝཏོ སཱསནཾ ཨོསཀྐཱཔེསི, སོ ཏེན ཀམྨེན ཨཝཱིཙིམྷི ནིབྦཏྟིཏྭཱ ཝིཔཱཀཱཝསེསེན ཨིདཱནི མཙྪོ ཧུཏྭཱ ཛཱཏོ། ཡཾ པན སོ དཱིགྷརཏྟཾ བུདྡྷཝཙནཾ ཝཱཙེསི, བུདྡྷསྶ ཙ གུཎཾ ཀཐེསི, ཏསྶ ནིསྶནྡེན ཨིམཾ སུཝཎྞཝཎྞཾ པཊིལབྷི། ཡཾ བྷིཀྑཱུནཾ ཨཀྐོསཀཔརིབྷཱསཀོ ཨཧོསི, ཏེནསྶ མུཁཏོ དུགྒནྡྷོ ཝཱཡཏི། ‘‘ཀཐཱཔེམི ནཾ, མཧཱརཱཛཱ’’ཏི? ‘‘ཀཐཱཔེཐ, བྷནྟེ’’ཏི། ཨཐ ནཾ སཏྠཱ པུཙྪི – ‘‘ཏྭཾསི ཀཔིལོ’’ཏི? ‘‘ཨཱམ, བྷནྟེ, ཨཧཾ ཀཔིལོ’’ཏི། ‘‘ཀུཏོ ཨཱགཏོསཱི’’ཏི? ‘‘ཨཝཱིཙིམཧཱནིརཡཏོ, བྷནྟེ’’ཏི། ‘‘ཛེཊྛབྷཱཏིཀོ ཏེ སཱགཏོ ཀུཧིཾ གཏོ’’ཏི? ‘‘པརིནིབྦུཏོ, བྷནྟེ’’ཏི། ‘‘མཱཏཱ པན ཏེ སཱདྷིནཱི ཀཧ’’ནྟི? ‘‘མཧཱནིརཡེ ནིབྦཏྟཱ, བྷནྟེ’’ཏི། ‘‘ཀནིཊྛབྷགིནཱི ཙ ཏེ ཏཱཔནཱ ཀཧ’’ནྟི? ‘‘མཧཱནིརཡེ ནིབྦཏྟཱ, བྷནྟེ’’ཏི། ‘‘ཨིདཱནི ཏྭཾ ཀཧཾ གམིསྶསཱི’’ཏི? ‘‘ཨཝཱིཙིམཧཱནིརཡམེཝ, བྷནྟེ’’ཏི ཝཏྭཱ ཝིཔྤཊིསཱརཱབྷིབྷཱུཏོ ནཱཝཾ སཱིསེན པཧརིཏྭཱ ཏཱཝདེཝ ཀཱལཾ ཀཏྭཱ ནིརཡེ ནིབྦཏྟི། མཧཱཛནོ སཾཝིགྒོ ཨཧོསི ལོམཧཊྛཛཱཏོ།

    Ayaṃ, mahārāja, kassapabhagavato pāvacane kapilo nāma bhikkhu ahosi bahussuto mahāparivāro lābhataṇhāya abhibhūto attano vacanaṃ agaṇhantānaṃ akkosakaparibhāsako, tassa ca bhagavato sāsanaṃ osakkāpesi, so tena kammena avīcimhi nibbattitvā vipākāvasesena idāni maccho hutvā jāto. Yaṃ pana so dīgharattaṃ buddhavacanaṃ vācesi, buddhassa ca guṇaṃ kathesi, tassa nissandena imaṃ suvaṇṇavaṇṇaṃ paṭilabhi. Yaṃ bhikkhūnaṃ akkosakaparibhāsako ahosi, tenassa mukhato duggandho vāyati. ‘‘Kathāpemi naṃ, mahārājā’’ti? ‘‘Kathāpetha, bhante’’ti. Atha naṃ satthā pucchi – ‘‘tvaṃsi kapilo’’ti? ‘‘Āma, bhante, ahaṃ kapilo’’ti. ‘‘Kuto āgatosī’’ti? ‘‘Avīcimahānirayato, bhante’’ti. ‘‘Jeṭṭhabhātiko te sāgato kuhiṃ gato’’ti? ‘‘Parinibbuto, bhante’’ti. ‘‘Mātā pana te sādhinī kaha’’nti? ‘‘Mahāniraye nibbattā, bhante’’ti. ‘‘Kaniṭṭhabhaginī ca te tāpanā kaha’’nti? ‘‘Mahāniraye nibbattā, bhante’’ti. ‘‘Idāni tvaṃ kahaṃ gamissasī’’ti? ‘‘Avīcimahānirayameva, bhante’’ti vatvā vippaṭisārābhibhūto nāvaṃ sīsena paharitvā tāvadeva kālaṃ katvā niraye nibbatti. Mahājano saṃviggo ahosi lomahaṭṭhajāto.

    ཨཐ བྷགཝཱ ཏསྨིཾ ཁཎེ སནྣིཔཏིཏཱཡ པརིསཱཡ ཙིཏྟཱཙཱརཾ ཨོལོཀེཏྭཱ ཏངྑཎཱནུརཱུཔཾ དྷམྨཾ དེསེཏུཾ ‘‘དྷམྨཙརིཡཾ བྲཧྨཙརིཡཾ, ཨེཏདཱཧུ ཝསུཏྟམ’’ནྟི སུཏྟནིཔཱཏེ (སུ॰ ནི॰ ༢༧༦) ཀཔིལསུཏྟཾ ཀཐེཏྭཱ ཨིམཱ གཱཐཱ ཨབྷཱསི –

    Atha bhagavā tasmiṃ khaṇe sannipatitāya parisāya cittācāraṃ oloketvā taṅkhaṇānurūpaṃ dhammaṃ desetuṃ ‘‘dhammacariyaṃ brahmacariyaṃ, etadāhu vasuttama’’nti suttanipāte (su. ni. 276) kapilasuttaṃ kathetvā imā gāthā abhāsi –

    ༣༣༤.

    334.

    ‘‘མནུཛསྶ པམཏྟཙཱརིནོ, ཏཎྷཱ ཝཌྜྷཏི མཱལུཝཱ ཝིཡ།

    ‘‘Manujassa pamattacārino, taṇhā vaḍḍhati māluvā viya;

    སོ པླཝཏཱི ཧུརཱ ཧུརཾ, ཕལམིཙྪཾཝ ཝནསྨི ཝཱནརོ༎

    So plavatī hurā huraṃ, phalamicchaṃva vanasmi vānaro.

    ༣༣༥.

    335.

    ‘‘ཡཾ ཨེསཱ སཧཏེ ཛམྨཱི, ཏཎྷཱ ལོཀེ ཝིསཏྟིཀཱ།

    ‘‘Yaṃ esā sahate jammī, taṇhā loke visattikā;

    སོཀཱ ཏསྶ པཝཌྜྷནྟི, ཨབྷིཝཊྛཾཝ བཱིརཎཾ༎

    Sokā tassa pavaḍḍhanti, abhivaṭṭhaṃva bīraṇaṃ.

    ༣༣༦.

    336.

    ‘‘ཡོ ཙེཏཾ སཧཏེ ཛམྨིཾ, ཏཎྷཾ ལོཀེ དུརཙྩཡཾ།

    ‘‘Yo cetaṃ sahate jammiṃ, taṇhaṃ loke duraccayaṃ;

    སོཀཱ ཏམྷཱ པཔཏནྟི, ཨུདབིནྡུཝ པོཀྑརཱ༎

    Sokā tamhā papatanti, udabinduva pokkharā.

    ༣༣༧.

    337.

    ‘‘ཏཾ ཝོ ཝདཱམི བྷདྡཾ ཝོ, ཡཱཝནྟེཏྠ སམཱགཏཱ།

    ‘‘Taṃ vo vadāmi bhaddaṃ vo, yāvantettha samāgatā;

    ཏཎྷཱཡ མཱུལཾ ཁཎཐ, ཨུསཱིརཏྠོཝ བཱིརཎཾ།

    Taṇhāya mūlaṃ khaṇatha, usīratthova bīraṇaṃ;

    མཱ ཝོ ནལ༹ཾཝ སོཏོཝ, མཱརོ བྷཉྫི པུནཔྤུན’’ནྟི༎

    Mā vo naḷaṃva sotova, māro bhañji punappuna’’nti.

    ཏཏྠ པམཏྟཙཱརིནོཏི སཏིཝོསྶགྒལཀྑཎེན པམཱདེན པམཏྟཙཱརིསྶ པུགྒལསྶ ནེཝ ཛྷཱནཾ ན ཝིཔསྶནཱ ན མགྒཕལཱནི ཝཌྜྷནྟི། ཡཐཱ པན རུཀྑཾ སཾསིབྦནྟཱི པརིཡོནནྡྷནྟཱི ཏསྶ ཝིནཱསཱཡ མཱལུཝཱལཏཱ ཝཌྜྷཏི , ཨེཝམསྶ ཚ དྭཱརཱནི ནིསྶཱཡ པུནཔྤུནཾ ཨུཔྤཛྫནཏོ ཏཎྷཱ ཝཌྜྷཏཱིཏི ཨཏྠོ། སོ པླཝཏཱི ཧུརཱ ཧུརནྟི སོ ཏཎྷཱཝསིཀོ པུགྒལོ བྷཝེ བྷཝེ ཨུཔླཝཏི དྷཱཝཏི། ཡཐཱ ཀིཾ ཝིཡཱཏི? ཕལམིཙྪཾཝ ཝནསྨི ཝཱནརོ, ཡཐཱ རུཀྑཕལཾ ཨིཙྪནྟོ ཝཱནརོ ཝནསྨིཾ དྷཱཝཏི, ཏསྶ ཏསྶ རུཀྑསྶ སཱཁཾ གཎྷཱཏི, ཏཾ མུཉྩིཏྭཱ ཨཉྙཾ གཎྷཱཏི, ཏམྤི མུཉྩིཏྭཱ ཨཉྙཾ གཎྷཱཏི, ‘‘སཱཁཾ ཨལབྷིཏྭཱ སནྣིསིནྣོ’’ཏི ཝཏྟབྦཏཾ ནཱཔཛྫཏི, ཨེཝམེཝ ཏཎྷཱཝསིཀོ པུགྒལོ ཧུརཱ ཧུརཾ དྷཱཝནྟོ ‘‘ཨཱརམྨཎཾ ཨལབྷིཏྭཱ ཏཎྷཱཡ ཨཔཝཏྟཾ པཏྟོ’’ཏི ཝཏྟབྦཏཾ ནཱཔཛྫཏི།

    Tattha pamattacārinoti sativossaggalakkhaṇena pamādena pamattacārissa puggalassa neva jhānaṃ na vipassanā na maggaphalāni vaḍḍhanti. Yathā pana rukkhaṃ saṃsibbantī pariyonandhantī tassa vināsāya māluvālatā vaḍḍhati , evamassa cha dvārāni nissāya punappunaṃ uppajjanato taṇhā vaḍḍhatīti attho. So plavatī hurā huranti so taṇhāvasiko puggalo bhave bhave uplavati dhāvati. Yathā kiṃ viyāti? Phalamicchaṃva vanasmi vānaro, yathā rukkhaphalaṃ icchanto vānaro vanasmiṃ dhāvati, tassa tassa rukkhassa sākhaṃ gaṇhāti, taṃ muñcitvā aññaṃ gaṇhāti, tampi muñcitvā aññaṃ gaṇhāti, ‘‘sākhaṃ alabhitvā sannisinno’’ti vattabbataṃ nāpajjati, evameva taṇhāvasiko puggalo hurā huraṃ dhāvanto ‘‘ārammaṇaṃ alabhitvā taṇhāya apavattaṃ patto’’ti vattabbataṃ nāpajjati.

    ཡནྟི ཡཾ པུགྒལཾ ཨེསཱ ལཱམཀབྷཱཝེན ཛམྨཱི ཝིསཱཧཱརཏཱཡ ཝིསཔུཔྥཏཱཡ ཝིསཕལཏཱཡ ཝིསཔརིབྷོགཏཱཡ རཱུཔཱདཱིསུ ཝིསཏྟཏཱཡ ཨཱསཏྟཏཱཡ ཝིསཏྟིཀཱཏི སངྑྱཾ གཏཱ ཚདྭཱརིཀཏཎྷཱ ཨབྷིབྷཝཏི། ཡཐཱ ནཱམ ཝསྶཱནེ པུནཔྤུནཾ ཝསྶནྟེན དེཝེན ཨབྷིཝཊྛཾ བཱིརཎཏིཎཾ ཝཌྜྷཏི, ཨེཝཾ ཏསྶ པུགྒལསྶ ཨནྟོ ཝཊྚམཱུལཀཱ སོཀཱ ཨབྷིཝཌྜྷནྟཱིཏི ཨཏྠོ།

    Yanti yaṃ puggalaṃ esā lāmakabhāvena jammī visāhāratāya visapupphatāya visaphalatāya visaparibhogatāya rūpādīsu visattatāya āsattatāya visattikāti saṅkhyaṃ gatā chadvārikataṇhā abhibhavati. Yathā nāma vassāne punappunaṃ vassantena devena abhivaṭṭhaṃ bīraṇatiṇaṃ vaḍḍhati, evaṃ tassa puggalassa anto vaṭṭamūlakā sokā abhivaḍḍhantīti attho.

    དུརཙྩཡནྟི ཡོ པན པུགྒལོ ཨེཝཾ ཝུཏྟཔྤཀཱརཾ ཨཏིཀྐམིཏུཾ པཛཧིཏུཾ དུཀྐརཏཱཡ དུརཙྩཡཾ ཏཎྷཾ སཧཏི ཨབྷིབྷཝཏི, ཏམྷཱ པུགྒལཱ ཝཊྚམཱུལཀཱ སོཀཱ པཔཏནྟི། ཡཐཱ ནཱམ པོཀྑརེ པདུམཔཏྟེ པཏིཏཾ ཨུདཀབིནྡུ ན པཏིཊྛཱཏི, ཨེཝཾ ན པཏིཊྛཧནྟཱིཏི ཨཏྠོ།

    Duraccayanti yo pana puggalo evaṃ vuttappakāraṃ atikkamituṃ pajahituṃ dukkaratāya duraccayaṃ taṇhaṃ sahati abhibhavati, tamhā puggalā vaṭṭamūlakā sokā papatanti. Yathā nāma pokkhare padumapatte patitaṃ udakabindu na patiṭṭhāti, evaṃ na patiṭṭhahantīti attho.

    ཏཾ ཝོ ཝདཱམཱིཏི ཏེན ཀཱརཎེན ཨཧཾ ཏུམྷེ ཝདཱམི། བྷདྡཾ ཝོཏི བྷདྡཾ ཏུམྷཱཀཾ ཧོཏུ, མཱ ཨཧཾ ཀཔིལོ ཝིཡ ཝིནཱསཾ པཱཔུཎཐཱཏི ཨཏྠོ། མཱུལནྟི ཨིམིསྶཱ ཚདྭཱརིཀཏཎྷཱཡ ཨརཧཏྟམགྒཉཱཎེན མཱུལཾ ཁཎཐ། ཀིཾ ཝིཡཱཏི? ཨུསཱིརཏྠོཝ བཱིརཎཾ, ཡཐཱ ཨུསཱིརེན ཨཏྠིཀོ པུརིསོ མཧནྟེན ཀུདཱལེན བཱིརཎཾ ཁཎཏི, ཨེཝམསྶཱ མཱུལཾ ཁཎཐཱཏི ཨཏྠོ། མཱ ཝོ ནལ༹ཾཝ སོཏོཝ, མཱརོ བྷཉྫི པུནཔྤུནནྟི མཱ ཏུམྷེ ནདཱིསོཏེ ཛཱཏཾ ནལ༹ཾ མཧཱཝེགེན ཨཱགཏོ ནདཱིསོཏོ ཝིཡ ཀིལེསམཱརོ མརཎམཱརོ དེཝཔུཏྟམཱརོ ཙ པུནཔྤུནཾ བྷཉྫཏཱུཏི ཨཏྠོ།

    Taṃ vo vadāmīti tena kāraṇena ahaṃ tumhe vadāmi. Bhaddaṃ voti bhaddaṃ tumhākaṃ hotu, mā ahaṃ kapilo viya vināsaṃ pāpuṇathāti attho. Mūlanti imissā chadvārikataṇhāya arahattamaggañāṇena mūlaṃ khaṇatha. Kiṃ viyāti? Usīratthova bīraṇaṃ, yathā usīrena atthiko puriso mahantena kudālena bīraṇaṃ khaṇati, evamassā mūlaṃ khaṇathāti attho. Mā vo naḷaṃva sotova, māro bhañji punappunanti mā tumhe nadīsote jātaṃ naḷaṃ mahāvegena āgato nadīsoto viya kilesamāro maraṇamāro devaputtamāro ca punappunaṃ bhañjatūti attho.

    དེསནཱཝསཱནེ པཉྩསཏཱཔི ཀེཝཊྚཔུཏྟཱ སཾཝེགཾ ཨཱཔཛྫིཏྭཱ དུཀྑསྶནྟཀིརིཡཾ པཏྠཡམཱནཱ སཏྠུ སནྟིཀེ པབྦཛིཏྭཱ ན ཙིརསྶེཝ དུཀྑསྶནྟཾ ཀཏྭཱ སཏྠཱརཱ སདྡྷིཾ ཨཱནེཉྫཝིཧཱརསམཱཔཏྟིདྷམྨཔརིབྷོགེན ཨེཀཔརིབྷོགཱ ཨཧེསུནྟི།

    Desanāvasāne pañcasatāpi kevaṭṭaputtā saṃvegaṃ āpajjitvā dukkhassantakiriyaṃ patthayamānā satthu santike pabbajitvā na cirasseva dukkhassantaṃ katvā satthārā saddhiṃ āneñjavihārasamāpattidhammaparibhogena ekaparibhogā ahesunti.

    ཀཔིལམཙྪཝཏྠུ པཋམཾ།

    Kapilamacchavatthu paṭhamaṃ.

    ༢. སཱུཀརཔོཏིཀཱཝཏྠུ

    2. Sūkarapotikāvatthu

    ཡཐཱཔི མཱུལེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ གཱུཐསཱུཀརཔོཏིཀཾ ཨཱརབྦྷ ཀཐེསི།

    Yathāpi mūleti imaṃ dhammadesanaṃ satthā veḷuvane viharanto gūthasūkarapotikaṃ ārabbha kathesi.

    ཨེཀསྨིཾ ཀིར སམཡེ སཏྠཱ རཱཛགཧཾ པིཎྜཱཡ པཝིསནྟོ ཨེཀཾ སཱུཀརཔོཏིཀཾ དིསྭཱ སིཏཾ པཱཏྭཱཀཱསི། ཏསྶ སིཏཾ ཀརོནྟསྶ མུཁཝིཝརནིགྒཏཾ དནྟོབྷཱསམཎྜལཾ དིསྭཱ ཨཱནནྡཏྠེརོ ‘‘ཀོ ནུ ཁོ, བྷནྟེ, ཧེཏུ སིཏསྶ པཱཏུཀམྨཱཡཱ’’ཏི སིཏཀཱརཎཾ པུཙྪི། ཨཐ ནཾ སཏྠཱ ཨཱཧ – ‘‘པསྶསེཏཾ, ཨཱནནྡ, སཱུཀརཔོཏིཀ’’ནྟི? ‘‘ཨཱམ, བྷནྟེ’’ཏི། ཨེསཱ ཀཀུསནྡྷསྶ བྷགཝཏོ སཱསནེ ཨེཀཱཡ ཨཱསནསཱལཱཡ སཱམནྟཱ ཀུཀྐུཊཱི ཨཧོསི། སཱ ཨེཀསྶ ཡོགཱཝཙརསྶ ཝིཔསྶནཱཀམྨཊྛཱནཾ སཛ྄ཛྷཱཡནྟསྶ དྷམྨགྷོསཾ སུཏྭཱ ཏཏོ ཙུཏཱ རཱཛཀུལེ ནིབྦཏྟིཏྭཱ ཨུབྦརཱི ནཱམ རཱཛདྷཱིཏཱ ཨཧོསི། སཱ ཨཔརབྷཱགེ སརཱིརཝལཉྫཊྛཱནཾ པཝིཊྛཱ པུལ༹ཝཀརཱསིཾ དིསྭཱ ཏཏྠ པུལ༹ཝཀསཉྙཾ ཨུཔྤཱདེཏྭཱ པཋམཾ ཛྷཱནཾ པཊིལབྷི། སཱ ཏཏྠ ཡཱཝཏཱཡུཀཾ ཋཏྭཱ ཏཏོ ཙུཏཱ བྲཧྨལོཀེ ནིབྦཏྟི། ཏཏོ ཙཝིཏྭཱ པུན གཏིཝསེན ཨཱལུལམཱནཱ ཨིདཱནི སཱུཀརཡོནིཡཾ ནིབྦཏྟི, ཨིདཾ ཀཱརཎཾ དིསྭཱ མཡཱ སིཏཾ པཱཏུཀཏནྟི། ཏཾ སུཏྭཱ ཨཱནནྡཏྠེརཔྤམུཁཱ བྷིཀྑཱུ མཧནྟཾ སཾཝེགཾ པཊིལབྷིཾསུ། སཏྠཱ ཏེསཾ སཾཝེགཾ ཨུཔྤཱདེཏྭཱ བྷཝཏཎྷཱཡ ཨཱདཱིནཝཾ པཀཱསེནྟོ ཨནྟརཝཱིཐིཡཾ ཋིཏཀོཝ ཨིམཱ གཱཐཱ ཨབྷཱསི –

    Ekasmiṃ kira samaye satthā rājagahaṃ piṇḍāya pavisanto ekaṃ sūkarapotikaṃ disvā sitaṃ pātvākāsi. Tassa sitaṃ karontassa mukhavivaraniggataṃ dantobhāsamaṇḍalaṃ disvā ānandatthero ‘‘ko nu kho, bhante, hetu sitassa pātukammāyā’’ti sitakāraṇaṃ pucchi. Atha naṃ satthā āha – ‘‘passasetaṃ, ānanda, sūkarapotika’’nti? ‘‘Āma, bhante’’ti. Esā kakusandhassa bhagavato sāsane ekāya āsanasālāya sāmantā kukkuṭī ahosi. Sā ekassa yogāvacarassa vipassanākammaṭṭhānaṃ sajjhāyantassa dhammaghosaṃ sutvā tato cutā rājakule nibbattitvā ubbarī nāma rājadhītā ahosi. Sā aparabhāge sarīravalañjaṭṭhānaṃ paviṭṭhā puḷavakarāsiṃ disvā tattha puḷavakasaññaṃ uppādetvā paṭhamaṃ jhānaṃ paṭilabhi. Sā tattha yāvatāyukaṃ ṭhatvā tato cutā brahmaloke nibbatti. Tato cavitvā puna gativasena ālulamānā idāni sūkarayoniyaṃ nibbatti, idaṃ kāraṇaṃ disvā mayā sitaṃ pātukatanti. Taṃ sutvā ānandattherappamukhā bhikkhū mahantaṃ saṃvegaṃ paṭilabhiṃsu. Satthā tesaṃ saṃvegaṃ uppādetvā bhavataṇhāya ādīnavaṃ pakāsento antaravīthiyaṃ ṭhitakova imā gāthā abhāsi –

    ༣༣༨.

    338.

    ‘‘ཡཐཱཔི མཱུལེ ཨནུཔདྡཝེ དལ༹ྷེ,

    ‘‘Yathāpi mūle anupaddave daḷhe,

    ཚིནྣོཔི རུཀྑོ པུནརེཝ རཱུཧཏི།

    Chinnopi rukkho punareva rūhati;

    ཨེཝམྤི ཏཎྷཱནུསཡེ ཨནཱུཧཏེ,

    Evampi taṇhānusaye anūhate,

    ནིབྦཏྟཏཱི དུཀྑམིདཾ པུནཔྤུནཾ༎

    Nibbattatī dukkhamidaṃ punappunaṃ.

    ༣༣༩.

    339.

    ‘‘ཡསྶ ཚཏྟིཾསཏི སོཏཱ, མནཱཔསཝནཱ བྷུསཱ།

    ‘‘Yassa chattiṃsati sotā, manāpasavanā bhusā;

    མཧཱཝཧནྟི དུདྡིཊྛིཾ, སངྐཔྤཱ རཱགནིསྶིཏཱ༎

    Mahāvahanti duddiṭṭhiṃ, saṅkappā rāganissitā.

    ༣༤༠.

    340.

    ‘‘སཝནྟི སབྦདྷི སོཏཱ, ལཏཱ ཨུཔྤཛྫ ཏིཊྛཏི།

    ‘‘Savanti sabbadhi sotā, latā uppajja tiṭṭhati;

    ཏཉྩ དིསྭཱ ལཏཾ ཛཱཏཾ, མཱུལཾ པཉྙཱཡ ཚིནྡཐ༎

    Tañca disvā lataṃ jātaṃ, mūlaṃ paññāya chindatha.

    ༣༤༡.

    341.

    ‘‘སརིཏཱནི སིནེཧིཏཱནི ཙ,

    ‘‘Saritāni sinehitāni ca,

    སོམནསྶཱནི ཧོནྟི ཛནྟུནོ།

    Somanassāni honti jantuno;

    ཏེ སཱཏསིཏཱ སུཁེསིནོ,

    Te sātasitā sukhesino,

    ཏེ ཝེ ཛཱཏིཛརཱུཔགཱ ནརཱ༎

    Te ve jātijarūpagā narā.

    ༣༤༢.

    342.

    ‘‘ཏསིཎཱཡ པུརཀྑཏཱ པཛཱ,

    ‘‘Tasiṇāya purakkhatā pajā,

    པརིསཔྤནྟི སསོཝ བནྡྷིཏོ།

    Parisappanti sasova bandhito;

    སཾཡོཛནསངྒསཏྟཀཱ,

    Saṃyojanasaṅgasattakā,

    དུཀྑམུཔེནྟི པུནཔྤུནཾ ཙིརཱཡ༎

    Dukkhamupenti punappunaṃ cirāya.

    ༣༤༣.

    343.

    ‘‘ཏསིཎཱཡ པུརཀྑཏཱ པཛཱ,

    ‘‘Tasiṇāya purakkhatā pajā,

    པརིསཔྤནྟི སསོཝ བནྡྷིཏོ།

    Parisappanti sasova bandhito;

    ཏསྨཱ ཏསིཎཾ ཝིནོདཡེ,

    Tasmā tasiṇaṃ vinodaye,

    ཨཱཀངྑནྟ ཝིརཱགམཏྟནོ’’ཏི༎

    Ākaṅkhanta virāgamattano’’ti.

    ཏཏྠ མཱུལེཏི ཡསྶ རུཀྑསྶ ཙཏཱུསུ དིསཱསུ ཙཏུདྷཱ ཧེཊྛཱ ཙ ཨུཛུཀམེཝ གཏེ པཉྩཝིདྷམཱུལེ ཚེདནཕཱལནཔཱཙནཝིཛ྄ཛྷནཱདཱིནཾ ཀེནཙི ཨུཔདྡཝེན ཨནུཔདྡཝེ ཐིརཔཏྟཏཱཡ དལ༹ྷེ སོ རུཀྑོ ཨུཔརིཙྪིནྣོཔི སཱཁཱནཾ ཝསེན པུནདེཝ རཱུཧཏི, ཨེཝམེཝ ཚདྭཱརིཀཱཡ ཏཎྷཱཡ ཨནུསཡེ ཨརཧཏྟམགྒཉཱཎེན ཨནུཧཏེ ཨསམུཙྪིནྣེ ཏསྨིཾ ཏསྨིཾ བྷཝེ ཛཱཏིཨཱདིབྷེདཾ ཨིདཾ དུཀྑཾ པུནཔྤུནཾ ནིབྦཏྟཏིཡེཝཱཏི ཨཏྠོ།

    Tattha mūleti yassa rukkhassa catūsu disāsu catudhā heṭṭhā ca ujukameva gate pañcavidhamūle chedanaphālanapācanavijjhanādīnaṃ kenaci upaddavena anupaddave thirapattatāya daḷhe so rukkho uparicchinnopi sākhānaṃ vasena punadeva rūhati, evameva chadvārikāya taṇhāya anusaye arahattamaggañāṇena anuhate asamucchinne tasmiṃ tasmiṃ bhave jātiādibhedaṃ idaṃ dukkhaṃ punappunaṃ nibbattatiyevāti attho.

    ཡསྶཱཏི ཡསྶ པུགྒལསྶ ‘‘ཨིཏི ཨཛ྄ཛྷཏྟིཀསྶཱུཔཱདཱཡ ཨཊྛཱརས ཏཎྷཱཝིཙརིཏཱནི བཱཧིརསྶཱུཔཱདཱཡ ཨཊྛཱརས ཏཎྷཱཝིཙརིཏཱནཱི’’ཏི ཨིམེསཾ ཏཎྷཱཝིཙརིཏཱནཾ ཝསེན ཚཏྟིཾསཏིཡཱ སོཏེཧི སམནྣཱགཏཱ མནཱཔེསུ རཱུཔཱདཱིསུ ཨཱསཝཏི པཝཏྟཏཱིཏི མནཱཔསཝནཱ ཏཎྷཱ བྷུསཱ བལཝཏཱི ཧོཏི, ཏཾ པུགྒལཾ ཝིཔནྣཉཱཎཏཱཡ དུདྡིཊྛིཾ པུནཔྤུནཾ ཨུཔྤཛྫནཏོ མཧནྟབྷཱཝེན མཧཱ ཧུཏྭཱ ཛྷཱནཾ ཝཱ ཝིཔསྶནཾ ཝཱ ཨནིསྶཱཡ རཱགནིསྶིཏཱ སངྐཔྤཱ ཝཧནྟཱིཏི ཨཏྠོ།

    Yassāti yassa puggalassa ‘‘iti ajjhattikassūpādāya aṭṭhārasa taṇhāvicaritāni bāhirassūpādāya aṭṭhārasa taṇhāvicaritānī’’ti imesaṃ taṇhāvicaritānaṃ vasena chattiṃsatiyā sotehi samannāgatā manāpesu rūpādīsu āsavati pavattatīti manāpasavanā taṇhā bhusā balavatī hoti, taṃ puggalaṃ vipannañāṇatāya duddiṭṭhiṃ punappunaṃ uppajjanato mahantabhāvena mahā hutvā jhānaṃ vā vipassanaṃ vā anissāya rāganissitā saṅkappā vahantīti attho.

    སཝནྟི སབྦདྷི སོཏཱཏི ཨིམེ ཏཎྷཱསོཏཱ ཙཀྑུདྭཱརཱདཱིནཾ ཝསེན སབྦེསུ རཱུཔཱདཱིསུ ཨཱརམྨཎེསུ སཝནཏོ, སབྦཱཔི རཱུཔཏཎྷཱ…པེ॰… དྷམྨཏཎྷཱཏི སབྦབྷཝེསུ ཝཱ སཝནཏོ སབྦདྷི སཝནྟི ནཱམ། ལཏཱཏི པལིཝེཋནཊྛེན སཾསིབྦནཊྛེན ཙ ལཏཱ ཝིཡཱཏི ལཏཱ། ཨུཔྤཛྫ ཏིཊྛཏཱིཏི ཚཧི དྭཱརེཧི ཨུཔྤཛྫིཏྭཱ རཱུཔཱདཱིསུ ཨཱརམྨཎེསུ ཏིཊྛཏི། ཏཉྩ དིསྭཱཏི ཏཾ པན ཏཎྷཱལཏཾ ‘‘ཨེཏྠེསཱ ཏཎྷཱ ཨུཔྤཛྫམཱནཱ ཨུཔྤཛྫཏཱི’’ཏི ཛཱཏཊྛཱནཝསེན དིསྭཱ། པཉྙཱཡཱཏི སཏྠེན ཝནེ ཛཱཏཾ ལཏཾ ཝིཡ མགྒཔཉྙཱཡ མཱུལེ ཚིནྡཐཱཏི ཨཏྠོ།

    Savanti sabbadhi sotāti ime taṇhāsotā cakkhudvārādīnaṃ vasena sabbesu rūpādīsu ārammaṇesu savanato, sabbāpi rūpataṇhā…pe… dhammataṇhāti sabbabhavesu vā savanato sabbadhi savanti nāma. Latāti paliveṭhanaṭṭhena saṃsibbanaṭṭhena ca latā viyāti latā. Uppajja tiṭṭhatīti chahi dvārehi uppajjitvā rūpādīsu ārammaṇesu tiṭṭhati. Tañca disvāti taṃ pana taṇhālataṃ ‘‘etthesā taṇhā uppajjamānā uppajjatī’’ti jātaṭṭhānavasena disvā. Paññāyāti satthena vane jātaṃ lataṃ viya maggapaññāya mūle chindathāti attho.

    སརིཏཱནཱིཏི ཨནུསཊཱནི པཡཱཏཱནི། སིནེཧིཏཱནཱིཏི ཙཱིཝརཱདཱིསུ པཝཏྟསིནེཧཝསེན སིནེཧིཏཱནི ཙ, ཏཎྷཱསིནེཧམཀྑིཏཱནཱིཏི ཨཏྠོ། སོམནསྶཱནཱིཏི ཏཎྷཱཝསིཀསྶ ཛནྟུནོ ཨེཝརཱུཔཱནི སོམནསྶཱནི བྷཝནྟི། ཏེ སཱཏསིཏཱཏི ཏེ ཏཎྷཱཝསིཀཱ པུགྒལཱ སཱཏནིསྶིཏཱ སུཁནིསྶིཏཱ ཙ ཧུཏྭཱ སུཁེསིནོ སུཁཔརིཡེསིནོ བྷཝནྟི། ཏེ ཝེཏི ཡེ ཨེཝརཱུཔཱ ནརཱ, ཏེ ཛཱཏིཛརཱབྱཱདྷིམརཎཱནི ཨུཔགཙྪནྟིཡེཝཱཏི ཛཱཏིཛརཱུཔགཱ ནཱམ ཧོནྟི། པཛཱཏི ཨིམེ སཏྟཱ ཏཱསཀརཎེན ཏསིཎཱཏི སངྑྱཾ གཏཱཡ ཏཎྷཱཡ པུརཀྑཏཱ པརིཝཱརིཏཱ ཧུཏྭཱ།

    Saritānīti anusaṭāni payātāni. Sinehitānīti cīvarādīsu pavattasinehavasena sinehitāni ca, taṇhāsinehamakkhitānīti attho. Somanassānīti taṇhāvasikassa jantuno evarūpāni somanassāni bhavanti. Te sātasitāti te taṇhāvasikā puggalā sātanissitā sukhanissitā ca hutvā sukhesino sukhapariyesino bhavanti. Te veti ye evarūpā narā, te jātijarābyādhimaraṇāni upagacchantiyevāti jātijarūpagā nāma honti. Pajāti ime sattā tāsakaraṇena tasiṇāti saṅkhyaṃ gatāya taṇhāya purakkhatā parivāritā hutvā.

    བནྡྷིཏོཏི ལུདྡེན ཨརཉྙེ བདྡྷོ སསོ ཝིཡ པརིསཔྤནྟི བྷཱཡནྟི། སཾཡོཛནསངྒསཏྟཀཱཏི དསཝིདྷེན སཾཡོཛནསངྒེན ཙེཝ སཏྟཝིདྷེན རཱགསངྒཱདིནཱ ཙ སཏྟཱ བདྡྷཱ ཏསྨིཾ ཝཱ ལགྒཱ ཧུཏྭཱ། ཙིརཱཡཱཏི ཙིརཾ དཱིགྷམདྡྷཱནཾ པུནཔྤུནཾ ཛཱཏིཨཱདིཀཾ དུཀྑཾ ཨུཔགཙྪནྟཱིཏི ཨཏྠོ། ཏསྨཱཏི ཡསྨཱ ཏསིཎཱཡ པུརཀྑཏཱ པལིཝེཋིཏཱ སཏྟཱ, ཏསྨཱ ཨཏྟནོ ཝིརཱགཾ རཱགཱདིཝིགམཾ ནིབྦཱནཾ པཏྠེནྟོ ཨཱཀངྐམཱནོ བྷིཀྑུ ཨརཧཏྟམགྒེནེཏཾ ཏསིཎཾ ཝིནོདཡེ པནུདིཏྭཱ ནཱིཧརིཏྭཱ ཚཌྜེཡྻཱཏི ཨཏྠོ།

    Bandhitoti luddena araññe baddho saso viya parisappanti bhāyanti. Saṃyojanasaṅgasattakāti dasavidhena saṃyojanasaṅgena ceva sattavidhena rāgasaṅgādinā ca sattā baddhā tasmiṃ vā laggā hutvā. Cirāyāti ciraṃ dīghamaddhānaṃ punappunaṃ jātiādikaṃ dukkhaṃ upagacchantīti attho. Tasmāti yasmā tasiṇāya purakkhatā paliveṭhitā sattā, tasmā attano virāgaṃ rāgādivigamaṃ nibbānaṃ patthento ākaṅkamāno bhikkhu arahattamaggenetaṃ tasiṇaṃ vinodaye panuditvā nīharitvā chaḍḍeyyāti attho.

    དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ།

    Desanāvasāne bahū sotāpattiphalādīni pāpuṇiṃsu.

    སཱཔི ཁོ སཱུཀརཔོཏིཀཱ ཏཏོ ཙཝིཏྭཱ སུཝཎྞབྷཱུམིཡཾ རཱཛཀུལེ ནིབྦཏྟི, ཏཏོ ཙུཏཱ བཱརཱཎསིཡཾ, ཏཏོ ཙུཏཱ སུཔྤཱརཀཔཊྚནེ ཨསྶཝཱཎིཛགེཧེ ནིབྦཏྟི, ཏཏོ ཙུཏཱ ཀཱཝཱིརཔཊྚནེ ནཱཝིཀསྶ གེཧེ ནིབྦཏྟི, ཏཏོ ཙུཏཱ ཨནུརཱདྷཔུརེ ཨིསྶརཀུལགེཧེ ནིབྦཏྟི, ཏཏོ ཙུཏཱ ཏསྶེཝ དཀྑིཎདིསཱཡ བྷོཀྐནྟགཱམེ སུམནསྶ ནཱམ ཀུཊུམྦིཀསྶ དྷཱིཏཱ ནཱམེན སུམནཱ ཨེཝ ཧུཏྭཱ ནིབྦཏྟི། ཨཐསྶཱ པིཏཱ ཏསྨིཾ གཱམེ ཚཌྜིཏེ དཱིགྷཝཱཔིརཊྛཾ གནྟྭཱ མཧཱམུནིགཱམེ ནཱམ ཝསི། ཏཏྠ ནཾ དུཊྛགཱམཎིརཉྙོ ཨམཙྩོ ལཀུཎྜཀཨཏིམྦརོ ནཱམ ཀེནཙིདེཝ ཀརཎཱིཡེན གཏོ དིསྭཱ མཧནྟཾ མངྒལཾ ཀཏྭཱ ཨཱདཱཡ མཧཱཔུཎྞགཱམཾ གཏོ། ཨཐ ནཾ ཀོཊིཔབྦཏམཧཱཝིཧཱརཝཱསཱི མཧཱཨནུརུདྡྷཏྠེརོ ནཱམ ཏཏྠ པིཎྜཱཡ ཙརིཏྭཱ ཏསྶཱ གེཧདྭཱརེ ཋིཏོ དིསྭཱ བྷིཀྑཱུཧི སདྡྷིཾ ཀཐེསི, ‘‘ཨཱཝུསོ, སཱུཀརཔོཏིཀཱ ནཱམ ལཀུཎྜཀཨཏིམྦརམཧཱམཏྟསྶ བྷརིཡབྷཱཝཾ པཏྟཱ, ཨཧོ ཨཙྪརིཡ’’ནྟི། སཱ ཏཾ ཀཐཾ སུཏྭཱ ཨཏཱིཏབྷཝེ ཨུགྒྷཱཊེཏྭཱ ཛཱཏིསྶརཉཱཎཾ པཊིལབྷི། ཏངྑཎཉྙེཝ ཨུཔྤནྣསཾཝེགཱ སཱམིཀཾ ཡཱཙིཏྭཱ མཧནྟེན ཨིསྶརིཡེན པཉྩབལཀཏྠེརཱིནཾ སནྟིཀེ པབྦཛིཏྭཱ ཏིསྶམཧཱཝིཧཱརེ མཧཱསཏིཔཊྛཱནསུཏྟཀཐཾ སུཏྭཱ སོཏཱཔཏྟིཕལེ པཏིཊྛཧི། པཙྪཱ དམིལ༹མདྡནེ ཀཏེ ཉཱཏཱིནཾ ཝསནཊྛཱནཾ བྷོཀྐནྟགཱམམེཝ གནྟྭཱ ཏཏྠ ཝསནྟཱི ཀལླམཧཱཝིཧཱརེ ཨཱསཱིཝིསོཔམསུཏྟནྟཾ སུཏྭཱ ཨརཧཏྟཾ པཱཔུཎི།

    Sāpi kho sūkarapotikā tato cavitvā suvaṇṇabhūmiyaṃ rājakule nibbatti, tato cutā bārāṇasiyaṃ, tato cutā suppārakapaṭṭane assavāṇijagehe nibbatti, tato cutā kāvīrapaṭṭane nāvikassa gehe nibbatti, tato cutā anurādhapure issarakulagehe nibbatti, tato cutā tasseva dakkhiṇadisāya bhokkantagāme sumanassa nāma kuṭumbikassa dhītā nāmena sumanā eva hutvā nibbatti. Athassā pitā tasmiṃ gāme chaḍḍite dīghavāpiraṭṭhaṃ gantvā mahāmunigāme nāma vasi. Tattha naṃ duṭṭhagāmaṇirañño amacco lakuṇḍakaatimbaro nāma kenacideva karaṇīyena gato disvā mahantaṃ maṅgalaṃ katvā ādāya mahāpuṇṇagāmaṃ gato. Atha naṃ koṭipabbatamahāvihāravāsī mahāanuruddhatthero nāma tattha piṇḍāya caritvā tassā gehadvāre ṭhito disvā bhikkhūhi saddhiṃ kathesi, ‘‘āvuso, sūkarapotikā nāma lakuṇḍakaatimbaramahāmattassa bhariyabhāvaṃ pattā, aho acchariya’’nti. Sā taṃ kathaṃ sutvā atītabhave ugghāṭetvā jātissarañāṇaṃ paṭilabhi. Taṅkhaṇaññeva uppannasaṃvegā sāmikaṃ yācitvā mahantena issariyena pañcabalakattherīnaṃ santike pabbajitvā tissamahāvihāre mahāsatipaṭṭhānasuttakathaṃ sutvā sotāpattiphale patiṭṭhahi. Pacchā damiḷamaddane kate ñātīnaṃ vasanaṭṭhānaṃ bhokkantagāmameva gantvā tattha vasantī kallamahāvihāre āsīvisopamasuttantaṃ sutvā arahattaṃ pāpuṇi.

    སཱ པརིནིབྦཱནདིཝསེ བྷིཀྑུབྷིཀྑུནཱིཧི པུཙྪིཏཱ བྷིཀྑུནིསངྒྷསྶ སབྦཾ ཨིམཾ པཝཏྟིཾ ནིརནྟརཾ ཀཐེཏྭཱ སནྣིཔཏིཏསྶ བྷིཀྑུསངྒྷསྶ མཛ྄ཛྷེ མཎྜལཱརཱམཝཱསིནཱ དྷམྨཔདབྷཱཎཀམཧཱཏིསྶཏྠེརེན སདྡྷིཾ སཾསནྡིཏྭཱ ‘‘ཨཧཾ པུབྦེ མནུསྶཡོནིཡཾ ནིབྦཏྟིཏྭཱ ཏཏོ ཙུཏཱ ཀུཀྐུཊཱི ཧུཏྭཱ ཏཏྠ སེནསྶ སནྟིཀཱ སཱིསཙྪེདཾ པཏྭཱ རཱཛགཧེ ནིབྦཏྟཱ, པརིབྦཱཛིཀཱསུ པབྦཛིཏྭཱ པཋམཛ྄ཛྷཱནབྷཱུམིཡཾ ནིབྦཏྟིཏྭཱ ཏཏོ ཙུཏཱ སེཊྛིཀུལེ ནིབྦཏྟཱ ནཙིརསྶེཝ ཙཝིཏྭཱ སཱུཀརཡོནིཾ གནྟྭཱ ཏཏོ ཙུཏཱ སུཝཎྞབྷཱུམིཾ, ཏཏོ ཙུཏཱ བཱརཱཎསིཾ, ཏཏོ ཙུཏཱ སུཔྤཱརཀཔཊྚནཾ, ཏཏོ ཙུཏཱ ཀཱཝཱིརཔཊྚནཾ, ཏཏོ ཙུཏཱ ཨནུརཱདྷཔུརཾ, ཏཏོ ཙུཏཱ བྷོཀྐནྟགཱམ’’ནྟི ཨེཝཾ སམཝིསམེ ཏེརས ཨཏྟབྷཱཝེ པཏྭཱ ‘‘ཨིདཱནི ཨུཀྐཎྛིཏྭཱ པབྦཛིཏྭཱ ཨརཧཏྟཾ པཏྟཱ, སབྦེཔི ཨཔྤམཱདེན སམྤཱདེཐཱ’’ཏི ཝཏྭཱ ཙཏསྶོ པརིསཱ སཾཝེཛེཏྭཱ པརིནིབྦཱཡཱིཏི།

    Sā parinibbānadivase bhikkhubhikkhunīhi pucchitā bhikkhunisaṅghassa sabbaṃ imaṃ pavattiṃ nirantaraṃ kathetvā sannipatitassa bhikkhusaṅghassa majjhe maṇḍalārāmavāsinā dhammapadabhāṇakamahātissattherena saddhiṃ saṃsanditvā ‘‘ahaṃ pubbe manussayoniyaṃ nibbattitvā tato cutā kukkuṭī hutvā tattha senassa santikā sīsacchedaṃ patvā rājagahe nibbattā, paribbājikāsu pabbajitvā paṭhamajjhānabhūmiyaṃ nibbattitvā tato cutā seṭṭhikule nibbattā nacirasseva cavitvā sūkarayoniṃ gantvā tato cutā suvaṇṇabhūmiṃ, tato cutā bārāṇasiṃ, tato cutā suppārakapaṭṭanaṃ, tato cutā kāvīrapaṭṭanaṃ, tato cutā anurādhapuraṃ, tato cutā bhokkantagāma’’nti evaṃ samavisame terasa attabhāve patvā ‘‘idāni ukkaṇṭhitvā pabbajitvā arahattaṃ pattā, sabbepi appamādena sampādethā’’ti vatvā catasso parisā saṃvejetvā parinibbāyīti.

    སཱུཀརཔོཏིཀཱཝཏྠུ དུཏིཡཾ།

    Sūkarapotikāvatthu dutiyaṃ.

    ༣. ཝིབྦྷནྟབྷིཀྑུཝཏྠུ

    3. Vibbhantabhikkhuvatthu

    ཡོ ནིབྦནཐོཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨེཀཾ ཝིབྦྷནྟཀཾ བྷིཀྑུཾ ཨཱརབྦྷ ཀཐེསི།

    Yonibbanathoti imaṃ dhammadesanaṃ satthā veḷuvane viharanto ekaṃ vibbhantakaṃ bhikkhuṃ ārabbha kathesi.

    ཨེཀོ ཀིར མཧཱཀསྶཔཏྠེརསྶ སདྡྷིཝིཧཱརིཀོ ཧུཏྭཱ ཙཏྟཱརི ཛྷཱནཱནི ཨུཔྤཱདེཏྭཱཔི ཨཏྟནོ མཱཏུལསྶ སུཝཎྞཀཱརསྶ གེཧེ ཝིསབྷཱགཱརམྨཎཾ དིསྭཱ ཏཏྠ པཊིབདྡྷཙིཏྟོ ཝིབྦྷམི། ཨཐ ནཾ མནུསྶཱ ཨལསབྷཱཝེན ཀམྨཾ ཀཱཏུཾ ཨནིཙྪནྟཾ གེཧཱ ནཱིཧརིཾསུ། སོ པཱཔམིཏྟསཾསགྒེན ཙོརཀམྨེན ཛཱིཝིཀཾ ཀཔྤེནྟོ ཝིཙརི། ཨཐ ནཾ ཨེཀདིཝསཾ གཧེཏྭཱ པཙྪཱབཱཧཾ གཱལ༹ྷབནྡྷནཾ བནྡྷིཏྭཱ ཙཏུཀྐེ ཙཏུཀྐེ ཀསཱཧི ཏཱལེ༹ནྟཱ ཨཱགྷཱཏནཾ ནཡིཾསུ། ཐེརོ པིཎྜཱཡ ཙརིཏུཾ པཝིསནྟོ ཏཾ དཀྑིཎེན དྭཱརེན ནཱིཧརིཡམཱནཾ དིསྭཱ བནྡྷནཾ སིཐིལཾ ཀཱརེཏྭཱ ‘‘པུབྦེ ཏཡཱ པརིཙིཏཀམྨཊྛཱནཾ པུན ཨཱཝཛྫེཧཱི’’ཏི ཨཱཧ། སོ ཏེན ཨོཝཱདེན སཏུཔྤཱདཾ ལབྷིཏྭཱ པུན ཙཏུཏྠཛ྄ཛྷཱནཾ ནིབྦཏྟེསི། ཨཐ ནཾ ‘‘ཨཱགྷཱཏནཾ ནེཏྭཱ གྷཱཏེསྶཱམཱ’’ཏི སཱུལེ ཨུཏྟཱསེསུཾ། སོ ན བྷཱཡཏི ན སནྟསཏི། ཨཐསྶ ཏསྨིཾ ཏསྨིཾ དིསཱབྷཱགེ ཋིཏཱ མནུསྶཱ ཨསིསཏྟིཏོམརཱདཱིནི ཨཱཝུདྷཱནི ཨུཀྑིཔིཏྭཱཔི ཏཾ ཨསནྟསནྟམེཝ དིསྭཱ ‘‘པསྶཐ, བྷོ, ཨིམཾ པུརིསཾ, ཨནེཀསཏཱནཉྷི ཨཱཝུདྷཧཏྠཱནཾ པུརིསཱནཾ མཛ྄ཛྷེ ནེཝ ཚམྦྷཏི ན ཝེདྷཏི, ཨཧོ ཨཙྪརིཡ’’ནྟི ཨཙྪརིཡབྦྷུཏཛཱཏཱ མཧཱནཱདཾ ནདིཏྭཱ རཉྙོ ཏཾ པཝཏྟིཾ ཨཱརོཙེསུཾ། རཱཛཱ ཏཾ ཀཱརཎཾ སུཏྭཱ ‘‘ཝིསྶཛྫེཐ ན’’ནྟི ཨཱཧ། སཏྠུ སནྟིཀམྤི གནྟྭཱ ཏམཏྠཾ ཨཱརོཙཡིཾསུ། སཏྠཱ ཨོབྷཱསཾ ཕརིཏྭཱ ཏསྶ དྷམྨཾ དེསེནྟོ ཨིམཾ གཱཐམཱཧ –

    Eko kira mahākassapattherassa saddhivihāriko hutvā cattāri jhānāni uppādetvāpi attano mātulassa suvaṇṇakārassa gehe visabhāgārammaṇaṃ disvā tattha paṭibaddhacitto vibbhami. Atha naṃ manussā alasabhāvena kammaṃ kātuṃ anicchantaṃ gehā nīhariṃsu. So pāpamittasaṃsaggena corakammena jīvikaṃ kappento vicari. Atha naṃ ekadivasaṃ gahetvā pacchābāhaṃ gāḷhabandhanaṃ bandhitvā catukke catukke kasāhi tāḷentā āghātanaṃ nayiṃsu. Thero piṇḍāya carituṃ pavisanto taṃ dakkhiṇena dvārena nīhariyamānaṃ disvā bandhanaṃ sithilaṃ kāretvā ‘‘pubbe tayā paricitakammaṭṭhānaṃ puna āvajjehī’’ti āha. So tena ovādena satuppādaṃ labhitvā puna catutthajjhānaṃ nibbattesi. Atha naṃ ‘‘āghātanaṃ netvā ghātessāmā’’ti sūle uttāsesuṃ. So na bhāyati na santasati. Athassa tasmiṃ tasmiṃ disābhāge ṭhitā manussā asisattitomarādīni āvudhāni ukkhipitvāpi taṃ asantasantameva disvā ‘‘passatha, bho, imaṃ purisaṃ, anekasatānañhi āvudhahatthānaṃ purisānaṃ majjhe neva chambhati na vedhati, aho acchariya’’nti acchariyabbhutajātā mahānādaṃ naditvā rañño taṃ pavattiṃ ārocesuṃ. Rājā taṃ kāraṇaṃ sutvā ‘‘vissajjetha na’’nti āha. Satthu santikampi gantvā tamatthaṃ ārocayiṃsu. Satthā obhāsaṃ pharitvā tassa dhammaṃ desento imaṃ gāthamāha –

    ༣༤༤.

    344.

    ‘‘ཡོ ནིབྦནཐོ ཝནཱདྷིམུཏྟོ,

    ‘‘Yo nibbanatho vanādhimutto,

    ཝནམུཏྟོ ཝནམེཝ དྷཱཝཏི།

    Vanamutto vanameva dhāvati;

    ཏཾ པུགྒལམེཐ པསྶཐ,

    Taṃ puggalametha passatha,

    མུཏྟོ བནྡྷནམེཝ དྷཱཝཏཱི’’ཏི༎

    Mutto bandhanameva dhāvatī’’ti.

    ཏསྶཏྠོ – ཡོ པུགྒལོ གིཧིབྷཱཝེ ཨཱལཡསངྑཱཏཾ ཝནཐཾ ཚཌྜེཏྭཱ པབྦཛིཏཏཱཡ ནིབྦནཐོ དིབྦཝིཧཱརསངྑཱཏེ ཏཔོཝནེ ཨདྷིམུཏྟོ གྷརཱཝཱསབནྡྷནསངྑཱཏཱ ཏཎྷཱཝནཱ མུཏྟོ ཧུཏྭཱ པུན གྷརཱཝཱསབནྡྷནསངྑཱཏཾ ཏཎྷཱཝནམེཝ དྷཱཝཏི, ཨེཐ ཏཾ པུགྒལཾ པསྶཐ, ཨེསོ གྷརཱཝཱསབནྡྷནཏོ མུཏྟོ གྷརཱཝཱསབནྡྷནམེཝ དྷཱཝཏཱིཏི།

    Tassattho – yo puggalo gihibhāve ālayasaṅkhātaṃ vanathaṃ chaḍḍetvā pabbajitatāya nibbanatho dibbavihārasaṅkhāte tapovane adhimutto gharāvāsabandhanasaṅkhātā taṇhāvanā mutto hutvā puna gharāvāsabandhanasaṅkhātaṃ taṇhāvanameva dhāvati, etha taṃ puggalaṃ passatha, eso gharāvāsabandhanato mutto gharāvāsabandhanameva dhāvatīti.

    ཨིམཾ པན དེསནཾ སུཏྭཱ སོ རཱཛཔུརིསཱནཾ ཨནྟརེ སཱུལགྒེ ནིསིནྣོཝ ཨུདཡབྦཡཾ པཊྛཔེཏྭཱ ཏིལཀྑཎཾ ཨཱརོཔེཏྭཱ སངྑཱརེ སམྨསནྟོ སོཏཱཔཏྟིཕལཾ པཏྭཱ སམཱཔཏྟིསུཁཾ ཨནུབྷཝནྟོ ཝེཧཱསཾ ཨུཔྤཏིཏྭཱ ཨཱཀཱསེནེཝ སཏྠུ སནྟིཀཾ གནྟྭཱ སཏྠཱརཾ ཝནྡིཏྭཱ སརཱཛིཀཱཡ པརིསཱཡ མཛ྄ཛྷེཡེཝ ཨརཧཏྟཾ པཱཔུཎཱིཏི།

    Imaṃ pana desanaṃ sutvā so rājapurisānaṃ antare sūlagge nisinnova udayabbayaṃ paṭṭhapetvā tilakkhaṇaṃ āropetvā saṅkhāre sammasanto sotāpattiphalaṃ patvā samāpattisukhaṃ anubhavanto vehāsaṃ uppatitvā ākāseneva satthu santikaṃ gantvā satthāraṃ vanditvā sarājikāya parisāya majjheyeva arahattaṃ pāpuṇīti.

    ཝིབྦྷནྟབྷིཀྑུཝཏྠུ ཏཏིཡཾ།

    Vibbhantabhikkhuvatthu tatiyaṃ.

    ༤. བནྡྷནཱགཱརཝཏྠུ

    4. Bandhanāgāravatthu

    ན ཏཾ དལ༹ྷནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ བནྡྷནཱགཱརཾ ཨཱརབྦྷ ཀཐེསི།

    Nataṃ daḷhanti imaṃ dhammadesanaṃ satthā jetavane viharanto bandhanāgāraṃ ārabbha kathesi.

    ཨེཀསྨིཾ ཀིར ཀཱལེ བཧཱུ སནྡྷིཙྪེདཀཔནྠགྷཱཏཀམནུསྶགྷཱཏཀེ ཙོརེ ཨཱནེཏྭཱ ཀོསལརཉྙོ དསྶཡིཾསུ། ཏེ རཱཛཱ ཨནྡུབནྡྷནརཛྫུབནྡྷནསངྑལིཀབནྡྷནེཧི བནྡྷཱཔེསི། ཏིཾསམཏྟཱཔི ཁོ ཛཱནཔདཱ བྷིཀྑཱུ སཏྠཱརཾ དཊྛུཀཱམཱ ཨཱགནྟྭཱ དིསྭཱ ཝནྡིཏྭཱ པུནདིཝསེ སཱཝཏྠིཾ པིཎྜཱཡ ཙརནྟཱ བནྡྷནཱགཱརཾ གནྟྭཱ ཏེ ཙོརེ དིསྭཱ པིཎྜཔཱཏཔཊིཀྐནྟཱ སཱཡནྷསམཡེ ཏཐཱགཏཾ ཨུཔསངྐམིཏྭཱ, ‘‘བྷནྟེ, ཨཛྫ ཨམྷེཧི པིཎྜཱཡ ཙརནྟེཧི བནྡྷནཱགཱརེ བཧཱུ ཙོརཱ ཨནྡུབནྡྷནཱདཱིཧི བདྡྷཱ མཧཱདུཀྑཾ ཨནུབྷཝནྟཱ དིཊྛཱ, ཏེ ཏཱནི བནྡྷནཱནི ཚིནྡིཏྭཱ པལཱཡིཏུཾ ན སཀྐོནྟི, ཨཏྠི ནུ ཁོ, བྷནྟེ, ཏེཧི བནྡྷནེཧི ཐིརཏརཾ ཨཉྙཾ བནྡྷནཾ ནཱམཱ’’ཏི པུཙྪིཾསུ། སཏྠཱ, ‘‘བྷིཀྑཝེ, ཀིཾ བནྡྷནཱནི ནཱམེཏཱནི, ཡཾ པནེཏཾ དྷནདྷཉྙཔུཏྟདཱརཱདཱིསུ ཏཎྷཱསངྑཱཏཾ ཀིལེསབནྡྷནཾ, ཨེཏཾ ཨེཏེཧི སཏགུཎེན སཧསྶགུཎེན སཏསཧསྶགུཎེན ཐིརཏརཾ, ཨེཝཾ མཧནྟམྤི པནེཏཾ དུཙྪིནྡནིཡཾ བནྡྷནཾ པོརཱཎཀཔཎྜིཏཱ ཚིནྡིཏྭཱ ཧིམཝནྟཾ པཝིསིཏྭཱ པབྦཛིཾསཱུ’’ཏི ཝཏྭཱ ཨཏཱིཏཾ ཨཱཧརི –

    Ekasmiṃ kira kāle bahū sandhicchedakapanthaghātakamanussaghātake core ānetvā kosalarañño dassayiṃsu. Te rājā andubandhanarajjubandhanasaṅkhalikabandhanehi bandhāpesi. Tiṃsamattāpi kho jānapadā bhikkhū satthāraṃ daṭṭhukāmā āgantvā disvā vanditvā punadivase sāvatthiṃ piṇḍāya carantā bandhanāgāraṃ gantvā te core disvā piṇḍapātapaṭikkantā sāyanhasamaye tathāgataṃ upasaṅkamitvā, ‘‘bhante, ajja amhehi piṇḍāya carantehi bandhanāgāre bahū corā andubandhanādīhi baddhā mahādukkhaṃ anubhavantā diṭṭhā, te tāni bandhanāni chinditvā palāyituṃ na sakkonti, atthi nu kho, bhante, tehi bandhanehi thirataraṃ aññaṃ bandhanaṃ nāmā’’ti pucchiṃsu. Satthā, ‘‘bhikkhave, kiṃ bandhanāni nāmetāni, yaṃ panetaṃ dhanadhaññaputtadārādīsu taṇhāsaṅkhātaṃ kilesabandhanaṃ, etaṃ etehi sataguṇena sahassaguṇena satasahassaguṇena thirataraṃ, evaṃ mahantampi panetaṃ ducchindaniyaṃ bandhanaṃ porāṇakapaṇḍitā chinditvā himavantaṃ pavisitvā pabbajiṃsū’’ti vatvā atītaṃ āhari –

    ཨཏཱིཏེ བཱརཱཎསིཡཾ བྲཧྨདཏྟེ རཛྫཾ ཀཱརེནྟེ བོདྷིསཏྟོ ཨེཀསྨིཾ དུགྒཏགཧཔཏིཀུལེ ནིབྦཏྟི། ཏསྶ ཝཡཔྤཏྟསྶ པིཏཱ ཀཱལམཀཱསི། སོ བྷཏིཾ ཀཏྭཱ མཱཏརཾ པོསེསི། ཨཐསྶ མཱཏཱ ཨནིཙྪམཱནསྶེཝ ཨེཀཾ ཀུལདྷཱིཏརཾ གེཧེ ཀཏྭཱ ཨཔརབྷཱགེ ཀཱལམཀཱསི། བྷརིཡཱཡཔིསྶ ཀུཙྪིཡཾ གབྦྷོ པཏིཊྛཧི། སོ གབྦྷསྶ པཏིཊྛིཏབྷཱཝཾ ཨཛཱནནྟོཝ, ‘‘བྷདྡེ, ཏྭཾ བྷཏིཾ ཀཏྭཱ ཛཱིཝ, ཨཧཾ པབྦཛིསྶཱམཱི’’ཏི ཨཱཧ། ‘‘སཱམི, ནནུ གབྦྷོ མེ པཏིཊྛིཏོ, མཡི ཝིཛཱཏཱཡ དཱརཀཾ དིསྭཱ པབྦཛིསྶསཱི’’ཏི ཨཱཧ། སོ ‘‘སཱདྷཱུ’’ཏི སམྤཊིཙྪིཏྭཱ ཏསྶཱ ཝིཛཱཏཀཱལེ, ‘‘བྷདྡེ, ཏྭཾ སོཏྠིནཱ ཝིཛཱཏཱ, ཨིདཱནི ཨཧཾ པབྦཛིསྶཱམཱི’’ཏི ཨཱཔུཙྪི། ཨཐ ནཾ སཱ ‘‘པུཏྟསྶ ཏཱཝ ཐནཔཱནཏོ ཨཔགམནཀཱལཾ ཨཱགམེཧཱི’’ཏི ཝཏྭཱ པུན གབྦྷཾ གཎྷི། སོ ཙིནྟེསི – ‘‘ཨིམཾ སམྤཊིཙྪཱཔེཏྭཱ གནྟུཾ ན སཀྐཱ, ཨིམིསྶཱ ཨནཱཙིཀྑིཏྭཱཝ པལཱཡིཏྭཱ པབྦཛིསྶཱམཱི’’ཏི། སོ ཏསྶཱ ཨནཱཙིཀྑིཏྭཱཝ རཏྟིབྷཱགེ ཨུཊྛཱཡ པལཱཡི། ཨཐ ནཾ ནགརགུཏྟིཀཱ ཨགྒཧེསུཾ། སོ ‘‘ཨཧཾ, སཱམི, མཱཏུཔོསཀོ ནཱམ, ཝིསྶཛྫེཐ མ’’ནྟི ཨཏྟཱནཾ ཝིསྶཛྫཱཔེཏྭཱ ཨེཀསྨིཾ ཋཱནེ ཝསིཏྭཱ ཨིསིཔབྦཛྫཾ པབྦཛིཏྭཱ ཨབྷིཉྙཱསམཱཔཏྟིཡོ ལབྷིཏྭཱ ཛྷཱནཀཱིལཱ༹ཡ ཀཱིལ༹ནྟོ ཝིཧཱསི། སོ ཏཏྠ ཝསནྟོཡེཝ ‘‘ཨེཝརཱུཔམྤི ནཱམ མེ དུཙྪིནྡནིཡཾ པུཏྟདཱརབནྡྷནཾ ཀིལེསབནྡྷནཾ ཚིནྣ’’ནྟི ཨིམཾ ཨུདཱནཾ ཨུདཱནེསི།

    Atīte bārāṇasiyaṃ brahmadatte rajjaṃ kārente bodhisatto ekasmiṃ duggatagahapatikule nibbatti. Tassa vayappattassa pitā kālamakāsi. So bhatiṃ katvā mātaraṃ posesi. Athassa mātā anicchamānasseva ekaṃ kuladhītaraṃ gehe katvā aparabhāge kālamakāsi. Bhariyāyapissa kucchiyaṃ gabbho patiṭṭhahi. So gabbhassa patiṭṭhitabhāvaṃ ajānantova, ‘‘bhadde, tvaṃ bhatiṃ katvā jīva, ahaṃ pabbajissāmī’’ti āha. ‘‘Sāmi, nanu gabbho me patiṭṭhito, mayi vijātāya dārakaṃ disvā pabbajissasī’’ti āha. So ‘‘sādhū’’ti sampaṭicchitvā tassā vijātakāle, ‘‘bhadde, tvaṃ sotthinā vijātā, idāni ahaṃ pabbajissāmī’’ti āpucchi. Atha naṃ sā ‘‘puttassa tāva thanapānato apagamanakālaṃ āgamehī’’ti vatvā puna gabbhaṃ gaṇhi. So cintesi – ‘‘imaṃ sampaṭicchāpetvā gantuṃ na sakkā, imissā anācikkhitvāva palāyitvā pabbajissāmī’’ti. So tassā anācikkhitvāva rattibhāge uṭṭhāya palāyi. Atha naṃ nagaraguttikā aggahesuṃ. So ‘‘ahaṃ, sāmi, mātuposako nāma, vissajjetha ma’’nti attānaṃ vissajjāpetvā ekasmiṃ ṭhāne vasitvā isipabbajjaṃ pabbajitvā abhiññāsamāpattiyo labhitvā jhānakīḷāya kīḷanto vihāsi. So tattha vasantoyeva ‘‘evarūpampi nāma me ducchindaniyaṃ puttadārabandhanaṃ kilesabandhanaṃ chinna’’nti imaṃ udānaṃ udānesi.

    སཏྠཱ ཨིམཾ ཨཏཱིཏཾ ཨཱཧརིཏྭཱ ཏེན ཨུདཱནིཏཾ ཨུདཱནཾ པཀཱསེནྟོ ཨིམཱ གཱཐཱ ཨབྷཱསི –

    Satthā imaṃ atītaṃ āharitvā tena udānitaṃ udānaṃ pakāsento imā gāthā abhāsi –

    ༣༤༥.

    345.

    ‘‘ན ཏཾ དལ༹ྷཾ བནྡྷནམཱཧུ དྷཱིརཱ,

    ‘‘Na taṃ daḷhaṃ bandhanamāhu dhīrā,

    ཡདཱཡསཾ དཱརུཛཔབྦཛཉྩ།

    Yadāyasaṃ dārujapabbajañca;

    སཱརཏྟརཏྟཱ མཎིཀུཎྜལེསུ,

    Sārattarattā maṇikuṇḍalesu,

    པུཏྟེསུ དཱརེསུ ཙ ཡཱ ཨཔེཀྑཱ༎

    Puttesu dāresu ca yā apekkhā.

    ༣༤༦.

    346.

    ‘‘ཨེཏཾ དལ༹ྷཾ བནྡྷནམཱཧུ དྷཱིརཱ,

    ‘‘Etaṃ daḷhaṃ bandhanamāhu dhīrā,

    ཨོཧཱརིནཾ སིཐིལཾ དུཔྤམུཉྩཾ།

    Ohārinaṃ sithilaṃ duppamuñcaṃ;

    ཨེཏམྤི ཚེཏྭཱན པརིབྦཛནྟི,

    Etampi chetvāna paribbajanti,

    ཨནཔེཀྑིནོ ཀཱམསུཁཾ པཧཱཡཱ’’ཏི༎

    Anapekkhino kāmasukhaṃ pahāyā’’ti.

    ཏཏྠ དྷཱིརཱཏི བུདྡྷཱདཡོ པཎྜིཏཔུརིསཱ ཡཾ སངྑལིཀསངྑཱཏཾ ཨཡསཱ ནིབྦཏྟཾ ཨཱཡསཾ, ཨནྡུབནྡྷནསངྑཱཏཾ དཱརུཛཾ, ཡཉྩ པབྦཛཏིཎེཧི ཝཱ ཨཉྙེཧི ཝཱ ཝཱཀཱདཱིཧི རཛྫུཾ ཀཏྭཱ ཀཏཾ རཛྫུབནྡྷནཾ, ཏཾ ཨསིཨཱདཱིཧི ཚིནྡིཏུཾ སཀྐུཎེཡྻབྷཱཝེན ཐིརནྟི ན ཝདནྟཱིཏི ཨཏྠོ། སཱརཏྟརཏྟཱཏི སཱརཏྟཱ ཧུཏྭཱ རཏྟཱ, བཧལཏརརཱགརཏྟཱཏི ཨཏྠོ། མཎིཀུཎྜལེསཱུཏི མཎཱིསུ ཙེཝ ཀུཎྜལེསུ ཙ, མཎིཝིཙིཏྟེསུ ཝཱ ཀུཎྜལེསུ། ཨེཏཾ དལ༹ྷནྟི ཡེ མཎིཀུཎྜལེསུ སཱརཏྟརཏྟཱ, ཏེསཾ སོ རཱགོ ཙ ཡཱ པུཏྟདཱརེསུ ཨཔེཀྑཱ ཏཎྷཱ, ཨེཏཾ ཀིལེསམཡཾ བནྡྷནཉྩ པཎྜིཏཔུརིསཱ དལ༹ྷནྟི ཝདནྟི། ཨོཧཱརིནནྟི ཨཱཀཌྜྷིཏྭཱ ཙཏཱུསུ ཨཔཱཡེསུ པཱཏནཏོ ཨཝཧརཏི ཧེཊྛཱ ཧརཏཱིཏི ཨོཧཱརིནཾ། སིཐིལནྟི བནྡྷནཊྛཱནེ ཚཝིཙམྨམཾསཱནི ན ཚིནྡཏི, ལོཧིཏཾ ན ནཱིཧརཏི, བནྡྷནབྷཱཝམྤི ཨཛཱནཱཔེཏྭཱ ཐལཔཐཛལཔཐཱདཱིསུ ཀམྨཱནི ཀཱཏུཾ དེཏཱིཏི སིཐིལཾ། དུཔྤམུཉྩནྟི ལོབྷཝསེན ཧི ཨེཀཝཱརམྤི ཨུཔྤནྣཾ ཀིལེསབནྡྷནཾ དཊྛཊྛཱནཏོ ཀཙྪཔོ ཝིཡ དུམྨོཙིཡཾ ཧོཏཱིཏི དུཔྤམུཉྩཾ། ཨེཏམྤི ཚེཏྭཱནཱཏི ཨེཏཾ དལ༹ྷམྤི ཀིལེསབནྡྷནཾ ཉཱཎཁགྒེན ཚིནྡིཏྭཱ ཨནཔེཀྑིནོ ཧུཏྭཱ ཀཱམསུཁཾ པཧཱཡ པརིབྦཛནྟི, པཀྐམནྟི པབྦཛནྟཱིཏི ཨཏྠོ།

    Tattha dhīrāti buddhādayo paṇḍitapurisā yaṃ saṅkhalikasaṅkhātaṃ ayasā nibbattaṃ āyasaṃ, andubandhanasaṅkhātaṃ dārujaṃ, yañca pabbajatiṇehi vā aññehi vā vākādīhi rajjuṃ katvā kataṃ rajjubandhanaṃ, taṃ asiādīhi chindituṃ sakkuṇeyyabhāvena thiranti na vadantīti attho. Sārattarattāti sārattā hutvā rattā, bahalatararāgarattāti attho. Maṇikuṇḍalesūti maṇīsu ceva kuṇḍalesu ca, maṇivicittesu vā kuṇḍalesu. Etaṃ daḷhanti ye maṇikuṇḍalesu sārattarattā, tesaṃ so rāgo ca yā puttadāresu apekkhā taṇhā, etaṃ kilesamayaṃ bandhanañca paṇḍitapurisā daḷhanti vadanti. Ohārinanti ākaḍḍhitvā catūsu apāyesu pātanato avaharati heṭṭhā haratīti ohārinaṃ. Sithilanti bandhanaṭṭhāne chavicammamaṃsāni na chindati, lohitaṃ na nīharati, bandhanabhāvampi ajānāpetvā thalapathajalapathādīsu kammāni kātuṃ detīti sithilaṃ. Duppamuñcanti lobhavasena hi ekavārampi uppannaṃ kilesabandhanaṃ daṭṭhaṭṭhānato kacchapo viya dummociyaṃ hotīti duppamuñcaṃ. Etampi chetvānāti etaṃ daḷhampi kilesabandhanaṃ ñāṇakhaggena chinditvā anapekkhino hutvā kāmasukhaṃ pahāya paribbajanti, pakkamanti pabbajantīti attho.

    དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི།

    Desanāvasāne bahū sotāpattiphalādīni pāpuṇiṃsūti.

    བནྡྷནཱགཱརཝཏྠུ ཙཏུཏྠཾ།

    Bandhanāgāravatthu catutthaṃ.

    ༥. ཁེམཱཐེརཱིཝཏྠུ

    5. Khemātherīvatthu

    ཡེ རཱགརཏྟཱཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཁེམཾ ནཱམ རཉྙོ བིམྦིསཱརསྶ ཨགྒམཧེསིཾ ཨཱརབྦྷ ཀཐེསི།

    Ye rāgarattāti imaṃ dhammadesanaṃ satthā veḷuvane viharanto khemaṃ nāma rañño bimbisārassa aggamahesiṃ ārabbha kathesi.

    སཱ ཀིར པདུམུཏྟརཔཱདམཱུལེ པཏྠིཏཔཏྠནཱ ཨཏིཝིཡ ཨབྷིརཱུཔཱ པཱསཱདིཀཱ ཨཧོསི། ‘‘སཏྠཱ ཀིར རཱུཔསྶ དོསཾ ཀཐེཏཱི’’ཏི སུཏྭཱ པན སཏྠུ སནྟིཀཾ གནྟུཾ ན ཨིཙྪི། རཱཛཱ ཏསྶཱ རཱུཔམདམཏྟབྷཱཝཾ ཉཏྭཱ ཝེལུ༹ཝནཝཎྞནཱཔཊིསཾཡུཏྟཱནི གཱིཏཱནི ཀཱརེཏྭཱ ནཊཱདཱིནཾ དཱཔེསི། ཏེསཾ ཏཱནི གཱཡནྟཱནཾ སདྡཾ སུཏྭཱ ཏསྶཱ ཝེལུ༹ཝནཾ ཨདིཊྛཔུབྦཾ ཝིཡ ཨསུཏཔུབྦཾ ཝིཡ ཙ ཨཧོསི། སཱ ‘‘ཀཏརཾ ཨུཡྻཱནཾ སནྡྷཱཡ གཱཡཐཱ’’ཏི པུཙྪིཏྭཱ, ‘‘དེཝཱི, ཏུམྷཱཀཾ ཝེལུ༹ཝནུཡྻཱནམེཝཱ’’ཏི ཝུཏྟེ ཨུཡྻཱནཾ གནྟུཀཱམཱ ཨཧོསི། སཏྠཱ ཏསྶཱ ཨཱགམནཾ ཉཏྭཱ པརིསམཛ྄ཛྷེ ནིསཱིདིཏྭཱ དྷམྨཾ དེསེནྟོཝ ཏཱལཝཎྚཾ ཨཱདཱཡ ཨཏྟནོ པསྶེ ཋཏྭཱ བཱིཛམཱནཾ ཨབྷིརཱུཔཾ ཨིཏྠིཾ ནིམྨིནི། ཁེམཱ, དེཝཱིཔི པཝིསམཱནཱཝ ཏཾ ཨིཏྠིཾ དིསྭཱ ཙིནྟེསི – ‘‘སམྨཱསམྦུདྡྷོ རཱུཔསྶ དོསཾ ཀཐེཏཱིཏི ཝདནྟི, ཨཡཉྩསྶ སནྟིཀེ ཨིཏྠཱི བཱིཛཡམཱནཱ ཋིཏཱ, ནཱཧཾ ཨིམིསྶཱ ཀལབྷཱགམྤི ཨུཔེམི, ན མཡཱ ཨཱིདིསཾ ཨིཏྠིརཱུཔཾ དིཊྛཔུབྦཾ, སཏྠཱརཾ ཨབྷཱུཏེན ཨབྦྷཱཙིཀྑནྟི མཉྙེ’’ཏི ཙིནྟེཏྭཱ ཏཐཱགཏསྶ ཀཐཱསདྡམྤི ཨནིསཱམེཏྭཱ ཏམེཝ ཨིཏྠིཾ ཨོལོཀཡམཱནཱ ཨཊྛཱསི། སཏྠཱ ཏསྶཱ ཏསྨིཾ རཱུཔེ ཨུཔྤནྣབཧུམཱནཏཾ ཉཏྭཱ ཏཾ རཱུཔཾ པཋམཝཡཱདིཝསེན དསྶེཏྭཱ ཧེཊྛཱ ཝུཏྟནཡེནེཝ པརིཡོསཱནེ ཨཊྛིམཏྟཱཝསཱནཾ ཀཏྭཱ དསྶེསི། ཁེམཱ ཏཾ དིསྭཱ ‘‘ཨེཝརཱུཔམྤི ནཱམེཏཾ རཱུཔཾ མུཧུཏྟེནེཝ ཁཡཝཡཾ སམྤཏྟཾ, ནཏྠི ཝཏ ཨིམསྨིཾ རཱུཔེ སཱརོ’’ཏི ཙིནྟེསི། སཏྠཱ ཏསྶཱ ཙིཏྟཱཙཱརཾ ཨོལོཀེཏྭཱ, ‘‘ཁེམེ, ཏྭཾ ‘ཨིམསྨིཾ རཱུཔེ སཱརོ ཨཏྠཱི’ཏི ཙིནྟེསི, པསྶ དཱནིསྶ ཨསཱརབྷཱཝ’’ནྟི ཝཏྭཱ ཨིམཾ གཱཐམཱཧ –

    Sā kira padumuttarapādamūle patthitapatthanā ativiya abhirūpā pāsādikā ahosi. ‘‘Satthā kira rūpassa dosaṃ kathetī’’ti sutvā pana satthu santikaṃ gantuṃ na icchi. Rājā tassā rūpamadamattabhāvaṃ ñatvā veḷuvanavaṇṇanāpaṭisaṃyuttāni gītāni kāretvā naṭādīnaṃ dāpesi. Tesaṃ tāni gāyantānaṃ saddaṃ sutvā tassā veḷuvanaṃ adiṭṭhapubbaṃ viya asutapubbaṃ viya ca ahosi. Sā ‘‘kataraṃ uyyānaṃ sandhāya gāyathā’’ti pucchitvā, ‘‘devī, tumhākaṃ veḷuvanuyyānamevā’’ti vutte uyyānaṃ gantukāmā ahosi. Satthā tassā āgamanaṃ ñatvā parisamajjhe nisīditvā dhammaṃ desentova tālavaṇṭaṃ ādāya attano passe ṭhatvā bījamānaṃ abhirūpaṃ itthiṃ nimmini. Khemā, devīpi pavisamānāva taṃ itthiṃ disvā cintesi – ‘‘sammāsambuddho rūpassa dosaṃ kathetīti vadanti, ayañcassa santike itthī bījayamānā ṭhitā, nāhaṃ imissā kalabhāgampi upemi, na mayā īdisaṃ itthirūpaṃ diṭṭhapubbaṃ, satthāraṃ abhūtena abbhācikkhanti maññe’’ti cintetvā tathāgatassa kathāsaddampi anisāmetvā tameva itthiṃ olokayamānā aṭṭhāsi. Satthā tassā tasmiṃ rūpe uppannabahumānataṃ ñatvā taṃ rūpaṃ paṭhamavayādivasena dassetvā heṭṭhā vuttanayeneva pariyosāne aṭṭhimattāvasānaṃ katvā dassesi. Khemā taṃ disvā ‘‘evarūpampi nāmetaṃ rūpaṃ muhutteneva khayavayaṃ sampattaṃ, natthi vata imasmiṃ rūpe sāro’’ti cintesi. Satthā tassā cittācāraṃ oloketvā, ‘‘kheme, tvaṃ ‘imasmiṃ rūpe sāro atthī’ti cintesi, passa dānissa asārabhāva’’nti vatvā imaṃ gāthamāha –

    ‘‘ཨཱཏུརཾ ཨསུཙིཾ པཱུཏིཾ, པསྶ ཁེམེ སམུསྶཡཾ།

    ‘‘Āturaṃ asuciṃ pūtiṃ, passa kheme samussayaṃ;

    ཨུགྒྷརནྟཾ པགྒྷརནྟཾ, བཱལཱནཾ ཨབྷིཔཏྠིཏ’’ནྟི༎ (ཨཔ॰ ཐེརཱི ༢.༢.༣༥༤)།

    Uggharantaṃ paggharantaṃ, bālānaṃ abhipatthita’’nti. (apa. therī 2.2.354);

    སཱ གཱཐཱཔརིཡོསཱནེ སོཏཱཔཏྟིཕལེ པཏིཊྛཧི། ཨཐ ནཾ སཏྠཱ, ‘‘ཁེམེ, ཨིམེ སཏྟཱ རཱགརཏྟཱ དོསཔདུཊྛཱ མོཧམཱུལ༹ྷཱ ཨཏྟནོ ཏཎྷཱསོཏཾ སམཏིཀྐམིཏུཾ ན སཀྐོནྟི, ཏཏྠེཝ ལགྒནྟཱི’’ཏི ཝཏྭཱ དྷམྨཾ དེསེནྟོ ཨིམཾ གཱཐམཱཧ –

    Sā gāthāpariyosāne sotāpattiphale patiṭṭhahi. Atha naṃ satthā, ‘‘kheme, ime sattā rāgarattā dosapaduṭṭhā mohamūḷhā attano taṇhāsotaṃ samatikkamituṃ na sakkonti, tattheva laggantī’’ti vatvā dhammaṃ desento imaṃ gāthamāha –

    ༣༤༧.

    347.

    ‘‘ཡེ རཱགརཏྟཱནུཔཏནྟི སོཏཾ,

    ‘‘Ye rāgarattānupatanti sotaṃ,

    སཡཾ ཀཏཾ མཀྐཊཀོཝ ཛཱལཾ།

    Sayaṃ kataṃ makkaṭakova jālaṃ;

    ཨེཏམྤི ཚེཏྭཱན ཝཛནྟི དྷཱིརཱ,

    Etampi chetvāna vajanti dhīrā,

    ཨནཔེཀྑིནོ སབྦདུཀྑཾ པཧཱཡཱ’’ཏི༎

    Anapekkhino sabbadukkhaṃ pahāyā’’ti.

    ཏཏྠ མཀྐཊཀོཝ ཛཱལནྟི ཡཐཱ ནཱམ མཀྐཊཀོ སུཏྟཛཱལཾ ཀཏྭཱ མཛ྄ཛྷེ ཋཱནེ ནཱབྷིམཎྜལེ ནིཔནྣོ པརིཡནྟེ པཏིཏཾ པཊངྒཾ ཝཱ མཀྑིཀཾ ཝཱ ཝེགེན གནྟྭཱ ཝིཛ྄ཛྷིཏྭཱ ཏསྶ རསཾ པིཝིཏྭཱ པུན གནྟྭཱ ཏསྨིཾཡེཝ ཋཱནེ ནིཔཛྫཏི, ཨེཝམེཝ ཡེ སཏྟཱ རཱགརཏྟཱ དོསཔདུཊྛཱ མོཧམཱུལ༹ྷཱ སཡཾཀཏཾ ཏཎྷཱསོཏཾ ཨནུཔཏནྟི, ཏེ ཏཾ སམཏིཀྐམིཏུཾ ན སཀྐོནྟི, ཨེཝཾ དུརཏིཀྐམཾ། ཨེཏམྤི ཚེཏྭཱན ཝཛནྟི དྷཱིརཱཏི པཎྜིཏཱ ཨེཏཾ བནྡྷནཾ ཚེཏྭཱ ཨནཔེཀྑིནོ ནིརཱལཡཱ ཧུཏྭཱ ཨརཧཏྟམགྒེན སབྦདུཀྑཾ པཧཱཡ ཝཛནྟི, གཙྪནྟཱིཏི ཨཏྠོ།

    Tattha makkaṭakova jālanti yathā nāma makkaṭako suttajālaṃ katvā majjhe ṭhāne nābhimaṇḍale nipanno pariyante patitaṃ paṭaṅgaṃ vā makkhikaṃ vā vegena gantvā vijjhitvā tassa rasaṃ pivitvā puna gantvā tasmiṃyeva ṭhāne nipajjati, evameva ye sattā rāgarattā dosapaduṭṭhā mohamūḷhā sayaṃkataṃ taṇhāsotaṃ anupatanti, te taṃ samatikkamituṃ na sakkonti, evaṃ duratikkamaṃ. Etampi chetvāna vajanti dhīrāti paṇḍitā etaṃ bandhanaṃ chetvā anapekkhino nirālayā hutvā arahattamaggena sabbadukkhaṃ pahāya vajanti, gacchantīti attho.

    དེསནཱཝསཱནེ ཁེམཱ ཨརཧཏྟེ པཏིཊྛཧི, མཧཱཛནསྶཱཔི སཱཏྠིཀཱ དྷམྨདེསནཱ ཨཧོསི། སཏྠཱ རཱཛཱནཾ ཨཱཧ – ‘‘མཧཱརཱཛ, ཁེམཱཡ པབྦཛིཏུཾ ཝཱ པརིནིབྦཱཡིཏུཾ ཝཱ ཝཊྚཏཱི’’ཏི། བྷནྟེ, པབྦཱཛེཐ ནཾ, ཨལཾ པརིནིབྦཱནེནཱཏི། སཱ པབྦཛིཏྭཱ ཨགྒསཱཝིཀཱ ཨཧོསཱིཏི།

    Desanāvasāne khemā arahatte patiṭṭhahi, mahājanassāpi sātthikā dhammadesanā ahosi. Satthā rājānaṃ āha – ‘‘mahārāja, khemāya pabbajituṃ vā parinibbāyituṃ vā vaṭṭatī’’ti. Bhante, pabbājetha naṃ, alaṃ parinibbānenāti. Sā pabbajitvā aggasāvikā ahosīti.

    ཁེམཱཐེརཱིཝཏྠུ པཉྩམཾ།

    Khemātherīvatthu pañcamaṃ.

    ༦. ཨུགྒསེནཝཏྠུ

    6. Uggasenavatthu

    མུཉྩ པུརེཏི ཨིམཾ དྷམྨདེསནཾ སཏྠཱ ཝེལུ༹ཝནེ ཝིཧརནྟོ ཨུགྒསེནཾ ཨཱརབྦྷ ཀཐེསི།

    Muñca pureti imaṃ dhammadesanaṃ satthā veḷuvane viharanto uggasenaṃ ārabbha kathesi.

    པཉྩསཏཱ ཀིར ནཊཱ སཾཝཙྪརེ ཝཱ ཚམཱསེ ཝཱ པཏྟེ རཱཛགཧཾ གནྟྭཱ རཉྙོ སཏྟཱཧཾ སམཛྫཾ ཀཏྭཱ བཧུཾ ཧིརཉྙསུཝཎྞཾ ལབྷནྟི, ཨནྟརནྟརེ ཨུཀྑེཔདཱཡཱནཾ པརིཡནྟོ ནཏྠི། མཧཱཛནོ མཉྩཱཏིམཉྩཱདཱིསུ ཋཏྭཱ སམཛྫཾ ཨོལོཀེསི། ཨཐེཀཱ ལངྒྷིཀདྷཱིཏཱ ཝཾསཾ ཨབྷིརུཡ྄ཧ ཏསྶ ཨུཔརི པརིཝཏྟིཏྭཱ ཏསྶ པརིཡནྟེ ཨཱཀཱསེ ཙངྐམམཱནཱ ནཙྩཏི ཙེཝ གཱཡཏི ཙ། ཏསྨིཾ སམཡེ ཨུགྒསེནོ ནཱམ སེཊྛིཔུཏྟོ སཧཱཡཀེན སདྡྷིཾ མཉྩཱཏིམཉྩེ ཋིཏོ ཏཾ ཨོལོཀེཏྭཱ ཏསྶཱ ཧཏྠཔཱདཝིཀྑེཔཱདཱིསུ ཨུཔྤནྣསིནེཧོ གེཧཾ གནྟྭཱ ‘‘ཏཾ ལབྷནྟོ ཛཱིཝིསྶཱམི, ཨལབྷནྟསྶ མེ ཨིདྷེཝ མརཎ’’ནྟི ཨཱཧཱརཱུཔཙྪེདཾ ཀཏྭཱ མཉྩཀེ ནིཔཛྫི། མཱཏཱཔིཏཱུཧི, ‘‘ཏཱཏ, ཀིཾ ཏེ རུཛྫཏཱི’’ཏི པུཙྪིཏོཔི ‘‘ཏཾ མེ ནཊདྷཱིཏརཾ ལབྷནྟསྶ ཛཱིཝིཏཾ ཨཏྠི, ཨལབྷནྟསྶ མེ ཨིདྷེཝ མརཎ’’ནྟི ཝཏྭཱ, ‘‘ཏཱཏ, མཱ ཨེཝཾ ཀརི, ཨཉྙཾ ཏེ ཨམྷཱཀཾ ཀུལསྶ ཙ བྷོགཱནཉྩ ཨནུརཱུཔཾ ཀུམཱརིཀཾ ཨཱནེསྶཱམཱ’’ཏི ཝུཏྟེཔི ཏཐེཝ ཝཏྭཱ ནིཔཛྫི། ཨཐསྶ པིཏཱ བཧུཾ ཡཱཙིཏྭཱཔི ཏཾ སཉྙཱཔེཏུཾ ཨསཀྐོནྟོ ཏསྶ སཧཱཡཾ པཀྐོསཱཔེཏྭཱ ཀཧཱཔཎསཧསྶཾ དཏྭཱ ‘‘ཨིམེ ཀཧཱཔཎེ གཧེཏྭཱ ཨཏྟནོ དྷཱིཏརཾ མཡ྄ཧཾ པུཏྟསྶ དེཏཱུ’’ཏི པཧིཎི། སོ ‘‘ནཱཧཾ ཀཧཱཔཎེ གཧེཏྭཱ དེམི, སཙེ པན སོ ཨིམཾ ཨལབྷིཏྭཱ ཛཱིཝིཏུཾ ན སཀྐོཏི, ཏེན ཧི ཨམྷེཧི སདྡྷིཾཡེཝ ཝིཙརཏུ, དསྶཱམིསྶ དྷཱིཏར’’ནྟི ཨཱཧ། མཱཏཱཔིཏརོ པུཏྟསྶ ཏམཏྠཾ ཨཱརོཙེསུཾ། སོ ‘‘ཨཧཾ ཏེཧི སདྡྷིཾ ཝིཙརིསྶཱམཱི’’ཏི ཝཏྭཱ ཡཱཙནྟཱནམྤི ཏེསཾ ཀཐཾ ཨནཱདིཡིཏྭཱ ནིཀྑམིཏྭཱ ནཱཊཀསྶ སནྟིཀཾ ཨགམཱསི། སོ ཏསྶ དྷཱིཏརཾ དཏྭཱ ཏེན སདྡྷིཾཡེཝ གཱམནིགམརཱཛདྷཱནཱིསུ སིཔྤཾ དསྶེནྟོ ཝིཙརི།

    Pañcasatā kira naṭā saṃvacchare vā chamāse vā patte rājagahaṃ gantvā rañño sattāhaṃ samajjaṃ katvā bahuṃ hiraññasuvaṇṇaṃ labhanti, antarantare ukkhepadāyānaṃ pariyanto natthi. Mahājano mañcātimañcādīsu ṭhatvā samajjaṃ olokesi. Athekā laṅghikadhītā vaṃsaṃ abhiruyha tassa upari parivattitvā tassa pariyante ākāse caṅkamamānā naccati ceva gāyati ca. Tasmiṃ samaye uggaseno nāma seṭṭhiputto sahāyakena saddhiṃ mañcātimañce ṭhito taṃ oloketvā tassā hatthapādavikkhepādīsu uppannasineho gehaṃ gantvā ‘‘taṃ labhanto jīvissāmi, alabhantassa me idheva maraṇa’’nti āhārūpacchedaṃ katvā mañcake nipajji. Mātāpitūhi, ‘‘tāta, kiṃ te rujjatī’’ti pucchitopi ‘‘taṃ me naṭadhītaraṃ labhantassa jīvitaṃ atthi, alabhantassa me idheva maraṇa’’nti vatvā, ‘‘tāta, mā evaṃ kari, aññaṃ te amhākaṃ kulassa ca bhogānañca anurūpaṃ kumārikaṃ ānessāmā’’ti vuttepi tatheva vatvā nipajji. Athassa pitā bahuṃ yācitvāpi taṃ saññāpetuṃ asakkonto tassa sahāyaṃ pakkosāpetvā kahāpaṇasahassaṃ datvā ‘‘ime kahāpaṇe gahetvā attano dhītaraṃ mayhaṃ puttassa detū’’ti pahiṇi. So ‘‘nāhaṃ kahāpaṇe gahetvā demi, sace pana so imaṃ alabhitvā jīvituṃ na sakkoti, tena hi amhehi saddhiṃyeva vicaratu, dassāmissa dhītara’’nti āha. Mātāpitaro puttassa tamatthaṃ ārocesuṃ. So ‘‘ahaṃ tehi saddhiṃ vicarissāmī’’ti vatvā yācantānampi tesaṃ kathaṃ anādiyitvā nikkhamitvā nāṭakassa santikaṃ agamāsi. So tassa dhītaraṃ datvā tena saddhiṃyeva gāmanigamarājadhānīsu sippaṃ dassento vicari.

    སཱཔི ཏེན སདྡྷིཾ སཾཝཱསམནྭཱཡ ནཙིརསྶེཝ པུཏྟཾ ལབྷིཏྭཱ ཀཱིལཱ༹པཡམཱནཱ ‘‘སཀཊགོཔཀསྶ པུཏྟ, བྷཎྜཧཱརཀསྶ པུཏྟ, ཀིཉྩི ཨཛཱནཀསྶ པུཏྟཱ’’ཏི ཝདཏི། སོཔི ནེསཾ སཀཊཔརིཝཏྟཀཾ ཀཏྭཱ ཋིཏཊྛཱནེ གོཎཱནཾ ཏིཎཾ ཨཱཧརཏི, སིཔྤདསྶནཊྛཱནེ ལདྡྷབྷཎྜཀཾ ཨུཀྑིཔིཏྭཱ ཧརཏི ། ཏདེཝ ཀིར སནྡྷཱཡ སཱ ཨིཏྠཱི པུཏྟཾ ཀཱིལཱ༹པཡམཱནཱ ཏཐཱ ཝདཏི། སོ ཨཏྟཱནཾ ཨཱརབྦྷ ཏསྶཱ གཱཡནབྷཱཝཾ ཉཏྭཱ ཏཾ པུཙྪི – ‘‘མཾ སནྡྷཱཡ ཀཐེསཱི’’ཏི? ‘‘ཨཱམ, ཏཾ སནྡྷཱཡཱ’’ཏི། ‘‘ཨེཝཾ སནྟེ ཨཧཾ པལཱཡིསྶཱམཱི’’ཏི ། སཱ ‘‘ཀིཾ པན མཡ྄ཧཾ ཏཡཱ པལཱཡིཏེན ཝཱ ཨཱགཏེན ཝཱ’’ཏི པུནཔྤུནཾ ཏདེཝ གཱིཏཾ གཱཡཏི། སཱ ཀིར ཨཏྟནོ རཱུཔསམྤཏྟིཉྩེཝ དྷནལཱབྷཉྩ ནིསྶཱཡ ཏཾ ཀིསྨིཉྩི ན མཉྙཏི། སོ ‘‘ཀིཾ ནུ ཁོ ནིསྶཱཡ ཨིམིསྶཱ ཨཡཾ མཱནོ’’ཏི ཙིནྟེནྟོ ‘‘སིཔྤཾ ནིསྶཱཡཱ’’ཏི ཉཏྭཱ ‘‘ཧོཏུ, སིཔྤཾ ཨུགྒཎྷིསྶཱམཱི’’ཏི སསུརཾ ཨུཔསངྐམིཏྭཱ ཏསྶ ཛཱནནཀསིཔྤཾ ཨུགྒཎྷིཏྭཱ གཱམནིགམཱདཱིསུ སིཔྤཾ དསྶེནྟོ ཨནུཔུབྦེན རཱཛགཧཾ ཨཱགནྟྭཱ ‘‘ཨིཏོ སཏྟམེ དིཝསེ ཨུགྒསེནོ སེཊྛིཔུཏྟོ ནགརཝཱསཱིནཾ སིཔྤཾ དསྶེསྶཏཱི’’ཏི ཨཱརོཙཱཔེསི།

    Sāpi tena saddhiṃ saṃvāsamanvāya nacirasseva puttaṃ labhitvā kīḷāpayamānā ‘‘sakaṭagopakassa putta, bhaṇḍahārakassa putta, kiñci ajānakassa puttā’’ti vadati. Sopi nesaṃ sakaṭaparivattakaṃ katvā ṭhitaṭṭhāne goṇānaṃ tiṇaṃ āharati, sippadassanaṭṭhāne laddhabhaṇḍakaṃ ukkhipitvā harati . Tadeva kira sandhāya sā itthī puttaṃ kīḷāpayamānā tathā vadati. So attānaṃ ārabbha tassā gāyanabhāvaṃ ñatvā taṃ pucchi – ‘‘maṃ sandhāya kathesī’’ti? ‘‘Āma, taṃ sandhāyā’’ti. ‘‘Evaṃ sante ahaṃ palāyissāmī’’ti . Sā ‘‘kiṃ pana mayhaṃ tayā palāyitena vā āgatena vā’’ti punappunaṃ tadeva gītaṃ gāyati. Sā kira attano rūpasampattiñceva dhanalābhañca nissāya taṃ kismiñci na maññati. So ‘‘kiṃ nu kho nissāya imissā ayaṃ māno’’ti cintento ‘‘sippaṃ nissāyā’’ti ñatvā ‘‘hotu, sippaṃ uggaṇhissāmī’’ti sasuraṃ upasaṅkamitvā tassa jānanakasippaṃ uggaṇhitvā gāmanigamādīsu sippaṃ dassento anupubbena rājagahaṃ āgantvā ‘‘ito sattame divase uggaseno seṭṭhiputto nagaravāsīnaṃ sippaṃ dassessatī’’ti ārocāpesi.

    ནགརཝཱསིནོ མཉྩཱཏིམཉྩཱདཡོ བནྡྷཱཔེཏྭཱ སཏྟམེ དིཝསེ སནྣིཔཏིཾསུ། སོཔི སཊྛིཧཏྠཾ ཝཾསཾ ཨབྷིརུཡ྄ཧ ཏསྶ མཏྠཀེ ཨཊྛཱསི། ཏཾ དིཝསཾ སཏྠཱ པཙྩཱུསཀཱལེ ལོཀཾ ཝོལོཀེནྟོ ཏཾ ཨཏྟནོ ཉཱཎཛཱལསྶ ཨནྟོ པཝིཊྛཾ དིསྭཱ ‘‘ཀིཾ ནུ ཁོ བྷཝིསྶཏཱི’’ཏི ཨཱཝཛྫེནྟོ ‘‘སྭེ སེཊྛིཔུཏྟོ སིཔྤཾ དསྶེསྶཱམཱིཏི ཝཾསམཏྠཀེ ཋསྶཏི, ཏསྶ དསྶནཏྠཾ མཧཱཛནོ སནྣིཔཏིསྶཏི། ཏཏྲ ཨཧཾ ཙཏུཔྤདིཀཾ གཱཐཾ དེསེསྶཱམི, ཏཾ སུཏྭཱ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ བྷཝིསྶཏི, ཨུགྒསེནོཔི ཨརཧཏྟེ པཏིཊྛཧིསྶཏཱི’’ཏི ཨཉྙཱསི། སཏྠཱ པུནདིཝསེ ཀཱལཾ སལླཀྑེཏྭཱ བྷིཀྑུསངྒྷཔརིཝུཏོ རཱཛགཧཾ པིཎྜཱཡ པཱཝིསི། ཨུགྒསེནོཔི སཏྠརི ཨནྟོནགརཾ ཨཔཝིཊྛེཡེཝ ཨུནྣཱདནཏྠཱཡ མཧཱཛནསྶ ཨངྒུལིསཉྙཾ དཏྭཱ ཝཾསམཏྠཀེ པཏིཊྛཱཡ ཨཱཀཱསེཡེཝ སཏྟ ཝཱརེ པརིཝཏྟིཏྭཱ ཨོརུཡ྄ཧ ཝཾསམཏྠཀེ ཨཊྛཱསི། ཏསྨིཾ ཁཎེ སཏྠཱ ནགརཾ པཝིསནྟོ ཡཐཱ ཏཾ པརིསཱ ན ཨོལོཀེཏི, ཨེཝཾ ཀཏྭཱ ཨཏྟཱནམེཝ ཨོལོཀཱཔེསི། ཨུགྒསེནོ པརིསཾ ཨོལོཀེཏྭཱ ‘‘ན མཾ པརིསཱ ཨོལོཀེཏཱི’’ཏི དོམནསྶཔྤཏྟོ ‘‘ཨིདཾ མཡཱ སཾཝཙྪརེ ཀཏྟབྦཾ སིཔྤཾ, སཏྠརི ནགརཾ པཝིསནྟེ པརིསཱ མཾ ཨནོལོཀེཏྭཱ སཏྠཱརམེཝ ཨོལོཀེཏི, མོགྷཾ ཝཏ མེ སིཔྤདསྶནཾ ཛཱཏ’’ནྟི ཙིནྟེསི།

    Nagaravāsino mañcātimañcādayo bandhāpetvā sattame divase sannipatiṃsu. Sopi saṭṭhihatthaṃ vaṃsaṃ abhiruyha tassa matthake aṭṭhāsi. Taṃ divasaṃ satthā paccūsakāle lokaṃ volokento taṃ attano ñāṇajālassa anto paviṭṭhaṃ disvā ‘‘kiṃ nu kho bhavissatī’’ti āvajjento ‘‘sve seṭṭhiputto sippaṃ dassessāmīti vaṃsamatthake ṭhassati, tassa dassanatthaṃ mahājano sannipatissati. Tatra ahaṃ catuppadikaṃ gāthaṃ desessāmi, taṃ sutvā caturāsītiyā pāṇasahassānaṃ dhammābhisamayo bhavissati, uggasenopi arahatte patiṭṭhahissatī’’ti aññāsi. Satthā punadivase kālaṃ sallakkhetvā bhikkhusaṅghaparivuto rājagahaṃ piṇḍāya pāvisi. Uggasenopi satthari antonagaraṃ apaviṭṭheyeva unnādanatthāya mahājanassa aṅgulisaññaṃ datvā vaṃsamatthake patiṭṭhāya ākāseyeva satta vāre parivattitvā oruyha vaṃsamatthake aṭṭhāsi. Tasmiṃ khaṇe satthā nagaraṃ pavisanto yathā taṃ parisā na oloketi, evaṃ katvā attānameva olokāpesi. Uggaseno parisaṃ oloketvā ‘‘na maṃ parisā oloketī’’ti domanassappatto ‘‘idaṃ mayā saṃvacchare kattabbaṃ sippaṃ, satthari nagaraṃ pavisante parisā maṃ anoloketvā satthārameva oloketi, moghaṃ vata me sippadassanaṃ jāta’’nti cintesi.

    སཏྠཱ ཏསྶ ཙིཏྟཾ ཉཏྭཱ མཧཱམོགྒལླཱནཾ ཨཱམནྟེཏྭཱ ‘‘གཙྪ, མོགྒལླཱན, སེཊྛིཔུཏྟཾ ཝདེཧི ‘སིཔྤཾ ཀིར དསྶེཏཱུ’’’ཏི ཨཱཧ། ཐེརོ གནྟྭཱ ཝཾསསྶ ཧེཊྛཱ ཋིཏོ སེཊྛིཔུཏྟཾ ཨཱམནྟེཏྭཱ ཨིམཾ གཱཐམཱཧ –

    Satthā tassa cittaṃ ñatvā mahāmoggallānaṃ āmantetvā ‘‘gaccha, moggallāna, seṭṭhiputtaṃ vadehi ‘sippaṃ kira dassetū’’’ti āha. Thero gantvā vaṃsassa heṭṭhā ṭhito seṭṭhiputtaṃ āmantetvā imaṃ gāthamāha –

    ‘‘ཨིངྒྷ པསྶ ནཊཔུཏྟ, ཨུགྒསེན མཧབྦལ།

    ‘‘Iṅgha passa naṭaputta, uggasena mahabbala;

    ཀརོཧི རངྒཾ པརིསཱཡ, ཧཱསཡསྶུ མཧཱཛན’’ནྟི༎

    Karohi raṅgaṃ parisāya, hāsayassu mahājana’’nti.

    སོ ཐེརསྶ ཀཐཾ སུཏྭཱ ཏུཊྛམཱནསོ ཧུཏྭཱ ‘‘སཏྠཱ མཉྙེ མམ སིཔྤཾ པསྶིཏུཀཱམོ’’ཏི ཝཾསམཏྠཀེ ཋིཏཀོཝ ཨིམཾ གཱཐམཱཧ –

    So therassa kathaṃ sutvā tuṭṭhamānaso hutvā ‘‘satthā maññe mama sippaṃ passitukāmo’’ti vaṃsamatthake ṭhitakova imaṃ gāthamāha –

    ‘‘ཨིངྒྷ པསྶ མཧཱཔཉྙ, མོགྒལླཱན མཧིདྡྷིཀ།

    ‘‘Iṅgha passa mahāpañña, moggallāna mahiddhika;

    ཀརོམི རངྒཾ པརིསཱཡ, ཧཱསཡཱམི མཧཱཛན’’ནྟི༎

    Karomi raṅgaṃ parisāya, hāsayāmi mahājana’’nti.

    ཨེཝཉྩ པན ཝཏྭཱ ཝཾསམཏྠཀཏོ ཝེཧཱསཾ ཨབྦྷུགྒནྟྭཱ ཨཱཀཱསེཝ ཙུདྡསཀྑཏྟུཾ པརིཝཏྟིཏྭཱ ཨོརུཡ྄ཧ ཝཾསམཏྠཀེཝ ཨཊྛཱསི། ཨཐ ནཾ སཏྠཱ, ‘‘ཨུགྒསེན, པཎྜིཏེན ནཱམ ཨཏཱིཏཱནཱགཏཔཙྩུཔྤནྣེསུ ཁནྡྷེསུ ཨཱལཡཾ པཧཱཡ ཛཱཏིཨཱདཱིཧི མུཙྩིཏུཾ ཝཊྚཏཱི’’ཏི ཝཏྭཱ ཨིམཾ གཱཐམཱཧ –

    Evañca pana vatvā vaṃsamatthakato vehāsaṃ abbhuggantvā ākāseva cuddasakkhattuṃ parivattitvā oruyha vaṃsamatthakeva aṭṭhāsi. Atha naṃ satthā, ‘‘uggasena, paṇḍitena nāma atītānāgatapaccuppannesu khandhesu ālayaṃ pahāya jātiādīhi muccituṃ vaṭṭatī’’ti vatvā imaṃ gāthamāha –

    ༣༤༨.

    348.

    ‘‘མུཉྩ པུརེ མུཉྩ པཙྪཏོ,

    ‘‘Muñca pure muñca pacchato,

    མཛ྄ཛྷེ མུཉྩ བྷཝསྶ པཱརགཱུ།

    Majjhe muñca bhavassa pāragū;

    སབྦཏྠ ཝིམུཏྟམཱནསོ,

    Sabbattha vimuttamānaso,

    ན པུནཾ ཛཱཏིཛརཾ ཨུཔེཧིསཱི’’ཏི༎

    Na punaṃ jātijaraṃ upehisī’’ti.

    ཏཏྠ མུཉྩ པུརེཏི ཨཏཱིཏེསུ ཁནྡྷེསུ ཨཱལཡཾ ནིཀནྟིཾ ཨཛ྄ཛྷོསཱནཾ པཏྠནཾ པརིཡུཊྛཱནཾ གཱཧཾ པརཱམཱསཾ ཏཎྷཾ མུཉྩ། པཙྪཏོཏི ཨནཱགཏེསུཔི ཁནྡྷེསུ ཨཱལཡཱདཱིནི མུཉྩ། མཛ྄ཛྷེཏི པཙྩུཔྤནྣེསུཔི ཏཱནི མུཉྩ། བྷཝསྶ པཱརགཱུཏི ཨེཝཾ སནྟེ ཏིཝིདྷསྶཱཔི བྷཝསྶ ཨབྷིཉྙཱཔརིཉྙཱཔཧཱནབྷཱཝནཱསཙྪིཀིརིཡཝསེན པཱརགཱུ པཱརངྒཏོ ཧུཏྭཱ ཁནྡྷདྷཱཏུཨཱཡཏནཱདིབྷེདེ སབྦསངྑཏེ ཝིམུཏྟམཱནསོ ཝིཧརནྟོ པུན ཛཱཏིཛརཱམརཎཱནི ན ཨུཔགཙྪཏཱིཏི ཨཏྠོ།

    Tattha muñca pureti atītesu khandhesu ālayaṃ nikantiṃ ajjhosānaṃ patthanaṃ pariyuṭṭhānaṃ gāhaṃ parāmāsaṃ taṇhaṃ muñca. Pacchatoti anāgatesupi khandhesu ālayādīni muñca. Majjheti paccuppannesupi tāni muñca. Bhavassa pāragūti evaṃ sante tividhassāpi bhavassa abhiññāpariññāpahānabhāvanāsacchikiriyavasena pāragū pāraṅgato hutvā khandhadhātuāyatanādibhede sabbasaṅkhate vimuttamānaso viharanto puna jātijarāmaraṇāni na upagacchatīti attho.

    དེསནཱཝསཱནེ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི། སེཊྛིཔུཏྟོཔི ཝཾསམཏྠཀེ ཋིཏཀོཝ སཧ པཊིསམྦྷིདཱཧི ཨརཧཏྟཾ པཏྭཱ ཝཾསཏོ ཨོརུཡ྄ཧ སཏྠུ སནྟིཀཾ ཨཱགནྟྭཱ པཉྩཔཏིཊྛིཏེན སཏྠཱརཾ ཝནྡིཏྭཱ པབྦཛྫཾ ཡཱཙི། ཨཐ ནཾ སཏྠཱ དཀྑིཎཧཏྠཾ པསཱརེཏྭཱ ‘‘ཨེཧི བྷིཀྑཱུ’’ཏི ཨཱཧ། སོ ཏཱཝདེཝ ཨཊྛཔརིཀྑཱརདྷརོ སཊྛིཝསྶིཀཏྠེརོ ཝིཡ ཨཧོསི། ཨཐ ནཾ བྷིཀྑཱུ, ‘‘ཨཱཝུསོ ཨུགྒསེན, སཊྛིཧཏྠསྶ ཏེ ཝཾསསྶ མཏྠཀཏོ ཨོཏརནྟསྶ བྷཡཾ ནཱམ ནཱཧོསཱི’’ཏི པུཙྪིཏྭཱ ‘‘ནཏྠི མེ, ཨཱཝུསོ, བྷཡ’’ནྟི ཝུཏྟེ སཏྠུ ཨཱརོཙེསུཾ, ‘‘བྷནྟེ, ཨུགྒསེནོ ‘ན བྷཱཡཱམཱི’ཏི ཝདཏི, ཨབྷཱུཏཾ ཝཏྭཱ ཨཉྙཾ བྱཱཀརོཏཱི’’ཏི། སཏྠཱ ‘‘ན, བྷིཀྑཝེ, མམ པུཏྟེན ཨུགྒསེནེན སདིསཱ ཚིནྣསཾཡོཛནཱ བྷིཀྑཱུ བྷཱཡནྟི, ན ཏསནྟཱི’’ཏི ཝཏྭཱ བྲཱཧྨཎཝགྒེ ཨིམཾ གཱཐམཱཧ –

    Desanāvasāne caturāsītiyā pāṇasahassānaṃ dhammābhisamayo ahosi. Seṭṭhiputtopi vaṃsamatthake ṭhitakova saha paṭisambhidāhi arahattaṃ patvā vaṃsato oruyha satthu santikaṃ āgantvā pañcapatiṭṭhitena satthāraṃ vanditvā pabbajjaṃ yāci. Atha naṃ satthā dakkhiṇahatthaṃ pasāretvā ‘‘ehi bhikkhū’’ti āha. So tāvadeva aṭṭhaparikkhāradharo saṭṭhivassikatthero viya ahosi. Atha naṃ bhikkhū, ‘‘āvuso uggasena, saṭṭhihatthassa te vaṃsassa matthakato otarantassa bhayaṃ nāma nāhosī’’ti pucchitvā ‘‘natthi me, āvuso, bhaya’’nti vutte satthu ārocesuṃ, ‘‘bhante, uggaseno ‘na bhāyāmī’ti vadati, abhūtaṃ vatvā aññaṃ byākarotī’’ti. Satthā ‘‘na, bhikkhave, mama puttena uggasenena sadisā chinnasaṃyojanā bhikkhū bhāyanti, na tasantī’’ti vatvā brāhmaṇavagge imaṃ gāthamāha –

    ‘‘སབྦསཾཡོཛནཾ ཚེཏྭཱ, ཡོ ཝེ ན པརིཏསྶཏི།

    ‘‘Sabbasaṃyojanaṃ chetvā, yo ve na paritassati;

    སངྒཱཏིགཾ ཝིསཾཡུཏྟཾ, ཏམཧཾ བྲཱུམི བྲཱཧྨཎ’’ནྟི༎ (དྷ॰ པ॰ ༣༩༧; སུ॰ ནི॰ ༦༢༦)།

    Saṅgātigaṃ visaṃyuttaṃ, tamahaṃ brūmi brāhmaṇa’’nti. (dha. pa. 397; su. ni. 626);

    དེསནཱཝསཱནེ བཧཱུནཾ དྷམྨཱབྷིསམཡོ ཨཧོསི། པུནེཀདིཝསཾ བྷིཀྑཱུ དྷམྨསབྷཱཡཾ ཀཐཾ སམུཊྛཱཔེསུཾ ‘‘ཀིཾ ནུ ཁོ, ཨཱཝུསོ, ཨེཝཾ ཨརཧཏྟཱུཔནིསྶཡསམྤནྣསྶ བྷིཀྑུནོ ནཊདྷཱིཏརཾ ནིསྶཱཡ ནཊེཧི སདྡྷིཾ ཝིཙརཎཀཱརཎཾ, ཀིཾ ཨརཧཏྟཱུཔནིསྶཡཀཱརཎ’’ནྟི? སཏྠཱ ཨཱགནྟྭཱ ‘‘ཀཱཡ ནུཏྠ, བྷིཀྑཝེ, ཨེཏརཧི ཀཐཱཡ སནྣིསིནྣཱ’’ཏི པུཙྪིཏྭཱ ‘‘ཨིམཱཡ ནཱམཱ’’ཏི ཝུཏྟེ, ‘‘བྷིཀྑཝེ, ཨུབྷཡམྤེཏཾ ཨིམིནཱ ཨེཝ ཀཏ’’ནྟི ཝཏྭཱ ཏམཏྠཾ པཀཱསེཏུཾ ཨཏཱིཏཾ ཨཱཧརི།

    Desanāvasāne bahūnaṃ dhammābhisamayo ahosi. Punekadivasaṃ bhikkhū dhammasabhāyaṃ kathaṃ samuṭṭhāpesuṃ ‘‘kiṃ nu kho, āvuso, evaṃ arahattūpanissayasampannassa bhikkhuno naṭadhītaraṃ nissāya naṭehi saddhiṃ vicaraṇakāraṇaṃ, kiṃ arahattūpanissayakāraṇa’’nti? Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte, ‘‘bhikkhave, ubhayampetaṃ iminā eva kata’’nti vatvā tamatthaṃ pakāsetuṃ atītaṃ āhari.

    ཨཏཱིཏེ ཀིར ཀསྶཔདསབལསྶ སུཝཎྞཙེཏིཡེ ཀརིཡམཱནེ བཱརཱཎསིཝཱསིནོ ཀུལཔུཏྟཱ བཧུཾ ཁཱདནཱིཡབྷོཛནཱིཡཾ ཡཱནཀེསུ ཨཱརོཔེཏྭཱ ‘‘ཧཏྠཀམྨཾ ཀརིསྶཱམཱ’’ཏི ཙེཏིཡཊྛཱནཾ གཙྪནྟཱ ཨནྟརཱམགྒེ ཨེཀཾ ཐེརཾ པིཎྜཱཡ པཝིསནྟཾ པསྶིཾསུ། ཨཐེཀཱ ཀུལདྷཱིཏཱ ཐེརཾ ཨོལོཀེཏྭཱ སཱམིཀཾ ཨཱཧ – ‘‘སཱམི, ཨཡྻོ, པིཎྜཱཡ པཝིསཏི, ཡཱནཀེ ཙ ནོ བཧུཾ ཁཱདནཱིཡཾ བྷོཛནཱིཡཾ, པཏྟམསྶ ཨཱཧར, བྷིཀྑཾ དསྶཱམཱ’’ཏི། སོ ཏཾ པཏྟཾ ཨཱཧརིཏྭཱ ཁཱདནཱིཡབྷོཛནཱིཡསྶ པཱུརེཏྭཱ ཐེརསྶ ཧཏྠེ པཏིཊྛཔེཏྭཱ ཨུབྷོཔི པཏྠནཾ ཀརིཾསུ, ‘‘བྷནྟེ, ཏུམྷེཧི དིཊྛདྷམྨསྶེཝ བྷཱགིནོ བྷཝེཡྻཱམཱ’’ཏི། སོཔི ཐེརོ ཁཱིཎཱསཝོཝ, ཏསྨཱ ཨོལོཀེནྟོ ཏེསཾ པཏྠནཱཡ སམིཛ྄ཛྷནབྷཱཝཾ ཉཏྭཱ སིཏཾ ཨཀཱསི། ཏཾ དིསྭཱ སཱ ཨིཏྠཱི སཱམིཀཾ ཨཱཧ – ‘‘ཨམྷཱཀཾ, ཨཡྻོ, སིཏཾ ཀརོཏི, ཨེཀོ ནཊཀཱརཀོ བྷཝིསྶཏཱི’’ཏི། སཱམིཀོཔིསྶཱ ‘‘ཨེཝཾ བྷཝིསྶཏི, བྷདྡེ’’ཏི ཝཏྭཱ པཀྐཱམི། ཨིདཾ ཏེསཾ པུབྦཀམྨཾ། ཏེ ཏཏྠ ཡཱཝཏཱཡུཀཾ ཋཏྭཱ དེཝལོཀེ ནིབྦཏྟིཏྭཱ ཏཏོ ཙཝིཏྭཱ སཱ ཨིཏྠཱི ནཊགེཧེ ནིབྦཏྟི, པུརིསོ སེཊྛིགེཧེ། སོ ‘‘ཨེཝཾ, བྷདྡེ, བྷཝིསྶཏཱི’’ཏི ཏསྶཱ པཊིཝཙནསྶ དིནྣཏྟཱ ནཊེཧི སདྡྷིཾ ཝིཙརི། ཁཱིཎཱསཝཏྠེརསྶ དིནྣཔིཎྜཔཱཏཾ ནིསྶཱཡ ཨརཧཏྟཾ པཱཔུཎི། སཱཔི ནཊདྷཱིཏཱ ‘‘ཡཱ མེ སཱམིཀསྶ གཏི, མཡ྄ཧམྤི སཱ ཨེཝ གཏཱི’’ཏི པབྦཛིཏྭཱ ཨརཧཏྟེ པཏིཊྛཧཱིཏི།

    Atīte kira kassapadasabalassa suvaṇṇacetiye kariyamāne bārāṇasivāsino kulaputtā bahuṃ khādanīyabhojanīyaṃ yānakesu āropetvā ‘‘hatthakammaṃ karissāmā’’ti cetiyaṭṭhānaṃ gacchantā antarāmagge ekaṃ theraṃ piṇḍāya pavisantaṃ passiṃsu. Athekā kuladhītā theraṃ oloketvā sāmikaṃ āha – ‘‘sāmi, ayyo, piṇḍāya pavisati, yānake ca no bahuṃ khādanīyaṃ bhojanīyaṃ, pattamassa āhara, bhikkhaṃ dassāmā’’ti. So taṃ pattaṃ āharitvā khādanīyabhojanīyassa pūretvā therassa hatthe patiṭṭhapetvā ubhopi patthanaṃ kariṃsu, ‘‘bhante, tumhehi diṭṭhadhammasseva bhāgino bhaveyyāmā’’ti. Sopi thero khīṇāsavova, tasmā olokento tesaṃ patthanāya samijjhanabhāvaṃ ñatvā sitaṃ akāsi. Taṃ disvā sā itthī sāmikaṃ āha – ‘‘amhākaṃ, ayyo, sitaṃ karoti, eko naṭakārako bhavissatī’’ti. Sāmikopissā ‘‘evaṃ bhavissati, bhadde’’ti vatvā pakkāmi. Idaṃ tesaṃ pubbakammaṃ. Te tattha yāvatāyukaṃ ṭhatvā devaloke nibbattitvā tato cavitvā sā itthī naṭagehe nibbatti, puriso seṭṭhigehe. So ‘‘evaṃ, bhadde, bhavissatī’’ti tassā paṭivacanassa dinnattā naṭehi saddhiṃ vicari. Khīṇāsavattherassa dinnapiṇḍapātaṃ nissāya arahattaṃ pāpuṇi. Sāpi naṭadhītā ‘‘yā me sāmikassa gati, mayhampi sā eva gatī’’ti pabbajitvā arahatte patiṭṭhahīti.

    ཨུགྒསེནཝཏྠུ ཚཊྛཾ།

    Uggasenavatthu chaṭṭhaṃ.

    ༧. ཙཱུལ༹དྷནུགྒཧཔཎྜིཏཝཏྠུ

    7. Cūḷadhanuggahapaṇḍitavatthu

    ཝིཏཀྐམཐིཏསྶཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཙཱུལ༹དྷནུགྒཧཔཎྜིཏཾ ཨཱརབྦྷ ཀཐེསི།

    Vitakkamathitassāti imaṃ dhammadesanaṃ satthā jetavane viharanto cūḷadhanuggahapaṇḍitaṃ ārabbha kathesi.

    ཨེཀོ ཀིར དཧརབྷིཀྑུ སལཱཀགྒེ ཨཏྟནོ པཏྟསལཱཀཾ གཧེཏྭཱ སལཱཀཡཱགུཾ ཨཱདཱཡ ཨཱསནསཱལཾ གནྟྭཱ པིཝི། ཏཏྠ ཨུདཀཾ ཨལབྷིཏྭཱ ཨུདཀཏྠཱཡ ཨེཀཾ གྷརཾ ཨགམཱསི། ཏཏྠ ཏཾ ཨེཀཱ ཀུམཱརིཀཱ དིསྭཱཝ ཨུཔྤནྣསིནེཧཱ, ‘‘བྷནྟེ, པུན པཱནཱིཡེན ཨཏྠེ སཏི ཨིདྷེཝ ཨཱགཙྪེཡྻཱཐཱ’’ཏི ཨཱཧ། སོ ཏཏོ པཊྛཱཡ ཡདཱ པཱནཱིཡཾ ན ལབྷཏི, ཏདཱ ཏཏྠེཝ གཙྪཏི། སཱཔིསྶ པཏྟཾ གཧེཏྭཱ པཱནཱིཡཾ དེཏི། ཨེཝཾ གཙྪནྟེ ཀཱལེ ཡཱགུམྤི དཏྭཱ པུནེཀདིཝསཾ ཏཏྠེཝ ནིསཱིདཱཔེཏྭཱ བྷཏྟཾ ཨདཱསི། སནྟིཀེ ཙསྶ ནིསཱིདིཏྭཱ , ‘‘བྷནྟེ, ཨིམསྨིཾ གེཧེ ན ཀིཉྩི ནཏྠི ནཱམ, ཀེཝལཾ མཡཾ ཝིཙརཎཀམནུསྶམེཝ ན ལབྷཱམཱ’’ཏི ཀཐཾ སམུཊྛཱཔེསི། སོ ཀཐིཔཱཧེནེཝ ཏསྶཱ ཀཐཾ སུཏྭཱ ཨུཀྐཎྛི། ཨཐ ནཾ ཨེཀདིཝསཾ ཨཱགནྟུཀཱ བྷིཀྑཱུ དིསྭཱ ‘‘ཀསྨཱ ཏྭཾ, ཨཱཝུསོ, ཀིསོ ཨུཔྤཎྜུཔཎྜུཀཛཱཏོསཱི’’ཏི པུཙྪིཏྭཱ ‘‘ཨུཀྐཎྛིཏོམྷི, ཨཱཝུསོ’’ཏི ཝུཏྟེ ཨཱཙརིཡུཔཛ྄ཛྷཱཡཱནཾ སནྟིཀཾ ནཡིཾསུ། ཏེཔི ནཾ སཏྠུ སནྟིཀཾ ནེཏྭཱ ཏམཏྠཾ ཨཱརོཙེསུཾ། སཏྠཱ ‘‘སཙྩཾ ཀིར ཏྭཾ, བྷིཀྑུ, ཨུཀྐཎྛིཏོསཱི’’ཏི པུཙྪིཏྭཱ ‘‘སཙྩ’’ནྟི ཝུཏྟེ ‘‘ཀསྨཱ ཏྭཾ མཱདིསསྶ ཨཱརདྡྷཝཱིརིཡསྶ བུདྡྷསྶ སཱསནེ པབྦཛིཏྭཱ ‘སོཏཱཔནྣོ’ཏི ཝཱ ‘སཀདཱགཱམཱི’ཏི ཝཱ ཨཏྟཱནཾ ཨཝདཱཔེཏྭཱ ‘ཨུཀྐཎྛིཏོ’ཏི ཝདཱཔེསི, བྷཱརིཡཾ ཏེ ཀམྨཾ ཀཏ’’ནྟི ཝཏྭཱ ‘‘ཀིཾ ཀཱརཎཱ ཨུཀྐཎྛིཏོསཱི’’ཏི པུཙྪི། ‘‘བྷནྟེ, ཨེཀཱ མཾ ཨིཏྠཱི ཨེཝམཱཧཱ’’ཏི ཝུཏྟེ, ‘‘བྷིཀྑུ, ཨནཙྪརིཡཾ ཨེཏཾ ཏསྶཱ ཀིརིཡཾ། སཱ ཧི པུབྦེ སཀལཛམྦུདཱིཔེ ཨགྒདྷནུགྒཧཔཎྜིཏཾ པཧཱཡ ཏཾམུཧུཏྟདིཊྛཀེ ཨེཀསྨིཾ སིནེཧཾ ཨུཔྤཱདེཏྭཱ ཏཾ ཛཱིཝིཏཀྑཡཾ པཱཔེསཱི’’ཏི ཝཏྭཱ ཏསྶཏྠསྶ པཀཱསནཏྠཾ བྷིཀྑཱུཧི ཡཱཙིཏོ –

    Eko kira daharabhikkhu salākagge attano pattasalākaṃ gahetvā salākayāguṃ ādāya āsanasālaṃ gantvā pivi. Tattha udakaṃ alabhitvā udakatthāya ekaṃ gharaṃ agamāsi. Tattha taṃ ekā kumārikā disvāva uppannasinehā, ‘‘bhante, puna pānīyena atthe sati idheva āgaccheyyāthā’’ti āha. So tato paṭṭhāya yadā pānīyaṃ na labhati, tadā tattheva gacchati. Sāpissa pattaṃ gahetvā pānīyaṃ deti. Evaṃ gacchante kāle yāgumpi datvā punekadivasaṃ tattheva nisīdāpetvā bhattaṃ adāsi. Santike cassa nisīditvā , ‘‘bhante, imasmiṃ gehe na kiñci natthi nāma, kevalaṃ mayaṃ vicaraṇakamanussameva na labhāmā’’ti kathaṃ samuṭṭhāpesi. So kathipāheneva tassā kathaṃ sutvā ukkaṇṭhi. Atha naṃ ekadivasaṃ āgantukā bhikkhū disvā ‘‘kasmā tvaṃ, āvuso, kiso uppaṇḍupaṇḍukajātosī’’ti pucchitvā ‘‘ukkaṇṭhitomhi, āvuso’’ti vutte ācariyupajjhāyānaṃ santikaṃ nayiṃsu. Tepi naṃ satthu santikaṃ netvā tamatthaṃ ārocesuṃ. Satthā ‘‘saccaṃ kira tvaṃ, bhikkhu, ukkaṇṭhitosī’’ti pucchitvā ‘‘sacca’’nti vutte ‘‘kasmā tvaṃ mādisassa āraddhavīriyassa buddhassa sāsane pabbajitvā ‘sotāpanno’ti vā ‘sakadāgāmī’ti vā attānaṃ avadāpetvā ‘ukkaṇṭhito’ti vadāpesi, bhāriyaṃ te kammaṃ kata’’nti vatvā ‘‘kiṃ kāraṇā ukkaṇṭhitosī’’ti pucchi. ‘‘Bhante, ekā maṃ itthī evamāhā’’ti vutte, ‘‘bhikkhu, anacchariyaṃ etaṃ tassā kiriyaṃ. Sā hi pubbe sakalajambudīpe aggadhanuggahapaṇḍitaṃ pahāya taṃmuhuttadiṭṭhake ekasmiṃ sinehaṃ uppādetvā taṃ jīvitakkhayaṃ pāpesī’’ti vatvā tassatthassa pakāsanatthaṃ bhikkhūhi yācito –

    ཨཏཱིཏེ ཙཱུལ༹དྷནུགྒཧཔཎྜིཏཀཱལེ ཏཀྐསིལཱཡཾ དིསཱཔཱམོཀྑསྶ ཨཱཙརིཡསྶ སནྟིཀེ སིཔྤཾ ཨུགྒཧེཏྭཱ ཏེན ཏུཊྛེན དིནྣཾ དྷཱིཏརཾ ཨཱདཱཡ བཱརཱཎསིཾ གཙྪནྟསྶ ཨེཀསྨིཾ ཨཊཝིམུཁེ ཨེཀཱུནཔཉྙཱསཱཡ ཀཎྜེཧི ཨེཀཱུནཔཉྙཱསཙོརེ མཱརེཏྭཱ ཀཎྜེསུ ཁཱིཎེསུ ཙོརཛེཊྛཀཾ གཧེཏྭཱ བྷཱུམིཡཾ པཱཏེཏྭཱ, ‘‘བྷདྡེ, ཨསིཾ ཨཱཧརཱ’’ཏི ཝུཏྟེ ཏཱཡ ཏངྑཎཾ དིཊྛཙོརེ སིནེཧཾ ཀཏྭཱ ཙོརསྶ ཧཏྠེ ཨསིཐརུཾ ཋཔེཏྭཱ ཙོརེན དྷནུགྒཧཔཎྜིཏསྶ མཱརིཏབྷཱཝཾ ཨཱཝིཀཏྭཱ ཙོརེན ཙ ཏཾ ཨཱདཱཡ གཙྪནྟེན ‘‘མམྤི ཨེསཱ ཨཉྙཾ དིསྭཱ ཨཏྟནོ སཱམིཀཾ ཝིཡ མཱརཱཔེསྶཏི , ཀིཾ མེ ཨིམཱཡཱ’’ཏི ཨེཀཾ ནདིཾ དིསྭཱ ཨོརིམཏཱིརེ ཏཾ ཋཔེཏྭཱ ཏསྶཱ བྷཎྜཀཾ ཨཱདཱཡ ‘‘ཏྭཾ ཨིདྷེཝ ཧོཧི, ཡཱཝཱཧཾ བྷཎྜིཀཾ ཨུཏྟཱརེམཱི’’ཏི ཏཏྠེཝ ཏཾ པཧཱཡ གམནབྷཱཝཉྩ ཨཱཝིཀཏྭཱ –

    Atīte cūḷadhanuggahapaṇḍitakāle takkasilāyaṃ disāpāmokkhassa ācariyassa santike sippaṃ uggahetvā tena tuṭṭhena dinnaṃ dhītaraṃ ādāya bārāṇasiṃ gacchantassa ekasmiṃ aṭavimukhe ekūnapaññāsāya kaṇḍehi ekūnapaññāsacore māretvā kaṇḍesu khīṇesu corajeṭṭhakaṃ gahetvā bhūmiyaṃ pātetvā, ‘‘bhadde, asiṃ āharā’’ti vutte tāya taṅkhaṇaṃ diṭṭhacore sinehaṃ katvā corassa hatthe asitharuṃ ṭhapetvā corena dhanuggahapaṇḍitassa māritabhāvaṃ āvikatvā corena ca taṃ ādāya gacchantena ‘‘mampi esā aññaṃ disvā attano sāmikaṃ viya mārāpessati , kiṃ me imāyā’’ti ekaṃ nadiṃ disvā orimatīre taṃ ṭhapetvā tassā bhaṇḍakaṃ ādāya ‘‘tvaṃ idheva hohi, yāvāhaṃ bhaṇḍikaṃ uttāremī’’ti tattheva taṃ pahāya gamanabhāvañca āvikatvā –

    ‘‘སབྦཾ བྷཎྜཾ སམཱདཱཡ, པཱརཾ ཏིཎྞོསི བྲཱཧྨཎ།

    ‘‘Sabbaṃ bhaṇḍaṃ samādāya, pāraṃ tiṇṇosi brāhmaṇa;

    པཙྩཱགཙྪ ལཧུཾ ཁིཔྤཾ, མམྤི ཏཱརེཧི དཱནིཏོ༎

    Paccāgaccha lahuṃ khippaṃ, mampi tārehi dānito.

    ‘‘ཨསནྠུཏཾ མཾ ཙིརསནྠུཏེན,

    ‘‘Asanthutaṃ maṃ cirasanthutena,

    ནིམཱིནི བྷོཏཱི ཨདྡྷུཝཾ དྷུཝེན།

    Nimīni bhotī addhuvaṃ dhuvena;

    མཡཱཔི བྷོཏཱི ནིམིནེཡྻ ཨཉྙཾ,

    Mayāpi bhotī nimineyya aññaṃ,

    ཨིཏོ ཨཧཾ དཱུརཏརཾ གམིསྶཾ༎

    Ito ahaṃ dūrataraṃ gamissaṃ.

    ‘‘ཀཱཡཾ ཨེལ༹གལཱགུམྦེ, ཀརོཏི ཨཧུཧཱསིཡཾ།

    ‘‘Kāyaṃ eḷagalāgumbe, karoti ahuhāsiyaṃ;

    ནཡཱིདྷ ནཙྩཾ ཝཱ གཱིཏཾ ཝཱ, ཏཱལ༹ཾ ཝཱ སུསམཱཧིཏཾ།

    Nayīdha naccaṃ vā gītaṃ vā, tāḷaṃ vā susamāhitaṃ;

    ཨནམྷིཀཱལེ སུསོཎི, ཀིཾ ནུ ཛགྒྷསི སོབྷནེ༎

    Anamhikāle susoṇi, kiṃ nu jagghasi sobhane.

    ‘‘སིངྒཱལ བཱལ དུམྨེདྷ, ཨཔྤཔཉྙོསི ཛམྦུཀ།

    ‘‘Siṅgāla bāla dummedha, appapaññosi jambuka;

    ཛཱིནོ མཙྪཉྩ པེསིཉྩ, ཀཔཎོ ཝིཡ ཛྷཱཡསི༎

    Jīno macchañca pesiñca, kapaṇo viya jhāyasi.

    ‘‘སུདསྶཾ ཝཛྫམཉྙེསཾ, ཨཏྟནོ པན དུདྡསཾ།

    ‘‘Sudassaṃ vajjamaññesaṃ, attano pana duddasaṃ;

    ཛཱིནཱ པཏིཉྩ ཛཱརཉྩ, མཉྙེ ཏྭཉྙེཝ ཛྷཱཡསི༎

    Jīnā patiñca jārañca, maññe tvaññeva jhāyasi.

    ‘‘ཨེཝམེཏཾ མིགརཱཛ, ཡཐཱ བྷཱསསི ཛམྦུཀ།

    ‘‘Evametaṃ migarāja, yathā bhāsasi jambuka;

    སཱ ནཱུནཱཧཾ ཨིཏོ གནྟྭཱ, བྷཏྟུ ཧེསྶཾ ཝསཱནུགཱ༎

    Sā nūnāhaṃ ito gantvā, bhattu hessaṃ vasānugā.

    ‘‘ཡོ ཧརེ མཏྟིཀཾ ཐཱལཾ, ཀཾསཐཱལམྤི སོ ཧརེ།

    ‘‘Yo hare mattikaṃ thālaṃ, kaṃsathālampi so hare;

    ཀཏཉྩེཝ ཏཡཱ པཱཔཾ, པུནཔེཝཾ ཀརིསྶསཱི’’ཏི༎ (ཛཱ॰ ༡.༥.༡༢༨-༡༣༤) –

    Katañceva tayā pāpaṃ, punapevaṃ karissasī’’ti. (jā. 1.5.128-134) –

    ཨིམཾ པཉྩཀནིཔཱཏེ ཙཱུལ༹དྷནུགྒཧཛཱཏཀཾ ཝིཏྠཱརེཏྭཱ ‘‘ཏདཱ ཙཱུལ༹དྷནུགྒཧཔཎྜིཏོ ཏྭཾ ཨཧོསི, སཱ ཨིཏྠཱི ཨེཏརཧི ཨཡཾ ཀུམཱརིཀཱ, སིངྒཱལརཱུཔེན ཨཱགནྟྭཱ ཏསྶཱ ནིགྒཧཀཱརཀོ སཀྐོ དེཝརཱཛཱ ཨཧམེཝཱ’’ཏི ཝཏྭཱ ‘‘ཨེཝཾ སཱ ཨིཏྠཱི ཏཾམུཧུཏྟདིཊྛཀེ ཨེཀསྨིཾ སིནེཧེན སཀལཛམྦུདཱིཔེ ཨགྒཔཎྜིཏཾ ཛཱིཝིཏཱ ཝོརོཔེསི, ཏཾ ཨིཏྠིཾ ཨཱརབྦྷ ཨུཔྤནྣཾ ཏཝ ཏཎྷཾ ཚིནྡིཏྭཱ ཝིཧརཱཧི བྷིཀྑཱུ’’ཏི ཏཾ ཨོཝདིཏྭཱ ཨུཏྟརིམྤི དྷམྨཾ དེསེནྟོ ཨིམཱ དྭེ གཱཐཱ ཨབྷཱསི –

    Imaṃ pañcakanipāte cūḷadhanuggahajātakaṃ vitthāretvā ‘‘tadā cūḷadhanuggahapaṇḍito tvaṃ ahosi, sā itthī etarahi ayaṃ kumārikā, siṅgālarūpena āgantvā tassā niggahakārako sakko devarājā ahamevā’’ti vatvā ‘‘evaṃ sā itthī taṃmuhuttadiṭṭhake ekasmiṃ sinehena sakalajambudīpe aggapaṇḍitaṃ jīvitā voropesi, taṃ itthiṃ ārabbha uppannaṃ tava taṇhaṃ chinditvā viharāhi bhikkhū’’ti taṃ ovaditvā uttarimpi dhammaṃ desento imā dve gāthā abhāsi –

    ༣༤༩.

    349.

    ‘‘ཝིཏཀྐམཐིཏསྶ ཛནྟུནོ,

    ‘‘Vitakkamathitassa jantuno,

    ཏིབྦརཱགསྶ སུབྷཱནུཔསྶིནོ།

    Tibbarāgassa subhānupassino;

    བྷིཡྻོ ཏཎྷཱ པཝཌྜྷཏི,

    Bhiyyo taṇhā pavaḍḍhati,

    ཨེས ཁོ དལ༹ྷཾ ཀརོཏི བནྡྷནཾ༎

    Esa kho daḷhaṃ karoti bandhanaṃ.

    ༣༥༠.

    350.

    ‘‘ཝིཏཀྐཱུཔསམེ ཙ ཡོ རཏོ,

    ‘‘Vitakkūpasame ca yo rato,

    ཨསུབྷཾ བྷཱཝཡཏེ སདཱ སཏོ།

    Asubhaṃ bhāvayate sadā sato;

    ཨེས ཁོ བྱནྟི ཀཱཧིཏི,

    Esa kho byanti kāhiti,

    ཨེས ཚེཙྪཏི མཱརབནྡྷན’’ནྟི༎

    Esa checchati mārabandhana’’nti.

    ཏཏྠ ཝིཏཀྐམཐིཏསྶཱཏི ཀཱམཝིཏཀྐཱདཱིཧི ཝིཏཀྐེཧི ནིམྨཐིཏསྶ། ཏིབྦརཱགསྶཱཏི བཧལརཱགསྶ། སུབྷཱནུཔསྶིནོཏི ཨིཊྛཱརམྨཎེ སུབྷནིམིཏྟགཱཧཱདིཝསེན ཝིསྶཊྛམཱནསཏཱཡ སུབྷནྟི ཨནུཔསྶནྟསྶ། ཏཎྷཱཏི ཨེཝརཱུཔསྶ ཛྷཱནཱདཱིསུ ཨེཀམྤི ན ཝཌྜྷཏི, ཨཐ ཁོ ཚདྭཱརིཀཱ ཏཎྷཱཡེཝ བྷིཡྻོ ཝཌྜྷཏི། ཨེས ཁོཏི ཨེསོ པུགྒལོ ཏཎྷཱབནྡྷནཾ དལ༹ྷཾ སུཐིརཾ ཀརོཏི། ཝིཏཀྐཱུཔསམེཏི མིཙྪཱཝིཏཀྐཱདཱིནཾ ཝཱུཔསམསངྑཱཏེ དསསུ ཨསུབྷེསུ པཋམཛ྄ཛྷཱནེ། སདཱ སཏོཏི ཡོ ཨེཏྠ ཨབྷིརཏོ ཧུཏྭཱ ནིཙྩཾ ཨུཔཊྛིཏསཏིཏཱཡ སཏོ ཏཾ ཨསུབྷཛྷཱནཾ བྷཱཝེཏི། བྱནྟི ཀཱཧིཏཱིཏི ཨེས བྷིཀྑུ ཏཱིསུ བྷཝེསུ ཨུཔྤཛྫནཀཾ ཏཎྷཾ ཝིགཏནྟཾ ཀརིསྶཏི། མཱརབནྡྷནནྟི ཨེསོ ཏེབྷཱུམཀཝཊྚསངྑཱཏཾ མཱརབནྡྷནམྤི ཚིནྡིསྶཏཱིཏི ཨཏྠོ།

    Tattha vitakkamathitassāti kāmavitakkādīhi vitakkehi nimmathitassa. Tibbarāgassāti bahalarāgassa. Subhānupassinoti iṭṭhārammaṇe subhanimittagāhādivasena vissaṭṭhamānasatāya subhanti anupassantassa. Taṇhāti evarūpassa jhānādīsu ekampi na vaḍḍhati, atha kho chadvārikā taṇhāyeva bhiyyo vaḍḍhati. Esa khoti eso puggalo taṇhābandhanaṃ daḷhaṃ suthiraṃ karoti. Vitakkūpasameti micchāvitakkādīnaṃ vūpasamasaṅkhāte dasasu asubhesu paṭhamajjhāne. Sadā satoti yo ettha abhirato hutvā niccaṃ upaṭṭhitasatitāya sato taṃ asubhajhānaṃ bhāveti. Byanti kāhitīti esa bhikkhu tīsu bhavesu uppajjanakaṃ taṇhaṃ vigatantaṃ karissati. Mārabandhananti eso tebhūmakavaṭṭasaṅkhātaṃ mārabandhanampi chindissatīti attho.

    དེསནཱཝསཱནེ སོ བྷིཀྑུ སོཏཱཔཏྟིཕལེ པཏིཊྛཧི, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི།

    Desanāvasāne so bhikkhu sotāpattiphale patiṭṭhahi, sampattānampi sātthikā dhammadesanā ahosīti.

    ཙཱུལ༹དྷནུགྒཧཔཎྜིཏཝཏྠུ སཏྟམཾ།

    Cūḷadhanuggahapaṇḍitavatthu sattamaṃ.

    ༨. མཱརཝཏྠུ

    8. Māravatthu

    ནིཊྛངྒཏོཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ མཱརཾ ཨཱརབྦྷ ཀཐེསི།

    Niṭṭhaṅgatoti imaṃ dhammadesanaṃ satthā jetavane viharanto māraṃ ārabbha kathesi.

    ཨེཀདིཝསཉྷི ཝིཀཱལེ སམྦཧུལཱ ཐེརཱ ཛེཏཝནཝིཧཱརཾ པཝིསིཏྭཱ རཱཧུལཏྠེརསྶ ཝསནཊྛཱནཾ གནྟྭཱ ཏཾ ཨུཊྛཱཔེསུཾ། སོ ཨཉྙཏྠ ཝསནཊྛཱནཾ ཨཔསྶནྟོ ཏཐཱགཏསྶ གནྡྷཀུཊིཡཱ པམུཁེ ནིཔཛྫི། ཏདཱ སོ ཨཱཡསྨཱ ཨརཧཏྟཾ པཏྟོ ཨཝསྶིཀོཝ ཧོཏི། མཱརོ ཝསཝཏྟིབྷཝནེ ཋིཏོཡེཝ ཏཾ ཨཱཡསྨནྟཾ གནྡྷཀུཊིཔམུཁེ ནིཔནྣཾ དིསྭཱ ཙིནྟེསི – ‘‘སམཎསྶ གོཏམསྶ རུཛནཀཨངྒུལཱི བཧི ནིཔནྣོ, སཡཾ ཨནྟོགནྡྷཀུཊིཡཾ ནིཔནྣོ, ཨངྒུལིཡཱ པཱིལི༹ཡམཱནཱཡ སཡམྤི པཱིལི༹ཏོ བྷཝིསྶཏཱི’’ཏི། སོ མཧནྟཾ ཧཏྠིརཱཛཝཎྞཾ ཨབྷིནིམྨིནིཏྭཱ ཨཱགམྨ སོཎྜཱཡ ཐེརསྶ མཏྠཀཾ པརིཀྑིཔིཏྭཱ མཧནྟེན སདྡེན ཀོཉྩནཱདཾ རཝི། སཏྠཱ གནྡྷཀུཊིཡཾ ནིསིནྣོཝ ཏསྶ མཱརབྷཱཝཾ ཉཏྭཱ, ‘‘མཱར, ཏཱདིསཱནཾ སཏསཧསྶེནཱཔི མམ པུཏྟསྶ བྷཡཾ ཨུཔྤཱདེཏུཾ ན སཀྐཱ། པུཏྟོ ཧི མེ ཨསནྟཱསཱི ཝཱིཏཏཎྷོ མཧཱཝཱིརིཡོ མཧཱཔཉྙོ’’ཏི ཝཏྭཱ ཨིམཱ གཱཐཱ ཨབྷཱསི –

    Ekadivasañhi vikāle sambahulā therā jetavanavihāraṃ pavisitvā rāhulattherassa vasanaṭṭhānaṃ gantvā taṃ uṭṭhāpesuṃ. So aññattha vasanaṭṭhānaṃ apassanto tathāgatassa gandhakuṭiyā pamukhe nipajji. Tadā so āyasmā arahattaṃ patto avassikova hoti. Māro vasavattibhavane ṭhitoyeva taṃ āyasmantaṃ gandhakuṭipamukhe nipannaṃ disvā cintesi – ‘‘samaṇassa gotamassa rujanakaaṅgulī bahi nipanno, sayaṃ antogandhakuṭiyaṃ nipanno, aṅguliyā pīḷiyamānāya sayampi pīḷito bhavissatī’’ti. So mahantaṃ hatthirājavaṇṇaṃ abhinimminitvā āgamma soṇḍāya therassa matthakaṃ parikkhipitvā mahantena saddena koñcanādaṃ ravi. Satthā gandhakuṭiyaṃ nisinnova tassa mārabhāvaṃ ñatvā, ‘‘māra, tādisānaṃ satasahassenāpi mama puttassa bhayaṃ uppādetuṃ na sakkā. Putto hi me asantāsī vītataṇho mahāvīriyo mahāpañño’’ti vatvā imā gāthā abhāsi –

    ༣༥༡.

    351.

    ‘‘ནིཊྛངྒཏོ ཨསནྟཱསཱི, ཝཱིཏཏཎྷོ ཨནངྒཎོ།

    ‘‘Niṭṭhaṅgato asantāsī, vītataṇho anaṅgaṇo;

    ཨཙྪིནྡི བྷཝསལླཱནི, ཨནྟིམོཡཾ སམུསྶཡོ༎

    Acchindi bhavasallāni, antimoyaṃ samussayo.

    ༣༥༢.

    352.

    ‘‘ཝཱིཏཏཎྷོ ཨནཱདཱནོ, ནིརུཏྟིཔདཀོཝིདོ།

    ‘‘Vītataṇho anādāno, niruttipadakovido;

    ཨཀྑརཱནཾ སནྣིཔཱཏཾ, ཛཉྙཱ པུབྦཱཔརཱནི ཙ།

    Akkharānaṃ sannipātaṃ, jaññā pubbāparāni ca;

    ས ཝེ ཨནྟིམསཱརཱིརོ,

    Sa ve antimasārīro,

    མཧཱཔཉྙོ མཧཱཔུརིསོཏི ཝུཙྩཏཱི’’ཏི༎

    Mahāpañño mahāpurisoti vuccatī’’ti.

    ཏཏྠ ནིཊྛངྒཏོཏི ཨིམསྨིཾ སཱསནེ པབྦཛིཏཱནཾ ཨརཧཏྟཾ ནིཊྛཾ ནཱམ, ཏཾ གཏོ པཏྟོཏི ཨཏྠོ། ཨསནྟཱསཱིཏི ཨབྦྷནྟརེ རཱགསནྟཱསཱདཱིནཾ ཨབྷཱཝེན ཨསནྟསནཀོ། ཨཙྪིནྡི བྷཝསལླཱནཱིཏི སབྦཱནིཔི བྷཝགཱམཱིནི སལླཱནི ཨཙྪིནྡི། སམུསྶཡོཏི ཨཡཾ ཨེཏསྶ ཨནྟིམོ དེཧོ།

    Tattha niṭṭhaṅgatoti imasmiṃ sāsane pabbajitānaṃ arahattaṃ niṭṭhaṃ nāma, taṃ gato pattoti attho. Asantāsīti abbhantare rāgasantāsādīnaṃ abhāvena asantasanako. Acchindi bhavasallānīti sabbānipi bhavagāmīni sallāni acchindi. Samussayoti ayaṃ etassa antimo deho.

    ཨནཱདཱནོཏི ཁནྡྷཱདཱིསུ ནིགྒཧཎོ། ནིརུཏྟིཔདཀོཝིདོཏི ནིརུཏྟིཡཉྩ སེསཔདེསུ ཙཱཏི ཙཏཱུསུཔི པཊིསམྦྷིདཱསུ ཚེཀོཏི ཨཏྠོ། ཨཀྑརཱནཾ སནྣིཔཱཏཾ, ཛཉྙཱ པུབྦཱཔརཱནི ཙཱཏི ཨཀྑརཱནཾ སནྣིཔཱཏསངྑཱཏཾ ཨཀྑརཔིཎྜཉྩ ཛཱནཱཏི, པུབྦཀྑརེན ཨཔརཀྑརཾ, ཨཔརཀྑརེན པུབྦཀྑརཉྩ ཛཱནཱཏི། པུབྦཀྑརེན ཨཔརཀྑརཾ ཛཱནཱཏི ནཱམ – ཨཱདིམྷི པཉྙཱཡམཱནེ མཛ྄ཛྷཔརིཡོསཱནེསུ ཨཔཉྙཱཡམཱནེསུཔི ‘‘ཨིམེསཾ ཨཀྑརཱནཾ ཨིདཾ མཛ྄ཛྷཾ, ཨིདཾ པརིཡོསཱན’’ནྟི ཛཱནཱཏི། ཨཔརཀྑརེན པུབྦཀྑརཾ ཛཱནཱཏི ནཱམ – ཨནྟེ པཉྙཱཡམཱནེ ཨཱདིམཛ྄ཛྷེསུ ཨཔཉྙཱཡམཱནེསུ ‘‘ཨིམེསཾ ཨཀྑརཱནཾ ཨིདཾ མཛ྄ཛྷཾ, ཨཡཾ ཨཱདཱི’’ཏི ཛཱནཱཏི། མཛ྄ཛྷེ པཉྙཱཡམཱནེཔི ‘‘ཨིམེསཾ ཨཀྑརཱནཾ ཨཡཾ ཨཱདི, ཨཡཾ ཨནྟོ’’ཏི ཛཱནཱཏི། ཨེཝཾ མཧཱཔཉྙོ། ས ཝེ ཨནྟིམསཱརཱིརོཏི ཨེས ཀོཊིཡཾ ཋིཏསརཱིརོ, མཧནྟཱནཾ ཨཏྠདྷམྨནིརུཏྟིཔཊིབྷཱནཱནཾ སཱིལཀྑནྡྷཱདཱིནཉྩ པརིགྒཱཧིཀཱཡ པཉྙཱཡ སམནྣཱགཏཏྟཱ མཧཱཔཉྙོ, ‘‘ཝིམུཏྟཙིཏྟཏྟཱ ཁྭཱཧཾ, སཱརིཔུཏྟ, མཧཱཔུརིསོཏི ཝདཱམཱི’’ཏི (སཾ॰ ནི॰ ༥.༣༧༧) ཝཙནཏོ ཝིམུཏྟཙིཏྟཏཱཡ ཙ མཧཱཔུརིསོཏི ཝུཙྩཏཱིཏི ཨཏྠོ།

    Anādānoti khandhādīsu niggahaṇo. Niruttipadakovidoti niruttiyañca sesapadesu cāti catūsupi paṭisambhidāsu chekoti attho. Akkharānaṃ sannipātaṃ, jaññā pubbāparāni cāti akkharānaṃ sannipātasaṅkhātaṃ akkharapiṇḍañca jānāti, pubbakkharena aparakkharaṃ, aparakkharena pubbakkharañca jānāti. Pubbakkharena aparakkharaṃ jānāti nāma – ādimhi paññāyamāne majjhapariyosānesu apaññāyamānesupi ‘‘imesaṃ akkharānaṃ idaṃ majjhaṃ, idaṃ pariyosāna’’nti jānāti. Aparakkharena pubbakkharaṃ jānāti nāma – ante paññāyamāne ādimajjhesu apaññāyamānesu ‘‘imesaṃ akkharānaṃ idaṃ majjhaṃ, ayaṃ ādī’’ti jānāti. Majjhe paññāyamānepi ‘‘imesaṃ akkharānaṃ ayaṃ ādi, ayaṃ anto’’ti jānāti. Evaṃ mahāpañño. Sa ve antimasārīroti esa koṭiyaṃ ṭhitasarīro, mahantānaṃ atthadhammaniruttipaṭibhānānaṃ sīlakkhandhādīnañca pariggāhikāya paññāya samannāgatattā mahāpañño, ‘‘vimuttacittattā khvāhaṃ, sāriputta, mahāpurisoti vadāmī’’ti (saṃ. ni. 5.377) vacanato vimuttacittatāya ca mahāpurisoti vuccatīti attho.

    དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསུ། མཱརོཔི པཱཔིམཱ ‘‘ཛཱནཱཏི མཾ སམཎོ གོཏམོ’’ཏི ཏཏྠེཝནྟརདྷཱཡཱིཏི།

    Desanāvasāne bahū sotāpattiphalādīni pāpuṇiṃsu. Māropi pāpimā ‘‘jānāti maṃ samaṇo gotamo’’ti tatthevantaradhāyīti.

    མཱརཝཏྠུ ཨཊྛམཾ།

    Māravatthu aṭṭhamaṃ.

    ༩. ཨུཔཀཱཛཱིཝཀཝཏྠུ

    9. Upakājīvakavatthu

    སབྦཱབྷིབྷཱུཏི ཨིམཾ དྷམྨདེསནཾ སཏྠཱ ཨནྟརཱམགྒེ ཨུཔཀཾ ཨཱཛཱིཝཀཾ ཨཱརབྦྷ ཀཐེསི།

    Sabbābhibhūti imaṃ dhammadesanaṃ satthā antarāmagge upakaṃ ājīvakaṃ ārabbha kathesi.

    ཨེཀསྨིཉྷི སམཡེ སཏྠཱ པཏྟསབྦཉྙུཏཉྙཱཎོ བོདྷིམཎྜེ སཏྟསཏྟཱཧཾ ཝཱིཏིནཱམེཏྭཱ ཨཏྟནོ པཏྟཙཱིཝརམཱདཱཡ དྷམྨཙཀྐཔཝཏྟནཏྠཾ བཱརཱཎསིཾ སནྡྷཱཡ ཨཊྛཱརསཡོཛནམགྒཾ པཊིཔནྣོ ཨནྟརཱམགྒེ ཨུཔཀཾ ཨཱཛཱིཝཀཾ ཨདྡས། སོཔི སཏྠཱརཾ དིསྭཱ ‘‘ཝིཔྤསནྣཱནི ཁོ ཏེ, ཨཱཝུསོ, ཨིནྡྲིཡཱནི, པརིསུདྡྷོ ཚཝིཝཎྞོ པརིཡོདཱཏོ, ཀཾསི ཏྭཾ, ཨཱཝུསོ, ཨུདྡིསྶ པབྦཛིཏོ, ཀོ ཝཱ ཏེ སཏྠཱ, ཀསྶ ཝཱ ཏྭཾ དྷམྨཾ རོཙེསཱི’’ཏི པུཙྪི། ཨཐསྶ སཏྠཱ ‘‘མཡ྄ཧཾ ཨུཔཛ྄ཛྷཱཡོ ཝཱ ཨཱཙརིཡོ ཝཱ ནཏྠཱི’’ཏི ཝཏྭཱ ཨིམཾ གཱཐམཱཧ –

    Ekasmiñhi samaye satthā pattasabbaññutaññāṇo bodhimaṇḍe sattasattāhaṃ vītināmetvā attano pattacīvaramādāya dhammacakkapavattanatthaṃ bārāṇasiṃ sandhāya aṭṭhārasayojanamaggaṃ paṭipanno antarāmagge upakaṃ ājīvakaṃ addasa. Sopi satthāraṃ disvā ‘‘vippasannāni kho te, āvuso, indriyāni, parisuddho chavivaṇṇo pariyodāto, kaṃsi tvaṃ, āvuso, uddissa pabbajito, ko vā te satthā, kassa vā tvaṃ dhammaṃ rocesī’’ti pucchi. Athassa satthā ‘‘mayhaṃ upajjhāyo vā ācariyo vā natthī’’ti vatvā imaṃ gāthamāha –

    ༣༥༣.

    353.

    ‘‘སབྦཱབྷིབྷཱུ སབྦཝིདཱུཧམསྨི,

    ‘‘Sabbābhibhū sabbavidūhamasmi,

    སབྦེསུ དྷམྨེསུ ཨནཱུཔལིཏྟོ།

    Sabbesu dhammesu anūpalitto;

    སབྦཉྫཧོ ཏཎྷཀྑཡེ ཝིམུཏྟོ,

    Sabbañjaho taṇhakkhaye vimutto,

    སཡཾ ཨབྷིཉྙཱཡ ཀམུདྡིསེཡྻ’’ནྟི༎

    Sayaṃ abhiññāya kamuddiseyya’’nti.

    ཏཏྠ སབྦཱབྷིབྷཱུཏི སབྦེསཾ ཏེབྷཱུམཀདྷམྨཱནཾ ཨབྷིབྷཝནཏོ སབྦཱབྷིབྷཱུ། སབྦཝིདཱུཏི ཝིདིཏསབྦཙཏུབྷཱུམཀདྷམྨོ། སབྦེསུ དྷམྨེསཱུཏི སབྦེསུཔི ཏེབྷཱུམཀདྷམྨེསུ ཏཎྷཱདིཊྛཱིཧི ཨནཱུཔལིཏྟོ། སབྦཉྫཧོཏི སབྦེ ཏེབྷཱུམཀདྷམྨེ ཛཧིཏྭཱ ཋིཏོ། ཏཎྷཀྑཡེ ཝིམུཏྟོཏི ཏཎྷཀྑཡནྟེ ཨུཔྤཱདིཏེ ཏཎྷཀྑཡསངྑཱཏེ ཨརཧཏྟེ ཨསེཁཱཡ ཝིམུཏྟིཡཱ ཝིམུཏྟོ། སཡཾ ཨབྷིཉྙཱཡཱཏི ཨབྷིཉྙེཡྻཱདིབྷེདེ དྷམྨེ སཡམེཝ ཛཱནིཏྭཱ། ཀམུདྡིསེཡྻནྟི ‘‘ཨཡཾ མེ ཨུཔཛ྄ཛྷཱཡོ ཝཱ ཨཱཙརིཡོ ཝཱ’’ཏི ཀཾ ནཱམ ཨུདྡིསེཡྻནྟི།

    Tattha sabbābhibhūti sabbesaṃ tebhūmakadhammānaṃ abhibhavanato sabbābhibhū. Sabbavidūti viditasabbacatubhūmakadhammo. Sabbesu dhammesūti sabbesupi tebhūmakadhammesu taṇhādiṭṭhīhi anūpalitto. Sabbañjahoti sabbe tebhūmakadhamme jahitvā ṭhito. Taṇhakkhaye vimuttoti taṇhakkhayante uppādite taṇhakkhayasaṅkhāte arahatte asekhāya vimuttiyā vimutto. Sayaṃ abhiññāyāti abhiññeyyādibhede dhamme sayameva jānitvā. Kamuddiseyyanti ‘‘ayaṃ me upajjhāyo vā ācariyo vā’’ti kaṃ nāma uddiseyyanti.

    དེསནཱཝསཱནེ ཨུཔཀོ ཨཱཛཱིཝཀོ ཏཐཱགཏསྶ ཝཙནཾ ནེཝཱབྷིནནྡི, ན པཊིཀྐོསི། སཱིསཾ པན ཙཱལེཏྭཱ ཛིཝ྄ཧཾ ནིལླཱལེ༹ཏྭཱ ཨེཀཔདིཀམགྒཾ གཧེཏྭཱ ཨཉྙཏརཾ ལུདྡཀནིཝཱསནཊྛཱནཾ ཨགམཱསཱིཏི།

    Desanāvasāne upako ājīvako tathāgatassa vacanaṃ nevābhinandi, na paṭikkosi. Sīsaṃ pana cāletvā jivhaṃ nillāḷetvā ekapadikamaggaṃ gahetvā aññataraṃ luddakanivāsanaṭṭhānaṃ agamāsīti.

    ཨུཔཀཱཛཱིཝཀཝཏྠུ ནཝམཾ།

    Upakājīvakavatthu navamaṃ.

    ༡༠. སཀྐཔཉྷཝཏྠུ

    10. Sakkapañhavatthu

    སབྦདཱནནྟི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ སཀྐཾ དེཝརཱཛཱནཾ ཨཱརབྦྷ ཀཐེསི།

    Sabbadānanti imaṃ dhammadesanaṃ satthā jetavane viharanto sakkaṃ devarājānaṃ ārabbha kathesi.

    ཨེཀསྨིཉྷི སམཡེ ཏཱཝཏིཾསདེཝལོཀེ དེཝཏཱ སནྣིཔཏིཏྭཱ ཙཏྟཱརོ པཉྷེ སམུཊྛཱཔེསུཾ ‘‘ཀཏརཾ དཱནཾ ནུ ཁོ དཱནེསུ, ཀཏརོ རསོ རསེསུ, ཀཏརཱ རཏི རཏཱིསུ ཛེཊྛཀཱ, ཏཎྷཀྑཡོཝ ཀསྨཱ ཛེཊྛཀོཏི ཝུཙྩཏཱི’’ཏི? ཏེ པཉྷེ ཨེཀཱ དེཝཏཱཔི ཝིནིཙྪིཏུཾ ནཱསཀྑི། ཨེཀོ པན དེཝོ ཨེཀཾ དེཝཾ, སོཔི ཨཔརནྟི ཨེཝཾ ཨཉྙམཉྙཾ པུཙྪནྟཱ དསསུ ཙཀྐཝཱལ༹སཧསྶེསུ དྭཱདས སཾཝཙྪརཱནི ཝིཙརིཾསུ། ཨེཏྟཀེནཱཔི ཀཱལེན པཉྷཱནཾ ཨཏྠཾ ཨདིསྭཱ དསསཧསྶཙཀྐཝཱལ༹དེཝཏཱ སནྣིཔཏིཏྭཱ ཙཏུནྣཾ མཧཱརཱཛཱནཾ སནྟིཀཾ གནྟྭཱ ‘‘ཀིཾ, ཏཱཏཱ, མཧཱདེཝཏཱསནྣིཔཱཏོ’’ཏི ཝུཏྟེ ‘‘ཙཏྟཱརོ པཉྷེ སམུཊྛཱཔེཏྭཱ ཝིནིཙྪིཏུཾ ཨསཀྐོནྟཱ ཏུམྷཱཀཾ སནྟིཀཾ ཨཱགཏམྷཱ’’ཏི། ‘‘ཀིཾ པཉྷཾ ནཱམེཏཾ, ཏཱཏཱ’’ཏི། ‘‘དཱནརསརཏཱིསུ ཀཏམཱ དཱནརསརཏཱི ནུ ཁོ སེཊྛཱ, ཏཎྷཀྑཡོཝ ཀསྨཱ སེཊྛོ’’ཏི ཨིམེ པཉྷེ ཝིནིཙྪིཏུཾ ཨསཀྐོནྟཱ ཨཱགཏམྷཱཏི། ཏཱཏཱ, མཡམྤི ཨིམེསཾ ཨཏྠེ ན ཛཱནཱམ, ཨམྷཱཀཾ པན རཱཛཱ ཛནསཧསྶེན ཙིནྟིཏེ ཨཏྠེ ཙིནྟེཏྭཱ ཏངྑཎེནེཝ ཛཱནཱཏི, སོ ཨམྷེཧི པཉྙཱཡ ཙ པུཉྙེན ཙ ཝིསིཊྛོ, ཨེཐ, ཏསྶ སནྟིཀཾ གཙྪཱམཱཏི ཏམེཝ དེཝགཎཾ ཨཱདཱཡ སཀྐསྶ དེཝརཉྙོ སནྟིཀཾ གནྟྭཱ ཏེནཱཔི ‘‘ཀིཾ, ཏཱཏཱ, མཧནྟོ དེཝསནྣིཔཱཏོ’’ཏི ཝུཏྟེ ཏམཏྠཾ ཨཱརོཙེསུཾ། ‘‘ཏཱཏཱ, ཨིམེསཾ པཉྷཱནཾ ཨཏྠཾ ཨཉྙོཔི ཛཱནིཏུཾ ན སཀྐོཏི, བུདྡྷཝིསཡཱ ཧེཏེ། སཏྠཱ པནེཏརཧི ཀཧཾ ཝིཧརཏཱི’’ཏི པུཙྪིཏྭཱ ‘‘ཛེཏཝནེ’’ཏི སུཏྭཱ ‘‘ཨེཐ, ཏསྶ སནྟིཀཾ གམིསྶཱམཱ’’ཏི དེཝགཎེན སདྡྷིཾ རཏྟིབྷཱགེ སཀལཾ ཛེཏཝནཾ ཨོབྷཱསེཏྭཱ སཏྠཱརཾ ཨུཔསངྐམིཏྭཱ ཝནྡིཏྭཱ ཨེཀམནྟཾ ཋིཏོ ‘‘ཀིཾ, མཧཱརཱཛ, མཧཏཱ དེཝསངྒྷེན ཨཱགཏོསཱི’’ཏི ཝུཏྟེ, ‘‘བྷནྟེ, དེཝགཎེན ཨིམེ ནཱམ པཉྷཱ སམུཊྛཱཔིཏཱ, ཨཉྙོ ཨིམེསཾ ཨཏྠཾ ཛཱནིཏུཾ སམཏྠོ ནཱམ ནཏྠི, ཨིམེསཾ ནོ ཨཏྠཾ པཀཱསེཐཱ’’ཏི ཨཱཧ།

    Ekasmiñhi samaye tāvatiṃsadevaloke devatā sannipatitvā cattāro pañhe samuṭṭhāpesuṃ ‘‘kataraṃ dānaṃ nu kho dānesu, kataro raso rasesu, katarā rati ratīsu jeṭṭhakā, taṇhakkhayova kasmā jeṭṭhakoti vuccatī’’ti? Te pañhe ekā devatāpi vinicchituṃ nāsakkhi. Eko pana devo ekaṃ devaṃ, sopi aparanti evaṃ aññamaññaṃ pucchantā dasasu cakkavāḷasahassesu dvādasa saṃvaccharāni vicariṃsu. Ettakenāpi kālena pañhānaṃ atthaṃ adisvā dasasahassacakkavāḷadevatā sannipatitvā catunnaṃ mahārājānaṃ santikaṃ gantvā ‘‘kiṃ, tātā, mahādevatāsannipāto’’ti vutte ‘‘cattāro pañhe samuṭṭhāpetvā vinicchituṃ asakkontā tumhākaṃ santikaṃ āgatamhā’’ti. ‘‘Kiṃ pañhaṃ nāmetaṃ, tātā’’ti. ‘‘Dānarasaratīsu katamā dānarasaratī nu kho seṭṭhā, taṇhakkhayova kasmā seṭṭho’’ti ime pañhe vinicchituṃ asakkontā āgatamhāti. Tātā, mayampi imesaṃ atthe na jānāma, amhākaṃ pana rājā janasahassena cintite atthe cintetvā taṅkhaṇeneva jānāti, so amhehi paññāya ca puññena ca visiṭṭho, etha, tassa santikaṃ gacchāmāti tameva devagaṇaṃ ādāya sakkassa devarañño santikaṃ gantvā tenāpi ‘‘kiṃ, tātā, mahanto devasannipāto’’ti vutte tamatthaṃ ārocesuṃ. ‘‘Tātā, imesaṃ pañhānaṃ atthaṃ aññopi jānituṃ na sakkoti, buddhavisayā hete. Satthā panetarahi kahaṃ viharatī’’ti pucchitvā ‘‘jetavane’’ti sutvā ‘‘etha, tassa santikaṃ gamissāmā’’ti devagaṇena saddhiṃ rattibhāge sakalaṃ jetavanaṃ obhāsetvā satthāraṃ upasaṅkamitvā vanditvā ekamantaṃ ṭhito ‘‘kiṃ, mahārāja, mahatā devasaṅghena āgatosī’’ti vutte, ‘‘bhante, devagaṇena ime nāma pañhā samuṭṭhāpitā, añño imesaṃ atthaṃ jānituṃ samattho nāma natthi, imesaṃ no atthaṃ pakāsethā’’ti āha.

    སཏྠཱ ‘‘སཱདྷུ མཧཱརཱཛ, མཡཱ ཧི པཱརམིཡོ པཱུརེཏྭཱ མཧཱཔརིཙྩཱགེ པརིཙྩཛིཏྭཱ ཏུམྷཱདིསཱནཾ ཀངྑཙྪེདནཏྠམེཝ སབྦཉྙུཏཉྙཱཎཾ པཊིཝིདྡྷཾ, ཏཡཱ པུཙྪིཏཔཉྷེསུ ཧི སབྦདཱནཱནཾ དྷམྨདཱནཾ སེཊྛཾ, སབྦརསཱནཾ དྷམྨརསོ སེཊྛོ, སབྦརཏཱིནཾ དྷམྨརཏི སེཊྛཱ, ཏཎྷཀྑཡོ པན ཨརཧཏྟཾ སམྤཱཔཀཏྟཱ སེཊྛོཡེཝཱ’’ཏི ཝཏྭཱ ཨིམཾ གཱཐམཱཧ –

    Satthā ‘‘sādhu mahārāja, mayā hi pāramiyo pūretvā mahāpariccāge pariccajitvā tumhādisānaṃ kaṅkhacchedanatthameva sabbaññutaññāṇaṃ paṭividdhaṃ, tayā pucchitapañhesu hi sabbadānānaṃ dhammadānaṃ seṭṭhaṃ, sabbarasānaṃ dhammaraso seṭṭho, sabbaratīnaṃ dhammarati seṭṭhā, taṇhakkhayo pana arahattaṃ sampāpakattā seṭṭhoyevā’’ti vatvā imaṃ gāthamāha –

    ༣༥༤.

    354.

    ‘‘སབྦདཱནཾ དྷམྨདཱནཾ ཛིནཱཏི,

    ‘‘Sabbadānaṃ dhammadānaṃ jināti,

    སབྦརསཾ དྷམྨརསོ ཛིནཱཏི།

    Sabbarasaṃ dhammaraso jināti;

    སབྦརཏིཾ དྷམྨརཏི ཛིནཱཏི,

    Sabbaratiṃ dhammarati jināti,

    ཏཎྷཀྑཡོ སབྦདུཀྑཾ ཛིནཱཏཱི’’ཏི༎

    Taṇhakkhayo sabbadukkhaṃ jinātī’’ti.

    ཏཏྠ སབྦདཱནཾ དྷམྨདཱནནྟི སཙེཔི ཧི ཙཀྐཝཱལ༹གབྦྷེ ཡཱཝ བྲཧྨལོཀཱ ནིརནྟརཾ ཀཏྭཱ སནྣིསིནྣཱནཾ བུདྡྷཔཙྩེཀབུདྡྷཁཱིཎཱསཝཱནཾ ཀདལིགབྦྷསདིསཱནི ཙཱིཝརཱནི དདེཡྻ, ཏསྨིཾ སམཱགམེ ཙཏུཔྤདིཀཱཡ གཱཐཱཡ ཀཏཱནུམོདནཱཝ སེཊྛཱ། ཏཉྷི དཱནཾ ཏསྶཱ གཱཐཱཡ སོལ༹སིཾ ཀལཾ ནཱགྒྷཏི། ཨེཝཾ དྷམྨསྶ དེསནཱཔི ཝཱཙནམྤི སཝནམྤི མཧནྟཾ། ཡེན ཙ པུགྒལེན བཧཱུནཾ ཏཾ དྷམྨསྶཝནཾ ཀཱརིཏཾ, ཏསྶེཝ ཨཱནིསཾསོ མཧཱ། ཏཐཱརཱུཔཱཡ ཨེཝ པརིསཱཡ པཎཱིཏཔིཎྜཔཱཏསྶ པཏྟེ པཱུརེཏྭཱ དིནྣདཱནཏོཔི སཔྤིཏེལཱདཱིནཾ པཏྟེ པཱུརེཏྭཱ དིནྣབྷེསཛྫདཱནཏོཔི མཧཱཝིཧཱརསདིསཱནཾ ཝིཧཱརཱནཉྩ ལོཧཔཱསཱདསདིསཱནཉྩ པཱསཱདཱནཾ ཨནེཀཱནི སཏསཧསྶཱནི ཀཱརེཏྭཱ དིནྣསེནཱསནདཱནཏོཔི ཨནཱཐཔིཎྜིཀཱདཱིཧི ཝིཧཱརེ ཨཱརབྦྷ ཀཏཔརིཙྩཱགཏོཔི ཨནྟམསོ ཙཏུཔྤདིཀཱཡ གཱཐཱཡ ཨནུམོདནཱཝསེནཱཔི པཝཏྟིཏཾ དྷམྨདཱནམེཝ ཝརཾ སེཊྛཾ། ཀིཾ ཀཱརཎཱ? ཨེཝརཱུཔཱནི ཧི པུཉྙཱནི ཀརོནྟཱ དྷམྨཾ སུཏྭཱཝ ཀརོནྟི, ནོ ཨསུཏྭཱ། སཙེ ཧི ཨིམེ སཏྟཱ དྷམྨཾ ན སུཎེཡྻུཾ, ཨུལུ༹ངྐམཏྟཾ ཡཱགུམྤི ཀཊཙྪུམཏྟཾ བྷཏྟམྤི ན དདེཡྻུཾ། ཨིམིནཱ ཀཱརཎེན སབྦདཱནེཧི དྷམྨདཱནམེཝ སེཊྛཾ། ཨཔིཙ ཋཔེཏྭཱ བུདྡྷེ ཙ པཙྩེཀབུདྡྷེ ཙ སཀལཀཔྤཾ དེཝེ ཝསྶནྟེ ཨུདཀབིནྡཱུནི གཎེཏུཾ སམཏྠཱཡ པཉྙཱཡ སམནྣཱགཏཱ སཱརིཔུཏྟཱདཡོཔི ཨཏྟནོ དྷམྨཏཱཡ སོཏཱཔཏྟིཕལཱདཱིནི ཨདྷིགནྟུཾ ནཱསཀྑིཾསུ, ཨསྶཛིཏྠེརཱདཱིཧི ཀཐིཏདྷམྨཾ སུཏྭཱ སོཏཱཔཏྟིཕལཾ སཙྪིཀརིཾསུ, སཏྠུ དྷམྨདེསནཱཡ སཱཝཀཔཱརམཱིཉཱཎཾ སཙྪིཀརིཾསུ། ཨིམིནཱཔི ཀཱརཎེན, མཧཱརཱཛ, དྷམྨདཱནམེཝ སེཊྛཾ། ཏེན ཝུཏྟཾ – ‘‘སབྦདཱནཾ དྷམྨདཱནཾ ཛིནཱཏཱི’’ཏི།

    Tattha sabbadānaṃ dhammadānanti sacepi hi cakkavāḷagabbhe yāva brahmalokā nirantaraṃ katvā sannisinnānaṃ buddhapaccekabuddhakhīṇāsavānaṃ kadaligabbhasadisāni cīvarāni dadeyya, tasmiṃ samāgame catuppadikāya gāthāya katānumodanāva seṭṭhā. Tañhi dānaṃ tassā gāthāya soḷasiṃ kalaṃ nāgghati. Evaṃ dhammassa desanāpi vācanampi savanampi mahantaṃ. Yena ca puggalena bahūnaṃ taṃ dhammassavanaṃ kāritaṃ, tasseva ānisaṃso mahā. Tathārūpāya eva parisāya paṇītapiṇḍapātassa patte pūretvā dinnadānatopi sappitelādīnaṃ patte pūretvā dinnabhesajjadānatopi mahāvihārasadisānaṃ vihārānañca lohapāsādasadisānañca pāsādānaṃ anekāni satasahassāni kāretvā dinnasenāsanadānatopi anāthapiṇḍikādīhi vihāre ārabbha katapariccāgatopi antamaso catuppadikāya gāthāya anumodanāvasenāpi pavattitaṃ dhammadānameva varaṃ seṭṭhaṃ. Kiṃ kāraṇā? Evarūpāni hi puññāni karontā dhammaṃ sutvāva karonti, no asutvā. Sace hi ime sattā dhammaṃ na suṇeyyuṃ, uḷuṅkamattaṃ yāgumpi kaṭacchumattaṃ bhattampi na dadeyyuṃ. Iminā kāraṇena sabbadānehi dhammadānameva seṭṭhaṃ. Apica ṭhapetvā buddhe ca paccekabuddhe ca sakalakappaṃ deve vassante udakabindūni gaṇetuṃ samatthāya paññāya samannāgatā sāriputtādayopi attano dhammatāya sotāpattiphalādīni adhigantuṃ nāsakkhiṃsu, assajittherādīhi kathitadhammaṃ sutvā sotāpattiphalaṃ sacchikariṃsu, satthu dhammadesanāya sāvakapāramīñāṇaṃ sacchikariṃsu. Imināpi kāraṇena, mahārāja, dhammadānameva seṭṭhaṃ. Tena vuttaṃ – ‘‘sabbadānaṃ dhammadānaṃ jinātī’’ti.

    སབྦེ པན གནྡྷརསཱདཡོཔི རསཱ ཨུཀྐཾསཏོ དེཝཏཱནཾ སུདྷཱབྷོཛནརསོཔི སཾསཱརཝཊྚེ པཱཏེཏྭཱ དུཀྑཱནུབྷཝནསྶེཝ པཙྩཡོ། ཡོ པནེས སཏྟཏིཾསབོདྷིཔཀྑིཡདྷམྨསངྑཱཏོ ཙ ནཝལོཀུཏྟརདྷམྨསངྑཱཏོ ཙ དྷམྨརསོ, ཨཡམེཝ སབྦརསཱནཾ སེཊྛོ། ཏེན ཝུཏྟཾ – ‘‘སབྦརསཾ དྷམྨརསོ ཛིནཱཏཱི’’ཏི ། ཡཱཔེསཱ པུཏྟརཏིདྷཱིཏུརཏིདྷནརཏིཨིཏྠིརཏིནཙྩགཱིཏཝཱདིཏཱདིརཏིཔབྷེདཱ ཙ ཨནེཀཔྤབྷེདཱ རཏཱི, སཱཔི སཾསཱརཝཊྚེ པཱཏེཏྭཱ དུཀྑཱནུབྷཝནསྶེཝ པཙྩཡོ། ཡཱ པནེསཱ དྷམྨཾ ཀཐེནྟསྶ ཝཱ སུཎནྟསྶ ཝཱ ཝཱཙེནྟསྶ ཝཱ ཨནྟོ ཨུཔྤཛྫམཱནཱ པཱིཏི ཨུདགྒབྷཱཝཾ ཛནེཏི, ཨསྶཱུནི པཝཏྟེཏི, ལོམཧཾསཾ ཛནེཏི, སཱཡཾ སཾསཱརཝཊྚསྶ ཨནྟཾ ཀཏྭཱ ཨརཧཏྟཔརིཡོསཱནཱ ཧོཏི། ཏསྨཱ སབྦརཏཱིནཾ ཨེཝརཱུཔཱ དྷམྨརཏིཡེཝ སེཊྛཱ། ཏེན ཝུཏྟཾ – ‘‘སབྦརཏིཾ དྷམྨརཏི ཛིནཱཏཱི’’ཏི ཏཎྷཀྑཡོ པན ཏཎྷཱཡ ཁཡནྟེ ཨུཔྤནྣཾ ཨརཧཏྟཾ སཀལསྶཔི ཝཊྚདུཀྑསྶ ཨབྷིབྷཝནཏོ སབྦསེཊྛམེཝ། ཏེན ཝུཏྟཾ – ‘‘ཏཎྷཀྑཡོ སབྦདུཀྑཾ ཛིནཱཏཱི’’ཏི།

    Sabbe pana gandharasādayopi rasā ukkaṃsato devatānaṃ sudhābhojanarasopi saṃsāravaṭṭe pātetvā dukkhānubhavanasseva paccayo. Yo panesa sattatiṃsabodhipakkhiyadhammasaṅkhāto ca navalokuttaradhammasaṅkhāto ca dhammaraso, ayameva sabbarasānaṃ seṭṭho. Tena vuttaṃ – ‘‘sabbarasaṃ dhammaraso jinātī’’ti . Yāpesā puttaratidhīturatidhanaratiitthiratinaccagītavāditādiratipabhedā ca anekappabhedā ratī, sāpi saṃsāravaṭṭe pātetvā dukkhānubhavanasseva paccayo. Yā panesā dhammaṃ kathentassa vā suṇantassa vā vācentassa vā anto uppajjamānā pīti udaggabhāvaṃ janeti, assūni pavatteti, lomahaṃsaṃ janeti, sāyaṃ saṃsāravaṭṭassa antaṃ katvā arahattapariyosānā hoti. Tasmā sabbaratīnaṃ evarūpā dhammaratiyeva seṭṭhā. Tena vuttaṃ – ‘‘sabbaratiṃ dhammarati jinātī’’ti taṇhakkhayo pana taṇhāya khayante uppannaṃ arahattaṃ sakalassapi vaṭṭadukkhassa abhibhavanato sabbaseṭṭhameva. Tena vuttaṃ – ‘‘taṇhakkhayo sabbadukkhaṃ jinātī’’ti.

    ཨེཝཾ སཏྠརི ཨིམིསྶཱ གཱཐཱཡ ཨཏྠཾ ཀཐེནྟེཡེཝ ཙཏུརཱསཱིཏིཡཱ པཱཎསཧསྶཱནཾ དྷམྨཱབྷིསམཡོ ཨཧོསི། སཀྐོཔི སཏྠུ དྷམྨཀཐཾ སུཏྭཱ སཏྠཱརཾ ཝནྡིཏྭཱ ཨེཝམཱཧ – ‘‘བྷནྟེ, ཨེཝཾཛེཊྛཀེ ནཱམ དྷམྨདཱནེ ཀིམཏྠཾ ཨམྷཱཀཾ པཏྟིཾ ན དཱཔེཐ, ཨིཏོ པཊྛཱཡ ནོ བྷིཀྑུསངྒྷསྶ ཀཐེཏྭཱ པཏྟིཾ དཱཔེཐ, བྷནྟེ’’ཏི། སཏྠཱ ཏསྶ ཝཙནཾ སུཏྭཱ བྷིཀྑུསངྒྷཾ སནྣིཔཱཏེཏྭཱ, ‘‘བྷིཀྑཝེ, ཨཛྫཱདིཾ ཀཏྭཱ མཧཱདྷམྨསྶཝནཾ ཝཱ པཱཀཏིཀདྷམྨསྶཝནཾ ཝཱ ཨུཔནིསིནྣཀཐཾ ཝཱ ཨནྟམསོ ཨནུམོདནམྤི ཀཐེཏྭཱ སབྦསཏྟཱནཾ པཏྟིཾ དདེཡྻཱཐཱ’’ཏི ཨཱཧ།

    Evaṃ satthari imissā gāthāya atthaṃ kathenteyeva caturāsītiyā pāṇasahassānaṃ dhammābhisamayo ahosi. Sakkopi satthu dhammakathaṃ sutvā satthāraṃ vanditvā evamāha – ‘‘bhante, evaṃjeṭṭhake nāma dhammadāne kimatthaṃ amhākaṃ pattiṃ na dāpetha, ito paṭṭhāya no bhikkhusaṅghassa kathetvā pattiṃ dāpetha, bhante’’ti. Satthā tassa vacanaṃ sutvā bhikkhusaṅghaṃ sannipātetvā, ‘‘bhikkhave, ajjādiṃ katvā mahādhammassavanaṃ vā pākatikadhammassavanaṃ vā upanisinnakathaṃ vā antamaso anumodanampi kathetvā sabbasattānaṃ pattiṃ dadeyyāthā’’ti āha.

    སཀྐཔཉྷཝཏྠུ དསམཾ།

    Sakkapañhavatthu dasamaṃ.

    ༡༡. ཨཔུཏྟཀསེཊྛིཝཏྠུ

    11. Aputtakaseṭṭhivatthu

    ཧནནྟི བྷོགཱཏི ཨིམཾ དྷམྨདེསནཾ སཏྠཱ ཛེཏཝནེ ཝིཧརནྟོ ཨཔུཏྟཀསེཊྛིཾ ནཱམ ཨཱརབྦྷ ཀཐེསི།

    Hananti bhogāti imaṃ dhammadesanaṃ satthā jetavane viharanto aputtakaseṭṭhiṃ nāma ārabbha kathesi.

    ཏསྶ ཀིར ཀཱལཀིརིཡཾ སུཏྭཱ རཱཛཱ པསེནདི ཀོསལོ ‘‘ཨཔུཏྟཀཾ སཱཔཏེཡྻཾ ཀསྶ པཱཔུཎཱཏཱི’’ཏི པུཙྪིཏྭཱ ‘‘རཉྙོ’’ཏི སུཏྭཱ སཏྟཧི དིཝསེཧི ཏསྶ གེཧཏོ དྷནཾ རཱཛཀུལཾ ཨབྷིཧརཱཔེཏྭཱ སཏྠུ སནྟིཀཾ ཨུཔསངྐམིཏྭཱ ‘‘ཧནྡ ཀུཏོ ནུ ཏྭཾ, མཧཱརཱཛ, ཨཱགཙྪསི དིཝཱདིཝསྶཱ’’ཏི ཝུཏྟེ ‘‘ཨིདྷ, བྷནྟེ, སཱཝཏྠིཡཾ སེཊྛི, གཧཔཏི, ཀཱལཀཏོ, ཏམཧཾ ཨཔུཏྟཀཾ སཱཔཏེཡྻཾ རཱཛནྟེཔུརཾ ཨབྷིཧརིཏྭཱ ཨཱགཙྪཱམཱི’’ཏི ཨཱཧ། སབྦཾ སུཏྟེ (སཾ॰ ནི॰ ༡.༡༣༠) ཨཱགཏནཡེནེཝ ཝེདིཏབྦཾ།

    Tassa kira kālakiriyaṃ sutvā rājā pasenadi kosalo ‘‘aputtakaṃ sāpateyyaṃ kassa pāpuṇātī’’ti pucchitvā ‘‘rañño’’ti sutvā sattahi divasehi tassa gehato dhanaṃ rājakulaṃ abhiharāpetvā satthu santikaṃ upasaṅkamitvā ‘‘handa kuto nu tvaṃ, mahārāja, āgacchasi divādivassā’’ti vutte ‘‘idha, bhante, sāvatthiyaṃ seṭṭhi, gahapati, kālakato, tamahaṃ aputtakaṃ sāpateyyaṃ rājantepuraṃ abhiharitvā āgacchāmī’’ti āha. Sabbaṃ sutte (saṃ. ni. 1.130) āgatanayeneva veditabbaṃ.

    སོ ཀིར སུཝཎྞཔཱཏིཡཱ ནཱནགྒརསབྷོཛནེ ཨུཔནཱིཏེ ‘‘ཨེཝརཱུཔཾ ནཱམ མནུསྶཱ བྷུཉྫནྟི, ཀིཾ ཏུམྷེ མཡཱ སདྡྷིཾ ཨིམསྨིཾ གེཧེ ཀེལི༹ཾ ཀརོཐཱ’’ཏི བྷོཛནེ ཨུཔཊྛིཏེ ལེཌྜུདཎྜཱདཱིཧི པཧརིཏྭཱ པལཱཔེཏྭཱ ‘‘ཨིདཾ མནུསྶཱནཾ བྷོཛན’’ནྟི ཀཎཱཛཀཾ བྷུཉྫཏི བིལ༹ངྒདུཏིཡཾ། ཝཏྠཡཱནཚཏྟེསུཔི མནཱཔེསུ ཨུཔཊྛཱཔིཏེསུ ཏེ མནུསྶེ ལེཌྜུདཎྜཱདཱིཧི པཧརནྟོ པལཱཔེཏྭཱ སཱཎཱནི དྷཱརེཏི, ཛཛྫརརཐཀེན ཡཱཏི པཎྞཚཏྟཀེན དྷཱརིཡམཱནེནཱཏི ཨེཝཾ རཉྙཱ ཨཱརོཙིཏེ སཏྠཱ ཏསྶ པུབྦཀམྨཾ ཀཐེསི།

    So kira suvaṇṇapātiyā nānaggarasabhojane upanīte ‘‘evarūpaṃ nāma manussā bhuñjanti, kiṃ tumhe mayā saddhiṃ imasmiṃ gehe keḷiṃ karothā’’ti bhojane upaṭṭhite leḍḍudaṇḍādīhi paharitvā palāpetvā ‘‘idaṃ manussānaṃ bhojana’’nti kaṇājakaṃ bhuñjati biḷaṅgadutiyaṃ. Vatthayānachattesupi manāpesu upaṭṭhāpitesu te manusse leḍḍudaṇḍādīhi paharanto palāpetvā sāṇāni dhāreti, jajjararathakena yāti paṇṇachattakena dhāriyamānenāti evaṃ raññā ārocite satthā tassa pubbakammaṃ kathesi.

    བྷཱུཏཔུབྦཾ སོ, མཧཱརཱཛ, སེཊྛི, གཧཔཏི, ཏགརསིཁིཾ ནཱམ པཙྩེཀབུདྡྷཾ པིཎྜཔཱཏེན པཊིཔཱདེསི། ‘‘དེཐ སམཎསྶ པིཎྜ’’ནྟི ཝཏྭཱ སོ ཨུཊྛཱཡཱསནཱ པཀྐཱམི། ཏསྨིཾ ཀིར ཨསྶདྡྷེ བཱལེ ཨེཝཾ ཝཏྭཱ པཀྐནྟེ ཏསྶ བྷརིཡཱ སདྡྷཱ པསནྣཱ ‘‘ཙིརསྶཾ ཝཏ མེ ཨིམསྶ མུཁཏོ ‘དེཧཱི’ཏི ཝཙནཾ སུཏཾ, ཨཛྫ མམ མནོརཐཾ པཱུརེནྟཱི པིཎྜཔཱཏཾ དསྶཱམཱི’’ཏི པཙྩེཀབུདྡྷསྶ པཏྟཾ གཧེཏྭཱ པཎཱིཏབྷོཛནསྶ པཱུརེཏྭཱ ཨདཱསི། སོཔི ནིཝཏྟམཱནོ ཏཾ དིསྭཱ ‘‘ཀིཾ, སམཎ, ཀིཉྩི ཏེ ལདྡྷ’’ནྟི པཏྟཾ གཧེཏྭཱ པཎཱིཏཔིཎྜཔཱཏཾ དིསྭཱ ཝིཔྤཊིསཱརཱི ཧུཏྭཱ ཨེཝཾ ཙིནྟེསི – ‘‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུཾ། ཏེ ཧི ཨིམཾ བྷུཉྫིཏྭཱ མཡ྄ཧཾ ཀམྨཾ ཀརིསྶནྟི, ཨཡཾ པན གནྟྭཱ བྷུཉྫིཏྭཱ ནིདྡཱཡིསྶཏི, ནཊྛོ མེ སོ པིཎྜཔཱཏོ’’ཏི། སོ བྷཱཏུ ཙ པན ཨེཀཔུཏྟཀཾ སཱཔཏེཡྻསྶ ཀཱརཎཱ ཛཱིཝིཏཱ ཝོརོཔེསི། སོ ཀིརསྶ ཨངྒུལིཾ གཧེཏྭཱ ཝིཙརནྟོ ‘‘ཨིདཾ མཡ྄ཧཾ པིཏུསནྟཀཾ ཡཱནཀཾ, ཨཡཾ ཏསྶ གོཎོ’’ཏིཨཱདཱིནི ཨཱཧ། ཨཐ ནཾ སོ སེཊྛི ‘‘ཨིདཱནི ཏཱཝེས ཨེཝཾ ཝདེཏི, ཨིམསྶ པན ཝུཌྜྷིཔྤཏྟཀཱལེ ཨིམསྨིཾ གེཧེ བྷོགེ ཀོ རཀྑིསྶཏཱི’’ཏི ཏཾ ཨརཉྙཾ ནེཏྭཱ ཨེཀསྨིཾ གཙྪམཱུལེ གཱིཝཱཡ གཧེཏྭཱ མཱུལཀནྡཾ ཝིཡ གཱིཝཾ ཕཱལེཏྭཱ མཱརེཏྭཱ ཏཏྠེཝ ཚཌྜེསི། ཨིདམསྶ པུབྦཀམྨཾ། ཏེན ཝུཏྟཾ –

    Bhūtapubbaṃ so, mahārāja, seṭṭhi, gahapati, tagarasikhiṃ nāma paccekabuddhaṃ piṇḍapātena paṭipādesi. ‘‘Detha samaṇassa piṇḍa’’nti vatvā so uṭṭhāyāsanā pakkāmi. Tasmiṃ kira assaddhe bāle evaṃ vatvā pakkante tassa bhariyā saddhā pasannā ‘‘cirassaṃ vata me imassa mukhato ‘dehī’ti vacanaṃ sutaṃ, ajja mama manorathaṃ pūrentī piṇḍapātaṃ dassāmī’’ti paccekabuddhassa pattaṃ gahetvā paṇītabhojanassa pūretvā adāsi. Sopi nivattamāno taṃ disvā ‘‘kiṃ, samaṇa, kiñci te laddha’’nti pattaṃ gahetvā paṇītapiṇḍapātaṃ disvā vippaṭisārī hutvā evaṃ cintesi – ‘‘varametaṃ piṇḍapātaṃ dāsā vā kammakarā vā bhuñjeyyuṃ. Te hi imaṃ bhuñjitvā mayhaṃ kammaṃ karissanti, ayaṃ pana gantvā bhuñjitvā niddāyissati, naṭṭho me so piṇḍapāto’’ti. So bhātu ca pana ekaputtakaṃ sāpateyyassa kāraṇā jīvitā voropesi. So kirassa aṅguliṃ gahetvā vicaranto ‘‘idaṃ mayhaṃ pitusantakaṃ yānakaṃ, ayaṃ tassa goṇo’’tiādīni āha. Atha naṃ so seṭṭhi ‘‘idāni tāvesa evaṃ vadeti, imassa pana vuḍḍhippattakāle imasmiṃ gehe bhoge ko rakkhissatī’’ti taṃ araññaṃ netvā ekasmiṃ gacchamūle gīvāya gahetvā mūlakandaṃ viya gīvaṃ phāletvā māretvā tattheva chaḍḍesi. Idamassa pubbakammaṃ. Tena vuttaṃ –

    ‘‘ཡཾ ཁོ སོ, མཧཱརཱཛ, སེཊྛི, གཧཔཏི, ཏགརསིཁིཾ པཙྩེཀབུདྡྷཾ པིཎྜཔཱཏེན པཊིཔཱདེསི, ཏསྶ ཀམྨསྶ ཝིཔཱཀེན སཏྟཀྑཏྟུཾ སུགཏིཾ སགྒཾ ལོཀཾ ཨུཔཔཛྫི, ཏསྶེཝ ཀམྨསྶ ཝིཔཱཀཱཝསེསེན ཨིམིསྶཱཡེཝ སཱཝཏྠིཡཱ སཏྟཀྑཏྟུཾ སེཊྛིཏྟཾ ཀཱརེསི། ཡཾ ཁོ སོ, མཧཱརཱཛ, སེཊྛི, གཧཔཏི, དཏྭཱ པཙྪཱ ཝིཔྤཊིསཱརཱི ཨཧོསི ‘ཝརམེཏཾ པིཎྜཔཱཏཾ དཱསཱ ཝཱ ཀམྨཀརཱ ཝཱ བྷུཉྫེཡྻུ’ནྟི, ཏསྶ ཀམྨསྶ ཝིཔཱཀེན ནཱསྶུལཱ༹རཱཡ བྷཏྟབྷོགཱཡ ཙིཏྟཾ ནམཏི, ནཱསྶུལཱ༹རཱཡ ཝཏྠབྷོགཱཡ, ནཱསྶུལཱ༹རཱཡ ཡཱནབྷོགཱཡ, ནཱསྶུལཱ༹རཱནཾ པཉྩནྣཾ ཀཱམགུཎཱནཾ བྷོགཱཡ ཙིཏྟཾ ནམཏི། ཡཾ ཁོ སོ, མཧཱརཱཛ, སེཊྛི, གཧཔཏི, བྷཱཏུ ཙ པན ཨེཀཔུཏྟཾ སཱཔཏེཡྻསྶ ཀཱརཎཱ ཛཱིཝིཏཱ ཝོརོཔེསི, ཏསྶ ཀམྨསྶ ཝིཔཱཀེན བཧཱུནི ཝསྶསཏཱནི བཧཱུནི ཝསྶསཧསྶཱནི བཧཱུནི ཝསྶསཏསཧསྶཱནི ནིརཡེ པཙྩིཏྠ, ཏསྶེཝ ཀམྨསྶ ཝིཔཱཀཱཝསེསེན ཨིདཾ སཏྟམཾ ཨཔུཏྟཀཾ སཱཔཏེཡྻཾ རཱཛཀོསཾ པཝེསེཏི། ཏསྶ ཁོ པན, མཧཱརཱཛ, སེཊྛིསྶ གཧཔཏིསྶ པུརཱཎཉྩ པུཉྙཾ པརིཀྑཱིཎཾ, ནཝཉྩ པུཉྙཾ ཨནུཔཙིཏཾ། ཨཛྫ པན, མཧཱརཱཛ, སེཊྛི, གཧཔཏི, མཧཱརོརུཝེ ནིརཡེ པཙྩཏཱི’’ཏི (སཾ॰ ནི॰ ༡.༡༣༡)།

    ‘‘Yaṃ kho so, mahārāja, seṭṭhi, gahapati, tagarasikhiṃ paccekabuddhaṃ piṇḍapātena paṭipādesi, tassa kammassa vipākena sattakkhattuṃ sugatiṃ saggaṃ lokaṃ upapajji, tasseva kammassa vipākāvasesena imissāyeva sāvatthiyā sattakkhattuṃ seṭṭhittaṃ kāresi. Yaṃ kho so, mahārāja, seṭṭhi, gahapati, datvā pacchā vippaṭisārī ahosi ‘varametaṃ piṇḍapātaṃ dāsā vā kammakarā vā bhuñjeyyu’nti, tassa kammassa vipākena nāssuḷārāya bhattabhogāya cittaṃ namati, nāssuḷārāya vatthabhogāya, nāssuḷārāya yānabhogāya, nāssuḷārānaṃ pañcannaṃ kāmaguṇānaṃ bhogāya cittaṃ namati. Yaṃ kho so, mahārāja, seṭṭhi, gahapati, bhātu ca pana ekaputtaṃ sāpateyyassa kāraṇā jīvitā voropesi, tassa kammassa vipākena bahūni vassasatāni bahūni vassasahassāni bahūni vassasatasahassāni niraye paccittha, tasseva kammassa vipākāvasesena idaṃ sattamaṃ aputtakaṃ sāpateyyaṃ rājakosaṃ paveseti. Tassa kho pana, mahārāja, seṭṭhissa gahapatissa purāṇañca puññaṃ parikkhīṇaṃ, navañca puññaṃ anupacitaṃ. Ajja pana, mahārāja, seṭṭhi, gahapati, mahāroruve niraye paccatī’’ti (saṃ. ni. 1.131).

    རཱཛཱ སཏྠུ ཝཙནཾ སུཏྭཱ ‘‘ཨཧོ, བྷནྟེ, བྷཱརིཡཾ ཀམྨཾ, ཨེཏྟཀེ ནཱམ བྷོགེ ཝིཛྫམཱནེ ནེཝ ཨཏྟནཱ པརིབྷུཉྫི, ན ཏུམྷཱདིསེ བུདྡྷེ དྷུརཝིཧཱརེ ཝིཧརནྟེ པུཉྙཀམྨཾ ཨཀཱསཱི’’ཏི ཨཱཧ ། སཏྠཱ ‘‘ཨེཝམེཏཾ, མཧཱརཱཛ, དུམྨེདྷཔུགྒལཱ ནཱམ བྷོགེ ལབྷིཏྭཱ ནིབྦཱནཾ ན གཝེསནྟི, བྷོགེ ནིསྶཱཡ ཨུཔྤནྣཏཎྷཱ པནེཏེ དཱིགྷརཏྟཾ ཧནཏཱི’’ཏི ཝཏྭཱ ཨིམཾ གཱཐམཱཧ –

    Rājā satthu vacanaṃ sutvā ‘‘aho, bhante, bhāriyaṃ kammaṃ, ettake nāma bhoge vijjamāne neva attanā paribhuñji, na tumhādise buddhe dhuravihāre viharante puññakammaṃ akāsī’’ti āha . Satthā ‘‘evametaṃ, mahārāja, dummedhapuggalā nāma bhoge labhitvā nibbānaṃ na gavesanti, bhoge nissāya uppannataṇhā panete dīgharattaṃ hanatī’’ti vatvā imaṃ gāthamāha –

    ༣༥༥.

    355.

    ‘‘ཧནནྟི བྷོགཱ དུམྨེདྷཾ, ནོ ཙ པཱརགཝེསིནོ།

    ‘‘Hananti bhogā dummedhaṃ, no ca pāragavesino;

    བྷོགཏཎྷཱཡ དུམྨེདྷོ, ཧནྟི ཨཉྙེཝ ཨཏྟན’’ནྟི༎

    Bhogataṇhāya dummedho, hanti aññeva attana’’nti.

    ཏཏྠ ནོ ཙ པཱརགཝེསིནོཏི ཡེ པན ནིབྦཱནཔཱརགཝེསིནོ པུགྒལཱ, ན ཏེ བྷོགཱ ཧནནྟི། ཨཉྙེཝ ཨཏྟནནྟི བྷོགེ ནིསྶཱཡ ཨུཔྤནྣཱཡ ཏཎྷཱཡ དུཔྤཉྙོ པུགྒལོ པརེ ཝིཡ ཨཏྟཱནམེཝ ཧནཏཱིཏི ཨཏྠོ།

    Tattha no ca pāragavesinoti ye pana nibbānapāragavesino puggalā, na te bhogā hananti. Aññeva attananti bhoge nissāya uppannāya taṇhāya duppañño puggalo pare viya attānameva hanatīti attho.

    དེསནཱཝསཱནེ བཧཱུ སོཏཱཔཏྟིཕལཱདཱིནི པཱཔུཎིཾསཱུཏི།

    Desanāvasāne bahū sotāpattiphalādīni pāpuṇiṃsūti.

    ཨཔུཏྟཀསེཊྛིཝཏྠུ ཨེཀཱདསམཾ།

    Aputtakaseṭṭhivatthu ekādasamaṃ.

    ༡༢. ཨངྐུརཝཏྠུ

    12. Aṅkuravatthu

    ཏིཎདོསཱནཱིཏི ཨིམཾ དྷམྨདེསནཾ སཏྠཱ པཎྜུཀམྦལསིལཱཡཾ ཝིཧརནྟོ ཨངྐུརཾ ཨཱརབྦྷ ཀཐེསི། ཝཏྠུ ‘‘ཡེ ཛྷཱནཔྤསུཏཱ དྷཱིརཱ’’ཏི (དྷ॰ པ॰ ༡༨༡) གཱཐཱཡ ཝིཏྠཱརིཏམེཝ། ཝུཏྟཉྷེཏཾ ཏཏྠ ཨིནྡཀཾ ཨཱརབྦྷ། སོ ཀིར ཨནུརུདྡྷཏྠེརསྶ ཨནྟོགཱམཾ པིཎྜཱཡ པཝིཊྛསྶ ཨཏྟནོ ཨཱབྷཏཾ ཀཊཙྪུམཏྟཀཾ བྷིཀྑཾ དཱཔེསི། ཏདསྶ པུཉྙཾ ཨངྐུརེན དསཝསྶསཧསྶཱནི དྭཱདསཡོཛནིཀཾ ཨུདྡྷནཔནྟིཾ ཀཏྭཱ དིནྣདཱནཏོ མཧཔྥལཏརཾ ཛཱཏཾ། ཏསྨཱ ཨེཝམཱཧ། ཨེཝཾ ཝུཏྟེ སཏྠཱ, ‘‘ཨངྐུར, དཱནཾ ནཱམ ཝིཙེཡྻ དཱཏུཾ ཝཊྚཏི, ཨེཝཾ ཏཾ སུཁེཏྟེ སུཝུཏྟབཱིཛཾ ཝིཡ མཧཔྥལཾ ཧོཏི། ཏྭཾ པན ཏཐཱ ནཱཀཱསི, ཏེན ཏེ དཱནཾ ན མཧཔྥལཾ ཛཱཏ’’ནྟི ཨིམམཏྠཾ ཝིབྷཱཝེནྟོ –

    Tiṇadosānīti imaṃ dhammadesanaṃ satthā paṇḍukambalasilāyaṃ viharanto aṅkuraṃ ārabbha kathesi. Vatthu ‘‘ye jhānappasutā dhīrā’’ti (dha. pa. 181) gāthāya vitthāritameva. Vuttañhetaṃ tattha indakaṃ ārabbha. So kira anuruddhattherassa antogāmaṃ piṇḍāya paviṭṭhassa attano ābhataṃ kaṭacchumattakaṃ bhikkhaṃ dāpesi. Tadassa puññaṃ aṅkurena dasavassasahassāni dvādasayojanikaṃ uddhanapantiṃ katvā dinnadānato mahapphalataraṃ jātaṃ. Tasmā evamāha. Evaṃ vutte satthā, ‘‘aṅkura, dānaṃ nāma viceyya dātuṃ vaṭṭati, evaṃ taṃ sukhette suvuttabījaṃ viya mahapphalaṃ hoti. Tvaṃ pana tathā nākāsi, tena te dānaṃ na mahapphalaṃ jāta’’nti imamatthaṃ vibhāvento –

    ‘‘ཝིཙེཡྻ དཱནཾ དཱཏབྦཾ, ཡཏྠ དིནྣཾ མཧཔྥལཾ།

    ‘‘Viceyya dānaṃ dātabbaṃ, yattha dinnaṃ mahapphalaṃ;

    ཝིཙེཡྻ དཱནཾ སུགཏཔྤསཏྠཾ,

    Viceyya dānaṃ sugatappasatthaṃ,

    ཡེ དཀྑིཎེཡྻཱ ཨིདྷ ཛཱིཝལོཀེ།

    Ye dakkhiṇeyyā idha jīvaloke;

    ཨེཏེསུ དིནྣཱནི མཧཔྥལཱནི,

    Etesu dinnāni mahapphalāni,

    བཱིཛཱནི ཝུཏྟཱནི ཡཐཱསུཁེཏྟེ’’ཏི༎ (པེ॰ ཝ॰ ༣༢༩) –

    Bījāni vuttāni yathāsukhette’’ti. (pe. va. 329) –

    ཝཏྭཱ ཨུཏྟརིམྤི དྷམྨཾ དེསེནྟོ ཨིམཱ གཱཐཱ ཨབྷཱསི –

    Vatvā uttarimpi dhammaṃ desento imā gāthā abhāsi –

    ༣༥༦.

    356.

    ‘‘ཏིཎདོསཱནི ཁེཏྟཱནི, རཱགདོསཱ ཨཡཾ པཛཱ།

    ‘‘Tiṇadosāni khettāni, rāgadosā ayaṃ pajā;

    ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལཾ༎

    Tasmā hi vītarāgesu, dinnaṃ hoti mahapphalaṃ.

    ༣༥༧.

    357.

    ‘‘ཏིཎདོསཱནི ཁེཏྟཱནི, དོསདོསཱ ཨཡཾ པཛཱ།

    ‘‘Tiṇadosāni khettāni, dosadosā ayaṃ pajā;

    ཏསྨཱ ཧི ཝཱིཏདོསེསུ, དིནྣཾ ཧོཏི མཧཔྥལཾ༎

    Tasmā hi vītadosesu, dinnaṃ hoti mahapphalaṃ.

    ༣༥༨.

    358.

    ‘‘ཏིཎདོསཱནི ཁེཏྟཱནི, མོཧདོསཱ ཨཡཾ པཛཱ།

    ‘‘Tiṇadosāni khettāni, mohadosā ayaṃ pajā;

    ཏསྨཱ ཧི ཝཱིཏམོཧེསུ, དིནྣཾ ཧོཏི མཧཔྥལཾ༎

    Tasmā hi vītamohesu, dinnaṃ hoti mahapphalaṃ.

    ༣༥༩.

    359.

    ‘‘ཏིཎདོསཱནི ཁེཏྟཱནི, ཨིཙྪཱདོསཱ ཨཡཾ པཛཱ།

    ‘‘Tiṇadosāni khettāni, icchādosā ayaṃ pajā;

    ཏསྨཱ ཧི ཝིགཏིཙྪེསུ, དིནྣཾ ཧོཏི མཧཔྥལ’’ནྟི༎

    Tasmā hi vigaticchesu, dinnaṃ hoti mahapphala’’nti.

    ཏཏྠ ཏིཎདོསཱནཱིཏི སཱམཱཀཱདཱིནི ཏིཎཱནི ཨུཊྛཧནྟཱནི པུབྦཎྞཱཔརཎྞཱནི ཁེཏྟཱནི དཱུསེནྟི, ཏེན ཏཱནི ན བཧུཕལཱནི ཧོནྟི། ཨེཝཾ སཏྟཱནམྤི ཨནྟོ རཱགོ ཨུཔྤཛྫནྟོ སཏྟེ དཱུསེཏི, ཏེན ཏེསུ དིནྣཾ མཧཔྥལཾ ན ཧོཏི ། ཁཱིཎཱསཝེསུ དིནྣཾ པན མཧཔྥལཾ ཧོཏི། ཏེན ཝུཏྟཾ –

    Tattha tiṇadosānīti sāmākādīni tiṇāni uṭṭhahantāni pubbaṇṇāparaṇṇāni khettāni dūsenti, tena tāni na bahuphalāni honti. Evaṃ sattānampi anto rāgo uppajjanto satte dūseti, tena tesu dinnaṃ mahapphalaṃ na hoti . Khīṇāsavesu dinnaṃ pana mahapphalaṃ hoti. Tena vuttaṃ –

    ‘‘ཏིཎདོསཱནི ཁེཏྟཱནི, རཱགདོསཱ ཨཡཾ པཛཱ།

    ‘‘Tiṇadosāni khettāni, rāgadosā ayaṃ pajā;

    ཏསྨཱ ཧི ཝཱིཏརཱགེསུ, དིནྣཾ ཧོཏི མཧཔྥལ’’ནྟི༎ –

    Tasmā hi vītarāgesu, dinnaṃ hoti mahapphala’’nti. –

    སེསགཱཐཱསུཔི ཨེསེཝ ནཡོ།

    Sesagāthāsupi eseva nayo.

    དེསནཱཝསཱནེ ཨངྐུརོ ཙ ཨིནྡཀོ ཙ སོཏཱཔཏྟིཕལེ པཏིཊྛཧིཾསུ, སམྤཏྟཱནམྤི སཱཏྠིཀཱ དྷམྨདེསནཱ ཨཧོསཱིཏི།

    Desanāvasāne aṅkuro ca indako ca sotāpattiphale patiṭṭhahiṃsu, sampattānampi sātthikā dhammadesanā ahosīti.

    ཨངྐུརཝཏྠུ དྭཱདསམཾ།

    Aṅkuravatthu dvādasamaṃ.

    ཏཎྷཱཝགྒཝཎྞནཱ ནིཊྛིཏཱ།

    Taṇhāvaggavaṇṇanā niṭṭhitā.

    ཙཏུཝཱིསཏིམོ ཝགྒོ།

    Catuvīsatimo vaggo.




    Next: ༢༥. བྷིཀྑུཝགྒོ • 25. Bhikkhuvaggo




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / དྷམྨཔདཔཱལི༹ • Dhammapadapāḷi / ༢༤. ཏཎྷཱཝགྒོ • 24. Taṇhāvaggo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact