| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. தண்ஹுப்பாத³ஸுத்தவண்ணனா
9. Taṇhuppādasuttavaṇṇanā
9. நவமே உப்பஜ்ஜதி ஏதேஸூதி உப்பாதா³. கா உப்பஜ்ஜதி? தண்ஹா. தண்ஹாய உப்பாதா³ தண்ஹுப்பாதா³, தண்ஹாவத்தூ²னி தண்ஹாகாரணானீதி அத்தோ². சீவரஹேதூதி ‘‘கத்த² மனாபங் சீவரங் லபி⁴ஸ்ஸாமீ’’தி சீவரகாரணா உப்பஜ்ஜதி. இதிப⁴வாப⁴வஹேதூதி எத்த² இதீதி நித³ஸ்ஸனத்தே² நிபாதோ. யதா² சீவராதி³ஹேது, ஏவங் ப⁴வாப⁴வஹேதுபீதி அத்தோ². ப⁴வாப⁴வோதி செத்த² பணீததரானி ஸப்பினவனீதாதீ³னி அதி⁴ப்பேதானி. ஸம்பத்திப⁴வேஸு பணீததரபணீததமப⁴வோதிபி வத³ந்தியேவ.
9. Navame uppajjati etesūti uppādā. Kā uppajjati? Taṇhā. Taṇhāya uppādā taṇhuppādā, taṇhāvatthūni taṇhākāraṇānīti attho. Cīvarahetūti ‘‘kattha manāpaṃ cīvaraṃ labhissāmī’’ti cīvarakāraṇā uppajjati. Itibhavābhavahetūti ettha itīti nidassanatthe nipāto. Yathā cīvarādihetu, evaṃ bhavābhavahetupīti attho. Bhavābhavoti cettha paṇītatarāni sappinavanītādīni adhippetāni. Sampattibhavesu paṇītatarapaṇītatamabhavotipi vadantiyeva.
தண்ஹாது³தியோதி அயஞ்ஹி ஸத்தோ அனமதக்³கே³ ஸங்ஸாரவட்டே ஸங்ஸரந்தோ ந ஏககோவ ஸங்ஸரதி, தண்ஹங் பன து³தியிகங் லப⁴ந்தோவ ஸங்ஸரதி. தேன வுத்தங் ‘‘தண்ஹாது³தியோ’’தி. இத்த²பா⁴வஞ்ஞதா²பா⁴வந்தி எத்த² இத்த²பா⁴வோ நாம அயங் அத்தபா⁴வோ, அஞ்ஞதா²பா⁴வோ நாம அனாக³தத்தபா⁴வோ. ஏவரூபோ வா அஞ்ஞோபி அத்தபா⁴வோ இத்த²பா⁴வோ நாம, ந ஏவரூபோ அஞ்ஞதா²பா⁴வோ நாம. தங் இத்த²பா⁴வஞ்ஞதா²பா⁴வங். ஸங்ஸாரந்தி க²ந்த⁴தா⁴துஆயதனானங் படிபாடிங். நாதிவத்ததீதி நாதிக்கமதி. ஏவமாதீ³னவங் ஞத்வாதி ஏவங் அதீதானாக³தபச்சுப்பன்னேஸு க²ந்தே⁴ஸு ஆதீ³னவங் ஜானித்வா. தண்ஹங் து³க்க²ஸ்ஸ ஸம்ப⁴வந்தி தண்ஹங் ச ‘‘அயங் வட்டது³க்க²ஸம்பூ⁴தோ ஸபா⁴வோ காரண’’ந்தி ஏவங் ஜானித்வா. எத்தாவதா இமஸ்ஸ பி⁴க்கு²னோ விபஸ்ஸனங் வட்³டெ⁴த்வா அரஹத்தங் பத்தபா⁴வோ த³ஸ்ஸிதோ. இதா³னி தங் கீ²ணாஸவங் தோ²மெந்தோ வீததண்ஹோதிஆதி³மாஹ. தத்த² அனாதா³னோதி நிக்³க³ஹணோ. ஸதோ பி⁴க்கு² பரிப்³ப³ஜேதி ஸதிஸம்பஜஞ்ஞே வேபுல்லப்பத்தோ கீ²ணாஸவோ பி⁴க்கு² ஸதோ ஸம்பஜானோ சரெய்ய விஹரெய்யாதி அத்தோ². இதி ஸுத்தந்தே வட்டங் கதெ²த்வா கா³தா²ஸு வட்டவிவட்டங் கதி²தந்தி.
Taṇhādutiyoti ayañhi satto anamatagge saṃsāravaṭṭe saṃsaranto na ekakova saṃsarati, taṇhaṃ pana dutiyikaṃ labhantova saṃsarati. Tena vuttaṃ ‘‘taṇhādutiyo’’ti. Itthabhāvaññathābhāvanti ettha itthabhāvo nāma ayaṃ attabhāvo, aññathābhāvo nāma anāgatattabhāvo. Evarūpo vā aññopi attabhāvo itthabhāvo nāma, na evarūpo aññathābhāvo nāma. Taṃ itthabhāvaññathābhāvaṃ. Saṃsāranti khandhadhātuāyatanānaṃ paṭipāṭiṃ. Nātivattatīti nātikkamati. Evamādīnavaṃ ñatvāti evaṃ atītānāgatapaccuppannesu khandhesu ādīnavaṃ jānitvā. Taṇhaṃ dukkhassa sambhavanti taṇhaṃ ca ‘‘ayaṃ vaṭṭadukkhasambhūto sabhāvo kāraṇa’’nti evaṃ jānitvā. Ettāvatā imassa bhikkhuno vipassanaṃ vaḍḍhetvā arahattaṃ pattabhāvo dassito. Idāni taṃ khīṇāsavaṃ thomento vītataṇhotiādimāha. Tattha anādānoti niggahaṇo. Sato bhikkhu paribbajeti satisampajaññe vepullappatto khīṇāsavo bhikkhu sato sampajāno careyya vihareyyāti attho. Iti suttante vaṭṭaṃ kathetvā gāthāsu vaṭṭavivaṭṭaṃ kathitanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. தண்ஹுப்பாத³ஸுத்தங் • 9. Taṇhuppādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. தண்ஹுப்பாத³ஸுத்தவண்ணனா • 9. Taṇhuppādasuttavaṇṇanā
