| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. தண்ஹுப்பாத³ஸுத்தவண்ணனா
9. Taṇhuppādasuttavaṇṇanā
9. நவமே ப⁴வதி ஏதேன ஆரொக்³யந்தி ப⁴வோ, கி³லானபச்சயோ. பரிவுத்³தோ⁴ ப⁴வோ அப⁴வோ. வுத்³தி⁴அத்தோ² ஹி அயமகாரோ யதா² ‘‘ஸங்வராஸங்வரோ, ப²லாப²ல’’ந்தி ச. ஸப்பினவனீதாதீ³னீதி ஆதி³-ஸத்³தே³ன தேலமது⁴பா²ணிதாதீ³னங் க³ஹணங். ஸப்பினவனீதாதி³க்³க³ஹணஞ்செத்த² நித³ஸ்ஸனமத்தங், ஸப்³ப³ஸ்ஸபி கி³லானபச்சயஸ்ஸ ஸங்க³ஹோ த³ட்ட²ப்³போ³. ப⁴வாப⁴வோதி வா கு²த்³த³கோ சேவ மஹந்தோ ச உபபத்திப⁴வோ வேதி³தப்³போ³. தேனேவாஹ ‘‘ஸம்பத்திப⁴வேஸூ’’திஆதி³. ப⁴வோதி வா ஸம்பத்தி, அப⁴வோதி விபத்தி. ப⁴வோதி வுத்³தி⁴, அப⁴வோதி ஹானி. தங்னிமித்தஞ்ச தண்ஹா உப்பஜ்ஜதீதி வுத்தங் ‘‘ப⁴வாப⁴வஹேது வா’’தி.
9. Navame bhavati etena ārogyanti bhavo, gilānapaccayo. Parivuddho bhavo abhavo. Vuddhiattho hi ayamakāro yathā ‘‘saṃvarāsaṃvaro, phalāphala’’nti ca. Sappinavanītādīnīti ādi-saddena telamadhuphāṇitādīnaṃ gahaṇaṃ. Sappinavanītādiggahaṇañcettha nidassanamattaṃ, sabbassapi gilānapaccayassa saṅgaho daṭṭhabbo. Bhavābhavoti vā khuddako ceva mahanto ca upapattibhavo veditabbo. Tenevāha ‘‘sampattibhavesū’’tiādi. Bhavoti vā sampatti, abhavoti vipatti. Bhavoti vuddhi, abhavoti hāni. Taṃnimittañca taṇhā uppajjatīti vuttaṃ ‘‘bhavābhavahetu vā’’ti.
தண்ஹாது³தியோதி தண்ஹாஸஹாயோ. தண்ஹா ஹி நிருத³ககந்தாரே மரீசிகாய உத³கஸஞ்ஞா விய பிபாஸாபி⁴பூ⁴தங் தஸிதங் ஸத்தங் அஸ்ஸாஸத³ஸ்ஸனவஸேன ஸஹாயகிச்சங் கரொந்தீ ப⁴வாதீ³ஸு அனிப்³பி³ன்னங் கத்வா பரிப்³ப⁴மாபேதி. ததா² ஹி தங் பபாதகங் அசிந்தெத்வா மது⁴க்³க³ண்ஹனகலுத்³த³கா விய அனேகாதீ³னவாகுலேஸு ப⁴வேஸு ஆனிஸங்ஸமேவ த³ஸ்ஸெந்தீ அனத்த²ஜாலே ஸா பரிப்³ப⁴மாபேதி, தஸ்மா தண்ஹா ‘‘புரிஸஸ்ஸ து³தியா’’தி வுத்தா. நனு ச அஞ்ஞேபி கிலேஸாத³யோ ப⁴வனிப்³ப³த்திபச்சயாதி? ஸச்சமேதங், ந பன ததா² விஸேஸபச்சயோ, யதா² தண்ஹா. ததா² ஹி ஸா குஸலேஹி வினா அகுஸலேஹி, காமாவசராதி³குஸலேஹி ச வினா ரூபாவசராதி³குஸலேஹி ப⁴வனிப்³ப³த்தியா விஸேஸபச்சயோ. யதோ ஸமுத³யஸச்சந்தி வுச்சதீதி. இத்த²பா⁴வஞ்ஞதா²பா⁴வந்தி இத்த²பா⁴வோ ச அஞ்ஞதா²பா⁴வோ ச இத்த²பா⁴வஞ்ஞதா²பா⁴வோ, ஸோ ஏதஸ்ஸ அத்தீ²தி இத்த²பா⁴வஞ்ஞதா²பா⁴வோ, ஸங்ஸாரோ, தங் இத்த²பா⁴வஞ்ஞதா²பா⁴வங். தத்த² இத்த²பா⁴வோ மனுஸ்ஸத்தங், அஞ்ஞதா²பா⁴வோ ததோ அவஸிட்ட²ஸத்தாவாஸா. இத்த²பா⁴வோ வா தேஸங் தேஸங் ஸத்தானங் பச்சுப்பன்னோ அத்தபா⁴வோ, அஞ்ஞதா²பா⁴வோ அனாக³தத்தபா⁴வோ. ஏவரூபோ வா அஞ்ஞோபி அத்தபா⁴வோ இத்த²பா⁴வோ, ந ஏவரூபோ அஞ்ஞதா²பா⁴வோ. தேனேவாஹ ‘‘இத்த²பா⁴வஞ்ஞதா²பா⁴வந்தி எத்த² இத்த²பா⁴வோ நாம அயங் அத்தபா⁴வோ’’திஆதி³. ஸங்ஸரணங் ஸங்ஸாரோ.
Taṇhādutiyoti taṇhāsahāyo. Taṇhā hi nirudakakantāre marīcikāya udakasaññā viya pipāsābhibhūtaṃ tasitaṃ sattaṃ assāsadassanavasena sahāyakiccaṃ karontī bhavādīsu anibbinnaṃ katvā paribbhamāpeti. Tathā hi taṃ papātakaṃ acintetvā madhuggaṇhanakaluddakā viya anekādīnavākulesu bhavesu ānisaṃsameva dassentī anatthajāle sā paribbhamāpeti, tasmā taṇhā ‘‘purisassa dutiyā’’ti vuttā. Nanu ca aññepi kilesādayo bhavanibbattipaccayāti? Saccametaṃ, na pana tathā visesapaccayo, yathā taṇhā. Tathā hi sā kusalehi vinā akusalehi, kāmāvacarādikusalehi ca vinā rūpāvacarādikusalehi bhavanibbattiyā visesapaccayo. Yato samudayasaccanti vuccatīti. Itthabhāvaññathābhāvanti itthabhāvo ca aññathābhāvo ca itthabhāvaññathābhāvo, so etassa atthīti itthabhāvaññathābhāvo, saṃsāro, taṃ itthabhāvaññathābhāvaṃ. Tattha itthabhāvo manussattaṃ, aññathābhāvo tato avasiṭṭhasattāvāsā. Itthabhāvo vā tesaṃ tesaṃ sattānaṃ paccuppanno attabhāvo, aññathābhāvo anāgatattabhāvo. Evarūpo vā aññopi attabhāvo itthabhāvo, na evarūpo aññathābhāvo. Tenevāha ‘‘itthabhāvaññathābhāvanti ettha itthabhāvo nāma ayaṃ attabhāvo’’tiādi. Saṃsaraṇaṃ saṃsāro.
‘‘க²ந்தா⁴னஞ்ச படிபாடி, தா⁴துஆயதனான ச;
‘‘Khandhānañca paṭipāṭi, dhātuāyatanāna ca;
அப்³பொ³ச்சி²ன்னங் வத்தமானா, ஸங்ஸாரோதி பவுச்சதி’’. (விஸுத்³தி⁴॰ 2.619; தீ³॰ நி॰ அட்ட²॰ 2.95 அபஸாத³னாவண்ணனா; ஸங்॰ நி॰ அட்ட²॰ 2.2.60; அ॰ நி॰ அட்ட²॰ 2.4.199; த⁴॰ ஸ॰ அட்ட²॰ நிதா³னகதா²; விப⁴॰ அட்ட²॰ 226 ஸங்கா²ரபத³னித்³தே³ஸோ; ஸு॰ நி॰ அட்ட²॰ 2.523; உதா³॰ அட்ட²॰ 39; இதிவு॰ அட்ட²॰ 14);
Abbocchinnaṃ vattamānā, saṃsāroti pavuccati’’. (visuddhi. 2.619; dī. ni. aṭṭha. 2.95 apasādanāvaṇṇanā; saṃ. ni. aṭṭha. 2.2.60; a. ni. aṭṭha. 2.4.199; dha. sa. aṭṭha. nidānakathā; vibha. aṭṭha. 226 saṅkhārapadaniddeso; su. ni. aṭṭha. 2.523; udā. aṭṭha. 39; itivu. aṭṭha. 14);
தேனாஹ ‘‘க²ந்த⁴தா⁴துஆயதனானங் படிபாடி’’ந்தி, க²ந்த⁴தா⁴துஆயதனானங் ஹேதுப²லபா⁴வேன அபராபரப்பவத்திந்தி அத்தோ².
Tenāha ‘‘khandhadhātuāyatanānaṃ paṭipāṭi’’nti, khandhadhātuāyatanānaṃ hetuphalabhāvena aparāparappavattinti attho.
ஏவமாதீ³னவங் ஞத்வாதி எத்த² ஏதமாதீ³னவங் ஞத்வாதிபி பட²ந்தி, ஏதங் ஸகலவட்டது³க்க²ஸ்ஸ ஸம்ப⁴வங் ஸமுத³யங் தண்ஹங் ஆதீ³னவங் ஞத்வாதி அத்தோ². அத² வா ஏவமாதீ³னவங் ஞத்வாதி ஏதங் யதா²வுத்தங் ஸங்ஸாரானதிவத்தனஆதீ³னவங் தோ³ஸங் ஞத்வா. நிக்³க³ஹணோதி சதுரூபாதா³னஸங்கா²தஸ்ஸ ஸப்³ப³ஸ்ஸ க³ஹணஸ்ஸ படினிஸ்ஸஜ்ஜனேன நிக்³க³ஹணோ, க²ந்த⁴பரினிப்³பா³னேன ஸங்கா²ரப்பவத்திதோ அபக³ச்செ²ய்யாதி ஏவங் வா எத்த² அத்தோ² த³ட்ட²ப்³போ³.
Evamādīnavaṃñatvāti ettha etamādīnavaṃ ñatvātipi paṭhanti, etaṃ sakalavaṭṭadukkhassa sambhavaṃ samudayaṃ taṇhaṃ ādīnavaṃ ñatvāti attho. Atha vā evamādīnavaṃ ñatvāti etaṃ yathāvuttaṃ saṃsārānativattanaādīnavaṃ dosaṃ ñatvā. Niggahaṇoti caturūpādānasaṅkhātassa sabbassa gahaṇassa paṭinissajjanena niggahaṇo, khandhaparinibbānena saṅkhārappavattito apagaccheyyāti evaṃ vā ettha attho daṭṭhabbo.
தண்ஹுப்பாத³ஸுத்தவண்ணனா நிட்டி²தா.
Taṇhuppādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. தண்ஹுப்பாத³ஸுத்தங் • 9. Taṇhuppādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. தண்ஹுப்பாத³ஸுத்தவண்ணனா • 9. Taṇhuppādasuttavaṇṇanā
