| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৯. তণ্হুপ্পাদসুত্তৰণ্ণনা
9. Taṇhuppādasuttavaṇṇanā
৯. নৰমে ভৰতি এতেন আরোগ্যন্তি ভৰো, গিলানপচ্চযো। পরিৰুদ্ধো ভৰো অভৰো। ৰুদ্ধিঅত্থো হি অযমকারো যথা ‘‘সংৰরাসংৰরো, ফলাফল’’ন্তি চ। সপ্পিনৰনীতাদীনীতি আদি-সদ্দেন তেলমধুফাণিতাদীনং গহণং। সপ্পিনৰনীতাদিগ্গহণঞ্চেত্থ নিদস্সনমত্তং, সব্বস্সপি গিলানপচ্চযস্স সঙ্গহো দট্ঠব্বো। ভৰাভৰোতি ৰা খুদ্দকো চেৰ মহন্তো চ উপপত্তিভৰো ৰেদিতব্বো। তেনেৰাহ ‘‘সম্পত্তিভৰেসূ’’তিআদি। ভৰোতি ৰা সম্পত্তি, অভৰোতি ৰিপত্তি। ভৰোতি ৰুদ্ধি, অভৰোতি হানি। তংনিমিত্তঞ্চ তণ্হা উপ্পজ্জতীতি ৰুত্তং ‘‘ভৰাভৰহেতু ৰা’’তি।
9. Navame bhavati etena ārogyanti bhavo, gilānapaccayo. Parivuddho bhavo abhavo. Vuddhiattho hi ayamakāro yathā ‘‘saṃvarāsaṃvaro, phalāphala’’nti ca. Sappinavanītādīnīti ādi-saddena telamadhuphāṇitādīnaṃ gahaṇaṃ. Sappinavanītādiggahaṇañcettha nidassanamattaṃ, sabbassapi gilānapaccayassa saṅgaho daṭṭhabbo. Bhavābhavoti vā khuddako ceva mahanto ca upapattibhavo veditabbo. Tenevāha ‘‘sampattibhavesū’’tiādi. Bhavoti vā sampatti, abhavoti vipatti. Bhavoti vuddhi, abhavoti hāni. Taṃnimittañca taṇhā uppajjatīti vuttaṃ ‘‘bhavābhavahetu vā’’ti.
তণ্হাদুতিযোতি তণ্হাসহাযো। তণ্হা হি নিরুদককন্তারে মরীচিকায উদকসঞ্ঞা ৰিয পিপাসাভিভূতং তসিতং সত্তং অস্সাসদস্সনৰসেন সহাযকিচ্চং করোন্তী ভৰাদীসু অনিব্বিন্নং কত্ৰা পরিব্ভমাপেতি। তথা হি তং পপাতকং অচিন্তেত্ৰা মধুগ্গণ্হনকলুদ্দকা ৰিয অনেকাদীনৰাকুলেসু ভৰেসু আনিসংসমেৰ দস্সেন্তী অনত্থজালে সা পরিব্ভমাপেতি, তস্মা তণ্হা ‘‘পুরিসস্স দুতিযা’’তি ৰুত্তা। ননু চ অঞ্ঞেপি কিলেসাদযো ভৰনিব্বত্তিপচ্চযাতি? সচ্চমেতং, ন পন তথা ৰিসেসপচ্চযো, যথা তণ্হা। তথা হি সা কুসলেহি ৰিনা অকুসলেহি, কামাৰচরাদিকুসলেহি চ ৰিনা রূপাৰচরাদিকুসলেহি ভৰনিব্বত্তিযা ৰিসেসপচ্চযো। যতো সমুদযসচ্চন্তি ৰুচ্চতীতি। ইত্থভাৰঞ্ঞথাভাৰন্তি ইত্থভাৰো চ অঞ্ঞথাভাৰো চ ইত্থভাৰঞ্ঞথাভাৰো, সো এতস্স অত্থীতি ইত্থভাৰঞ্ঞথাভাৰো, সংসারো, তং ইত্থভাৰঞ্ঞথাভাৰং। তত্থ ইত্থভাৰো মনুস্সত্তং, অঞ্ঞথাভাৰো ততো অৰসিট্ঠসত্তাৰাসা। ইত্থভাৰো ৰা তেসং তেসং সত্তানং পচ্চুপ্পন্নো অত্তভাৰো, অঞ্ঞথাভাৰো অনাগতত্তভাৰো। এৰরূপো ৰা অঞ্ঞোপি অত্তভাৰো ইত্থভাৰো, ন এৰরূপো অঞ্ঞথাভাৰো। তেনেৰাহ ‘‘ইত্থভাৰঞ্ঞথাভাৰন্তি এত্থ ইত্থভাৰো নাম অযং অত্তভাৰো’’তিআদি। সংসরণং সংসারো।
Taṇhādutiyoti taṇhāsahāyo. Taṇhā hi nirudakakantāre marīcikāya udakasaññā viya pipāsābhibhūtaṃ tasitaṃ sattaṃ assāsadassanavasena sahāyakiccaṃ karontī bhavādīsu anibbinnaṃ katvā paribbhamāpeti. Tathā hi taṃ papātakaṃ acintetvā madhuggaṇhanakaluddakā viya anekādīnavākulesu bhavesu ānisaṃsameva dassentī anatthajāle sā paribbhamāpeti, tasmā taṇhā ‘‘purisassa dutiyā’’ti vuttā. Nanu ca aññepi kilesādayo bhavanibbattipaccayāti? Saccametaṃ, na pana tathā visesapaccayo, yathā taṇhā. Tathā hi sā kusalehi vinā akusalehi, kāmāvacarādikusalehi ca vinā rūpāvacarādikusalehi bhavanibbattiyā visesapaccayo. Yato samudayasaccanti vuccatīti. Itthabhāvaññathābhāvanti itthabhāvo ca aññathābhāvo ca itthabhāvaññathābhāvo, so etassa atthīti itthabhāvaññathābhāvo, saṃsāro, taṃ itthabhāvaññathābhāvaṃ. Tattha itthabhāvo manussattaṃ, aññathābhāvo tato avasiṭṭhasattāvāsā. Itthabhāvo vā tesaṃ tesaṃ sattānaṃ paccuppanno attabhāvo, aññathābhāvo anāgatattabhāvo. Evarūpo vā aññopi attabhāvo itthabhāvo, na evarūpo aññathābhāvo. Tenevāha ‘‘itthabhāvaññathābhāvanti ettha itthabhāvo nāma ayaṃ attabhāvo’’tiādi. Saṃsaraṇaṃ saṃsāro.
‘‘খন্ধানঞ্চ পটিপাটি, ধাতুআযতনান চ।
‘‘Khandhānañca paṭipāṭi, dhātuāyatanāna ca;
অব্বোচ্ছিন্নং ৰত্তমানা, সংসারোতি পৰুচ্চতি’’॥ (ৰিসুদ্ধি॰ ২.৬১৯; দী॰ নি॰ অট্ঠ॰ ২.৯৫ অপসাদনাৰণ্ণনা; সং॰ নি॰ অট্ঠ॰ ২.২.৬০; অ॰ নি॰ অট্ঠ॰ ২.৪.১৯৯; ধ॰ স॰ অট্ঠ॰ নিদানকথা; ৰিভ॰ অট্ঠ॰ ২২৬ সঙ্খারপদনিদ্দেসো; সু॰ নি॰ অট্ঠ॰ ২.৫২৩; উদা॰ অট্ঠ॰ ৩৯; ইতিৰু॰ অট্ঠ॰ ১৪)।
Abbocchinnaṃ vattamānā, saṃsāroti pavuccati’’. (visuddhi. 2.619; dī. ni. aṭṭha. 2.95 apasādanāvaṇṇanā; saṃ. ni. aṭṭha. 2.2.60; a. ni. aṭṭha. 2.4.199; dha. sa. aṭṭha. nidānakathā; vibha. aṭṭha. 226 saṅkhārapadaniddeso; su. ni. aṭṭha. 2.523; udā. aṭṭha. 39; itivu. aṭṭha. 14);
তেনাহ ‘‘খন্ধধাতুআযতনানং পটিপাটি’’ন্তি, খন্ধধাতুআযতনানং হেতুফলভাৰেন অপরাপরপ্পৰত্তিন্তি অত্থো।
Tenāha ‘‘khandhadhātuāyatanānaṃ paṭipāṭi’’nti, khandhadhātuāyatanānaṃ hetuphalabhāvena aparāparappavattinti attho.
এৰমাদীনৰং ঞত্ৰাতি এত্থ এতমাদীনৰং ঞত্ৰাতিপি পঠন্তি, এতং সকলৰট্টদুক্খস্স সম্ভৰং সমুদযং তণ্হং আদীনৰং ঞত্ৰাতি অত্থো। অথ ৰা এৰমাদীনৰং ঞত্ৰাতি এতং যথাৰুত্তং সংসারানতিৰত্তনআদীনৰং দোসং ঞত্ৰা। নিগ্গহণোতি চতুরূপাদানসঙ্খাতস্স সব্বস্স গহণস্স পটিনিস্সজ্জনেন নিগ্গহণো, খন্ধপরিনিব্বানেন সঙ্খারপ্পৰত্তিতো অপগচ্ছেয্যাতি এৰং ৰা এত্থ অত্থো দট্ঠব্বো।
Evamādīnavaṃñatvāti ettha etamādīnavaṃ ñatvātipi paṭhanti, etaṃ sakalavaṭṭadukkhassa sambhavaṃ samudayaṃ taṇhaṃ ādīnavaṃ ñatvāti attho. Atha vā evamādīnavaṃ ñatvāti etaṃ yathāvuttaṃ saṃsārānativattanaādīnavaṃ dosaṃ ñatvā. Niggahaṇoti caturūpādānasaṅkhātassa sabbassa gahaṇassa paṭinissajjanena niggahaṇo, khandhaparinibbānena saṅkhārappavattito apagaccheyyāti evaṃ vā ettha attho daṭṭhabbo.
তণ্হুপ্পাদসুত্তৰণ্ণনা নিট্ঠিতা।
Taṇhuppādasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. তণ্হুপ্পাদসুত্তং • 9. Taṇhuppādasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. তণ্হুপ্পাদসুত্তৰণ্ণনা • 9. Taṇhuppādasuttavaṇṇanā
