| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৩. তপনীযসুত্তৰণ্ণনা
3. Tapanīyasuttavaṇṇanā
৩. ততিযে তপনীযাতি এত্থ কত্তুঅত্থে অনীয-সদ্দোতি আহ ‘‘তপন্তীতি তপনীযা’’তি। তপন্তীতি ৰিবাধেন্তি, ৰিহেঠেন্তীতি অত্থো। তপনং ৰা দুক্খং, দিট্ঠে চেৰ ধম্মে অভিসম্পরাযঞ্চ তস্স উপ্পাদনেন চেৰ অনুবলপ্পদানেন চ হিতাতি তপনীযা। অথ ৰা তপন্তি তেনাতি তপনং, অনুতাপো, ৰিপ্পটিসারোতি অত্থো। তস্স হেতুভাৰতো হিতাতি তপনীযা। অনুসোচতীতি ৰিপ্পটিসারী হুত্ৰা কতাকতং অনুগম্ম সোচতি। সোচনঞ্হি কতত্তা চ হোতি অকতত্তা চ। তথা চেৰ পাল়িযং ৰিভত্তং। নন্দযক্খাদীনং ৰত্থূনি পাকটানীতি তানি অদস্সেত্ৰা দ্ৰেভাতিকৰত্থুং দস্সেন্তো ‘‘তে কিরা’’তি আদিমাহ। তত্থ তেতি দ্ৰে ভাতরো। পুন কিং মগ্গসীতি পুন কিং ইচ্ছসি।
3. Tatiye tapanīyāti ettha kattuatthe anīya-saddoti āha ‘‘tapantīti tapanīyā’’ti. Tapantīti vibādhenti, viheṭhentīti attho. Tapanaṃ vā dukkhaṃ, diṭṭhe ceva dhamme abhisamparāyañca tassa uppādanena ceva anubalappadānena ca hitāti tapanīyā. Atha vā tapanti tenāti tapanaṃ, anutāpo, vippaṭisāroti attho. Tassa hetubhāvato hitāti tapanīyā. Anusocatīti vippaṭisārī hutvā katākataṃ anugamma socati. Socanañhi katattā ca hoti akatattā ca. Tathā ceva pāḷiyaṃ vibhattaṃ. Nandayakkhādīnaṃ vatthūni pākaṭānīti tāni adassetvā dvebhātikavatthuṃ dassento ‘‘te kirā’’ti ādimāha. Tattha teti dve bhātaro. Puna kiṃ maggasīti puna kiṃ icchasi.
তপনীযসুত্তৰণ্ণনা নিট্ঠিতা।
Tapanīyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৩. তপনীযসুত্তং • 3. Tapanīyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩. তপনীযসুত্তৰণ্ণনা • 3. Tapanīyasuttavaṇṇanā
