| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
३. तपनीयसुत्तवण्णना
3. Tapanīyasuttavaṇṇanā
३. ततिये तपनीयाति एत्थ कत्तुअत्थे अनीय-सद्दोति आह ‘‘तपन्तीति तपनीया’’ति। तपन्तीति विबाधेन्ति, विहेठेन्तीति अत्थो। तपनं वा दुक्खं, दिट्ठे चेव धम्मे अभिसम्परायञ्च तस्स उप्पादनेन चेव अनुबलप्पदानेन च हिताति तपनीया। अथ वा तपन्ति तेनाति तपनं, अनुतापो, विप्पटिसारोति अत्थो। तस्स हेतुभावतो हिताति तपनीया। अनुसोचतीति विप्पटिसारी हुत्वा कताकतं अनुगम्म सोचति। सोचनञ्हि कतत्ता च होति अकतत्ता च। तथा चेव पाळियं विभत्तं। नन्दयक्खादीनं वत्थूनि पाकटानीति तानि अदस्सेत्वा द्वेभातिकवत्थुं दस्सेन्तो ‘‘ते किरा’’ति आदिमाह। तत्थ तेति द्वे भातरो। पुन किं मग्गसीति पुन किं इच्छसि।
3. Tatiye tapanīyāti ettha kattuatthe anīya-saddoti āha ‘‘tapantīti tapanīyā’’ti. Tapantīti vibādhenti, viheṭhentīti attho. Tapanaṃ vā dukkhaṃ, diṭṭhe ceva dhamme abhisamparāyañca tassa uppādanena ceva anubalappadānena ca hitāti tapanīyā. Atha vā tapanti tenāti tapanaṃ, anutāpo, vippaṭisāroti attho. Tassa hetubhāvato hitāti tapanīyā. Anusocatīti vippaṭisārī hutvā katākataṃ anugamma socati. Socanañhi katattā ca hoti akatattā ca. Tathā ceva pāḷiyaṃ vibhattaṃ. Nandayakkhādīnaṃ vatthūni pākaṭānīti tāni adassetvā dvebhātikavatthuṃ dassento ‘‘te kirā’’ti ādimāha. Tattha teti dve bhātaro. Puna kiṃ maggasīti puna kiṃ icchasi.
तपनीयसुत्तवण्णना निट्ठिता।
Tapanīyasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / ३. तपनीयसुत्तं • 3. Tapanīyasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ३. तपनीयसुत्तवण्णना • 3. Tapanīyasuttavaṇṇanā
