| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. තපනීයසුත්‌තවණ්‌ණනා
3. Tapanīyasuttavaṇṇanā
3. තතියෙ තපනීයාති ඉධ චෙව සම්‌පරායෙ ච තපන්‌තීති තපනීයා. තප්‌පතීති චිත්‌තසන්‌තාපෙන තප්‌පති අනුසොචති කායදුච්‌චරිතං කත්‌වා නන්‌දයක්‌ඛො විය නන්‌දමාණවො විය නන්‌දගොඝාතකො විය දෙවදත්‌තො විය ද්‌වෙභාතිකා විය ච. තෙ කිර ගාවං වධිත්‌වා මංසං ද්‌වෙ කොට්‌ඨාසෙ අකංසු. තතො කනිට්‌ඨො ජෙට්‌ඨකං ආහ – ‘‘මය්‌හං දාරකා බහූ, ඉමානි මෙ අන්‌තානි දෙහී’’ති. අථ නං සො ‘‘සබ්‌බං මංසං ද්‌වෙධා විභත්‌තං, පුන කිං මග්‌ගසී’’ති පහරිත්‌වා ජීවිතක්‌ඛයං පාපෙසි. නිවත්‌තිත්‌වා ච නං ඔලොකෙන්‌තො මතං දිස්‌වා ‘‘භාරියං මෙ කම්‌මං කත’’න්‌ති චිත්‌තං උප්‌පාදෙසි. අථස්‌ස බලවසොකො උප්‌පජ්‌ජි. සො ඨිතට්‌ඨානෙපි නිසින්‌නට්‌ඨානෙපි තදෙව කම්‌මං ආවජ්‌ජෙති, චිත්‌තස්‌සාදං න ලභති. අසිතපීතඛායිතසායිතම්‌පිස්‌ස සරීරෙ ඔජං න ඵරති, අට්‌ඨිචම්‌මමත්‌තමෙව අහොසි. අථ නං එකො ථෙරො දිස්‌වා – ‘‘උපාසක, ත්‌වං පහූතඅන්‌නපානො, අට්‌ඨිචම්‌මමත්‌තමෙව තෙ අවසිට්‌ඨං, අත්‌ථි නු ඛො තෙ කිඤ්‌චි තපනීයකම්‌ම’’න්‌ති? සො ‘‘ආම, භන්‌තෙ’’ති සබ්‌බං ආරොචෙසි. අථ නං ථෙරො ‘‘භාරියං තෙ උපාසක කම්‌මං කතං, අනපරාධට්‌ඨානෙ අපරද්‌ධ’’න්‌ති ආහ. සො තෙනෙව කම්‌මෙන කාලං කත්‌වා නිරයෙ නිබ්‌බත්‌තො. වචීදුච්‌චරිතෙන සුප්‌පබුද්‌ධසක්‌කකොකාලිකචිඤ්‌චමාණවිකාදයො විය තප්‌පති. සෙසමෙත්‌ථ චතුත්‌ථෙ ච උත්‌තානත්‌ථමෙව. තතියං.
3. Tatiye tapanīyāti idha ceva samparāye ca tapantīti tapanīyā. Tappatīti cittasantāpena tappati anusocati kāyaduccaritaṃ katvā nandayakkho viya nandamāṇavo viya nandagoghātako viya devadatto viya dvebhātikā viya ca. Te kira gāvaṃ vadhitvā maṃsaṃ dve koṭṭhāse akaṃsu. Tato kaniṭṭho jeṭṭhakaṃ āha – ‘‘mayhaṃ dārakā bahū, imāni me antāni dehī’’ti. Atha naṃ so ‘‘sabbaṃ maṃsaṃ dvedhā vibhattaṃ, puna kiṃ maggasī’’ti paharitvā jīvitakkhayaṃ pāpesi. Nivattitvā ca naṃ olokento mataṃ disvā ‘‘bhāriyaṃ me kammaṃ kata’’nti cittaṃ uppādesi. Athassa balavasoko uppajji. So ṭhitaṭṭhānepi nisinnaṭṭhānepi tadeva kammaṃ āvajjeti, cittassādaṃ na labhati. Asitapītakhāyitasāyitampissa sarīre ojaṃ na pharati, aṭṭhicammamattameva ahosi. Atha naṃ eko thero disvā – ‘‘upāsaka, tvaṃ pahūtaannapāno, aṭṭhicammamattameva te avasiṭṭhaṃ, atthi nu kho te kiñci tapanīyakamma’’nti? So ‘‘āma, bhante’’ti sabbaṃ ārocesi. Atha naṃ thero ‘‘bhāriyaṃ te upāsaka kammaṃ kataṃ, anaparādhaṭṭhāne aparaddha’’nti āha. So teneva kammena kālaṃ katvā niraye nibbatto. Vacīduccaritena suppabuddhasakkakokālikaciñcamāṇavikādayo viya tappati. Sesamettha catutthe ca uttānatthameva. Tatiyaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. තපනීයසුත්‌තං • 3. Tapanīyasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3. තපනීයසුත්‌තවණ්‌ණනා • 3. Tapanīyasuttavaṇṇanā
