| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. মারসংযুত্তং
4. Mārasaṃyuttaṃ
১. পঠমৰগ্গো
1. Paṭhamavaggo
১. তপোকম্মসুত্তং
1. Tapokammasuttaṃ
১৩৭. এৰং মে সুতং – একং সমযং ভগৰা উরুৰেলাযং ৰিহরতি নজ্জা নেরঞ্জরায তীরে অজপালনিগ্রোধমূলে পঠমাভিসম্বুদ্ধো। অথ খো ভগৰতো রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘মুত্তো ৰতম্হি তায দুক্করকারিকায। সাধু মুত্তো ৰতম্হি তায অনত্থসংহিতায দুক্করকারিকায। সাধু ৰতম্হি মুত্তো বোধিং সমজ্ঝগ’’ন্তি 1।
137. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘mutto vatamhi tāya dukkarakārikāya. Sādhu mutto vatamhi tāya anatthasaṃhitāya dukkarakārikāya. Sādhu vatamhi mutto bodhiṃ samajjhaga’’nti 2.
অথ খো মারো পাপিমা ভগৰতো চেতসা চেতোপরিৰিতক্কমঞ্ঞায যেন ভগৰা তেনুপসঙ্কমি; উপসঙ্কমিত্ৰা ভগৰন্তং গাথায অজ্ঝভাসি –
Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –
‘‘তপোকম্মা অপক্কম্ম, যেন ন সুজ্ঝন্তি মাণৰা।
‘‘Tapokammā apakkamma, yena na sujjhanti māṇavā;
অসুদ্ধো মঞ্ঞসি সুদ্ধো, সুদ্ধিমগ্গা অপরদ্ধো’’ 3 তি॥
Asuddho maññasi suddho, suddhimaggā aparaddho’’ 4 ti.
অথ খো ভগৰা ‘‘মারো অযং পাপিমা’’ ইতি ৰিদিত্ৰা মারং পাপিমন্তং গাথাহি অজ্ঝভাসি –
Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāhi ajjhabhāsi –
‘‘সীলং সমাধি পঞ্ঞঞ্চ, মগ্গং বোধায ভাৰযং।
‘‘Sīlaṃ samādhi paññañca, maggaṃ bodhāya bhāvayaṃ;
পত্তোস্মি পরমং সুদ্ধিং, নিহতো ত্ৰমসি অন্তকা’’তি॥
Pattosmi paramaṃ suddhiṃ, nihato tvamasi antakā’’ti.
অথ খো মারো পাপিমা ‘‘জানাতি মং ভগৰা, জানাতি মং সুগতো’’তি, দুক্খী দুম্মনো তত্থেৰন্তরধাযীতি।
Atha kho māro pāpimā ‘‘jānāti maṃ bhagavā, jānāti maṃ sugato’’ti, dukkhī dummano tatthevantaradhāyīti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. তপোকম্মসুত্তৰণ্ণনা • 1. Tapokammasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. তপোকম্মসুত্তৰণ্ণনা • 1. Tapokammasuttavaṇṇanā
