१. तपोकम्मसुत्तं

1. Tapokammasuttaṃ

१३७. एवं मे सुतं – एकं समयं भगवा उरुवेलायं विहरति नज्‍जा नेरञ्‍जराय तीरे अजपालनिग्रोधमूले पठमाभिसम्बुद्धो। अथ खो भगवतो रहोगतस्स पटिसल्‍लीनस्स एवं चेतसो परिवितक्‍को उदपादि – ‘‘मुत्तो वतम्हि ताय दुक्‍करकारिकाय। साधु मुत्तो वतम्हि ताय अनत्थसंहिताय दुक्‍करकारिकाय। साधु वतम्हि मुत्तो बोधिं समज्झग’’न्ति ¹।

137. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘mutto vatamhi tāya dukkarakārikāya. Sādhu mutto vatamhi tāya anatthasaṃhitāya dukkarakārikāya. Sādhu vatamhi mutto bodhiṃ samajjhaga’’nti ².

अथ खो मारो पापिमा भगवतो चेतसा चेतोपरिवितक्‍कमञ्‍ञाय येन भगवा तेनुपसङ्कमि; उपसङ्कमित्वा भगवन्तं गाथाय अज्झभासि –

Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –

‘‘तपोकम्मा अपक्‍कम्म, येन न सुज्झन्ति माणवा।

‘‘Tapokammā apakkamma, yena na sujjhanti māṇavā;

असुद्धो मञ्‍ञसि सुद्धो, सुद्धिमग्गा अपरद्धो’’ ³ ति॥

Asuddho maññasi suddho, suddhimaggā aparaddho’’ ⁴ ti.

अथ खो भगवा ‘‘मारो अयं पापिमा’’ इति विदित्वा मारं पापिमन्तं गाथाहि अज्झभासि –

Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāhi ajjhabhāsi –

‘‘अनत्थसंहितं ञत्वा, यं किञ्‍चि अमरं तपं ⁵।

‘‘Anatthasaṃhitaṃ ñatvā, yaṃ kiñci amaraṃ tapaṃ ⁶;

सब्बं नत्थावहं होति, फियारित्तंव धम्मनि ⁷॥

Sabbaṃ natthāvahaṃ hoti, phiyārittaṃva dhammani ⁸.

‘‘सीलं समाधि पञ्‍ञञ्‍च, मग्गं बोधाय भावयं।

‘‘Sīlaṃ samādhi paññañca, maggaṃ bodhāya bhāvayaṃ;

पत्तोस्मि परमं सुद्धिं, निहतो त्वमसि अन्तका’’ति॥

Pattosmi paramaṃ suddhiṃ, nihato tvamasi antakā’’ti.

अथ खो मारो पापिमा ‘‘जानाति मं भगवा, जानाति मं सुगतो’’ति, दुक्खी दुम्मनो तत्थेवन्तरधायीति।

Atha kho māro pāpimā ‘‘jānāti maṃ bhagavā, jānāti maṃ sugato’’ti, dukkhī dummano tatthevantaradhāyīti.

Next: २. हत्थिराजवण्णसुत्तं • 2. Hatthirājavaṇṇasuttaṃ

Footnotes:

1. साधु ठितो सतो बोधिं समज्झेगन्ति (सी॰ पी॰), साधु वतम्हि सत्तो बोधिसमज्झगूति (स्या॰ कं॰)

2. sādhu ṭhito sato bodhiṃ samajjheganti (sī. pī.), sādhu vatamhi satto bodhisamajjhagūti (syā. kaṃ.)

3. सुद्धिमग्गमपरद्धो (सी॰ स्या॰ कं॰ पी॰)

4. suddhimaggamaparaddho (sī. syā. kaṃ. pī.)

5. अपरं तपं (क॰)

6. aparaṃ tapaṃ (ka.)

7. वम्मनि (सी॰), धम्मनिं (पी॰), जम्मनिं (क॰) एत्थायं धम्मसद्दो सक्‍कते धन्वनं-सद्देन सदिसो मरुवाचकोति वेदितब्बो, यथा दळ्हधम्मातिपदं

8. vammani (sī.), dhammaniṃ (pī.), jammaniṃ (ka.) etthāyaṃ dhammasaddo sakkate dhanvanaṃ-saddena sadiso maruvācakoti veditabbo, yathā daḷhadhammātipadaṃ

Related texts:

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १. तपोकम्मसुत्तवण्णना • 1. Tapokammasuttavaṇṇanā

टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १. तपोकम्मसुत्तवण्णना • 1. Tapokammasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact