១. តបោកម្មសុត្តំ

1. Tapokammasuttaṃ

១៣៧. ឯវំ មេ សុតំ – ឯកំ សមយំ ភគវា ឧរុវេលាយំ វិហរតិ នជ្ជា នេរញ្ជរាយ តីរេ អជបាលនិគ្រោធមូលេ បឋមាភិសម្ពុទ្ធោ។ អថ ខោ ភគវតោ រហោគតស្ស បដិសល្លីនស្ស ឯវំ ចេតសោ បរិវិតក្កោ ឧទបាទិ – ‘‘មុត្តោ វតម្ហិ តាយ ទុក្ករការិកាយ។ សាធុ មុត្តោ វតម្ហិ តាយ អនត្ថសំហិតាយ ទុក្ករការិកាយ។ សាធុ វតម្ហិ មុត្តោ ពោធិំ សមជ្ឈគ’’ន្តិ ¹។

137. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhamūle paṭhamābhisambuddho. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘mutto vatamhi tāya dukkarakārikāya. Sādhu mutto vatamhi tāya anatthasaṃhitāya dukkarakārikāya. Sādhu vatamhi mutto bodhiṃ samajjhaga’’nti ².

អថ ខោ មារោ បាបិមា ភគវតោ ចេតសា ចេតោបរិវិតក្កមញ្ញាយ យេន ភគវា តេនុបសង្កមិ; ឧបសង្កមិត្វា ភគវន្តំ គាថាយ អជ្ឈភាសិ –

Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami; upasaṅkamitvā bhagavantaṃ gāthāya ajjhabhāsi –

‘‘តបោកម្មា អបក្កម្ម, យេន ន សុជ្ឈន្តិ មាណវា;

‘‘Tapokammā apakkamma, yena na sujjhanti māṇavā;

អសុទ្ធោ មញ្ញសិ សុទ្ធោ, សុទ្ធិមគ្គា អបរទ្ធោ’’ ³ តិ។

Asuddho maññasi suddho, suddhimaggā aparaddho’’ ⁴ ti.

អថ ខោ ភគវា ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ អជ្ឈភាសិ –

Atha kho bhagavā ‘‘māro ayaṃ pāpimā’’ iti viditvā māraṃ pāpimantaṃ gāthāhi ajjhabhāsi –

‘‘អនត្ថសំហិតំ ញត្វា, យំ កិញ្ចិ អមរំ តបំ ⁵;

‘‘Anatthasaṃhitaṃ ñatvā, yaṃ kiñci amaraṃ tapaṃ ⁶;

សព្ពំ នត្ថាវហំ ហោតិ, ផិយារិត្តំវ ធម្មនិ ⁷។

Sabbaṃ natthāvahaṃ hoti, phiyārittaṃva dhammani ⁸.

‘‘សីលំ សមាធិ បញ្ញញ្ច, មគ្គំ ពោធាយ ភាវយំ;

‘‘Sīlaṃ samādhi paññañca, maggaṃ bodhāya bhāvayaṃ;

បត្តោស្មិ បរមំ សុទ្ធិំ, និហតោ ត្វមសិ អន្តកា’’តិ។

Pattosmi paramaṃ suddhiṃ, nihato tvamasi antakā’’ti.

អថ ខោ មារោ បាបិមា ‘‘ជានាតិ មំ ភគវា, ជានាតិ មំ សុគតោ’’តិ, ទុក្ខី ទុម្មនោ តត្ថេវន្តរធាយីតិ។

Atha kho māro pāpimā ‘‘jānāti maṃ bhagavā, jānāti maṃ sugato’’ti, dukkhī dummano tatthevantaradhāyīti.

Next: ២. ហត្ថិរាជវណ្ណសុត្តំ • 2. Hatthirājavaṇṇasuttaṃ

Footnotes:

1. សាធុ ឋិតោ សតោ ពោធិំ សមជ្ឈេគន្តិ (សី. បី.), សាធុ វតម្ហិ សត្តោ ពោធិសមជ្ឈគូតិ (ស្យា. កំ.)

2. sādhu ṭhito sato bodhiṃ samajjheganti (sī. pī.), sādhu vatamhi satto bodhisamajjhagūti (syā. kaṃ.)

3. សុទ្ធិមគ្គមបរទ្ធោ (សី. ស្យា. កំ. បី.)

4. suddhimaggamaparaddho (sī. syā. kaṃ. pī.)

5. អបរំ តបំ (ក.)

6. aparaṃ tapaṃ (ka.)

7. វម្មនិ (សី.), ធម្មនិំ (បី.), ជម្មនិំ (ក.) ឯត្ថាយំ ធម្មសទ្ទោ សក្កតេ ធន្វនំ-សទ្ទេន សទិសោ មរុវាចកោតិ វេទិតព្ពោ, យថា ទឡ្ហធម្មាតិបទំ

8. vammani (sī.), dhammaniṃ (pī.), jammaniṃ (ka.) etthāyaṃ dhammasaddo sakkate dhanvanaṃ-saddena sadiso maruvācakoti veditabbo, yathā daḷhadhammātipadaṃ

Related texts:

អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. តបោកម្មសុត្តវណ្ណនា • 1. Tapokammasuttavaṇṇanā

ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១. តបោកម្មសុត្តវណ្ណនា • 1. Tapokammasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact