| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. மாரஸங்யுத்தங்
4. Mārasaṃyuttaṃ
1. பட²மவக்³கோ³
1. Paṭhamavaggo
1. தபோகம்மஸுத்தவண்ணனா
1. Tapokammasuttavaṇṇanā
137. மாரஸங்யுத்தஸ்ஸ பட²மே உருவேலாயங் விஹரதீதி படிவித்³த⁴ஸப்³ப³ஞ்ஞுதஞ்ஞாணோ உருவேலகா³மங் உபனிஸ்ஸாய விஹரதி. பட²மாபி⁴ஸம்பு³த்³தோ⁴தி அபி⁴ஸம்பு³த்³தோ⁴ ஹுத்வா பட²மங் அந்தோஸத்தாஹஸ்மிங்யேவ. து³க்கரகாரிகாயாதி ச²ப்³ப³ஸ்ஸானி கதாய து³க்கரகாரிகாய. மாரோ பாபிமாதி அத்தனோ விஸயங் அதிக்கமிதுங் படிபன்னே ஸத்தே மாரேதீதி மாரோ. பாபே நியோஜேதி, ஸயங் வா பாபே நியுத்தோதி பாபிமா. அஞ்ஞானிபிஸ்ஸ கண்ஹோ, அதி⁴பதி, வஸவத்தீ, அந்தகோ, நமுசி, பமத்தப³ந்தூ⁴திஆதீ³னி ப³ஹூனி நாமானி, இத⁴ பன நாமத்³வயமேவ க³ஹிதங். உபஸங்கமீதி – ‘‘அயங் ஸமணோ கோ³தமோ ‘முத்தொஸ்மீ’தி மஞ்ஞதி, அமுத்தபா⁴வமஸ்ஸ கதெ²ஸ்ஸாமீ’’தி சிந்தெத்வா உபஸங்கமி.
137. Mārasaṃyuttassa paṭhame uruvelāyaṃ viharatīti paṭividdhasabbaññutaññāṇo uruvelagāmaṃ upanissāya viharati. Paṭhamābhisambuddhoti abhisambuddho hutvā paṭhamaṃ antosattāhasmiṃyeva. Dukkarakārikāyāti chabbassāni katāya dukkarakārikāya. Māro pāpimāti attano visayaṃ atikkamituṃ paṭipanne satte māretīti māro. Pāpe niyojeti, sayaṃ vā pāpe niyuttoti pāpimā. Aññānipissa kaṇho, adhipati, vasavattī, antako, namuci, pamattabandhūtiādīni bahūni nāmāni, idha pana nāmadvayameva gahitaṃ. Upasaṅkamīti – ‘‘ayaṃ samaṇo gotamo ‘muttosmī’ti maññati, amuttabhāvamassa kathessāmī’’ti cintetvā upasaṅkami.
தபோகம்மா அபக்கம்மாதி தபோகம்மதோ அபக்கமித்வா. அபரத்³தோ⁴தி ‘‘தூ³ரே த்வங் ஸுத்³தி⁴மக்³கா³’’தி வத³தி. அமரங் தபந்தி அமரதபங் அமரபா⁴வத்தா²ய கதங் லூக²தபங், அத்தகிலமதா²னுயோகோ³. ஸப்³பா³னத்தா²வஹங் ஹோதீதி, ‘‘ஸப்³ப³ங் தபங் மய்ஹங் அத்தா²வஹங் ந ப⁴வதீ’’தி ஞத்வா. பி²யாரித்தங்வ த⁴ம்மனீதி அரஞ்ஞே த²லே பி²யாரித்தங் விய. இத³ங் வுத்தங் ஹோதி – யதா² அரஞ்ஞே த²லே நாவங் ட²பெத்வா ப⁴ண்ட³ஸ்ஸ பூரெத்வா மஹாஜனா அபி⁴ரூஹித்வா பி²யாரித்தங் க³ஹெத்வா ஸங்கட்³டெ⁴ய்யுங் சேவ உப்பீலெய்யுங் ச, ஸோ மஹாஜனஸ்ஸ வாயாமோ ஏகங்கு³லத்³வங்கு³லமத்தம்பி நாவாய க³மனங் அஸாதெ⁴ந்தோ நிரத்த²கோ ப⁴வெய்ய ந அனத்தா²வஹோ, ஏவமேவ அஹங் ‘ஸப்³ப³ங் அமரங் தபங் அனத்தா²வஹங் ஹோதீ’தி ஞத்வா விஸ்ஸஜ்ஜேஸிந்தி.
Tapokammā apakkammāti tapokammato apakkamitvā. Aparaddhoti ‘‘dūre tvaṃ suddhimaggā’’ti vadati. Amaraṃ tapanti amaratapaṃ amarabhāvatthāya kataṃ lūkhatapaṃ, attakilamathānuyogo. Sabbānatthāvahaṃ hotīti, ‘‘sabbaṃ tapaṃ mayhaṃ atthāvahaṃ na bhavatī’’ti ñatvā. Phiyārittaṃva dhammanīti araññe thale phiyārittaṃ viya. Idaṃ vuttaṃ hoti – yathā araññe thale nāvaṃ ṭhapetvā bhaṇḍassa pūretvā mahājanā abhirūhitvā phiyārittaṃ gahetvā saṃkaḍḍheyyuṃ ceva uppīleyyuṃ ca, so mahājanassa vāyāmo ekaṅguladvaṅgulamattampi nāvāya gamanaṃ asādhento niratthako bhaveyya na anatthāvaho, evameva ahaṃ ‘sabbaṃ amaraṃ tapaṃ anatthāvahaṃ hotī’ti ñatvā vissajjesinti.
இதா³னி தங் அமரங் தபங் பஹாய யேன மக்³கே³ன பு³த்³தோ⁴ ஜாதோ, தங் த³ஸ்ஸெந்தோ ஸீலந்திஆதி³மாஹ . தத்த² ஸீலந்தி வசனேன ஸம்மாவாசாகம்மந்தாஜீவா க³ஹிதா, ஸமாதி⁴னா ஸம்மாவாயாமஸதிஸமாத⁴யோ, பஞ்ஞாய ஸம்மாதி³ட்டி²ஸங்கப்பா. மக்³க³ங் போ³தா⁴ய பா⁴வயந்தி இமங் அட்ட²ங்கி³கமேவ அரியமக்³க³ங் போ³த⁴த்தா²ய பா⁴வயந்தோ. எத்த² ச போ³தா⁴யாதி மக்³க³த்தா²ய. யதா² ஹி யாகு³த்தா²ய யாகு³மேவ பசந்தி, பூவத்தா²ய பூவமேவ பசந்தி, ந அஞ்ஞங் கிஞ்சி கரொந்தி, ஏவங் மக்³க³மேவ மக்³க³த்தா²ய பா⁴வேதி. தேனாஹ ‘‘மக்³க³ங் போ³தா⁴ய பா⁴வய’’ந்தி. பரமங் ஸுத்³தி⁴ந்தி அரஹத்தங். நிஹதோதி த்வங் மயா நிஹதோ பராஜிதோ. பட²மங்.
Idāni taṃ amaraṃ tapaṃ pahāya yena maggena buddho jāto, taṃ dassento sīlantiādimāha . Tattha sīlanti vacanena sammāvācākammantājīvā gahitā, samādhinā sammāvāyāmasatisamādhayo, paññāya sammādiṭṭhisaṅkappā. Maggaṃ bodhāya bhāvayanti imaṃ aṭṭhaṅgikameva ariyamaggaṃ bodhatthāya bhāvayanto. Ettha ca bodhāyāti maggatthāya. Yathā hi yāgutthāya yāgumeva pacanti, pūvatthāya pūvameva pacanti, na aññaṃ kiñci karonti, evaṃ maggameva maggatthāya bhāveti. Tenāha ‘‘maggaṃ bodhāya bhāvaya’’nti. Paramaṃ suddhinti arahattaṃ. Nihatoti tvaṃ mayā nihato parājito. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. தபோகம்மஸுத்தங் • 1. Tapokammasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. தபோகம்மஸுத்தவண்ணனா • 1. Tapokammasuttavaṇṇanā
