| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. မာရသံယုတ္တံ
4. Mārasaṃyuttaṃ
၁. ပဌမဝဂ္ဂော
1. Paṭhamavaggo
၁. တပောကမ္မသုတ္တဝဏ္ဏနာ
1. Tapokammasuttavaṇṇanā
၁၃၇. မာရသံယုတ္တသ္သ ပဌမေ ဥရုဝေလာယံ ဝိဟရတီတိ ပဋိဝိဒ္ဓသဗ္ဗညုတညာဏော ဥရုဝေလဂာမံ ဥပနိသ္သာယ ဝိဟရတိ။ ပဌမာဘိသမ္ဗုဒ္ဓောတိ အဘိသမ္ဗုဒ္ဓော ဟုတ္ဝာ ပဌမံ အန္တောသတ္တာဟသ္မိံယေဝ။ ဒုက္ကရကာရိကာယာတိ ဆဗ္ဗသ္သာနိ ကတာယ ဒုက္ကရကာရိကာယ။ မာရော ပာပိမာတိ အတ္တနော ဝိသယံ အတိက္ကမိတုံ ပဋိပန္နေ သတ္တေ မာရေတီတိ မာရော။ ပာပေ နိယောဇေတိ, သယံ ဝာ ပာပေ နိယုတ္တောတိ ပာပိမာ။ အညာနိပိသ္သ ကဏ္ဟော, အဓိပတိ, ဝသဝတ္တီ, အန္တကော, နမုစိ, ပမတ္တဗန္ဓူတိအာဒီနိ ဗဟူနိ နာမာနိ, ဣဓ ပန နာမဒ္ဝယမေဝ ဂဟိတံ။ ဥပသင္ကမီတိ – ‘‘အယံ သမဏော ဂောတမော ‘မုတ္တောသ္မီ’တိ မညတိ, အမုတ္တဘာဝမသ္သ ကထေသ္သာမီ’’တိ စိန္တေတ္ဝာ ဥပသင္ကမိ။
137. Mārasaṃyuttassa paṭhame uruvelāyaṃ viharatīti paṭividdhasabbaññutaññāṇo uruvelagāmaṃ upanissāya viharati. Paṭhamābhisambuddhoti abhisambuddho hutvā paṭhamaṃ antosattāhasmiṃyeva. Dukkarakārikāyāti chabbassāni katāya dukkarakārikāya. Māro pāpimāti attano visayaṃ atikkamituṃ paṭipanne satte māretīti māro. Pāpe niyojeti, sayaṃ vā pāpe niyuttoti pāpimā. Aññānipissa kaṇho, adhipati, vasavattī, antako, namuci, pamattabandhūtiādīni bahūni nāmāni, idha pana nāmadvayameva gahitaṃ. Upasaṅkamīti – ‘‘ayaṃ samaṇo gotamo ‘muttosmī’ti maññati, amuttabhāvamassa kathessāmī’’ti cintetvā upasaṅkami.
တပောကမ္မာ အပက္ကမ္မာတိ တပောကမ္မတော အပက္ကမိတ္ဝာ။ အပရဒ္ဓောတိ ‘‘ဒူရေ တ္ဝံ သုဒ္ဓိမဂ္ဂာ’’တိ ဝဒတိ။ အမရံ တပန္တိ အမရတပံ အမရဘာဝတ္ထာယ ကတံ လူခတပံ, အတ္တကိလမထာနုယောဂော။ သဗ္ဗာနတ္ထာဝဟံ ဟောတီတိ, ‘‘သဗ္ဗံ တပံ မယ္ဟံ အတ္ထာဝဟံ န ဘဝတီ’’တိ ဉတ္ဝာ။ ဖိယာရိတ္တံဝ ဓမ္မနီတိ အရညေ ထလေ ဖိယာရိတ္တံ ဝိယ။ ဣဒံ ဝုတ္တံ ဟောတိ – ယထာ အရညေ ထလေ နာဝံ ဌပေတ္ဝာ ဘဏ္ဍသ္သ ပူရေတ္ဝာ မဟာဇနာ အဘိရူဟိတ္ဝာ ဖိယာရိတ္တံ ဂဟေတ္ဝာ သံကဍ္ဎေယ္ယုံ စေဝ ဥပ္ပီလေယ္ယုံ စ, သော မဟာဇနသ္သ ဝာယာမော ဧကင္ဂုလဒ္ဝင္ဂုလမတ္တမ္ပိ နာဝာယ ဂမနံ အသာဓေန္တော နိရတ္ထကော ဘဝေယ္ယ န အနတ္ထာဝဟော, ဧဝမေဝ အဟံ ‘သဗ္ဗံ အမရံ တပံ အနတ္ထာဝဟံ ဟောတီ’တိ ဉတ္ဝာ ဝိသ္သဇ္ဇေသိန္တိ။
Tapokammā apakkammāti tapokammato apakkamitvā. Aparaddhoti ‘‘dūre tvaṃ suddhimaggā’’ti vadati. Amaraṃ tapanti amaratapaṃ amarabhāvatthāya kataṃ lūkhatapaṃ, attakilamathānuyogo. Sabbānatthāvahaṃ hotīti, ‘‘sabbaṃ tapaṃ mayhaṃ atthāvahaṃ na bhavatī’’ti ñatvā. Phiyārittaṃva dhammanīti araññe thale phiyārittaṃ viya. Idaṃ vuttaṃ hoti – yathā araññe thale nāvaṃ ṭhapetvā bhaṇḍassa pūretvā mahājanā abhirūhitvā phiyārittaṃ gahetvā saṃkaḍḍheyyuṃ ceva uppīleyyuṃ ca, so mahājanassa vāyāmo ekaṅguladvaṅgulamattampi nāvāya gamanaṃ asādhento niratthako bhaveyya na anatthāvaho, evameva ahaṃ ‘sabbaṃ amaraṃ tapaṃ anatthāvahaṃ hotī’ti ñatvā vissajjesinti.
ဣဒာနိ တံ အမရံ တပံ ပဟာယ ယေန မဂ္ဂေန ဗုဒ္ဓော ဇာတော, တံ ဒသ္သေန္တော သီလန္တိအာဒိမာဟ ။ တတ္ထ သီလန္တိ ဝစနေန သမ္မာဝာစာကမ္မန္တာဇီဝာ ဂဟိတာ, သမာဓိနာ သမ္မာဝာယာမသတိသမာဓယော, ပညာယ သမ္မာဒိဋ္ဌိသင္ကပ္ပာ။ မဂ္ဂံ ဗောဓာယ ဘာဝယန္တိ ဣမံ အဋ္ဌင္ဂိကမေဝ အရိယမဂ္ဂံ ဗောဓတ္ထာယ ဘာဝယန္တော။ ဧတ္ထ စ ဗောဓာယာတိ မဂ္ဂတ္ထာယ။ ယထာ ဟိ ယာဂုတ္ထာယ ယာဂုမေဝ ပစန္တိ, ပူဝတ္ထာယ ပူဝမေဝ ပစန္တိ, န အညံ ကိဉ္စိ ကရောန္တိ, ဧဝံ မဂ္ဂမေဝ မဂ္ဂတ္ထာယ ဘာဝေတိ။ တေနာဟ ‘‘မဂ္ဂံ ဗောဓာယ ဘာဝယ’’န္တိ။ ပရမံ သုဒ္ဓိန္တိ အရဟတ္တံ။ နိဟတောတိ တ္ဝံ မယာ နိဟတော ပရာဇိတော။ ပဌမံ။
Idāni taṃ amaraṃ tapaṃ pahāya yena maggena buddho jāto, taṃ dassento sīlantiādimāha . Tattha sīlanti vacanena sammāvācākammantājīvā gahitā, samādhinā sammāvāyāmasatisamādhayo, paññāya sammādiṭṭhisaṅkappā. Maggaṃ bodhāya bhāvayanti imaṃ aṭṭhaṅgikameva ariyamaggaṃ bodhatthāya bhāvayanto. Ettha ca bodhāyāti maggatthāya. Yathā hi yāgutthāya yāgumeva pacanti, pūvatthāya pūvameva pacanti, na aññaṃ kiñci karonti, evaṃ maggameva maggatthāya bhāveti. Tenāha ‘‘maggaṃ bodhāya bhāvaya’’nti. Paramaṃ suddhinti arahattaṃ. Nihatoti tvaṃ mayā nihato parājito. Paṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. တပောကမ္မသုတ္တံ • 1. Tapokammasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. တပောကမ္မသုတ္တဝဏ္ဏနာ • 1. Tapokammasuttavaṇṇanā
