| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. တပုသ္သသုတ္တဝဏ္ဏနာ
10. Tapussasuttavaṇṇanā
၄၁. ဒသမေ မလ္လေသူတိ မလ္လရဋ္ဌေ။ ဣဓေဝ တာဝ တ္ဝံ, အာနန္ဒ, ဟောတီတိ ဣဓ ဘဂဝာ ‘‘တပုသ္သဂဟပတိနော ဣဓ ဌိတေန အာနန္ဒေန သဒ္ဓိံ ကထာသလ္လာပော ဘဝိသ္သတိ, တတောနိဒာနံ အဟံ မဟန္တံ ဓမ္မပရိယာယံ ဒေသေသ္သာမီ’’တိ ဉတ္ဝာ အာဟ။ ဥပသင္ကမီတိ သော ကိရ ဘုတ္တပာတရာသော ‘‘ဒသဗလသ္သ ဥပဋ္ဌာနံ ဂမိသ္သာမီ’’တိ နိက္ခမန္တော ဒူရတောဝ ထေရံ ဒိသ္ဝာ ယေနာယသ္မာ အာနန္ဒော တေနုပသင္ကမိ။ ပပာတော ဝိယ ခာယတိ, ယဒိဒံ နေက္ခမ္မန္တိ ယမိဒံ ပဗ္ဗဇ္ဇာသင္ခာတံ နေက္ခမ္မံ, တံ အမ္ဟာကံ မဟာပပာတော ဝိယ ဩဂာဟိတ္ဝာ ဥပဋ္ဌာတိ။ နေက္ခမ္မေ စိတ္တံ ပက္ခန္ဒတီတိ ပဗ္ဗဇ္ဇာယ စိတ္တံ အာရမ္မဏဝသေန ပက္ခန္ဒတိ, တဒေဝ အာရမ္မဏံ ကတ္ဝာ ပသီဒတိ, တဒေဝ ပတိဋ္ဌာတိ, ပစ္စနီကဓမ္မေဟိ စ ဝိမုစ္စတိ။ ‘ဧတံ သန္တ’န္တိ ပသ္သတောတိ ဧတံ နေက္ခမ္မံ သန္တံ ဝိဂတဒရထပရိဠာဟန္တိ ဧဝံ ပသ္သန္တာနံ ဘိက္ခူနံ။ ဗဟုနာ ဇနေန ဝိသဘာဂောတိ တယိဒံ ဗဟုနာ မဟာဇနေန သဒ္ဓိံ ဘိက္ခူနံ ဝိသဘာဂံ, အသဒိသန္တိ အတ္ထော။
41. Dasame mallesūti mallaraṭṭhe. Idheva tāva tvaṃ, ānanda, hotīti idha bhagavā ‘‘tapussagahapatino idha ṭhitena ānandena saddhiṃ kathāsallāpo bhavissati, tatonidānaṃ ahaṃ mahantaṃ dhammapariyāyaṃ desessāmī’’ti ñatvā āha. Upasaṅkamīti so kira bhuttapātarāso ‘‘dasabalassa upaṭṭhānaṃ gamissāmī’’ti nikkhamanto dūratova theraṃ disvā yenāyasmā ānando tenupasaṅkami. Papāto viya khāyati, yadidaṃ nekkhammanti yamidaṃ pabbajjāsaṅkhātaṃ nekkhammaṃ, taṃ amhākaṃ mahāpapāto viya ogāhitvā upaṭṭhāti. Nekkhamme cittaṃ pakkhandatīti pabbajjāya cittaṃ ārammaṇavasena pakkhandati, tadeva ārammaṇaṃ katvā pasīdati, tadeva patiṭṭhāti, paccanīkadhammehi ca vimuccati. ‘Etaṃ santa’nti passatoti etaṃ nekkhammaṃ santaṃ vigatadarathapariḷāhanti evaṃ passantānaṃ bhikkhūnaṃ. Bahunā janena visabhāgoti tayidaṃ bahunā mahājanena saddhiṃ bhikkhūnaṃ visabhāgaṃ, asadisanti attho.
ကထာပာဘတန္တိ ကထာမူလံ။ တသ္သ မယ္ဟံ, အာနန္ဒ, နေက္ခမ္မေ စိတ္တံ န ပက္ခန္ဒတီတိ တသ္သ ဧဝံ ဝိတက္ကေန္တသ္သာပိ မယ္ဟံ ပဗ္ဗဇ္ဇာယ စိတ္တံ န ဩတရတိ။ ‘‘ဧတံ သန္တ’’န္တိ ပသ္သတောတိ ‘‘သာဓု နေက္ခမ္မ’’န္တိ ပရိဝိတက္ကနဝသေန ‘‘ဧတံ နေက္ခမ္မံ သန္တ’’န္တိ ပသ္သန္တသ္သပိ။ အနာသေဝိတောတိ န အာသေဝိတော န ဖသ္သိတော န သစ္ဆိကတော။ အဓိဂမ္မာတိ အဓိဂန္တ္ဝာ ပတ္ဝာ သစ္ဆိကတ္ဝာ။ တမာသေဝေယ္ယန္တိ တံ အာနိသံသံ သေဝေယ္ယံ ဘဇေယ္ယံ။ ယံ မေတိ ယေန ကာရဏေန မယ္ဟံ။ အဓိဂမ္မာတိ အဓိဂန္တ္ဝာ။ သ္ဝာသ္သ မေ ဟောတိ အာဗာဓောတိ သော မယ္ဟံ အာဗာဓနဋ္ဌေန အာဗာဓော ဟောတိ။ အဝိတက္ကေ စိတ္တံ န ပက္ခန္ဒတီတိ အဝိတက္ကဝိစာရေ ဒုတိယဇ္ဈာနေ အာရမ္မဏဝသေန စိတ္တံ န ပက္ခန္ဒတိ။ ဝိတက္ကေသူတိ ဝိတက္ကဝိစာရေသု။ သေသံ သဗ္ဗတ္ထ ဥတ္တာနတ္ထမေဝာတိ။
Kathāpābhatanti kathāmūlaṃ. Tassa mayhaṃ, ānanda, nekkhamme cittaṃ na pakkhandatīti tassa evaṃ vitakkentassāpi mayhaṃ pabbajjāya cittaṃ na otarati. ‘‘Etaṃsanta’’nti passatoti ‘‘sādhu nekkhamma’’nti parivitakkanavasena ‘‘etaṃ nekkhammaṃ santa’’nti passantassapi. Anāsevitoti na āsevito na phassito na sacchikato. Adhigammāti adhigantvā patvā sacchikatvā. Tamāseveyyanti taṃ ānisaṃsaṃ seveyyaṃ bhajeyyaṃ. Yaṃmeti yena kāraṇena mayhaṃ. Adhigammāti adhigantvā. Svāssa me hoti ābādhoti so mayhaṃ ābādhanaṭṭhena ābādho hoti. Avitakke cittaṃ na pakkhandatīti avitakkavicāre dutiyajjhāne ārammaṇavasena cittaṃ na pakkhandati. Vitakkesūti vitakkavicāresu. Sesaṃ sabbattha uttānatthamevāti.
မဟာဝဂ္ဂော စတုတ္ထော။
Mahāvaggo catuttho.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. တပုသ္သသုတ္တံ • 10. Tapussasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁၀. တပုသ္သသုတ္တဝဏ္ဏနာ • 10. Tapussasuttavaṇṇanā
