| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༧. ཏརུཎརུཀྑསུཏྟཾ
7. Taruṇarukkhasuttaṃ
༥༧. སཱཝཏྠིཡཾ ཝིཧརཏི…པེ॰… ‘‘སཾཡོཛནིཡེསུ, བྷིཀྑཝེ, དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི། ཏཎྷཱཔཙྩཡཱ ཨུཔཱདཱནཾ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི’’།
57. Sāvatthiyaṃ viharati…pe… ‘‘saṃyojaniyesu, bhikkhave, dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti’’.
‘‘སེཡྻཐཱཔི, བྷིཀྑཝེ, ཏརུཎོ རུཀྑོ། ཏསྶ པུརིསོ ཀཱལེན ཀཱལཾ མཱུལཱནི པལིམཛྫེཡྻ 1 ཀཱལེན ཀཱལཾ པཾསུཾ དདེཡྻ, ཀཱལེན ཀཱལཾ ཨུདཀཾ དདེཡྻ། ཨེཝཉྷི སོ, བྷིཀྑཝེ, ཏརུཎོ རུཀྑོ ཏདཱཧཱརོ ཏདུཔཱདཱནོ ཝུདྡྷིཾ ཝིརཱུལ༹ྷིཾ ཝེཔུལླཾ ཨཱཔཛྫེཡྻ། ཨེཝམེཝ ཁོ, བྷིཀྑཝེ, སཾཡོཛནིཡེསུ དྷམྨེསུ ཨསྶཱདཱནུཔསྶིནོ ཝིཧརཏོ ཏཎྷཱ པཝཌྜྷཏི། ཏཎྷཱཔཙྩཡཱ ཨུཔཱདཱནཾ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི།
‘‘Seyyathāpi, bhikkhave, taruṇo rukkho. Tassa puriso kālena kālaṃ mūlāni palimajjeyya 2 kālena kālaṃ paṃsuṃ dadeyya, kālena kālaṃ udakaṃ dadeyya. Evañhi so, bhikkhave, taruṇo rukkho tadāhāro tadupādāno vuddhiṃ virūḷhiṃ vepullaṃ āpajjeyya. Evameva kho, bhikkhave, saṃyojaniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti.
‘‘སཾཡོཛནིཡེསུ, བྷིཀྑཝེ, དྷམྨེསུ ཨཱདཱིནཝཱནུཔསྶིནོ ཝིཧརཏོ ཏཎྷཱ ནིརུཛ྄ཛྷཏི། ཏཎྷཱནིརོདྷཱ ཨུཔཱདཱནནིརོདྷོ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ ནིརོདྷོ ཧོཏི།
‘‘Saṃyojaniyesu, bhikkhave, dhammesu ādīnavānupassino viharato taṇhā nirujjhati. Taṇhānirodhā upādānanirodho…pe… evametassa kevalassa dukkhakkhandhassa nirodho hoti.
‘‘སེཡྻཐཱཔི , བྷིཀྑཝེ, ཏརུཎོ རུཀྑོ། ཨཐ པུརིསོ ཨཱགཙྪེཡྻ ཀུདྡཱལཔིཊཀཾ ཨཱདཱཡ…པེ॰… ནདིཡཱ ཝཱ སཱིགྷསོཏཱཡ པཝཱཧེཡྻ། ཨེཝཉྷི སོ, བྷིཀྑཝེ, ཏརུཎོ རུཀྑོ ཨུཙྪིནྣམཱུལོ ཨསྶ ཏཱལཱཝཏྠུཀཏོ ཨནབྷཱཝངྐཏོ ཨཱཡཏིཾ ཨནུཔྤཱདདྷམྨོ། ཨེཝམེཝ ཁོ, བྷིཀྑཝེ, སཾཡོཛནིཡེསུ དྷམྨེསུ ཨཱདཱིནཝཱནུཔསྶིནོ ཝིཧརཏོ ཏཎྷཱ ནིརུཛ྄ཛྷཏི། ཏཎྷཱནིརོདྷཱ ཨུཔཱདཱནནིརོདྷོ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ ནིརོདྷོ ཧོཏཱི’’ཏི། སཏྟམཾ།
‘‘Seyyathāpi , bhikkhave, taruṇo rukkho. Atha puriso āgaccheyya kuddālapiṭakaṃ ādāya…pe… nadiyā vā sīghasotāya pavāheyya. Evañhi so, bhikkhave, taruṇo rukkho ucchinnamūlo assa tālāvatthukato anabhāvaṅkato āyatiṃ anuppādadhammo. Evameva kho, bhikkhave, saṃyojaniyesu dhammesu ādīnavānupassino viharato taṇhā nirujjhati. Taṇhānirodhā upādānanirodho…pe… evametassa kevalassa dukkhakkhandhassa nirodho hotī’’ti. Sattamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. ཏརུཎརུཀྑསུཏྟཝཎྞནཱ • 7. Taruṇarukkhasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༧. ཏརུཎརུཀྑསུཏྟཝཎྞནཱ • 7. Taruṇarukkhasuttavaṇṇanā
