| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
12. ததா²க³தஸுத்தங்
12. Tathāgatasuttaṃ
844. தத்ர கோ² ப⁴க³வா பி⁴க்கூ² ஆமந்தேஸி – ‘‘தங் கிங் மஞ்ஞத², பி⁴க்க²வே, கதமேஸங் த⁴ம்மானங் பா⁴விதத்தா ப³ஹுலீகதத்தா ததா²க³தோ ஏவங்மஹித்³தி⁴கோ ஏவங்மஹானுபா⁴வோ’’தி? ப⁴க³வங்மூலகா நோ, ப⁴ந்தே, த⁴ம்மா…பே॰… ‘‘சதுன்னங் கோ², பி⁴க்க²வே, இத்³தி⁴பாதா³னங் பா⁴விதத்தா ப³ஹுலீகதத்தா ததா²க³தோ ஏவங்மஹித்³தி⁴கோ ஏவங்மஹானுபா⁴வோ’’.
844. Tatra kho bhagavā bhikkhū āmantesi – ‘‘taṃ kiṃ maññatha, bhikkhave, katamesaṃ dhammānaṃ bhāvitattā bahulīkatattā tathāgato evaṃmahiddhiko evaṃmahānubhāvo’’ti? Bhagavaṃmūlakā no, bhante, dhammā…pe… ‘‘catunnaṃ kho, bhikkhave, iddhipādānaṃ bhāvitattā bahulīkatattā tathāgato evaṃmahiddhiko evaṃmahānubhāvo’’.
‘‘கதமேஸங் சதுன்னங்? இத⁴, பி⁴க்க²வே, ததா²க³தோ ச²ந்த³ஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி – ‘இதி மே ச²ந்தோ³ ந ச அதிலீனோ ப⁴விஸ்ஸதி, ந ச அதிப்பக்³க³ஹிதோ ப⁴விஸ்ஸதி, ந ச அஜ்ஜ²த்தங் ஸங்கி²த்தோ ப⁴விஸ்ஸதி, ந ச ப³ஹித்³தா⁴ விக்கி²த்தோ ப⁴விஸ்ஸதி’. பச்சா²புரேஸஞ்ஞீ ச விஹரதி – ‘யதா² புரே ததா² பச்சா², யதா² பச்சா² ததா² புரே; யதா² அதோ⁴ ததா² உத்³த⁴ங், யதா² உத்³த⁴ங் ததா² அதோ⁴; யதா² தி³வா ததா² ரத்திங், யதா² ரத்திங் ததா² தி³வா’. இதி விவடேன சேதஸா அபரியோனத்³தே⁴ன ஸப்பபா⁴ஸங் சித்தங் பா⁴வேதி. வீரியஸமாதி⁴…பே॰… சித்தஸமாதி⁴…பே॰… வீமங்ஸாஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி – ‘இதி மே வீமங்ஸா ந ச அதிலீனா ப⁴விஸ்ஸதி, ந ச அதிபக்³க³ஹிதா ப⁴விஸ்ஸதி, ந ச அஜ்ஜ²த்தங் ஸங்கி²த்தா ப⁴விஸ்ஸதி, ந ச ப³ஹித்³தா⁴ விக்கி²த்தா ப⁴விஸ்ஸதி’. பச்சா²புரேஸஞ்ஞீ ச விஹரதி – ‘யதா² புரே ததா² பச்சா², யதா² பச்சா² ததா² புரே; யதா² அதோ⁴ ததா² உத்³த⁴ங், யதா² உத்³த⁴ங் ததா² அதோ⁴; யதா² தி³வா ததா² ரத்திங், யதா² ரத்திங் ததா² தி³வா’. இதி விவடேன சேதஸா அபரியோனத்³தே⁴ன ஸப்பபா⁴ஸங் சித்தங் பா⁴வேதி. இமேஸங் கோ², பி⁴க்க²வே, சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா ததா²க³தோ ஏவங்மஹித்³தி⁴கோ ஏவங்மஹானுபா⁴வோ.
‘‘Katamesaṃ catunnaṃ? Idha, bhikkhave, tathāgato chandasamādhippadhānasaṅkhārasamannāgataṃ iddhipādaṃ bhāveti – ‘iti me chando na ca atilīno bhavissati, na ca atippaggahito bhavissati, na ca ajjhattaṃ saṃkhitto bhavissati, na ca bahiddhā vikkhitto bhavissati’. Pacchāpuresaññī ca viharati – ‘yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā’. Iti vivaṭena cetasā apariyonaddhena sappabhāsaṃ cittaṃ bhāveti. Vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ‘iti me vīmaṃsā na ca atilīnā bhavissati, na ca atipaggahitā bhavissati, na ca ajjhattaṃ saṃkhittā bhavissati, na ca bahiddhā vikkhittā bhavissati’. Pacchāpuresaññī ca viharati – ‘yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā’. Iti vivaṭena cetasā apariyonaddhena sappabhāsaṃ cittaṃ bhāveti. Imesaṃ kho, bhikkhave, catunnaṃ iddhipādānaṃ bhāvitattā bahulīkatattā tathāgato evaṃmahiddhiko evaṃmahānubhāvo.
‘‘இமேஸஞ்ச பன, பி⁴க்க²வே, சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா ததா²க³தோ அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி…பே॰… யாவ ப்³ரஹ்மலோகாபி காயேன வஸங் வத்தேதி. இமேஸஞ்ச பன, பி⁴க்க²வே, சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா ததா²க³தோ ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. த்³வாத³ஸமங்.
‘‘Imesañca pana, bhikkhave, catunnaṃ iddhipādānaṃ bhāvitattā bahulīkatattā tathāgato anekavihitaṃ iddhividhaṃ paccanubhoti – ekopi hutvā bahudhā hoti…pe… yāva brahmalokāpi kāyena vasaṃ vatteti. Imesañca pana, bhikkhave, catunnaṃ iddhipādānaṃ bhāvitattā bahulīkatattā tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’’ti. Dvādasamaṃ.
(ச²பி அபி⁴ஞ்ஞாயோ வித்தா²ரேதப்³பா³).
(Chapi abhiññāyo vitthāretabbā).
அயோகு³ளவக்³கோ³ ததியோ.
Ayoguḷavaggo tatiyo.
தஸ்ஸுத்³தா³னங் –
Tassuddānaṃ –
மக்³கோ³ அயோகு³ளோ பி⁴க்கு², ஸுத்³தி⁴கஞ்சாபி த்³வே ப²லா;
Maggo ayoguḷo bhikkhu, suddhikañcāpi dve phalā;
த்³வே சானந்தா³ து³வே பி⁴க்கூ², மொக்³க³ல்லானோ ததா²க³தோதி.
Dve cānandā duve bhikkhū, moggallāno tathāgatoti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 11-12. மொக்³க³ல்லானஸுத்தாதி³வண்ணனா • 11-12. Moggallānasuttādivaṇṇanā
