| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১২. তথাগতসুত্তং
12. Tathāgatasuttaṃ
৮৪৪. তত্র খো ভগৰা ভিক্খূ আমন্তেসি – ‘‘তং কিং মঞ্ঞথ, ভিক্খৰে, কতমেসং ধম্মানং ভাৰিতত্তা বহুলীকতত্তা তথাগতো এৰংমহিদ্ধিকো এৰংমহানুভাৰো’’তি? ভগৰংমূলকা নো, ভন্তে, ধম্মা…পে॰… ‘‘চতুন্নং খো, ভিক্খৰে, ইদ্ধিপাদানং ভাৰিতত্তা বহুলীকতত্তা তথাগতো এৰংমহিদ্ধিকো এৰংমহানুভাৰো’’।
844. Tatra kho bhagavā bhikkhū āmantesi – ‘‘taṃ kiṃ maññatha, bhikkhave, katamesaṃ dhammānaṃ bhāvitattā bahulīkatattā tathāgato evaṃmahiddhiko evaṃmahānubhāvo’’ti? Bhagavaṃmūlakā no, bhante, dhammā…pe… ‘‘catunnaṃ kho, bhikkhave, iddhipādānaṃ bhāvitattā bahulīkatattā tathāgato evaṃmahiddhiko evaṃmahānubhāvo’’.
‘‘কতমেসং চতুন্নং? ইধ, ভিক্খৰে, তথাগতো ছন্দসমাধিপ্পধানসঙ্খারসমন্নাগতং ইদ্ধিপাদং ভাৰেতি – ‘ইতি মে ছন্দো ন চ অতিলীনো ভৰিস্সতি, ন চ অতিপ্পগ্গহিতো ভৰিস্সতি, ন চ অজ্ঝত্তং সংখিত্তো ভৰিস্সতি, ন চ বহিদ্ধা ৰিক্খিত্তো ভৰিস্সতি’। পচ্ছাপুরেসঞ্ঞী চ ৰিহরতি – ‘যথা পুরে তথা পচ্ছা, যথা পচ্ছা তথা পুরে; যথা অধো তথা উদ্ধং, যথা উদ্ধং তথা অধো; যথা দিৰা তথা রত্তিং, যথা রত্তিং তথা দিৰা’। ইতি ৰিৰটেন চেতসা অপরিযোনদ্ধেন সপ্পভাসং চিত্তং ভাৰেতি। ৰীরিযসমাধি…পে॰… চিত্তসমাধি…পে॰… ৰীমংসাসমাধিপ্পধানসঙ্খারসমন্নাগতং ইদ্ধিপাদং ভাৰেতি – ‘ইতি মে ৰীমংসা ন চ অতিলীনা ভৰিস্সতি, ন চ অতিপগ্গহিতা ভৰিস্সতি, ন চ অজ্ঝত্তং সংখিত্তা ভৰিস্সতি, ন চ বহিদ্ধা ৰিক্খিত্তা ভৰিস্সতি’। পচ্ছাপুরেসঞ্ঞী চ ৰিহরতি – ‘যথা পুরে তথা পচ্ছা, যথা পচ্ছা তথা পুরে; যথা অধো তথা উদ্ধং, যথা উদ্ধং তথা অধো; যথা দিৰা তথা রত্তিং, যথা রত্তিং তথা দিৰা’। ইতি ৰিৰটেন চেতসা অপরিযোনদ্ধেন সপ্পভাসং চিত্তং ভাৰেতি। ইমেসং খো, ভিক্খৰে, চতুন্নং ইদ্ধিপাদানং ভাৰিতত্তা বহুলীকতত্তা তথাগতো এৰংমহিদ্ধিকো এৰংমহানুভাৰো।
‘‘Katamesaṃ catunnaṃ? Idha, bhikkhave, tathāgato chandasamādhippadhānasaṅkhārasamannāgataṃ iddhipādaṃ bhāveti – ‘iti me chando na ca atilīno bhavissati, na ca atippaggahito bhavissati, na ca ajjhattaṃ saṃkhitto bhavissati, na ca bahiddhā vikkhitto bhavissati’. Pacchāpuresaññī ca viharati – ‘yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā’. Iti vivaṭena cetasā apariyonaddhena sappabhāsaṃ cittaṃ bhāveti. Vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ‘iti me vīmaṃsā na ca atilīnā bhavissati, na ca atipaggahitā bhavissati, na ca ajjhattaṃ saṃkhittā bhavissati, na ca bahiddhā vikkhittā bhavissati’. Pacchāpuresaññī ca viharati – ‘yathā pure tathā pacchā, yathā pacchā tathā pure; yathā adho tathā uddhaṃ, yathā uddhaṃ tathā adho; yathā divā tathā rattiṃ, yathā rattiṃ tathā divā’. Iti vivaṭena cetasā apariyonaddhena sappabhāsaṃ cittaṃ bhāveti. Imesaṃ kho, bhikkhave, catunnaṃ iddhipādānaṃ bhāvitattā bahulīkatattā tathāgato evaṃmahiddhiko evaṃmahānubhāvo.
‘‘ইমেসঞ্চ পন, ভিক্খৰে, চতুন্নং ইদ্ধিপাদানং ভাৰিতত্তা বহুলীকতত্তা তথাগতো অনেকৰিহিতং ইদ্ধিৰিধং পচ্চনুভোতি – একোপি হুত্ৰা বহুধা হোতি…পে॰… যাৰ ব্রহ্মলোকাপি কাযেন ৰসং ৰত্তেতি। ইমেসঞ্চ পন, ভিক্খৰে, চতুন্নং ইদ্ধিপাদানং ভাৰিতত্তা বহুলীকতত্তা তথাগতো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি। দ্ৰাদসমং।
‘‘Imesañca pana, bhikkhave, catunnaṃ iddhipādānaṃ bhāvitattā bahulīkatattā tathāgato anekavihitaṃ iddhividhaṃ paccanubhoti – ekopi hutvā bahudhā hoti…pe… yāva brahmalokāpi kāyena vasaṃ vatteti. Imesañca pana, bhikkhave, catunnaṃ iddhipādānaṃ bhāvitattā bahulīkatattā tathāgato āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’’ti. Dvādasamaṃ.
(ছপি অভিঞ্ঞাযো ৰিত্থারেতব্বা)।
(Chapi abhiññāyo vitthāretabbā).
অযোগুল়ৰগ্গো ততিযো।
Ayoguḷavaggo tatiyo.
তস্সুদ্দানং –
Tassuddānaṃ –
মগ্গো অযোগুল়ো ভিক্খু, সুদ্ধিকঞ্চাপি দ্ৰে ফলা।
Maggo ayoguḷo bhikkhu, suddhikañcāpi dve phalā;
দ্ৰে চানন্দা দুৰে ভিক্খূ, মোগ্গল্লানো তথাগতোতি॥
Dve cānandā duve bhikkhū, moggallāno tathāgatoti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১১-১২. মোগ্গল্লানসুত্তাদিৰণ্ণনা • 11-12. Moggallānasuttādivaṇṇanā
