| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. තතියඅධම්‌මසුත්‌තං
7. Tatiyaadhammasuttaṃ
173. ‘‘අධම්‌මො ච, භික්‌ඛවෙ, වෙදිතබ්‌බො ධම්‌මො ච; අනත්‌ථො ච වෙදිතබ්‌බො අත්‌ථො ච . අධම්‌මඤ්‌ච විදිත්‌වා ධම්‌මඤ්‌ච, අනත්‌ථඤ්‌ච විදිත්‌වා අත්‌ථඤ්‌ච යථා ධම්‌මො යථා අත්‌ථො තථා පටිපජ්‌ජිතබ්‌බං.
173. ‘‘Adhammo ca, bhikkhave, veditabbo dhammo ca; anattho ca veditabbo attho ca . Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabbaṃ.
‘‘කතමො ච, භික්‌ඛවෙ, අධම්‌මො, කතමො ච ධම්‌මො; කතමො ච අනත්‌ථො, කතමො ච අත්‌ථො? පාණාතිපාතො, භික්‌ඛවෙ, අධම්‌මො; පාණාතිපාතා වෙරමණී ධම්‌මො; යෙ ච පාණාතිපාතපච්‌චයා අනෙකෙ පාපකා අකුසලා ධම්‌මා සම්‌භවන්‌ති, අයං අනත්‌ථො; පාණාතිපාතා වෙරමණිපච්‌චයා ච අනෙකෙ කුසලා ධම්‌මා භාවනාපාරිපූරිං ගච්‌ඡන්‌ති, අයං අත්‌ථො.
‘‘Katamo ca, bhikkhave, adhammo, katamo ca dhammo; katamo ca anattho, katamo ca attho? Pāṇātipāto, bhikkhave, adhammo; pāṇātipātā veramaṇī dhammo; ye ca pāṇātipātapaccayā aneke pāpakā akusalā dhammā sambhavanti, ayaṃ anattho; pāṇātipātā veramaṇipaccayā ca aneke kusalā dhammā bhāvanāpāripūriṃ gacchanti, ayaṃ attho.
‘‘අදින්‌නාදානං, භික්‌ඛවෙ, අධම්‌මො; අදින්‌නාදානා වෙරමණී ධම්‌මො… කාමෙසුමිච්‌ඡාචාරො, භික්‌ඛවෙ , අධම්‌මො; කාමෙසුමිච්‌ඡාචාරා වෙරමණී ධම්‌මො… මුසාවාදො, භික්‌ඛවෙ, අධම්‌මො; මුසාවාදා වෙරමණී ධම්‌මො… පිසුණා වාචා, භික්‌ඛවෙ, අධම්‌මො; පිසුණාය වාචාය වෙරමණී ධම්‌මො… ඵරුසා වාචා, භික්‌ඛවෙ, අධම්‌මො; ඵරුසාය වාචාය වෙරමණී ධම්‌මො… සම්‌ඵප්‌පලාපො, භික්‌ඛවෙ , අධම්‌මො; සම්‌ඵප්‌පලාපා වෙරමණී ධම්‌මො… අභිජ්‌ඣා, භික්‌ඛවෙ, අධම්‌මො; අනභිජ්‌ඣා ධම්‌මො… බ්‍යාපාදො, භික්‌ඛවෙ, අධම්‌මො; අබ්‍යාපාදො ධම්‌මො….
‘‘Adinnādānaṃ, bhikkhave, adhammo; adinnādānā veramaṇī dhammo… kāmesumicchācāro, bhikkhave , adhammo; kāmesumicchācārā veramaṇī dhammo… musāvādo, bhikkhave, adhammo; musāvādā veramaṇī dhammo… pisuṇā vācā, bhikkhave, adhammo; pisuṇāya vācāya veramaṇī dhammo… pharusā vācā, bhikkhave, adhammo; pharusāya vācāya veramaṇī dhammo… samphappalāpo, bhikkhave , adhammo; samphappalāpā veramaṇī dhammo… abhijjhā, bhikkhave, adhammo; anabhijjhā dhammo… byāpādo, bhikkhave, adhammo; abyāpādo dhammo….
‘‘මිච්‌ඡාදිට්‌ඨි, භික්‌ඛවෙ, අධම්‌මො; සම්‌මාදිට්‌ඨි ධම්‌මො; යෙ ච මිච්‌ඡාදිට්‌ඨිපච්‌චයා අනෙකෙ පාපකා අකුසලා ධම්‌මා සම්‌භවන්‌ති, අයං අනත්‌ථො; සම්‌මාදිට්‌ඨිපච්‌චයා ච අනෙකෙ කුසලා ධම්‌මා භාවනාපාරිපූරිං ගච්‌ඡන්‌ති, අයං අත්‌ථො.
‘‘Micchādiṭṭhi, bhikkhave, adhammo; sammādiṭṭhi dhammo; ye ca micchādiṭṭhipaccayā aneke pāpakā akusalā dhammā sambhavanti, ayaṃ anattho; sammādiṭṭhipaccayā ca aneke kusalā dhammā bhāvanāpāripūriṃ gacchanti, ayaṃ attho.
‘‘‘අධම්‌මො ච, භික්‌ඛවෙ, වෙදිතබ්‌බො ධම්‌මො ච; අනත්‌ථො ච වෙදිතබ්‌බො අත්‌ථො ච. අධම්‌මඤ්‌ච විදිත්‌වා ධම්‌මඤ්‌ච, අනත්‌ථඤ්‌ච විදිත්‌වා අත්‌ථඤ්‌ච යථා ධම්‌මො යථා අත්‌ථො තථා පටිපජ්‌ජිතබ්‌බ’න්‌ති, ඉති යං තං වුත්‌තං, ඉදමෙතං පටිච්‌ච වුත්‌ත’’න්‌ති. සත්‌තමං.
‘‘‘Adhammo ca, bhikkhave, veditabbo dhammo ca; anattho ca veditabbo attho ca. Adhammañca viditvā dhammañca, anatthañca viditvā atthañca yathā dhammo yathā attho tathā paṭipajjitabba’nti, iti yaṃ taṃ vuttaṃ, idametaṃ paṭicca vutta’’nti. Sattamaṃ.
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-44. බ්‍රාහ්‌මණපච්‌චොරොහණීසුත්‌තාදිවණ්‌ණනා • 1-44. Brāhmaṇapaccorohaṇīsuttādivaṇṇanā
