| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
7. තතියආජානීයසුත්‌තං
7. Tatiyaājānīyasuttaṃ
99. ‘‘තීහි, භික්‌ඛවෙ, අඞ්‌ගෙහි සමන්‌නාගතො රඤ්‌ඤො භද්‍රො අස්‌සාජානීයො රාජාරහො හොති රාජභොග්‌ගො, රඤ්‌ඤො අඞ්‌ගන්‌තෙව සඞ්‌ඛයං ගච්‌ඡති. කතමෙහි තීහි? ඉධ , භික්‌ඛවෙ, රඤ්‌ඤො භද්‍රො අස්‌සාජානීයො වණ්‌ණසම්‌පන්‌නො ච හොති බලසම්‌පන්‌නො ච ජවසම්‌පන්‌නො ච. ඉමෙහි ඛො, භික්‌ඛවෙ, තීහි අඞ්‌ගෙහි සමන්‌නාගතො රඤ්‌ඤො භද්‍රො අස්‌සාජානීයො රාජාරහො හොති රාජභොග්‌ගො, රඤ්‌ඤො අඞ්‌ගන්‌තෙව සඞ්‌ඛ්‍යං ගච්‌ඡති. එවමෙවං ඛො, භික්‌ඛවෙ, තීහි ධම්‌මෙහි සමන්‌නාගතො භික්‌ඛු ආහුනෙය්‍යො හොති පාහුනෙය්‍යො දක්‌ඛිණෙය්‍යො අඤ්‌ජලිකරණීයො අනුත්‌තරං පුඤ්‌ඤක්‌ඛෙත්‌තං ලොකස්‌ස. කතමෙහි තීහි? ඉධ, භික්‌ඛවෙ, භික්‌ඛු වණ්‌ණසම්‌පන්‌නො ච හොති බලසම්‌පන්‌නො ච ජවසම්‌පන්‌නො ච.
99. ‘‘Tīhi, bhikkhave, aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhayaṃ gacchati. Katamehi tīhi? Idha , bhikkhave, rañño bhadro assājānīyo vaṇṇasampanno ca hoti balasampanno ca javasampanno ca. Imehi kho, bhikkhave, tīhi aṅgehi samannāgato rañño bhadro assājānīyo rājāraho hoti rājabhoggo, rañño aṅganteva saṅkhyaṃ gacchati. Evamevaṃ kho, bhikkhave, tīhi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa. Katamehi tīhi? Idha, bhikkhave, bhikkhu vaṇṇasampanno ca hoti balasampanno ca javasampanno ca.
‘‘කථඤ්‌ච, භික්‌ඛවෙ, භික්‌ඛු වණ්‌ණසම්‌පන්‌නො හොති? ඉධ, භික්‌ඛවෙ, භික්‌ඛු සීලවා හොති , පාතිමොක්‌ඛසංවරසංවුතො විහරති ආචාරගොචරසම්‌පන්‌නො අණුමත්‌තෙසු වජ්‌ජෙසු භයදස්‌සාවී, සමාදාය සික්‌ඛති සික්‌ඛාපදෙසු. එවං ඛො, භික්‌ඛවෙ, භික්‌ඛු වණ්‌ණසම්‌පන්‌නො හොති.
‘‘Kathañca, bhikkhave, bhikkhu vaṇṇasampanno hoti? Idha, bhikkhave, bhikkhu sīlavā hoti , pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu. Evaṃ kho, bhikkhave, bhikkhu vaṇṇasampanno hoti.
‘‘කථඤ්‌ච, භික්‌ඛවෙ, භික්‌ඛු බලසම්‌පන්‌නො හොති? ඉධ, භික්‌ඛවෙ, භික්‌ඛු ආරද්‌ධවීරියො විහරති අකුසලානං ධම්‌මානං පහානාය කුසලානං ධම්‌මානං උපසම්‌පදාය ථාමවා දළ්‌හපරක්‌කමො අනික්‌ඛිත්‌තධුරො කුසලෙසු ධම්‌මෙසු. එවං ඛො, භික්‌ඛවෙ, භික්‌ඛු බලසම්‌පන්‌නො හොති.
‘‘Kathañca, bhikkhave, bhikkhu balasampanno hoti? Idha, bhikkhave, bhikkhu āraddhavīriyo viharati akusalānaṃ dhammānaṃ pahānāya kusalānaṃ dhammānaṃ upasampadāya thāmavā daḷhaparakkamo anikkhittadhuro kusalesu dhammesu. Evaṃ kho, bhikkhave, bhikkhu balasampanno hoti.
‘‘කථඤ්‌ච, භික්‌ඛවෙ, භික්‌ඛු ජවසම්‌පන්‌නො හොති? ඉධ, භික්‌ඛවෙ, භික්‌ඛු ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති. එවං ඛො, භික්‌ඛවෙ, භික්‌ඛු ජවසම්‌පන්‌නො හොති. ඉමෙහි ඛො, භික්‌ඛවෙ, තීහි ධම්‌මෙහි සමන්‌නාගතො භික්‌ඛු ආහුනෙය්‍යො හොති…පෙ.… අනුත්‌තරං පුඤ්‌ඤක්‌ඛෙත්‌තං ලොකස්‌සා’’ති. සත්‌තමං.
‘‘Kathañca, bhikkhave, bhikkhu javasampanno hoti? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Evaṃ kho, bhikkhave, bhikkhu javasampanno hoti. Imehi kho, bhikkhave, tīhi dhammehi samannāgato bhikkhu āhuneyyo hoti…pe… anuttaraṃ puññakkhettaṃ lokassā’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5-7. පඨමආජානීයසුත්‌තාදිවණ්‌ණනා • 5-7. Paṭhamaājānīyasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-7. පඨමආජානීයසුත්‌තාදිවණ්‌ණනා • 5-7. Paṭhamaājānīyasuttādivaṇṇanā
