| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৯. ততিযঅনাগতভযসুত্তং
9. Tatiyaanāgatabhayasuttaṃ
৭৯. ‘‘পঞ্চিমানি , ভিক্খৰে, অনাগতভযানি এতরহি অসমুপ্পন্নানি আযতিং সমুপ্পজ্জিস্সন্তি। তানি ৰো 1 পটিবুজ্ঝিতব্বানি ; পটিবুজ্ঝিত্ৰা চ তেসং পহানায ৰাযমিতব্বং।
79. ‘‘Pañcimāni , bhikkhave, anāgatabhayāni etarahi asamuppannāni āyatiṃ samuppajjissanti. Tāni vo 2 paṭibujjhitabbāni ; paṭibujjhitvā ca tesaṃ pahānāya vāyamitabbaṃ.
‘‘কতমানি পঞ্চ? ভৰিস্সন্তি, ভিক্খৰে, ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞে উপসম্পাদেস্সন্তি। তেপি 3 ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায। তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞে উপসম্পাদেস্সন্তি। তেপি 4 ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায। তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো। ইদং, ভিক্খৰে, পঠমং অনাগতভযং এতরহি অসমুপ্পন্নং আযতিং সমুপ্পজ্জিস্সতি। তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং।
‘‘Katamāni pañca? Bhavissanti, bhikkhave, bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti. Tepi 5 na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññe upasampādessanti. Tepi 6 na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, paṭhamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞেসং নিস্সযং দস্সন্তি। তেপি ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায । তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অঞ্ঞেসং নিস্সযং দস্সন্তি। তেপি ন সক্খিস্সন্তি ৰিনেতুং অধিসীলে অধিচিত্তে অধিপঞ্ঞায। তেপি ভৰিস্সন্তি অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো। ইদং, ভিক্খৰে, দুতিযং অনাগতভযং এতরহি অসমুপ্পন্নং আযতিং সমুপ্পজ্জিস্সতি। তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং।
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññesaṃ nissayaṃ dassanti. Tepi na sakkhissanti vinetuṃ adhisīle adhicitte adhipaññāya . Tepi bhavissanti abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā aññesaṃ nissayaṃ dassanti. Tepi na sakkhissanti vinetuṃ adhisīle adhicitte adhipaññāya. Tepi bhavissanti abhāvitakāyā abhāvitasīlā abhāvitacittā abhāvitapaññā. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, dutiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা অভিধম্মকথং ৰেদল্লকথং কথেন্তা কণ্হধম্মং ওক্কমমানা ন বুজ্ঝিস্সন্তি। ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো। ইদং, ভিক্খৰে, ততিযং অনাগতভযং এতরহি অসমুপ্পন্নং আযতিং সমুপ্পজ্জিস্সতি। তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং।
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā abhidhammakathaṃ vedallakathaṃ kathentā kaṇhadhammaṃ okkamamānā na bujjhissanti. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, tatiyaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা। তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা যে তে সুত্তন্তা তথাগতভাসিতা গম্ভীরা গম্ভীরত্থা লোকুত্তরা সুঞ্ঞতাপ্পটিসংযুত্তা, তেসু ভঞ্ঞমানেসু ন সুস্সূসিস্সন্তি, ন সোতং ওদহিস্সন্তি, ন অঞ্ঞা চিত্তং উপট্ঠপেস্সন্তি, ন চ তে ধম্মে উগ্গহেতব্বং পরিযাপুণিতব্বং মঞ্ঞিস্সন্তি। যে পন তে সুত্তন্তা কৰিতা 7 কাৰেয্যা চিত্তক্খরা চিত্তব্যঞ্জনা বাহিরকা সাৰকভাসিতা, তেসু ভঞ্ঞমানেসু সুস্সূসিস্সন্তি, সোতং ওদহিস্সন্তি, অঞ্ঞা চিত্তং উপট্ঠপেস্সন্তি, তে চ ধম্মে উগ্গহেতব্বং পরিযাপুণিতব্বং মঞ্ঞিস্সন্তি। ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো। ইদং, ভিক্খৰে, চতুত্থং অনাগতভযং এতরহি অসমুপ্পন্নং আযতিং সমুপ্পজ্জিস্সতি। তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং।
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā. Te abhāvitakāyā samānā abhāvitasīlā abhāvitacittā abhāvitapaññā ye te suttantā tathāgatabhāsitā gambhīrā gambhīratthā lokuttarā suññatāppaṭisaṃyuttā, tesu bhaññamānesu na sussūsissanti, na sotaṃ odahissanti, na aññā cittaṃ upaṭṭhapessanti, na ca te dhamme uggahetabbaṃ pariyāpuṇitabbaṃ maññissanti. Ye pana te suttantā kavitā 8 kāveyyā cittakkharā cittabyañjanā bāhirakā sāvakabhāsitā, tesu bhaññamānesu sussūsissanti, sotaṃ odahissanti, aññā cittaṃ upaṭṭhapessanti, te ca dhamme uggahetabbaṃ pariyāpuṇitabbaṃ maññissanti. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, catutthaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ.
‘‘পুন চপরং, ভিক্খৰে, ভৰিস্সন্তি ভিক্খূ অনাগতমদ্ধানং অভাৰিতকাযা অভাৰিতসীলা অভাৰিতচিত্তা অভাৰিতপঞ্ঞা । তে অভাৰিতকাযা সমানা অভাৰিতসীলা অভাৰিতচিত্তা অভাৰিতপঞ্ঞা থেরা ভিক্খূ বাহুলিকা 9 ভৰিস্সন্তি সাথলিকা ওক্কমনে পুব্বঙ্গমা পৰিৰেকে নিক্খিত্তধুরা, ন ৰীরিযং আরভিস্সন্তি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায। তেসং পচ্ছিমা জনতা দিট্ঠানুগতিং আপজ্জিস্সতি। সাপি ভৰিস্সতি বাহুলিকা সাথলিকা ওক্কমনে পুব্বঙ্গমা পৰিৰেকে নিক্খিত্তধুরা, ন ৰীরিযং আরভিস্সতি অপ্পত্তস্স পত্তিযা অনধিগতস্স অধিগমায অসচ্ছিকতস্স সচ্ছিকিরিযায। ইতি খো, ভিক্খৰে, ধম্মসন্দোসা ৰিনযসন্দোসো; ৰিনযসন্দোসা ধম্মসন্দোসো। ইদং, ভিক্খৰে, পঞ্চমং অনাগতভযং এতরহি অসমুপ্পন্নং আযতিং সমুপ্পজ্জিস্সতি। তং ৰো পটিবুজ্ঝিতব্বং; পটিবুজ্ঝিত্ৰা চ তস্স পহানায ৰাযমিতব্বং । ‘‘ইমানি খো, ভিক্খৰে, পঞ্চ অনাগতভযানি এতরহি অসমুপ্পন্নানি আযতিং সমুপ্পজ্জিস্সন্তি। তানি ৰো পটিবুজ্ঝিতব্বানি; পটিবুজ্ঝিত্ৰা চ তেসং পহানায ৰাযমিতব্ব’’ন্তি। নৰমং।
‘‘Puna caparaṃ, bhikkhave, bhavissanti bhikkhū anāgatamaddhānaṃ abhāvitakāyā abhāvitasīlā abhāvitacittā abhāvitapaññā . Te abhāvitakāyā samānā abhāvitasīlā abhāvitacittā abhāvitapaññā therā bhikkhū bāhulikā 10 bhavissanti sāthalikā okkamane pubbaṅgamā paviveke nikkhittadhurā, na vīriyaṃ ārabhissanti appattassa pattiyā anadhigatassa adhigamāya asacchikatassa sacchikiriyāya. Tesaṃ pacchimā janatā diṭṭhānugatiṃ āpajjissati. Sāpi bhavissati bāhulikā sāthalikā okkamane pubbaṅgamā paviveke nikkhittadhurā, na vīriyaṃ ārabhissati appattassa pattiyā anadhigatassa adhigamāya asacchikatassa sacchikiriyāya. Iti kho, bhikkhave, dhammasandosā vinayasandoso; vinayasandosā dhammasandoso. Idaṃ, bhikkhave, pañcamaṃ anāgatabhayaṃ etarahi asamuppannaṃ āyatiṃ samuppajjissati. Taṃ vo paṭibujjhitabbaṃ; paṭibujjhitvā ca tassa pahānāya vāyamitabbaṃ . ‘‘Imāni kho, bhikkhave, pañca anāgatabhayāni etarahi asamuppannāni āyatiṃ samuppajjissanti. Tāni vo paṭibujjhitabbāni; paṭibujjhitvā ca tesaṃ pahānāya vāyamitabba’’nti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. ততিযঅনাগতভযসুত্তৰণ্ণনা • 9. Tatiyaanāgatabhayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৯. ততিযঅনাগতভযসুত্তৰণ্ণনা • 9. Tatiyaanāgatabhayasuttavaṇṇanā
