| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๙. ตติยอนาคตภยสุตฺตวณฺณนา
9. Tatiyaanāgatabhayasuttavaṇṇanā
๗๙. นวเม ธมฺมสโนฺทสา วินยสโนฺทโสติ ธมฺมสโนฺทเสน วินยสโนฺทโส โหติฯ กถํ ปน ธมฺมสฺมิํ ทุสฺสเนฺต วินโย ทุสฺสติ นาม? สมถวิปสฺสนาธเมฺมสุ คพฺภํ อคฺคณฺหเนฺตสุ ปญฺจวิโธ วินโย น โหติ , เอวํ ธเมฺม ทุสฺสเนฺต วินโย ทุสฺสติฯ ทุสฺสีลสฺส ปน สํวรวินโย นาม น โหติ, ตสฺมิํ อสติ สมถวิปสฺสนา คพฺภํ น คณฺหาติฯ เอวํ วินยสโนฺทเสนปิ ธมฺมสโนฺทโส เวทิตโพฺพฯ อภิธมฺมกถนฺติ สีลาทิอุตฺตมธมฺมกถํฯ เวทลฺลกถนฺติ เวทปฎิสํยุตฺตํ ญาณมิสฺสกกถํฯ กณฺหธมฺมํ โอกฺกมมานาติ รนฺธคเวสิตาย อุปารมฺภปริเยสนวเสน กาฬกธมฺมํ โอกฺกมมานาฯ อปิจ ทุฎฺฐจิเตฺตน ปุคฺคลํ ฆเฎฺฎนฺตาปิ ตํ กณฺหธมฺมํ อตฺตโน ทหนฺตาปิ ลาภสกฺการตฺถํ กเถนฺตาปิ กณฺหธมฺมํ โอกฺกมนฺติเยวฯ
79. Navame dhammasandosā vinayasandosoti dhammasandosena vinayasandoso hoti. Kathaṃ pana dhammasmiṃ dussante vinayo dussati nāma? Samathavipassanādhammesu gabbhaṃ aggaṇhantesu pañcavidho vinayo na hoti , evaṃ dhamme dussante vinayo dussati. Dussīlassa pana saṃvaravinayo nāma na hoti, tasmiṃ asati samathavipassanā gabbhaṃ na gaṇhāti. Evaṃ vinayasandosenapi dhammasandoso veditabbo. Abhidhammakathanti sīlādiuttamadhammakathaṃ. Vedallakathanti vedapaṭisaṃyuttaṃ ñāṇamissakakathaṃ. Kaṇhadhammaṃ okkamamānāti randhagavesitāya upārambhapariyesanavasena kāḷakadhammaṃ okkamamānā. Apica duṭṭhacittena puggalaṃ ghaṭṭentāpi taṃ kaṇhadhammaṃ attano dahantāpi lābhasakkāratthaṃ kathentāpi kaṇhadhammaṃ okkamantiyeva.
คมฺภีราติ ปาฬิคมฺภีราฯ คมฺภีรตฺถาติ อตฺถคมฺภีราฯ โลกุตฺตราติ โลกุตฺตรธมฺมทีปกาฯ สุญฺญตาปฎิสํยุตฺตาติ ขนฺธธาตุอายตนปจฺจยาการปฎิสํยุตฺตาฯ น อญฺญา จิตฺตํ อุปฎฺฐเปสฺสนฺตีติ ชานนตฺถาย จิตฺตํ น ฐเปสฺสนฺติฯ อุคฺคเหตพฺพํ ปริยาปุณิตพฺพนฺติ อุคฺคเหตเพฺพ จ วฬเญฺชตเพฺพ จฯ กวิตาติ สิโลกาทิพนฺธนวเสน กวีหิ กตาฯ กาเวยฺยาติ ตเสฺสว เววจนํฯ พาหิรกาติ สาสนโต พหิทฺธา ฐิตาฯ สาวกภาสิตาติ พาหิรสาวเกหิ ภาสิตาฯ เสสเมตฺถ เหฎฺฐา วุตฺตนยตฺตา สุวิเญฺญยฺยตฺตา จ อุตฺตานตฺถเมวฯ
Gambhīrāti pāḷigambhīrā. Gambhīratthāti atthagambhīrā. Lokuttarāti lokuttaradhammadīpakā. Suññatāpaṭisaṃyuttāti khandhadhātuāyatanapaccayākārapaṭisaṃyuttā. Na aññā cittaṃ upaṭṭhapessantīti jānanatthāya cittaṃ na ṭhapessanti. Uggahetabbaṃ pariyāpuṇitabbanti uggahetabbe ca vaḷañjetabbe ca. Kavitāti silokādibandhanavasena kavīhi katā. Kāveyyāti tasseva vevacanaṃ. Bāhirakāti sāsanato bahiddhā ṭhitā. Sāvakabhāsitāti bāhirasāvakehi bhāsitā. Sesamettha heṭṭhā vuttanayattā suviññeyyattā ca uttānatthameva.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๙. ตติยอนาคตภยสุตฺตํ • 9. Tatiyaanāgatabhayasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๙. ตติยอนาคตภยสุตฺตวณฺณนา • 9. Tatiyaanāgatabhayasuttavaṇṇanā
