| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
7. ததியஅஸ்ஸாத³ஸுத்தங்
7. Tatiyaassādasuttaṃ
28. ஸாவத்தி²னிதா³னங். ‘‘நோ சேத³ங், பி⁴க்க²வே, ரூபஸ்ஸ அஸ்ஸாதோ³ அப⁴விஸ்ஸ நயித³ங் ஸத்தா ரூபஸ்மிங் ஸாரஜ்ஜெய்யுங். யஸ்மா ச கோ², பி⁴க்க²வே, அத்தி² ரூபஸ்ஸ அஸ்ஸாதோ³, தஸ்மா ஸத்தா ரூபஸ்மிங் ஸாரஜ்ஜந்தி. நோ சேத³ங், பி⁴க்க²வே, ரூபஸ்ஸ ஆதீ³னவோ அப⁴விஸ்ஸ நயித³ங் ஸத்தா ரூபஸ்மிங் நிப்³பி³ந்தெ³ய்யுங். யஸ்மா ச கோ², பி⁴க்க²வே, அத்தி² ரூபஸ்ஸ ஆதீ³னவோ, தஸ்மா ஸத்தா ரூபஸ்மிங் நிப்³பி³ந்த³ந்தி. நோ சேத³ங், பி⁴க்க²வே, ரூபஸ்ஸ நிஸ்ஸரணங் அப⁴விஸ்ஸ நயித³ங் ஸத்தா ரூபஸ்மா நிஸ்ஸரெய்யுங். யஸ்மா ச கோ², பி⁴க்க²வே, அத்தி² ரூபஸ்ஸ நிஸ்ஸரணங், தஸ்மா ஸத்தா ரூபஸ்மா நிஸ்ஸரந்தி. நோ சேத³ங், பி⁴க்க²வே, வேத³னாய…பே॰… நோ சேத³ங், பி⁴க்க²வே, ஸஞ்ஞாய… நோ சேத³ங், பி⁴க்க²வே, ஸங்கா²ரானங் நிஸ்ஸரணங் அப⁴விஸ்ஸ , நயித³ங் ஸத்தா ஸங்கா²ரேஹி நிஸ்ஸரெய்யுங். யஸ்மா ச கோ², பி⁴க்க²வே, அத்தி² ஸங்கா²ரானங் நிஸ்ஸரணங், தஸ்மா ஸத்தா ஸங்கா²ரேஹி நிஸ்ஸரந்தி. நோ சேத³ங், பி⁴க்க²வே, விஞ்ஞாணஸ்ஸ அஸ்ஸாதோ³ அப⁴விஸ்ஸ, நயித³ங் ஸத்தா விஞ்ஞாணஸ்மிங் ஸாரஜ்ஜெய்யுங். யஸ்மா ச கோ², பி⁴க்க²வே, அத்தி² விஞ்ஞாணஸ்ஸ அஸ்ஸாதோ³, தஸ்மா ஸத்தா விஞ்ஞாணஸ்மிங் ஸாரஜ்ஜந்தி. நோ சேத³ங், பி⁴க்க²வே, விஞ்ஞாணஸ்ஸ ஆதீ³னவோ அப⁴விஸ்ஸ, நயித³ங் ஸத்தா விஞ்ஞாணஸ்மிங் நிப்³பி³ந்தெ³ய்யுங். யஸ்மா ச கோ², பி⁴க்க²வே, அத்தி² விஞ்ஞாணஸ்ஸ ஆதீ³னவோ, தஸ்மா ஸத்தா விஞ்ஞாணஸ்மிங் நிப்³பி³ந்த³ந்தி. நோ சேத³ங், பி⁴க்க²வே, விஞ்ஞாணஸ்ஸ நிஸ்ஸரணங் அப⁴விஸ்ஸ, நயித³ங் ஸத்தா விஞ்ஞாணஸ்மா நிஸ்ஸரெய்யுங் . யஸ்மா ச கோ², பி⁴க்க²வே, அத்தி² விஞ்ஞாணஸ்ஸ நிஸ்ஸரணங், தஸ்மா ஸத்தா விஞ்ஞாணஸ்மா நிஸ்ஸரந்தி.
28. Sāvatthinidānaṃ. ‘‘No cedaṃ, bhikkhave, rūpassa assādo abhavissa nayidaṃ sattā rūpasmiṃ sārajjeyyuṃ. Yasmā ca kho, bhikkhave, atthi rūpassa assādo, tasmā sattā rūpasmiṃ sārajjanti. No cedaṃ, bhikkhave, rūpassa ādīnavo abhavissa nayidaṃ sattā rūpasmiṃ nibbindeyyuṃ. Yasmā ca kho, bhikkhave, atthi rūpassa ādīnavo, tasmā sattā rūpasmiṃ nibbindanti. No cedaṃ, bhikkhave, rūpassa nissaraṇaṃ abhavissa nayidaṃ sattā rūpasmā nissareyyuṃ. Yasmā ca kho, bhikkhave, atthi rūpassa nissaraṇaṃ, tasmā sattā rūpasmā nissaranti. No cedaṃ, bhikkhave, vedanāya…pe… no cedaṃ, bhikkhave, saññāya… no cedaṃ, bhikkhave, saṅkhārānaṃ nissaraṇaṃ abhavissa , nayidaṃ sattā saṅkhārehi nissareyyuṃ. Yasmā ca kho, bhikkhave, atthi saṅkhārānaṃ nissaraṇaṃ, tasmā sattā saṅkhārehi nissaranti. No cedaṃ, bhikkhave, viññāṇassa assādo abhavissa, nayidaṃ sattā viññāṇasmiṃ sārajjeyyuṃ. Yasmā ca kho, bhikkhave, atthi viññāṇassa assādo, tasmā sattā viññāṇasmiṃ sārajjanti. No cedaṃ, bhikkhave, viññāṇassa ādīnavo abhavissa, nayidaṃ sattā viññāṇasmiṃ nibbindeyyuṃ. Yasmā ca kho, bhikkhave, atthi viññāṇassa ādīnavo, tasmā sattā viññāṇasmiṃ nibbindanti. No cedaṃ, bhikkhave, viññāṇassa nissaraṇaṃ abhavissa, nayidaṃ sattā viññāṇasmā nissareyyuṃ . Yasmā ca kho, bhikkhave, atthi viññāṇassa nissaraṇaṃ, tasmā sattā viññāṇasmā nissaranti.
‘‘யாவகீவஞ்ச, பி⁴க்க²வே, ஸத்தா இமேஸங் பஞ்சன்னங் உபாதா³னக்க²ந்தா⁴னங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தங் நாப்³ப⁴ஞ்ஞங்ஸு 1; நேவ தாவ, பி⁴க்க²வே, ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸங்யுத்தா விப்பமுத்தா விமரியாதீ³கதேன சேதஸா விஹரிங்ஸு. யதோ ச கோ², பி⁴க்க²வே, ஸத்தா இமேஸங் பஞ்சன்னங் உபாதா³னக்க²ந்தா⁴னங் அஸ்ஸாத³ஞ்ச அஸ்ஸாத³தோ ஆதீ³னவஞ்ச ஆதீ³னவதோ நிஸ்ஸரணஞ்ச நிஸ்ஸரணதோ யதா²பூ⁴தங் அப்³ப⁴ஞ்ஞங்ஸு; அத², பி⁴க்க²வே, ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸங்யுத்தா விப்பமுத்தா விமரியாதீ³கதேன சேதஸா விஹரந்தி’’. ஸத்தமங்.
‘‘Yāvakīvañca, bhikkhave, sattā imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññaṃsu 2; neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādīkatena cetasā vihariṃsu. Yato ca kho, bhikkhave, sattā imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññaṃsu; atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādīkatena cetasā viharanti’’. Sattamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-9. ச²ந்த³ராக³ஸுத்தாதி³வண்ணனா • 4-9. Chandarāgasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-9. ச²ந்த³ராக³ஸுத்தாதி³வண்ணனா • 4-9. Chandarāgasuttādivaṇṇanā
