| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၇. တတိယအသ္သာဒသုတ္တံ
7. Tatiyaassādasuttaṃ
၂၈. သာဝတ္ထိနိဒာနံ။ ‘‘နော စေဒံ, ဘိက္ခဝေ, ရူပသ္သ အသ္သာဒော အဘဝိသ္သ နယိဒံ သတ္တာ ရူပသ္မိံ သာရဇ္ဇေယ္ယုံ။ ယသ္မာ စ ခော, ဘိက္ခဝေ, အတ္ထိ ရူပသ္သ အသ္သာဒော, တသ္မာ သတ္တာ ရူပသ္မိံ သာရဇ္ဇန္တိ။ နော စေဒံ, ဘိက္ခဝေ, ရူပသ္သ အာဒီနဝော အဘဝိသ္သ နယိဒံ သတ္တာ ရူပသ္မိံ နိဗ္ဗိန္ဒေယ္ယုံ။ ယသ္မာ စ ခော, ဘိက္ခဝေ, အတ္ထိ ရူပသ္သ အာဒီနဝော, တသ္မာ သတ္တာ ရူပသ္မိံ နိဗ္ဗိန္ဒန္တိ။ နော စေဒံ, ဘိက္ခဝေ, ရူပသ္သ နိသ္သရဏံ အဘဝိသ္သ နယိဒံ သတ္တာ ရူပသ္မာ နိသ္သရေယ္ယုံ။ ယသ္မာ စ ခော, ဘိက္ခဝေ, အတ္ထိ ရူပသ္သ နိသ္သရဏံ, တသ္မာ သတ္တာ ရူပသ္မာ နိသ္သရန္တိ။ နော စေဒံ, ဘိက္ခဝေ, ဝေဒနာယ။ပေ.။ နော စေဒံ, ဘိက္ခဝေ, သညာယ။ နော စေဒံ, ဘိက္ခဝေ, သင္ခာရာနံ နိသ္သရဏံ အဘဝိသ္သ , နယိဒံ သတ္တာ သင္ခာရေဟိ နိသ္သရေယ္ယုံ။ ယသ္မာ စ ခော, ဘိက္ခဝေ, အတ္ထိ သင္ခာရာနံ နိသ္သရဏံ, တသ္မာ သတ္တာ သင္ခာရေဟိ နိသ္သရန္တိ။ နော စေဒံ, ဘိက္ခဝေ, ဝိညာဏသ္သ အသ္သာဒော အဘဝိသ္သ, နယိဒံ သတ္တာ ဝိညာဏသ္မိံ သာရဇ္ဇေယ္ယုံ။ ယသ္မာ စ ခော, ဘိက္ခဝေ, အတ္ထိ ဝိညာဏသ္သ အသ္သာဒော, တသ္မာ သတ္တာ ဝိညာဏသ္မိံ သာရဇ္ဇန္တိ။ နော စေဒံ, ဘိက္ခဝေ, ဝိညာဏသ္သ အာဒီနဝော အဘဝိသ္သ, နယိဒံ သတ္တာ ဝိညာဏသ္မိံ နိဗ္ဗိန္ဒေယ္ယုံ။ ယသ္မာ စ ခော, ဘိက္ခဝေ, အတ္ထိ ဝိညာဏသ္သ အာဒီနဝော, တသ္မာ သတ္တာ ဝိညာဏသ္မိံ နိဗ္ဗိန္ဒန္တိ။ နော စေဒံ, ဘိက္ခဝေ, ဝိညာဏသ္သ နိသ္သရဏံ အဘဝိသ္သ, နယိဒံ သတ္တာ ဝိညာဏသ္မာ နိသ္သရေယ္ယုံ ။ ယသ္မာ စ ခော, ဘိက္ခဝေ, အတ္ထိ ဝိညာဏသ္သ နိသ္သရဏံ, တသ္မာ သတ္တာ ဝိညာဏသ္မာ နိသ္သရန္တိ။
28. Sāvatthinidānaṃ. ‘‘No cedaṃ, bhikkhave, rūpassa assādo abhavissa nayidaṃ sattā rūpasmiṃ sārajjeyyuṃ. Yasmā ca kho, bhikkhave, atthi rūpassa assādo, tasmā sattā rūpasmiṃ sārajjanti. No cedaṃ, bhikkhave, rūpassa ādīnavo abhavissa nayidaṃ sattā rūpasmiṃ nibbindeyyuṃ. Yasmā ca kho, bhikkhave, atthi rūpassa ādīnavo, tasmā sattā rūpasmiṃ nibbindanti. No cedaṃ, bhikkhave, rūpassa nissaraṇaṃ abhavissa nayidaṃ sattā rūpasmā nissareyyuṃ. Yasmā ca kho, bhikkhave, atthi rūpassa nissaraṇaṃ, tasmā sattā rūpasmā nissaranti. No cedaṃ, bhikkhave, vedanāya…pe… no cedaṃ, bhikkhave, saññāya… no cedaṃ, bhikkhave, saṅkhārānaṃ nissaraṇaṃ abhavissa , nayidaṃ sattā saṅkhārehi nissareyyuṃ. Yasmā ca kho, bhikkhave, atthi saṅkhārānaṃ nissaraṇaṃ, tasmā sattā saṅkhārehi nissaranti. No cedaṃ, bhikkhave, viññāṇassa assādo abhavissa, nayidaṃ sattā viññāṇasmiṃ sārajjeyyuṃ. Yasmā ca kho, bhikkhave, atthi viññāṇassa assādo, tasmā sattā viññāṇasmiṃ sārajjanti. No cedaṃ, bhikkhave, viññāṇassa ādīnavo abhavissa, nayidaṃ sattā viññāṇasmiṃ nibbindeyyuṃ. Yasmā ca kho, bhikkhave, atthi viññāṇassa ādīnavo, tasmā sattā viññāṇasmiṃ nibbindanti. No cedaṃ, bhikkhave, viññāṇassa nissaraṇaṃ abhavissa, nayidaṃ sattā viññāṇasmā nissareyyuṃ . Yasmā ca kho, bhikkhave, atthi viññāṇassa nissaraṇaṃ, tasmā sattā viññāṇasmā nissaranti.
‘‘ယာဝကီဝဉ္စ, ဘိက္ခဝေ, သတ္တာ ဣမေသံ ပဉ္စန္နံ ဥပာဒာနက္ခန္ဓာနံ အသ္သာဒဉ္စ အသ္သာဒတော အာဒီနဝဉ္စ အာဒီနဝတော နိသ္သရဏဉ္စ နိသ္သရဏတော ယထာဘူတံ နာဗ္ဘညံသု 1; နေဝ တာဝ, ဘိက္ခဝေ, သတ္တာ သဒေဝကာ လောကာ သမာရကာ သဗ္ရဟ္မကာ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ နိသ္သဋာ ဝိသံယုတ္တာ ဝိပ္ပမုတ္တာ ဝိမရိယာဒီကတေန စေတသာ ဝိဟရိံသု။ ယတော စ ခော, ဘိက္ခဝေ, သတ္တာ ဣမေသံ ပဉ္စန္နံ ဥပာဒာနက္ခန္ဓာနံ အသ္သာဒဉ္စ အသ္သာဒတော အာဒီနဝဉ္စ အာဒီနဝတော နိသ္သရဏဉ္စ နိသ္သရဏတော ယထာဘူတံ အဗ္ဘညံသု; အထ, ဘိက္ခဝေ, သတ္တာ သဒေဝကာ လောကာ သမာရကာ သဗ္ရဟ္မကာ သသ္သမဏဗ္ရာဟ္မဏိယာ ပဇာယ သဒေဝမနုသ္သာယ နိသ္သဋာ ဝိသံယုတ္တာ ဝိပ္ပမုတ္တာ ဝိမရိယာဒီကတေန စေတသာ ဝိဟရန္တိ’’။ သတ္တမံ။
‘‘Yāvakīvañca, bhikkhave, sattā imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ nābbhaññaṃsu 2; neva tāva, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādīkatena cetasā vihariṃsu. Yato ca kho, bhikkhave, sattā imesaṃ pañcannaṃ upādānakkhandhānaṃ assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññaṃsu; atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādīkatena cetasā viharanti’’. Sattamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၉. ဆန္ဒရာဂသုတ္တာဒိဝဏ္ဏနာ • 4-9. Chandarāgasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄-၉. ဆန္ဒရာဂသုတ္တာဒိဝဏ္ဏနာ • 4-9. Chandarāgasuttādivaṇṇanā
