| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
৩. ততিযভাণৰারো
3. Tatiyabhāṇavāro
৪২৩. তেন খো পন সমযেন উপসম্পন্নাযো দিস্সন্তি – অনিমিত্তাপি, নিমিত্তমত্তাপি, অলোহিতাপি, ধুৰলোহিতাপি, ধুৰচোল়াপি, পগ্ঘরন্তীপি, সিখরিণীপি, ইত্থিপণ্ডকাপি, ৰেপুরিসিকাপি, সম্ভিন্নাপি, উভতোব্যঞ্জনাপি। ভগৰতো এতমত্থং আরোচেসুং। ‘‘অনুজানামি, ভিক্খৰে, উপসম্পাদেন্তিযা চতুৰীসতি অন্তরাযিকে ধম্মে পুচ্ছিতুং। এৰঞ্চ পন , ভিক্খৰে, পুচ্ছিতব্বা – ‘নসি অনিমিত্তা, নসি নিমিত্তমত্তা, নসি অলোহিতা, নসি ধুৰলোহিতা, নসি ধুৰচোল়া, নসি পগ্ঘরন্তী, নসি সিখরণী 1, নসি ইত্থিপণ্ডকা, নসি ৰেপুরিসিকা, নসি সম্ভিন্না, নসি উভতোব্যঞ্জনা? সন্তি তে এৰরূপা আবাধা – কুট্ঠং, গণ্ডো, কিলাসো, সোসো, অপমারো? মনুস্সাসি, ইত্থীসি, ভুজিস্সাসি, অণণাসি, নসি রাজভটী? অনুঞ্ঞাতাসি মাতাপিতূহি, সামিকেন? পরিপুণ্ণৰীসতিৰস্সাসি, পরিপুণ্ণং তে পত্তচীৰরং, কিন্নামাসি, কানামা তে পৰত্তিনী’’তি?
423. Tena kho pana samayena upasampannāyo dissanti – animittāpi, nimittamattāpi, alohitāpi, dhuvalohitāpi, dhuvacoḷāpi, paggharantīpi, sikhariṇīpi, itthipaṇḍakāpi, vepurisikāpi, sambhinnāpi, ubhatobyañjanāpi. Bhagavato etamatthaṃ ārocesuṃ. ‘‘Anujānāmi, bhikkhave, upasampādentiyā catuvīsati antarāyike dhamme pucchituṃ. Evañca pana , bhikkhave, pucchitabbā – ‘nasi animittā, nasi nimittamattā, nasi alohitā, nasi dhuvalohitā, nasi dhuvacoḷā, nasi paggharantī, nasi sikharaṇī 2, nasi itthipaṇḍakā, nasi vepurisikā, nasi sambhinnā, nasi ubhatobyañjanā? Santi te evarūpā ābādhā – kuṭṭhaṃ, gaṇḍo, kilāso, soso, apamāro? Manussāsi, itthīsi, bhujissāsi, aṇaṇāsi, nasi rājabhaṭī? Anuññātāsi mātāpitūhi, sāmikena? Paripuṇṇavīsativassāsi, paripuṇṇaṃ te pattacīvaraṃ, kinnāmāsi, kānāmā te pavattinī’’ti?
তেন খো পন সমযেন ভিক্খূ ভিক্খুনীনং অন্তরাযিকে ধম্মে পুচ্ছন্তি। উপসম্পদাপেক্খাযো ৰিত্থাযন্তি, মঙ্কূ হোন্তি, ন সক্কোন্তি ৰিস্সজ্জেতুং। ভগৰতো এতমত্থং আরোচেসুং। ‘‘অনুজানামি, ভিক্খৰে, একতোউপসম্পন্নায ভিক্খুনিসঙ্ঘে ৰিসুদ্ধায ভিক্খুসঙ্ঘে উপসম্পাদেতু’’ন্তি।
Tena kho pana samayena bhikkhū bhikkhunīnaṃ antarāyike dhamme pucchanti. Upasampadāpekkhāyo vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. ‘‘Anujānāmi, bhikkhave, ekatoupasampannāya bhikkhunisaṅghe visuddhāya bhikkhusaṅghe upasampādetu’’nti.
তেন খো পন সমযেন ভিক্খুনিযো অননুসিট্ঠা উপসম্পদাপেক্খাযো অন্তরাযিকে ধম্মে পুচ্ছন্তি। উপসম্পদাপেক্খাযো ৰিত্থাযন্তি, মঙ্কূ হোন্তি, ন সক্কোন্তি ৰিস্সজ্জেতুং। ভগৰতো এতমত্থং আরোচেসুং। ‘‘অনুজানামি, ভিক্খৰে, পঠমং অনুসাসিত্ৰা পচ্ছা অন্তরাযিকে ধম্মে পুচ্ছিতু’’ন্তি।
Tena kho pana samayena bhikkhuniyo ananusiṭṭhā upasampadāpekkhāyo antarāyike dhamme pucchanti. Upasampadāpekkhāyo vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. ‘‘Anujānāmi, bhikkhave, paṭhamaṃ anusāsitvā pacchā antarāyike dhamme pucchitu’’nti.
তত্থেৰ সঙ্ঘমজ্ঝে অনুসাসন্তি। উপসম্পদাপেক্খাযো তথেৰ ৰিত্থাযন্তি, মঙ্কূ হোন্তি , ন সক্কোন্তি ৰিস্সজ্জেতুং। ভগৰতো এতমত্থং আরোচেসুং। ‘‘অনুজানামি, ভিক্খৰে, একমন্তং অনুসাসিত্ৰা সঙ্ঘমজ্ঝে অন্তরাযিকে ধম্মে পুচ্ছিতুং। এৰঞ্চ পন, ভিক্খৰে, অনুসাসিতব্বা।
Tattheva saṅghamajjhe anusāsanti. Upasampadāpekkhāyo tatheva vitthāyanti, maṅkū honti , na sakkonti vissajjetuṃ. Bhagavato etamatthaṃ ārocesuṃ. ‘‘Anujānāmi, bhikkhave, ekamantaṃ anusāsitvā saṅghamajjhe antarāyike dhamme pucchituṃ. Evañca pana, bhikkhave, anusāsitabbā.
৪২৪. ‘‘পঠমং উপজ্ঝং গাহাপেতব্বা। উপজ্ঝং গাহাপেত্ৰা পত্তচীৰরং আচিক্খিতব্বং – ‘অযং তে পত্তো, অযং সঙ্ঘাটি, অযং উত্তরাসঙ্গো, অযং অন্তরৰাসকো, ইদং সংকচ্চিকং 3, অযং উদকসাটিকা; গচ্ছ অমুম্হি ওকাসে তিট্ঠাহী’’তি।
424. ‘‘Paṭhamaṃ upajjhaṃ gāhāpetabbā. Upajjhaṃ gāhāpetvā pattacīvaraṃ ācikkhitabbaṃ – ‘ayaṃ te patto, ayaṃ saṅghāṭi, ayaṃ uttarāsaṅgo, ayaṃ antaravāsako, idaṃ saṃkaccikaṃ 4, ayaṃ udakasāṭikā; gaccha amumhi okāse tiṭṭhāhī’’ti.
বালা অব্যত্তা অনুসাসন্তি। দুরনুসিট্ঠা উপসম্পদাপেক্খাযো ৰিত্থাযন্তি, মঙ্কূ হোন্তি, ন সক্কোন্তি ৰিস্সজ্জেতুং। ভগৰতো এতমত্থং আরোচেসুং। ‘‘ন, ভিক্খৰে, বালায অব্যত্তায অনুসাসিতব্বা। যা অনুসাসেয্য, আপত্তি দুক্কটস্স। অনুজানামি, ভিক্খৰে, ব্যত্তায ভিক্খুনিযা পটিবলায অনুসাসিতু’’ন্তি।
Bālā abyattā anusāsanti. Duranusiṭṭhā upasampadāpekkhāyo vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. ‘‘Na, bhikkhave, bālāya abyattāya anusāsitabbā. Yā anusāseyya, āpatti dukkaṭassa. Anujānāmi, bhikkhave, byattāya bhikkhuniyā paṭibalāya anusāsitu’’nti.
অসম্মতা অনুসাসন্তি। ভগৰতো এতমত্থং আরোচেসুং। ‘‘ন, ভিক্খৰে, অসম্মতায অনুসাসিতব্বা। যা অনুসাসেয্য, আপত্তি দুক্কটস্স। অনুজানামি, ভিক্খৰে, সম্মতায অনুসাসিতুং। এৰঞ্চ পন, ভিক্খৰে, সম্মন্নিতব্বা – অত্তনা ৰা অত্তানং সম্মন্নিতব্বং, পরায ৰা পরা সম্মন্নিতব্বা।
Asammatā anusāsanti. Bhagavato etamatthaṃ ārocesuṃ. ‘‘Na, bhikkhave, asammatāya anusāsitabbā. Yā anusāseyya, āpatti dukkaṭassa. Anujānāmi, bhikkhave, sammatāya anusāsituṃ. Evañca pana, bhikkhave, sammannitabbā – attanā vā attānaṃ sammannitabbaṃ, parāya vā parā sammannitabbā.
‘‘কথঞ্চ অত্তনাৰ 5 অত্তানং সম্মন্নিতব্বং? ব্যত্তায ভিক্খুনিযা পটিবলায সঙ্ঘো ঞাপেতব্বো – ‘সুণাতু মে, অয্যে, সঙ্ঘো। ইত্থন্নামা ইত্থন্নামায অয্যায উপসম্পদাপেক্খা। যদি সঙ্ঘস্স পত্তকল্লং, অহং ইত্থন্নামা ইত্থন্নামং অনুসাসেয্য’ন্তি। এৰং অত্তনাৰ অত্তানং সম্মন্নিতব্বং।
‘‘Kathañca attanāva 6 attānaṃ sammannitabbaṃ? Byattāya bhikkhuniyā paṭibalāya saṅgho ñāpetabbo – ‘suṇātu me, ayye, saṅgho. Itthannāmā itthannāmāya ayyāya upasampadāpekkhā. Yadi saṅghassa pattakallaṃ, ahaṃ itthannāmā itthannāmaṃ anusāseyya’nti. Evaṃ attanāva attānaṃ sammannitabbaṃ.
‘‘কথঞ্চ পরায 7 পরা সম্মন্নিতব্বা? ব্যত্তায ভিক্খুনিযা পটিবলায সঙ্ঘো ঞাপেতব্বো – ‘সুণাতু মে, অয্যে, সঙ্ঘো। ইত্থন্নামা ইত্থন্নামায অয্যায উপসম্পদাপেক্খা। যদি সঙ্ঘস্স পত্তকল্লং, ইত্থন্নামা ইত্থন্নামং অনুসাসেয্যা’তি। এৰং পরায পরা সম্মন্নিতব্বা।
‘‘Kathañca parāya 8 parā sammannitabbā? Byattāya bhikkhuniyā paṭibalāya saṅgho ñāpetabbo – ‘suṇātu me, ayye, saṅgho. Itthannāmā itthannāmāya ayyāya upasampadāpekkhā. Yadi saṅghassa pattakallaṃ, itthannāmā itthannāmaṃ anusāseyyā’ti. Evaṃ parāya parā sammannitabbā.
‘‘তায সম্মতায ভিক্খুনিযা উপসম্পদাপেক্খং উপসঙ্কমিত্ৰা এৰমস্স ৰচনীযা – ‘সুণসি ইত্থন্নামে। অযং তে সচ্চকালো, ভূতকালো। যং জাতং তং সঙ্ঘমজ্ঝে পুচ্ছন্তে সন্তং অত্থীতি ৰত্তব্বং, অসন্তং নত্থীতি ৰত্তব্বং। মা খো ৰিত্থাযি 9, মা খো মঙ্কু অহোসি। এৰং তং পুচ্ছিস্সন্তি – নসি অনিমিত্তা, নসি নিমিত্তমত্তা, নসি অলোহিতা, নসি ধুৰলোহিতা, নসি ধুৰচোল়া, নসি পগ্ঘরন্তী, নসি সিখরিণী, নসি ইত্থিপণ্ডকা, নসি ৰেপুরিসিকা, নসি সম্ভিন্না, নসি উভতোব্যঞ্জনা? সন্তি তে এৰরূপা আবাধা – কুট্ঠং, গণ্ডো, কিলাসো, সোসো, অপমারো? মনুস্সাসি, ইত্থীসি, ভুজিস্সাসি, অণণাসি, নসি রাজভটী? অনুঞ্ঞাতাসি মাতাপিতূহি, সামিকেন? পরিপুণ্ণৰীসতিৰস্সাসি, পরিপুণ্ণং তে পত্তচীৰরং, কিন্নামাসি, কানামা তে পৰত্তিনী’তি ?
‘‘Tāya sammatāya bhikkhuniyā upasampadāpekkhaṃ upasaṅkamitvā evamassa vacanīyā – ‘suṇasi itthannāme. Ayaṃ te saccakālo, bhūtakālo. Yaṃ jātaṃ taṃ saṅghamajjhe pucchante santaṃ atthīti vattabbaṃ, asantaṃ natthīti vattabbaṃ. Mā kho vitthāyi 10, mā kho maṅku ahosi. Evaṃ taṃ pucchissanti – nasi animittā, nasi nimittamattā, nasi alohitā, nasi dhuvalohitā, nasi dhuvacoḷā, nasi paggharantī, nasi sikhariṇī, nasi itthipaṇḍakā, nasi vepurisikā, nasi sambhinnā, nasi ubhatobyañjanā? Santi te evarūpā ābādhā – kuṭṭhaṃ, gaṇḍo, kilāso, soso, apamāro? Manussāsi, itthīsi, bhujissāsi, aṇaṇāsi, nasi rājabhaṭī? Anuññātāsi mātāpitūhi, sāmikena? Paripuṇṇavīsativassāsi, paripuṇṇaṃ te pattacīvaraṃ, kinnāmāsi, kānāmā te pavattinī’ti ?
‘‘একতো আগচ্ছন্তি। ন একতো আগন্তব্বং। অনুসাসিকায পঠমতরং আগন্ত্ৰা সঙ্ঘো ঞাপেতব্বো – ‘সুণাতু মে, অয্যে, সঙ্ঘো। ইত্থন্নামা ইত্থন্নামায অয্যায উপসম্পদাপেক্খা। অনুসিট্ঠা সা মযা। যদি সঙ্ঘস্স পত্তকল্লং, ইত্থন্নামা আগচ্ছেয্যা’তি। ‘আগচ্ছাহী’তি ৰত্তব্বা।
‘‘Ekato āgacchanti. Na ekato āgantabbaṃ. Anusāsikāya paṭhamataraṃ āgantvā saṅgho ñāpetabbo – ‘suṇātu me, ayye, saṅgho. Itthannāmā itthannāmāya ayyāya upasampadāpekkhā. Anusiṭṭhā sā mayā. Yadi saṅghassa pattakallaṃ, itthannāmā āgaccheyyā’ti. ‘Āgacchāhī’ti vattabbā.
‘‘একংসং উত্তরাসঙ্গং কারাপেত্ৰা ভিক্খুনীনং পাদে ৰন্দাপেত্ৰা উক্কুটিকং নিসীদাপেত্ৰা অঞ্জলিং পগ্গণ্হাপেত্ৰা উপসম্পদং যাচাপেতব্বা – ‘সঙ্ঘং, অয্যে, উপসম্পদং যাচামি। উল্লুম্পতু মং, অয্যে, সঙ্ঘো অনুকম্পং উপাদায। দুতিযম্পি, অয্যে, সঙ্ঘং উপসম্পদং যাচামি। উল্লুম্পতু মং, অয্যে, সঙ্ঘো অনুকম্পং উপাদায। ততিযম্পি, অয্যে, সঙ্ঘং উপসম্পদং যাচামি। উল্লুম্পতু মং, অয্যে, সঙ্ঘো অনুকম্পং উপাদাযা’তি। ব্যত্তায ভিক্খুনিযা পটিবলায সঙ্ঘো ঞাপেতব্বো –
‘‘Ekaṃsaṃ uttarāsaṅgaṃ kārāpetvā bhikkhunīnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā upasampadaṃ yācāpetabbā – ‘saṅghaṃ, ayye, upasampadaṃ yācāmi. Ullumpatu maṃ, ayye, saṅgho anukampaṃ upādāya. Dutiyampi, ayye, saṅghaṃ upasampadaṃ yācāmi. Ullumpatu maṃ, ayye, saṅgho anukampaṃ upādāya. Tatiyampi, ayye, saṅghaṃ upasampadaṃ yācāmi. Ullumpatu maṃ, ayye, saṅgho anukampaṃ upādāyā’ti. Byattāya bhikkhuniyā paṭibalāya saṅgho ñāpetabbo –
‘‘সুণাতু মে, অয্যে, সঙ্ঘো। অযং ইত্থন্নামা ইত্থন্নামায অয্যায উপসম্পদাপেক্খা। যদি সঙ্ঘস্স পত্তকল্লং, অহং ইত্থন্নামং অন্তরাযিকে ধম্মে পুচ্ছেয্যন্তি।
‘‘Suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā. Yadi saṅghassa pattakallaṃ, ahaṃ itthannāmaṃ antarāyike dhamme puccheyyanti.
‘‘সুণসি ইত্থন্নামে। অযং তে সচ্চকালো, ভূতকালো। যং জাতং তং পুচ্ছামি সন্তং অত্থীতি ৰত্তব্বং, অসন্তং নত্থীতি ৰত্তব্বং। নসি অনিমিত্তা…পে॰… কিন্নামাসি, কানামা তে পৰত্তিনীতি। ব্যত্তায ভিক্খুনিযা পটিবলায সঙ্ঘো ঞাপেতব্বো –
‘‘Suṇasi itthannāme. Ayaṃ te saccakālo, bhūtakālo. Yaṃ jātaṃ taṃ pucchāmi santaṃ atthīti vattabbaṃ, asantaṃ natthīti vattabbaṃ. Nasi animittā…pe… kinnāmāsi, kānāmā te pavattinīti. Byattāya bhikkhuniyā paṭibalāya saṅgho ñāpetabbo –
৪২৫. ‘‘সুণাতু মে, অয্যে, সঙ্ঘো। অযং ইত্থন্নামা ইত্থন্নামায অয্যায উপসম্পদাপেক্খা। পরিসুদ্ধা অন্তরাযিকেহি ধম্মেহি, পরিপুণ্ণস্সা পত্তচীৰরং। ইত্থন্নামা সঙ্ঘং উপসম্পদং যাচতি ইত্থন্নামায অয্যায পৰত্তিনিযা। যদি সঙ্ঘস্স পত্তকল্লং, সঙ্ঘো ইত্থন্নামং উপসম্পাদেয্য ইত্থন্নামায অয্যায পৰত্তিনিযা। এসা ঞত্তি।
425. ‘‘Suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā. Parisuddhā antarāyikehi dhammehi, paripuṇṇassā pattacīvaraṃ. Itthannāmā saṅghaṃ upasampadaṃ yācati itthannāmāya ayyāya pavattiniyā. Yadi saṅghassa pattakallaṃ, saṅgho itthannāmaṃ upasampādeyya itthannāmāya ayyāya pavattiniyā. Esā ñatti.
‘‘সুণাতু মে, অয্যে, সঙ্ঘো। অযং ইত্থন্নামা ইত্থন্নামায অয্যায উপসম্পদাপেক্খা । পরিসুদ্ধা অন্তরাযিকেহি ধম্মেহি, পরিপুণ্ণস্সা পত্তচীৰরং। ইত্থন্নামা সঙ্ঘং উপসম্পদং যাচতি ইত্থন্নামায অয্যায পৰত্তিনিযা। সঙ্ঘো ইত্থন্নামং উপসম্পাদেতি ইত্থন্নামায অয্যায পৰত্তিনিযা। যস্সা অয্যায খমতি ইত্থন্নামায উপসম্পদা ইত্থন্নামায অয্যায পৰত্তিনিযা, সা তুণ্হস্স; যস্সা নক্খমতি, সা ভাসেয্য।
‘‘Suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā . Parisuddhā antarāyikehi dhammehi, paripuṇṇassā pattacīvaraṃ. Itthannāmā saṅghaṃ upasampadaṃ yācati itthannāmāya ayyāya pavattiniyā. Saṅgho itthannāmaṃ upasampādeti itthannāmāya ayyāya pavattiniyā. Yassā ayyāya khamati itthannāmāya upasampadā itthannāmāya ayyāya pavattiniyā, sā tuṇhassa; yassā nakkhamati, sā bhāseyya.
‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, অয্যে, সঙ্ঘো। অযং ইত্থন্নামা ইত্থন্নামায অয্যায উপসম্পদাপেক্খা। পরিসুদ্ধা অন্তরাযিকেহি ধম্মেহি, পরিপুণ্ণস্সা পত্তচীৰরং। ইত্থন্নামা সঙ্ঘং উপসম্পদং যাচতি ইত্থন্নামায অয্যায পৰত্তিনিযা। সঙ্ঘো ইত্থন্নামং উপসম্পাদেতি ইত্থন্নামায অয্যায পৰত্তিনিযা। যস্সা অয্যায খমতি ইত্থন্নামায উপসম্পদা ইত্থন্নামায অয্যায পৰত্তিনিযা, সা তুণ্হস্স; যস্সা নক্খমতি, সা ভাসেয্য।
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā. Parisuddhā antarāyikehi dhammehi, paripuṇṇassā pattacīvaraṃ. Itthannāmā saṅghaṃ upasampadaṃ yācati itthannāmāya ayyāya pavattiniyā. Saṅgho itthannāmaṃ upasampādeti itthannāmāya ayyāya pavattiniyā. Yassā ayyāya khamati itthannāmāya upasampadā itthannāmāya ayyāya pavattiniyā, sā tuṇhassa; yassā nakkhamati, sā bhāseyya.
‘‘উপসম্পন্না সঙ্ঘেন ইত্থন্নামা ইত্থন্নামায অয্যায পৰত্তিনিযা। খমতি সঙ্ঘস্স, তস্মা তুণ্হী, এৰমেতং ধারযামীতি।
‘‘Upasampannā saṅghena itthannāmā itthannāmāya ayyāya pavattiniyā. Khamati saṅghassa, tasmā tuṇhī, evametaṃ dhārayāmīti.
‘‘তাৰদেৰ তং আদায ভিক্খুসঙ্ঘং উপসঙ্কমিত্ৰা একংসং উত্তরাসঙ্গং কারাপেত্ৰা ভিক্খূনং পাদে ৰন্দাপেত্ৰা উক্কুটিকং নিসীদাপেত্ৰা অঞ্জলিং পগ্গণ্হাপেত্ৰা উপসম্পদং যাচাপেতব্বা – ‘অহং, অয্যা, ইত্থন্নামা ইত্থন্নামায অয্যায উপসম্পদাপেক্খা । একতোউপসম্পন্না ভিক্খুনিসঙ্ঘে, ৰিসুদ্ধা; সঙ্ঘং, অয্যা, উপসম্পদং যাচামি। উল্লুম্পতু মং, অয্যা, সঙ্ঘো অনুকম্পং উপাদায। অহং, অয্যা, ইত্থন্নামা ইত্থন্নামায অয্যায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। দুতিযম্পি, অয্যা, সঙ্ঘং উপসম্পদং যাচামি। উল্লুম্পতু মং, অয্যা, সঙ্ঘো অনুকম্পং উপাদায। অহং, অয্যা, ইত্থন্নামা ইত্থন্নামায অয্যায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। ততিযম্পি, অয্যা, সঙ্ঘং উপসম্পদং যাচামি। উল্লুম্পতু মং, অয্যা, সঙ্ঘো অনুকম্পং উপাদাযা’তি। ব্যত্তেন ভিক্খুনা পটিবলেন সঙ্ঘো ঞাপেতব্বো –
‘‘Tāvadeva taṃ ādāya bhikkhusaṅghaṃ upasaṅkamitvā ekaṃsaṃ uttarāsaṅgaṃ kārāpetvā bhikkhūnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā upasampadaṃ yācāpetabbā – ‘ahaṃ, ayyā, itthannāmā itthannāmāya ayyāya upasampadāpekkhā . Ekatoupasampannā bhikkhunisaṅghe, visuddhā; saṅghaṃ, ayyā, upasampadaṃ yācāmi. Ullumpatu maṃ, ayyā, saṅgho anukampaṃ upādāya. Ahaṃ, ayyā, itthannāmā itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Dutiyampi, ayyā, saṅghaṃ upasampadaṃ yācāmi. Ullumpatu maṃ, ayyā, saṅgho anukampaṃ upādāya. Ahaṃ, ayyā, itthannāmā itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Tatiyampi, ayyā, saṅghaṃ upasampadaṃ yācāmi. Ullumpatu maṃ, ayyā, saṅgho anukampaṃ upādāyā’ti. Byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। অযং ইত্থন্নামা ইত্থন্নামায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। ইত্থন্নামা সঙ্ঘং উপসম্পদং যাচতি ইত্থন্নামায পৰত্তিনিযা। যদি সঙ্ঘস্স পত্তকল্লং, সঙ্ঘো ইত্থন্নামং উপসম্পাদেয্য, ইত্থন্নামায পৰত্তিনিযা। এসা ঞত্তি।
‘‘Suṇātu me, bhante, saṅgho. Ayaṃ itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Itthannāmā saṅghaṃ upasampadaṃ yācati itthannāmāya pavattiniyā. Yadi saṅghassa pattakallaṃ, saṅgho itthannāmaṃ upasampādeyya, itthannāmāya pavattiniyā. Esā ñatti.
‘‘সুণাতু মে, ভন্তে, সঙ্ঘো। অযং ইত্থন্নামা ইত্থন্নামায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। ইত্থন্নামা সঙ্ঘং উপসম্পদং যাচতি ইত্থন্নামায পৰত্তিনিযা। সঙ্ঘো ইত্থন্নামং উপসম্পাদেতি ইত্থন্নামায পৰত্তিনিযা। যস্সাযস্মতো খমতি ইত্থন্নামায উপসম্পদা ইত্থন্নামায পৰত্তিনিযা, সো তুণ্হস্স; যস্স নক্খমতি, সো ভাসেয্য।
‘‘Suṇātu me, bhante, saṅgho. Ayaṃ itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। অযং ইত্থন্নামা ইত্থন্নামায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। ইত্থন্নামা সঙ্ঘং উপসম্পদং যাচতি ইত্থন্নামায পৰত্তিনিযা। সঙ্ঘো ইত্থন্নামং উপসম্পাদেতি ইত্থন্নামায পৰত্তিনিযা। যস্সাযস্মতো খমতি ইত্থন্নামায উপসম্পদা ইত্থন্নামায পৰত্তিনিযা, সো তুণ্হস্স; যস্স নক্খমতি, সো ভাসেয্য।
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘উপসম্পন্না সঙ্ঘেন ইত্থন্নামা ইত্থন্নামায পৰত্তিনিযা। খমতি সঙ্ঘস্স, তস্মা তুণ্হী, এৰমেতং ধারযামীতি।
‘‘Upasampannā saṅghena itthannāmā itthannāmāya pavattiniyā. Khamati saṅghassa, tasmā tuṇhī, evametaṃ dhārayāmīti.
‘‘তাৰদেৰ ছাযা মেতব্বা, উতুপ্পমাণং আচিক্খিতব্বং, দিৰসভাগো আচিক্খিতব্বো, সঙ্গীতি আচিক্খিতব্বা, ভিক্খুনিযো ৰত্তব্বা – ইমিস্সা তযো চ নিস্সযে, অট্ঠ চ অকরণীযানি আচিক্খেয্যাথা’’তি।
‘‘Tāvadeva chāyā metabbā, utuppamāṇaṃ ācikkhitabbaṃ, divasabhāgo ācikkhitabbo, saṅgīti ācikkhitabbā, bhikkhuniyo vattabbā – imissā tayo ca nissaye, aṭṭha ca akaraṇīyāni ācikkheyyāthā’’ti.
৪২৬. তেন খো পন সমযেন ভিক্খুনিযো ভত্তগ্গে আসনং সংকসাযন্তিযো কালং ৰীতিনামেসুং। ভগৰতো এতমত্থং আরোচেসুং । ‘‘অনুজানামি, ভিক্খৰে, অট্ঠন্নং ভিক্খুনীনং যথাৰুড্ঢং, অৰসেসানং যথাগতিক’’ন্তি।
426. Tena kho pana samayena bhikkhuniyo bhattagge āsanaṃ saṃkasāyantiyo kālaṃ vītināmesuṃ. Bhagavato etamatthaṃ ārocesuṃ . ‘‘Anujānāmi, bhikkhave, aṭṭhannaṃ bhikkhunīnaṃ yathāvuḍḍhaṃ, avasesānaṃ yathāgatika’’nti.
তেন খো পন সমযেন ভিক্খুনিযো – ভগৰতা অনুঞ্ঞাতং অট্ঠন্নং ভিক্খুনীনং যথাৰুড্ঢং, অৰসেসানং যথাগতিকন্তি – সব্বত্থ অট্ঠেৰ ভিক্খুনিযো যথাৰুড্ঢং পটিবাহন্তি, অৰসেসাযো যথাগতিকং। ভগৰতো এতমত্থং আরোচেসুং। ‘‘অনুজানামি, ভিক্খৰে, ভত্তগ্গে অট্ঠন্নং ভিক্খুনীনং যথাৰুড্ঢং, অৰসেসানং যথাগতিকং; অঞ্ঞত্থ সব্বত্থ যথাৰুড্ঢং 11 ন পটিবাহিতব্বং। যা পটিবাহেয্য, আপত্তি দুক্কটস্সা’’তি।
Tena kho pana samayena bhikkhuniyo – bhagavatā anuññātaṃ aṭṭhannaṃ bhikkhunīnaṃ yathāvuḍḍhaṃ, avasesānaṃ yathāgatikanti – sabbattha aṭṭheva bhikkhuniyo yathāvuḍḍhaṃ paṭibāhanti, avasesāyo yathāgatikaṃ. Bhagavato etamatthaṃ ārocesuṃ. ‘‘Anujānāmi, bhikkhave, bhattagge aṭṭhannaṃ bhikkhunīnaṃ yathāvuḍḍhaṃ, avasesānaṃ yathāgatikaṃ; aññattha sabbattha yathāvuḍḍhaṃ 12 na paṭibāhitabbaṃ. Yā paṭibāheyya, āpatti dukkaṭassā’’ti.
৪২৭. 13 তেন খো পন সমযেন ভিক্খুনিযো ন পৰারেন্তি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা ন পৰারেতব্বং। যা ন পৰারেয্য, যথাধম্মো কারেতব্বো’’তি।
427.14 Tena kho pana samayena bhikkhuniyo na pavārenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā na pavāretabbaṃ. Yā na pavāreyya, yathādhammo kāretabbo’’ti.
তেন খো পন সমযেন ভিক্খুনিযো অত্তনা পৰারেত্ৰা ভিক্খুসঙ্ঘং ন পৰারেন্তি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা অত্তনা পৰারেত্ৰা ভিক্খুসঙ্ঘো ন পৰারেতব্বো। যা ন পৰারেয্য, যথাধম্মো কারেতব্বো’’তি।
Tena kho pana samayena bhikkhuniyo attanā pavāretvā bhikkhusaṅghaṃ na pavārenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā attanā pavāretvā bhikkhusaṅgho na pavāretabbo. Yā na pavāreyya, yathādhammo kāretabbo’’ti.
তেন খো পন সমযেন ভিক্খুনিযো ভিক্খূহি সদ্ধিং একতো পৰারেন্তিযো কোলাহলং অকংসু। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা ভিক্খূহি সদ্ধিং একতো পৰারেতব্বং। যা পৰারেয্য, আপত্তি দুক্কটস্সা’’তি।
Tena kho pana samayena bhikkhuniyo bhikkhūhi saddhiṃ ekato pavārentiyo kolāhalaṃ akaṃsu. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhūhi saddhiṃ ekato pavāretabbaṃ. Yā pavāreyya, āpatti dukkaṭassā’’ti.
তেন খো পন সমযেন ভিক্খুনিযো পুরেভত্তং পৰারেন্তিযো কালং ৰীতিনামেসুং। ভগৰতো এতমত্থং আরোচেসুং। ‘‘অনুজানামি, ভিক্খৰে, পচ্ছাভত্তং 15 পৰারেতু’’ন্তি। পচ্ছাভত্তং পৰারেন্তিযো ৰিকালে 16 অহেসুং। ভগৰতো এতমত্থং আরোচেসুং। ‘‘অনুজানামি, ভিক্খৰে, অজ্জতনা ভিক্খুনিসঙ্ঘং 17 পৰারেত্ৰা অপরজ্জু ভিক্খুসঙ্ঘং পৰারেতু’’ন্তি।
Tena kho pana samayena bhikkhuniyo purebhattaṃ pavārentiyo kālaṃ vītināmesuṃ. Bhagavato etamatthaṃ ārocesuṃ. ‘‘Anujānāmi, bhikkhave, pacchābhattaṃ 18 pavāretu’’nti. Pacchābhattaṃ pavārentiyo vikāle 19 ahesuṃ. Bhagavato etamatthaṃ ārocesuṃ. ‘‘Anujānāmi, bhikkhave, ajjatanā bhikkhunisaṅghaṃ 20 pavāretvā aparajju bhikkhusaṅghaṃ pavāretu’’nti.
তেন খো পন সমযেন সব্বো ভিক্খুনিসঙ্ঘো পৰারেন্তো কোলাহলং অকাসি। ভগৰতো এতমত্থং আরোচেসুং। ‘‘অনুজানামি, ভিক্খৰে, একং ভিক্খুনিং ব্যত্তং পটিবলং সম্মন্নিতুং – ভিক্খুনিসঙ্ঘস্স অত্থায ভিক্খুসঙ্ঘং পৰারেতুং। এৰঞ্চ পন, ভিক্খৰে, সম্মন্নিতব্বা। পঠমং ভিক্খুনী যাচিতব্বা, যাচিত্ৰা ব্যত্তায ভিক্খুনিযা পটিবলায সঙ্ঘো ঞাপেতব্বো –
Tena kho pana samayena sabbo bhikkhunisaṅgho pavārento kolāhalaṃ akāsi. Bhagavato etamatthaṃ ārocesuṃ. ‘‘Anujānāmi, bhikkhave, ekaṃ bhikkhuniṃ byattaṃ paṭibalaṃ sammannituṃ – bhikkhunisaṅghassa atthāya bhikkhusaṅghaṃ pavāretuṃ. Evañca pana, bhikkhave, sammannitabbā. Paṭhamaṃ bhikkhunī yācitabbā, yācitvā byattāya bhikkhuniyā paṭibalāya saṅgho ñāpetabbo –
‘‘সুণাতু মে, অয্যে, সঙ্ঘো। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সম্মন্নেয্য ভিক্খুনিসঙ্ঘস্স অত্থায ভিক্খুসঙ্ঘং পৰারেতুং। এসা ঞত্তি।
‘‘Suṇātu me, ayye, saṅgho. Yadi saṅghassa pattakallaṃ, saṅgho itthannāmaṃ bhikkhuniṃ sammanneyya bhikkhunisaṅghassa atthāya bhikkhusaṅghaṃ pavāretuṃ. Esā ñatti.
‘‘সুণাতু মে, অয্যে, সঙ্ঘো। সঙ্ঘো ইত্থন্নামং ভিক্খুনিং সম্মন্নতি ভিক্খুনিসঙ্ঘস্স অত্থায ভিক্খুসঙ্ঘং পৰারেতুং। যস্সা অয্যায খমতি ইত্থন্নামায ভিক্খুনিযা সম্মুতি ভিক্খুনিসঙ্ঘস্স অত্থায ভিক্খুসঙ্ঘং পৰারেতুং, সা তুণ্হস্স; যস্সা নক্খমতি, সা ভাসেয্য।
‘‘Suṇātu me, ayye, saṅgho. Saṅgho itthannāmaṃ bhikkhuniṃ sammannati bhikkhunisaṅghassa atthāya bhikkhusaṅghaṃ pavāretuṃ. Yassā ayyāya khamati itthannāmāya bhikkhuniyā sammuti bhikkhunisaṅghassa atthāya bhikkhusaṅghaṃ pavāretuṃ, sā tuṇhassa; yassā nakkhamati, sā bhāseyya.
‘‘সম্মতা সঙ্ঘেন ইত্থন্নামা ভিক্খুনী ভিক্খুনিসঙ্ঘস্স অত্থায ভিক্খুসঙ্ঘং পৰারেতুং। খমতি সঙ্ঘস্স, তস্মা তুণ্হী, এৰমেতং ধারযামীতি।
‘‘Sammatā saṅghena itthannāmā bhikkhunī bhikkhunisaṅghassa atthāya bhikkhusaṅghaṃ pavāretuṃ. Khamati saṅghassa, tasmā tuṇhī, evametaṃ dhārayāmīti.
‘‘তায সম্মতায ভিক্খুনিযা ভিক্খুনিসঙ্ঘং আদায ভিক্খুসঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘ভিক্খুনীসঙ্ঘো , অয্যা, ভিক্খুসঙ্ঘং পৰারেতি – দিট্ঠেন ৰা, সুতেন ৰা পরিসঙ্কায ৰা। ৰদতু 21, অয্যা, ভিক্খুসঙ্ঘো ভিক্খুনিসঙ্ঘং অনুকম্পং উপাদায, পস্সন্তো পটিকরিস্সতি। দুতিযম্পি, অয্যা…পে॰… ততিযম্পি, অয্যা, ভিক্খুনিসঙ্ঘো ভিক্খুসঙ্ঘং পৰারেতি – দিট্ঠেন ৰা, সুতেন ৰা, পরিসঙ্কায ৰা। ৰদতু, অয্যা, ভিক্খুসঙ্ঘো ভিক্খুনিসঙ্ঘং অনুকম্পং উপাদায, পস্সন্তো পটিকরিস্সতী’’তি।
‘‘Tāya sammatāya bhikkhuniyā bhikkhunisaṅghaṃ ādāya bhikkhusaṅghaṃ upasaṅkamitvā ekaṃsaṃ uttarāsaṅgaṃ karitvā bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘bhikkhunīsaṅgho , ayyā, bhikkhusaṅghaṃ pavāreti – diṭṭhena vā, sutena vā parisaṅkāya vā. Vadatu 22, ayyā, bhikkhusaṅgho bhikkhunisaṅghaṃ anukampaṃ upādāya, passanto paṭikarissati. Dutiyampi, ayyā…pe… tatiyampi, ayyā, bhikkhunisaṅgho bhikkhusaṅghaṃ pavāreti – diṭṭhena vā, sutena vā, parisaṅkāya vā. Vadatu, ayyā, bhikkhusaṅgho bhikkhunisaṅghaṃ anukampaṃ upādāya, passanto paṭikarissatī’’ti.
৪২৮. তেন খো পন সমযেন ভিক্খুনিযো ভিক্খূনং উপোসথং ঠপেন্তি, পৰারণং ঠপেন্তি, সৰচনীযং করোন্তি, অনুৰাদং পট্ঠপেন্তি, ওকাসং কারেন্তি, চোদেন্তি, সারেন্তি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা ভিক্খুস্স উপোসথো ঠপেতব্বো; ঠপিতোপি অট্ঠপিতো; ঠপেন্তিযা আপত্তি দুক্কটস্স। ন পৰারণা ঠপেতব্বা; ঠপিতাপি অট্ঠপিতা; ঠপেন্তিযা আপত্তি দুক্কটস্স। ন সৰচনীযং কাতব্বং; কতম্পি অকতং; করোন্তিযা আপত্তি দুক্কটস্স। ন অনুৰাদো পট্ঠপেতব্বো; পট্ঠপিতোপি অপ্পট্ঠপিতো; পট্ঠপেন্তিযা আপত্তি দুক্কটস্স। ন ওকাসো কারেতব্বো ; কারিতোপি অকারিতো; কারেন্তিযা আপত্তি দুক্কটস্স। ন চোদেতব্বো; চোদিতোপি অচোদিতো; চোদেন্তিযা আপত্তি দুক্কটস্স । ন সারেতব্বো; সারিতোপি অসারিতো; সারেন্তিযা আপত্তি দুক্কটস্সা’’তি।
428. Tena kho pana samayena bhikkhuniyo bhikkhūnaṃ uposathaṃ ṭhapenti, pavāraṇaṃ ṭhapenti, savacanīyaṃ karonti, anuvādaṃ paṭṭhapenti, okāsaṃ kārenti, codenti, sārenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhussa uposatho ṭhapetabbo; ṭhapitopi aṭṭhapito; ṭhapentiyā āpatti dukkaṭassa. Na pavāraṇā ṭhapetabbā; ṭhapitāpi aṭṭhapitā; ṭhapentiyā āpatti dukkaṭassa. Na savacanīyaṃ kātabbaṃ; katampi akataṃ; karontiyā āpatti dukkaṭassa. Na anuvādo paṭṭhapetabbo; paṭṭhapitopi appaṭṭhapito; paṭṭhapentiyā āpatti dukkaṭassa. Na okāso kāretabbo ; kāritopi akārito; kārentiyā āpatti dukkaṭassa. Na codetabbo; coditopi acodito; codentiyā āpatti dukkaṭassa . Na sāretabbo; sāritopi asārito; sārentiyā āpatti dukkaṭassā’’ti.
তেন খো পন সমযেন ভিক্খূ ভিক্খুনীনং উপোসথং ঠপেন্তি, পৰারণং ঠপেন্তি, সৰচনীযং করোন্তি, অনুৰাদং পট্ঠপেন্তি, ওকাসং কারেন্তি, চোদেন্তি, সারেন্তি। ভগৰতো এতমত্থং আরোচেসুং। ‘‘অনুজানামি, ভিক্খৰে ভিক্খুনা ভিক্খুনিযা উপোসথং ঠপেতুং; ঠপিতোপি সুট্ঠপিতো; ঠপেন্তস্স অনাপত্তি। পৰারণং ঠপেতুং; ঠপিতাপি সুট্ঠপিতা; ঠপেন্তস্স অনাপত্তি। সৰচনীযং কাতুং; কতম্পি সুকতং; করোন্তস্স অনাপত্তি। অনুৰাদং পট্ঠপেতুং; পট্ঠপিতোপি সুপ্পট্ঠপিতো; পট্ঠপেন্তস্স অনাপত্তি। ওকাসং কারেতুং; কারিতোপি সুকারিতো; কারেন্তস্স অনাপত্তি। চোদেতুং; চোদিতাপি সুচোদিতা; চোদেন্তস্স অনাপত্তি। সারেতুং; সারিতাপি সুসারিতা; সারেন্তস্স অনাপত্তী’’তি।
Tena kho pana samayena bhikkhū bhikkhunīnaṃ uposathaṃ ṭhapenti, pavāraṇaṃ ṭhapenti, savacanīyaṃ karonti, anuvādaṃ paṭṭhapenti, okāsaṃ kārenti, codenti, sārenti. Bhagavato etamatthaṃ ārocesuṃ. ‘‘Anujānāmi, bhikkhave bhikkhunā bhikkhuniyā uposathaṃ ṭhapetuṃ; ṭhapitopi suṭṭhapito; ṭhapentassa anāpatti. Pavāraṇaṃ ṭhapetuṃ; ṭhapitāpi suṭṭhapitā; ṭhapentassa anāpatti. Savacanīyaṃ kātuṃ; katampi sukataṃ; karontassa anāpatti. Anuvādaṃ paṭṭhapetuṃ; paṭṭhapitopi suppaṭṭhapito; paṭṭhapentassa anāpatti. Okāsaṃ kāretuṃ; kāritopi sukārito; kārentassa anāpatti. Codetuṃ; coditāpi sucoditā; codentassa anāpatti. Sāretuṃ; sāritāpi susāritā; sārentassa anāpattī’’ti.
৪২৯. 23 তেন খো পন সমযেন ছব্বগ্গিযা ভিক্খুনিযো যানেন যাযন্তি – ইত্থিযুত্তেনপি পুরিসন্তরেন, পুরিসযুত্তেনপি ইত্থন্তরেন। মনুস্সা উজ্ঝাযন্তি খিয্যন্তি ৰিপাচেন্তি…পে॰… ‘‘সেয্যথাপি গঙ্গামহিযাযা’’তি 24। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা যানেন যাযিতব্বং। যা যাযেয্য, যথাধম্মো কারেতব্বো’’তি।
429.25 Tena kho pana samayena chabbaggiyā bhikkhuniyo yānena yāyanti – itthiyuttenapi purisantarena, purisayuttenapi itthantarena. Manussā ujjhāyanti khiyyanti vipācenti…pe… ‘‘seyyathāpi gaṅgāmahiyāyā’’ti 26. Bhagavato etamatthaṃ ārocesuṃ. ‘‘Na, bhikkhave, bhikkhuniyā yānena yāyitabbaṃ. Yā yāyeyya, yathādhammo kāretabbo’’ti.
তেন খো পন সমযেন অঞ্ঞতরা ভিক্খুনী গিলানা হোতি, ন সক্কোতি পদসা গন্তুং। ভগৰতো এতমত্থং আরোচেসুং। ‘‘অনুজানামি , ভিক্খৰে, গিলানায যান’’ন্তি। অথ খো ভিক্খুনীনং এতদহোসি – ‘‘ইত্থিযুত্তং নু খো, পুরিসযুত্তং নু খো’’তি? ভগৰতো এতমত্থং আরোচেসুং। ‘‘অনুজানামি, ভিক্খৰে, ইত্থিযুত্তং পুরিসযুত্তং হত্থৰট্টক’’ন্তি।
Tena kho pana samayena aññatarā bhikkhunī gilānā hoti, na sakkoti padasā gantuṃ. Bhagavato etamatthaṃ ārocesuṃ. ‘‘Anujānāmi , bhikkhave, gilānāya yāna’’nti. Atha kho bhikkhunīnaṃ etadahosi – ‘‘itthiyuttaṃ nu kho, purisayuttaṃ nu kho’’ti? Bhagavato etamatthaṃ ārocesuṃ. ‘‘Anujānāmi, bhikkhave, itthiyuttaṃ purisayuttaṃ hatthavaṭṭaka’’nti.
তেন খো পন সমযেন অঞ্ঞতরিস্সা ভিক্খুনিযা যানুগ্ঘাতেন বাল়্হতরং অফাসু অহোসি। ভগৰতো এতমত্থং আরোচেসুং। ‘‘অনুজানামি, ভিক্খৰে, সিৰিকং পাটঙ্কি’’ন্তি।
Tena kho pana samayena aññatarissā bhikkhuniyā yānugghātena bāḷhataraṃ aphāsu ahosi. Bhagavato etamatthaṃ ārocesuṃ. ‘‘Anujānāmi, bhikkhave, sivikaṃ pāṭaṅki’’nti.
৪৩০. তেন খো পন সমযেন অড্ঢকাসী গণিকা ভিক্খুনীসু পব্বজিতা হোতি। সা চ সাৰত্থিং গন্তুকামা হোতি – ‘ভগৰতো সন্তিকে উপসম্পজ্জিস্সামী’তি। অস্সোসুং খো ধুত্তা – ‘অড্ঢকাসী কির গণিকা সাৰত্থিং গন্তুকামা’তি। তে মগ্গে পরিযুট্ঠিংসু। অস্সোসি খো অড্ঢকাসী গণিকা – ‘ধুত্তা কির মগ্গে পরিযুট্ঠিতা’তি। ভগৰতো সন্তিকে দূতং পাহেসি – ‘‘অহঞ্হি উপসম্পজ্জিতুকামা; কথং নু খো মযা পটিপজ্জিতব্ব’’ন্তি? অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, দূতেনপি উপসম্পাদেতু’’ন্তি।
430. Tena kho pana samayena aḍḍhakāsī gaṇikā bhikkhunīsu pabbajitā hoti. Sā ca sāvatthiṃ gantukāmā hoti – ‘bhagavato santike upasampajjissāmī’ti. Assosuṃ kho dhuttā – ‘aḍḍhakāsī kira gaṇikā sāvatthiṃ gantukāmā’ti. Te magge pariyuṭṭhiṃsu. Assosi kho aḍḍhakāsī gaṇikā – ‘dhuttā kira magge pariyuṭṭhitā’ti. Bhagavato santike dūtaṃ pāhesi – ‘‘ahañhi upasampajjitukāmā; kathaṃ nu kho mayā paṭipajjitabba’’nti? Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, dūtenapi upasampādetu’’nti.
ভিক্খুদূতেন উপসম্পাদেন্তি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুদূতেন উপসম্পাদেতব্বা। যো উপসম্পাদেয্য, আপত্তি দুক্কটস্সা’’তি। সিক্খমানদূতেন উপসম্পাদেন্তি…পে॰… সামণেরদূতেন উপসম্পাদেন্তি…পে॰… সামণেরিদূতেন উপসম্পাদেন্তি…পে॰… বালায অব্যত্তায দূতেন উপসম্পাদেন্তি। ‘‘ন, ভিক্খৰে, বালায অব্যত্তায দূতেন উপসম্পাদেতব্বা। যো উপসম্পাদেয্য, আপত্তি দুক্কটস্স। অনুজানামি, ভিক্খৰে, ব্যত্তায ভিক্খুনিযা পটিবলায দূতেন উপসম্পাদেতুন্তি।
Bhikkhudūtena upasampādenti. Bhagavato etamatthaṃ ārocesuṃ. ‘‘Na, bhikkhave, bhikkhudūtena upasampādetabbā. Yo upasampādeyya, āpatti dukkaṭassā’’ti. Sikkhamānadūtena upasampādenti…pe… sāmaṇeradūtena upasampādenti…pe… sāmaṇeridūtena upasampādenti…pe… bālāya abyattāya dūtena upasampādenti. ‘‘Na, bhikkhave, bālāya abyattāya dūtena upasampādetabbā. Yo upasampādeyya, āpatti dukkaṭassa. Anujānāmi, bhikkhave, byattāya bhikkhuniyā paṭibalāya dūtena upasampādetunti.
‘‘তায দূতায ভিক্খুনিযা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘ইত্থন্নামা, অয্যা, ইত্থন্নামায অয্যায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। সা কেনচিদেৰ অন্তরাযেন ন আগচ্ছতি। ইত্থন্নামা, অয্যা, সঙ্ঘং উপসম্পদং যাচতি। উল্লুম্পতু তং, অয্যা, সঙ্ঘো অনুকম্পং উপাদায। ইত্থন্নামা, অয্যা, ইত্থন্নামায অয্যায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। সা কেনচিদেৰ অন্তরাযেন ন আগচ্ছতি। দুতিযম্পি, অয্যা, ইত্থন্নামা সঙ্ঘং উপসম্পদং যাচতি। উল্লুম্পতু তং, অয্যা, সঙ্ঘো অনুকম্পং উপাদায। ইত্থন্নামা, অয্যা, ইত্থন্নামায অয্যায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। সা কেনচিদেৰ অন্তরাযেন ন আগচ্ছতি। ততিযম্পি, অয্যা, ইত্থন্নামা সঙ্ঘং উপসম্পদং যাচতি। উল্লুম্পতু তং, অয্যা, সঙ্ঘো অনুকম্পং উপাদাযা’তি । ব্যত্তেন ভিক্খুনা পটিবলেন সঙ্ঘো ঞাপেতব্বো –
‘‘Tāya dūtāya bhikkhuniyā saṅghaṃ upasaṅkamitvā ekaṃsaṃ uttarāsaṅgaṃ karitvā bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘itthannāmā, ayyā, itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā, ayyā, saṅghaṃ upasampadaṃ yācati. Ullumpatu taṃ, ayyā, saṅgho anukampaṃ upādāya. Itthannāmā, ayyā, itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Dutiyampi, ayyā, itthannāmā saṅghaṃ upasampadaṃ yācati. Ullumpatu taṃ, ayyā, saṅgho anukampaṃ upādāya. Itthannāmā, ayyā, itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Tatiyampi, ayyā, itthannāmā saṅghaṃ upasampadaṃ yācati. Ullumpatu taṃ, ayyā, saṅgho anukampaṃ upādāyā’ti . Byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। ইত্থন্নামা ইত্থন্নামায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। সা কেনচিদেৰ অন্তরাযেন ন আগচ্ছতি। ইত্থন্নামা সঙ্ঘং উপসম্পদং যাচতি ইত্থন্নামায পৰত্তিনিযা। যদি সঙ্ঘস্স পত্তকল্লং, সঙ্ঘো ইত্থন্নামং উপসম্পাদেয্য ইত্থন্নামায পৰত্তিনিযা। এসা ঞত্তি।
‘‘Suṇātu me, bhante, saṅgho. Itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā saṅghaṃ upasampadaṃ yācati itthannāmāya pavattiniyā. Yadi saṅghassa pattakallaṃ, saṅgho itthannāmaṃ upasampādeyya itthannāmāya pavattiniyā. Esā ñatti.
‘‘সুণাতু মে , ভন্তে, সঙ্ঘো। ইত্থন্নামা ইত্থন্নামায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। সা কেনচিদেৰ অন্তরাযেন ন আগচ্ছতি। ইত্থন্নামা সঙ্ঘং উপসম্পদং যাচতি ইত্থন্নামায পৰত্তিনিযা। সঙ্ঘো ইত্থন্নামং উপসম্পাদেতি ইত্থন্নামায পৰত্তিনিযা। যস্সাযস্মতো খমতি ইত্থন্নামায উপসম্পদা ইত্থন্নামায পৰত্তিনিযা, সো তুণ্হস্স; যস্স নক্খমতি, সো ভাসেয্য।
‘‘Suṇātu me , bhante, saṅgho. Itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি। সুণাতু মে, ভন্তে, সঙ্ঘো। ইত্থন্নামা ইত্থন্নামায উপসম্পদাপেক্খা। একতোউপসম্পন্না ভিক্খুনিসঙ্ঘে, ৰিসুদ্ধা। সা কেনচিদেৰ অন্তরাযেন ন আগচ্ছতি। ইত্থন্নামা সঙ্ঘং উপসম্পদং যাচতি ইত্থন্নামায পৰত্তিনিযা। সঙ্ঘো ইত্থন্নামং উপসম্পাদেতি ইত্থন্নামায পৰত্তিনিযা। যস্সাযস্মতো খমতি ইত্থন্নামায উপসম্পদা ইত্থন্নামায পৰত্তিনিযা, সো তুণ্হস্স; যস্স নক্খমতি, সো ভাসেয্য।
‘‘Dutiyampi etamatthaṃ vadāmi…pe… tatiyampi etamatthaṃ vadāmi. Suṇātu me, bhante, saṅgho. Itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘উপসম্পন্না সঙ্ঘেন ইত্থন্নামা ইত্থন্নামায পৰত্তিনিযা। খমতি সঙ্ঘস্স, তস্মা তুণ্হী, এৰমেতং ধারযামীতি।
‘‘Upasampannā saṅghena itthannāmā itthannāmāya pavattiniyā. Khamati saṅghassa, tasmā tuṇhī, evametaṃ dhārayāmīti.
‘‘তাৰদেৰ ছাযা মেতব্বা, উতুপ্পমাণং আচিক্খিতব্বং, দিৰসভাগো আচিক্খিতব্বো, সঙ্গীতি আচিক্খিতব্বা, ভিক্খুনিযো ৰত্তব্বা – তস্সা তযো চ নিস্সযে, অট্ঠ চ অকরণীযানি আচিক্খেয্যাথা’’তি।
‘‘Tāvadeva chāyā metabbā, utuppamāṇaṃ ācikkhitabbaṃ, divasabhāgo ācikkhitabbo, saṅgīti ācikkhitabbā, bhikkhuniyo vattabbā – tassā tayo ca nissaye, aṭṭha ca akaraṇīyāni ācikkheyyāthā’’ti.
৪৩১. তেন খো পন সমযেন ভিক্খুনিযো অরঞ্ঞে ৰিহরন্তি। ধুত্তা দূসেন্তি। ভগৰতো এতমত্থং, আরোচেসুং। ‘‘ন, ভিক্খৰে, ভিক্খুনিযা অরঞ্ঞে ৰত্থব্বং। যা ৰসেয্য, আপত্তি দুক্কটস্সা’’তি।
431. Tena kho pana samayena bhikkhuniyo araññe viharanti. Dhuttā dūsenti. Bhagavato etamatthaṃ, ārocesuṃ. ‘‘Na, bhikkhave, bhikkhuniyā araññe vatthabbaṃ. Yā vaseyya, āpatti dukkaṭassā’’ti.
তেন খো পন সমযেন অঞ্ঞতরেন উপাসকেন ভিক্খুনিসঙ্ঘস্স উদ্দোসিতো দিন্নো হোতি। ভগৰতো এতমত্থং আরোচেসুং। ‘‘অনুজানামি, ভিক্খৰে, উদ্দোসিত’’ন্তি। উদ্দোসিতো ন সম্মতি। ভগৰতো এতমত্থং আরোচেসুং। ‘‘অনুজানামি, ভিক্খৰে, উপস্সয’’ন্তি। উপস্সযো ন সম্মতি। ভগৰতো এতমত্থং আরোচেসুং। ‘‘অনুজানামি, ভিক্খৰে, নৰকম্ম’’ন্তি। নৰকম্মং ন সম্মতি। ভগৰতো এতমত্থং আরোচেসুং। ‘‘অনুজানামি, ভিক্খৰে, পুগ্গলিকম্পি কাতু’’ন্তি।
Tena kho pana samayena aññatarena upāsakena bhikkhunisaṅghassa uddosito dinno hoti. Bhagavato etamatthaṃ ārocesuṃ. ‘‘Anujānāmi, bhikkhave, uddosita’’nti. Uddosito na sammati. Bhagavato etamatthaṃ ārocesuṃ. ‘‘Anujānāmi, bhikkhave, upassaya’’nti. Upassayo na sammati. Bhagavato etamatthaṃ ārocesuṃ. ‘‘Anujānāmi, bhikkhave, navakamma’’nti. Navakammaṃ na sammati. Bhagavato etamatthaṃ ārocesuṃ. ‘‘Anujānāmi, bhikkhave, puggalikampi kātu’’nti.
৪৩২. তেন খো পন সমযেন অঞ্ঞতরা ইত্থী সন্নিসিন্নগব্ভা ভিক্খুনীসু পব্বজিতা হোতি। তস্সা পব্বজিতায গব্ভো ৰুট্ঠাতি। অথ খো তস্সা ভিক্খুনিযা এতদহোসি – ‘‘কথং নু খো মযা ইমস্মিং দারকে পটিপজ্জিতব্ব’’ন্তি? ভগৰতো এতমত্থং আরোচেসুং । ‘‘অনুজানামি, ভিক্খৰে, পোসেতুং, যাৰ সো দারকো ৰিঞ্ঞুতং পাপুণাতী’’তি।
432. Tena kho pana samayena aññatarā itthī sannisinnagabbhā bhikkhunīsu pabbajitā hoti. Tassā pabbajitāya gabbho vuṭṭhāti. Atha kho tassā bhikkhuniyā etadahosi – ‘‘kathaṃ nu kho mayā imasmiṃ dārake paṭipajjitabba’’nti? Bhagavato etamatthaṃ ārocesuṃ . ‘‘Anujānāmi, bhikkhave, posetuṃ, yāva so dārako viññutaṃ pāpuṇātī’’ti.
অথ খো তস্সা ভিক্খুনিযা এতদহোসি – ‘‘মযা চ ন লব্ভা একিকায ৰত্থুং, অঞ্ঞায চ ভিক্খুনিযা ন লব্ভা দারকেন সহ ৰত্থুং, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং। ‘‘অনুজানামি, ভিক্খৰে, একং ভিক্খুনিং সম্মন্নিত্ৰা তস্সা ভিক্খুনিযা দুতিযং দাতুং। এৰঞ্চ পন, ভিক্খৰে, সম্মন্নিতব্বা। পঠমং ভিক্খুনী যাচিতব্বা, যাচিত্ৰা ব্যত্তায ভিক্খুনিযা পটিবলায সঙ্ঘো ঞাপেতব্বো –
Atha kho tassā bhikkhuniyā etadahosi – ‘‘mayā ca na labbhā ekikāya vatthuṃ, aññāya ca bhikkhuniyā na labbhā dārakena saha vatthuṃ, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, ekaṃ bhikkhuniṃ sammannitvā tassā bhikkhuniyā dutiyaṃ dātuṃ. Evañca pana, bhikkhave, sammannitabbā. Paṭhamaṃ bhikkhunī yācitabbā, yācitvā byattāya bhikkhuniyā paṭibalāya saṅgho ñāpetabbo –
‘‘সুণাতু মে, অয্যে, সঙ্ঘো। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সম্মন্নেয্য ইত্থন্নামায ভিক্খুনিযা দুতিযং। এসা ঞত্তি।
‘‘Suṇātu me, ayye, saṅgho. Yadi saṅghassa pattakallaṃ, saṅgho itthannāmaṃ bhikkhuniṃ sammanneyya itthannāmāya bhikkhuniyā dutiyaṃ. Esā ñatti.
‘‘সুণাতু মে, অয্যে, সঙ্ঘো। সঙ্ঘো ইত্থন্নামং ভিক্খুনিং সম্মন্নতি ইত্থন্নামায ভিক্খুনিযা দুতিযং। যস্সা অয্যায খমতি ইত্থন্নামায ভিক্খুনিযা সম্মুতি ইত্থন্নামায ভিক্খুনিযা দুতিযায, সা তুণ্হস্স; যস্সা নক্খমতি, সা ভাসেয্য।
‘‘Suṇātu me, ayye, saṅgho. Saṅgho itthannāmaṃ bhikkhuniṃ sammannati itthannāmāya bhikkhuniyā dutiyaṃ. Yassā ayyāya khamati itthannāmāya bhikkhuniyā sammuti itthannāmāya bhikkhuniyā dutiyāya, sā tuṇhassa; yassā nakkhamati, sā bhāseyya.
‘‘সম্মতা সঙ্ঘেন ইত্থন্নামা ভিক্খুনী ইত্থন্নামায ভিক্খুনিযা দুতিযা। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Sammatā saṅghena itthannāmā bhikkhunī itthannāmāya bhikkhuniyā dutiyā. Khamati saṅghassa, tasmā tuṇhī, evametaṃ dhārayāmī’’ti.
অথ খো তস্সা দুতিযিকায ভিক্খুনিযা এতদহোসি – ‘‘কথং নু খো মযা ইমস্মিং দারকে পটিপজ্জিতব্ব’’ন্তি? ভগৰতো এতমত্থং আরোচেসুং। ‘‘অনুজানামি, ভিক্খৰে, ঠপেত্ৰা সাগারং যথা অঞ্ঞস্মিং পুরিসে পটিপজ্জন্তি 27 এৰং তস্মিং দারকে পটিপজ্জিতু’’ন্তি।
Atha kho tassā dutiyikāya bhikkhuniyā etadahosi – ‘‘kathaṃ nu kho mayā imasmiṃ dārake paṭipajjitabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā sāgāraṃ yathā aññasmiṃ purise paṭipajjanti 28 evaṃ tasmiṃ dārake paṭipajjitu’’nti.
৪৩৩. তেন খো পন সমযেন অঞ্ঞতরা ভিক্খুনী গরুধম্মং অজ্ঝাপন্না হোতি মানত্তচারিনী। অথ খো তস্সা ভিক্খুনিযা এতদহোসি – ‘‘মযা চ ন লব্ভা একিকায ৰত্থুং, অঞ্ঞায চ ভিক্খুনিযা ন লব্ভা সহ মযা ৰত্থুং, কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসুং। ‘‘অনুজানামি, ভিক্খৰে, একং ভিক্খুনিং সম্মন্নিত্ৰা তস্সা ভিক্খুনিযা দুতিযং দাতুং। এৰঞ্চ পন, ভিক্খৰে, সম্মন্নিতব্বা। পঠমং ভিক্খুনী যাচিতব্বা, যাচিত্ৰা ব্যত্তায ভিক্খুনিযা পটিবলায সঙ্ঘো ঞাপেতব্বো –
433. Tena kho pana samayena aññatarā bhikkhunī garudhammaṃ ajjhāpannā hoti mānattacārinī. Atha kho tassā bhikkhuniyā etadahosi – ‘‘mayā ca na labbhā ekikāya vatthuṃ, aññāya ca bhikkhuniyā na labbhā saha mayā vatthuṃ, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, ekaṃ bhikkhuniṃ sammannitvā tassā bhikkhuniyā dutiyaṃ dātuṃ. Evañca pana, bhikkhave, sammannitabbā. Paṭhamaṃ bhikkhunī yācitabbā, yācitvā byattāya bhikkhuniyā paṭibalāya saṅgho ñāpetabbo –
‘‘সুণাতু মে, অয্যে, সঙ্ঘো। যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সম্মন্নেয্য ইত্থন্নামায ভিক্খুনিযা দুতিযং। এসা ঞত্তি।
‘‘Suṇātu me, ayye, saṅgho. Yadi saṅghassa pattakallaṃ, saṅgho itthannāmaṃ bhikkhuniṃ sammanneyya itthannāmāya bhikkhuniyā dutiyaṃ. Esā ñatti.
‘‘সুণাতু মে, অয্যে, সঙ্ঘো। সঙ্ঘো ইত্থন্নামং ভিক্খুনিং সম্মন্নতি ইত্থন্নামায ভিক্খুনিযা দুতিযং। যস্সা অয্যায খমতি ইত্থন্নামায ভিক্খুনিযা সম্মুতি ইত্থন্নামায ভিক্খুনিযা দুতিযায, সা তুণ্হস্স; যস্সা নক্খমতি, সা ভাসেয্য।
‘‘Suṇātu me, ayye, saṅgho. Saṅgho itthannāmaṃ bhikkhuniṃ sammannati itthannāmāya bhikkhuniyā dutiyaṃ. Yassā ayyāya khamati itthannāmāya bhikkhuniyā sammuti itthannāmāya bhikkhuniyā dutiyāya, sā tuṇhassa; yassā nakkhamati, sā bhāseyya.
‘‘সম্মতা সঙ্ঘেন ইত্থন্নামা ভিক্খুনী ইত্থন্নামায ভিক্খুনিযা দুতিযা। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Sammatā saṅghena itthannāmā bhikkhunī itthannāmāya bhikkhuniyā dutiyā. Khamati saṅghassa, tasmā tuṇhī, evametaṃ dhārayāmī’’ti.
৪৩৪. তেন খো পন সমযেন অঞ্ঞতরা ভিক্খুনী সিক্খং পচ্চক্খায ৰিব্ভমি। সা পুন পচ্চাগন্ত্ৰা ভিক্খুনিযো উপসম্পদং যাচি । ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা সিক্খাপচ্চক্খানং; যদেৰ সা ৰিব্ভন্তা তদেৰ সা অভিক্খুনী’’তি।
434. Tena kho pana samayena aññatarā bhikkhunī sikkhaṃ paccakkhāya vibbhami. Sā puna paccāgantvā bhikkhuniyo upasampadaṃ yāci . Bhagavato etamatthaṃ ārocesuṃ. ‘‘Na, bhikkhave, bhikkhuniyā sikkhāpaccakkhānaṃ; yadeva sā vibbhantā tadeva sā abhikkhunī’’ti.
তেন খো পন সমযেন অঞ্ঞতরা ভিক্খুনী সকাৰাসা তিত্থাযতনং সঙ্কমি। সা পুন পচ্চাগন্ত্ৰা ভিক্খুনিযো উপসম্পদং যাচি। ভগৰতো এতমত্থং আরোচেসুং। ‘‘যা সা, ভিক্খৰে, ভিক্খুনী সকাৰাসা তিত্থাযতনং সঙ্কন্তা, সা আগতা ন উপসম্পাদেতব্বা’’তি।
Tena kho pana samayena aññatarā bhikkhunī sakāvāsā titthāyatanaṃ saṅkami. Sā puna paccāgantvā bhikkhuniyo upasampadaṃ yāci. Bhagavato etamatthaṃ ārocesuṃ. ‘‘Yā sā, bhikkhave, bhikkhunī sakāvāsā titthāyatanaṃ saṅkantā, sā āgatā na upasampādetabbā’’ti.
তেন খো পন সমযেন ভিক্খুনিযো পুরিসেহি অভিৰাদনং , কেসচ্ছেদনং, নখচ্ছেদনং, ৰণপ্পটিকম্মং, কুক্কুচ্চাযন্তা ন সাদিযন্তি। ভগৰতো এতমত্থং আরোচেসুং। ‘‘অনুজানামি, ভিক্খৰে, সাদিতু’’ন্তি 29।
Tena kho pana samayena bhikkhuniyo purisehi abhivādanaṃ , kesacchedanaṃ, nakhacchedanaṃ, vaṇappaṭikammaṃ, kukkuccāyantā na sādiyanti. Bhagavato etamatthaṃ ārocesuṃ. ‘‘Anujānāmi, bhikkhave, sāditu’’nti 30.
৪৩৫. তেন খো পন সমযেন ভিক্খুনিযো পল্লঙ্কেন নিসীদন্তি পণ্হীসম্ফস্সং সাদিযন্তী 31। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা পল্লঙ্কেন নিসীদিতব্বং। যা নিসীদেয্য, আপত্তি দুক্কটস্সা’’তি।
435. Tena kho pana samayena bhikkhuniyo pallaṅkena nisīdanti paṇhīsamphassaṃ sādiyantī 32. Bhagavato etamatthaṃ ārocesuṃ. ‘‘Na, bhikkhave, bhikkhuniyā pallaṅkena nisīditabbaṃ. Yā nisīdeyya, āpatti dukkaṭassā’’ti.
তেন খো পন সমযেন অঞ্ঞতরা ভিক্খুনী গিলানা হোতি। তস্সা ৰিনা পল্লঙ্কেন ন ফাসু হোতি। ভগৰতো এতমত্থং আরোচেসুং। ‘‘অনুজানামি, ভিক্খৰে, ভিক্খুনিযা অড্ঢপল্লঙ্ক’’ন্তি।
Tena kho pana samayena aññatarā bhikkhunī gilānā hoti. Tassā vinā pallaṅkena na phāsu hoti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhuniyā aḍḍhapallaṅka’’nti.
তেন খো পন সমযেন ভিক্খুনিযো ৰচ্চকুটিযা ৰচ্চং করোন্তি । ছব্বগ্গিযা ভিক্খুনিযো তত্থেৰ গব্ভং পাতেন্তি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা ৰচ্চকুটিযা ৰচ্চো কাতব্বো। যা করেয্য, আপত্তি দুক্কটস্স। অনুজানামি, ভিক্খৰে, হেট্ঠা ৰিৰটে উপরিপটিচ্ছন্নে ৰচ্চং কাতু’’ন্তি।
Tena kho pana samayena bhikkhuniyo vaccakuṭiyā vaccaṃ karonti . Chabbaggiyā bhikkhuniyo tattheva gabbhaṃ pātenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā vaccakuṭiyā vacco kātabbo. Yā kareyya, āpatti dukkaṭassa. Anujānāmi, bhikkhave, heṭṭhā vivaṭe uparipaṭicchanne vaccaṃ kātu’’nti.
৪৩৬. তেন খো পন সমযেন ভিক্খুনিযো চুণ্ণেন নহাযন্তি। মনুস্সা উজ্ঝাযন্তি খিয্যন্তি ৰিপাচেন্তি…পে॰… সেয্যথাপি গিহিনী কামভোগিনিযোতি। ভগৰতো এতমত্থং আরোচেসুং । ‘‘ন, ভিক্খৰে, ভিক্খুনিযা চুণ্ণেন নহাযিতব্বং। যা নহাযেয্য, আপত্তি দুক্কটস্স। অনুজানামি, ভিক্খৰে, কুক্কুসং মত্তিক’’ন্তি।
436. Tena kho pana samayena bhikkhuniyo cuṇṇena nahāyanti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ . ‘‘Na, bhikkhave, bhikkhuniyā cuṇṇena nahāyitabbaṃ. Yā nahāyeyya, āpatti dukkaṭassa. Anujānāmi, bhikkhave, kukkusaṃ mattika’’nti.
তেন খো পন সমযেন ভিক্খুনিযো ৰাসিতকায মত্তিকায নহাযন্তি। মনুস্সা উজ্ঝাযন্তি খিয্যন্তি ৰিপাচেন্তি…পে॰… সেয্যথাপি গিহিনী কামভোগিনিযোতি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা ৰাসিতকায মত্তিকায নহাযিতব্বং। যা নহাযেয্য, আপত্তি দুক্কটস্স। অনুজানামি, ভিক্খৰে, পকতিমত্তিক’’ন্তি।
Tena kho pana samayena bhikkhuniyo vāsitakāya mattikāya nahāyanti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā vāsitakāya mattikāya nahāyitabbaṃ. Yā nahāyeyya, āpatti dukkaṭassa. Anujānāmi, bhikkhave, pakatimattika’’nti.
তেন খো পন সমযেন ভিক্খুনিযো জন্তাঘরে নহাযন্তিযো কোলাহলং অকংসু। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা জন্তাঘরে নহাযিতব্বং। যা নহাযেয্য, আপত্তি দুক্কটস্সা’’তি।
Tena kho pana samayena bhikkhuniyo jantāghare nahāyantiyo kolāhalaṃ akaṃsu. Bhagavato etamatthaṃ ārocesuṃ. ‘‘Na, bhikkhave, bhikkhuniyā jantāghare nahāyitabbaṃ. Yā nahāyeyya, āpatti dukkaṭassā’’ti.
তেন খো পন সমযেন ভিক্খুনিযো পটিসোতে নহাযন্তি ধারাসম্ফস্সং সাদিযন্তী। ভগৰতো এতমত্থং আরোচেসুং। ‘‘ন, ভিক্খৰে , ভিক্খুনিযা পটিসোতে নহাযিতব্বং। যা নহাযেয্য, আপত্তি দুক্কটস্সা’’তি।
Tena kho pana samayena bhikkhuniyo paṭisote nahāyanti dhārāsamphassaṃ sādiyantī. Bhagavato etamatthaṃ ārocesuṃ. ‘‘Na, bhikkhave , bhikkhuniyā paṭisote nahāyitabbaṃ. Yā nahāyeyya, āpatti dukkaṭassā’’ti.
তেন খো পন সমযেন ভিক্খুনিযো অতিত্থে নহাযন্তি। ধুত্তা দূসেন্তি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা অতিত্থে নহাযিতব্বং। যা নহাযেয্য, আপত্তি দুক্কটস্সা’’তি।
Tena kho pana samayena bhikkhuniyo atitthe nahāyanti. Dhuttā dūsenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā atitthe nahāyitabbaṃ. Yā nahāyeyya, āpatti dukkaṭassā’’ti.
তেন খো পন সমযেন ভিক্খুনিযো পুরিসতিত্থে নহাযন্তি। মনুস্সা উজ্ঝাযন্তি খিয্যন্তি ৰিপাচেন্তি…পে॰… সেয্যথাপি গিহিনী কামভোগিনিযোতি। ভগৰতো এতমত্থং আরোচেসুং। ‘‘ন, ভিক্খৰে, ভিক্খুনিযা পুরিসতিত্থে নহাযিতব্বং। যা নহাযেয্য, আপত্তি দুক্কটস্স। অনুজানামি, ভিক্খৰে, মহিলাতিত্থে নহাযিতু’’ন্তি।
Tena kho pana samayena bhikkhuniyo purisatitthe nahāyanti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā purisatitthe nahāyitabbaṃ. Yā nahāyeyya, āpatti dukkaṭassa. Anujānāmi, bhikkhave, mahilātitthe nahāyitu’’nti.
ততিযভাণৰারো নিট্ঠিতো।
Tatiyabhāṇavāro niṭṭhito.
ভিক্খুনিক্খন্ধকো দসমো।
Bhikkhunikkhandhako dasamo.
ইমস্মিং খন্ধকে ৰত্থূ একসতং।
Imasmiṃ khandhake vatthū ekasataṃ.
তস্সুদ্দানং –
Tassuddānaṃ –
পব্বজ্জং গোতমী যাচি, নানুঞ্ঞাসি তথাগতো।
Pabbajjaṃ gotamī yāci, nānuññāsi tathāgato;
কপিলৰত্থু ৰেসালিং, অগমাসি ৰিনাযকো॥
Kapilavatthu vesāliṃ, agamāsi vināyako.
রজোকিণ্ণেন কোট্ঠকে, আনন্দস্স পৰেদযি।
Rajokiṇṇena koṭṭhake, ānandassa pavedayi;
ভব্বোতি নযতো যাচি, মাতাতি পোসিকাতি চ॥
Bhabboti nayato yāci, mātāti posikāti ca.
ৰস্সসতং তদহু চ, অভিক্খুপচ্চাসীসনা।
Vassasataṃ tadahu ca, abhikkhupaccāsīsanā;
পৰারণা গরুধম্মা, দ্ৰে ৰস্সা অনক্কোসনা॥
Pavāraṇā garudhammā, dve vassā anakkosanā.
ওৰটো চ অট্ঠ ধম্মা, যাৰজীৰানুৰত্তনা।
Ovaṭo ca aṭṭha dhammā, yāvajīvānuvattanā;
গরুধম্মপটিগ্গাহো সাৰস্সা উপসম্পদা॥
Garudhammapaṭiggāho sāvassā upasampadā.
ৰস্সসহস্সং পঞ্চেৰ, কুম্ভথেনকসেতট্টি।
Vassasahassaṃ pañceva, kumbhathenakasetaṭṭi;
মঞ্জিট্ঠিকউপমাহি, এৰং সদ্ধম্মহিংসনা॥
Mañjiṭṭhikaupamāhi, evaṃ saddhammahiṃsanā.
আল়িং বন্ধেয্য পাএৰ, পুন সদ্ধম্মসণ্ঠিতি।
Āḷiṃ bandheyya pāeva, puna saddhammasaṇṭhiti;
উপসম্পাদেতুং অয্যা, যথাৰুড্ঢাভিৰাদনা॥
Upasampādetuṃ ayyā, yathāvuḍḍhābhivādanā.
ন করিস্সন্তি কিমেৰ, সাধারণাসাধারণং।
Na karissanti kimeva, sādhāraṇāsādhāraṇaṃ;
ওৰাদং পাতিমোক্খঞ্চ, কেন নু খো উপস্সযং॥
Ovādaṃ pātimokkhañca, kena nu kho upassayaṃ.
ন জানন্তি চ আচিক্খি, ন করোন্তি চ ভিক্খুহি।
Na jānanti ca ācikkhi, na karonti ca bhikkhuhi;
পটিগ্গহেতুং ভিক্খূহি, ভিক্খুনীহি পটিগ্গহো॥
Paṭiggahetuṃ bhikkhūhi, bhikkhunīhi paṭiggaho.
আচিক্খি কম্মং ভিক্খূহি, উজ্ঝাযন্তি ভিক্খুনীহি ৰা।
Ācikkhi kammaṃ bhikkhūhi, ujjhāyanti bhikkhunīhi vā;
আচিক্খিতুং ভণ্ডনঞ্চ, রোপেত্ৰা উপ্পলায চ॥
Ācikkhituṃ bhaṇḍanañca, ropetvā uppalāya ca.
সাৰত্থিযা কদ্দমোদ, অৰন্দি কায ঊরু চ।
Sāvatthiyā kaddamoda, avandi kāya ūru ca;
অঙ্গজাতঞ্চ ওভাসং, সম্পযোজেন্তি ৰগ্গিকা॥
Aṅgajātañca obhāsaṃ, sampayojenti vaggikā.
অৰন্দিযো দণ্ডকম্মং, ভিক্খুনিযো তথা পুন।
Avandiyo daṇḍakammaṃ, bhikkhuniyo tathā puna;
আৰরণঞ্চ ওৰাদং, কপ্পতি নু খো পক্কমি॥
Āvaraṇañca ovādaṃ, kappati nu kho pakkami.
বালা ৰত্থুৰিনিচ্ছযা, ওৰাদং সঙ্ঘো পঞ্চহি।
Bālā vatthuvinicchayā, ovādaṃ saṅgho pañcahi;
দুৰে তিস্সো ন গণ্হন্তি, বালা গিলানগমিকং॥
Duve tisso na gaṇhanti, bālā gilānagamikaṃ.
আরঞ্ঞিকো নারোচেন্তি, ন পচ্চাগচ্ছন্তি চ।
Āraññiko nārocenti, na paccāgacchanti ca;
দীঘং ৰিলীৰচম্মঞ্চ, দুস্সা চ ৰেণিৰট্টি চ।
Dīghaṃ vilīvacammañca, dussā ca veṇivaṭṭi ca;
চোল়ৰেণি চ ৰট্টি চ, সুত্তৰেণি চ ৰট্টিকা॥
Coḷaveṇi ca vaṭṭi ca, suttaveṇi ca vaṭṭikā.
অট্ঠিল্লং গোহনুকেন, হত্থকোচ্ছং পাদং তথা।
Aṭṭhillaṃ gohanukena, hatthakocchaṃ pādaṃ tathā;
ঊরুং মুখং দন্তমংসং, আলিম্পোমদ্দচুণ্ণনা॥
Ūruṃ mukhaṃ dantamaṃsaṃ, ālimpomaddacuṇṇanā.
লঞ্ছেন্তি অঙ্গরাগঞ্চ, মুখরাগং তথা দুৰে।
Lañchenti aṅgarāgañca, mukharāgaṃ tathā duve;
ৰেসী পানাগারং সূনং, আপণং ৰড্ঢি ৰণিজ্জা।
Vesī pānāgāraṃ sūnaṃ, āpaṇaṃ vaḍḍhi vaṇijjā;
দাসং দাসিং কম্মকরং, কম্মকারিং উপট্ঠয্যুং॥
Dāsaṃ dāsiṃ kammakaraṃ, kammakāriṃ upaṭṭhayyuṃ.
তিরচ্ছানহরীতকি, সন্ধারযন্তি নমতকং।
Tiracchānaharītaki, sandhārayanti namatakaṃ;
নীলং পীতং লোহিতকং, মঞ্জিট্ঠকণ্হচীৰরা॥
Nīlaṃ pītaṃ lohitakaṃ, mañjiṭṭhakaṇhacīvarā.
মহারঙ্গমহানামঅচ্ছিন্না দীঘমেৰ চ।
Mahāraṅgamahānāmaacchinnā dīghameva ca;
পুপ্ফফলকঞ্চুকঞ্চ, তিরীটকঞ্চ ধারযুং॥
Pupphaphalakañcukañca, tirīṭakañca dhārayuṃ.
ভিক্খুনী সিক্খমানায, সামণেরায অচ্চযে।
Bhikkhunī sikkhamānāya, sāmaṇerāya accaye;
নিয্যাদিতে পরিক্খারে, ভিক্খুনিযোৰ ইস্সরা॥
Niyyādite parikkhāre, bhikkhuniyova issarā.
ভিক্খুস্স সামণেরস্স, উপাসকস্সুপাসিকা।
Bhikkhussa sāmaṇerassa, upāsakassupāsikā;
অঞ্ঞেসঞ্চ পরিক্খারে, নিয্যাতে ভিক্খুইস্সরা॥
Aññesañca parikkhāre, niyyāte bhikkhuissarā.
মল্লী গব্ভং পত্তমূলং, ব্যঞ্জনং আমিসেন চ।
Mallī gabbhaṃ pattamūlaṃ, byañjanaṃ āmisena ca;
উস্সন্নঞ্চ বাল়্হতরং, সন্নিধিকতমামিসং॥
Ussannañca bāḷhataraṃ, sannidhikatamāmisaṃ.
ভিক্খূনং যাদিসং ভোট্ঠং 35, ভিক্খুনীনং তথা করে।
Bhikkhūnaṃ yādisaṃ bhoṭṭhaṃ 36, bhikkhunīnaṃ tathā kare;
সেনাসনং উতুনিযো, মক্খীযতি পটাণি চ॥
Senāsanaṃ utuniyo, makkhīyati paṭāṇi ca.
ছিজ্জন্তি সব্বকালঞ্চ, অনিমিত্তাপি দিস্সরে।
Chijjanti sabbakālañca, animittāpi dissare;
নিমিত্তা লোহিতা চেৰ, তথেৰ ধুৰলোহিতা॥
Nimittā lohitā ceva, tatheva dhuvalohitā.
ধুৰচোল়পগ্ঘরন্তী, সিখরণিত্থিপণ্ডকা।
Dhuvacoḷapaggharantī, sikharaṇitthipaṇḍakā;
ৰেপুরিসী চ সম্ভিন্না, উভতোব্যঞ্জনাপি চ॥
Vepurisī ca sambhinnā, ubhatobyañjanāpi ca.
অনিমিত্তাদিতো কত্ৰা, যাৰ উভতোব্যঞ্জনা।
Animittādito katvā, yāva ubhatobyañjanā;
এতং পেয্যালতো হেট্ঠা, কুট্ঠং গণ্ডো কিলাসো চ॥
Etaṃ peyyālato heṭṭhā, kuṭṭhaṃ gaṇḍo kilāso ca.
সোসাপমারো মানুসী, ইত্থীসি ভুজিস্সাসি চ।
Sosāpamāro mānusī, itthīsi bhujissāsi ca;
অণণা ন রাজভটী, অনুঞ্ঞাতা চ ৰীসতি॥
Aṇaṇā na rājabhaṭī, anuññātā ca vīsati.
পরিপুণ্ণা চ কিন্নামা, কানামা তে পৰত্তিনী।
Paripuṇṇā ca kinnāmā, kānāmā te pavattinī;
চতুৰীসন্তরাযানং, পুচ্ছিত্ৰা উপসম্পদা॥
Catuvīsantarāyānaṃ, pucchitvā upasampadā.
ৰিত্থাযন্তি অননুসিট্ঠা, সঙ্ঘমজ্ঝে তথেৰ চ।
Vitthāyanti ananusiṭṭhā, saṅghamajjhe tatheva ca;
উপজ্ঝাগাহ সঙ্ঘাটি, উত্তরন্তরৰাসকো॥
Upajjhāgāha saṅghāṭi, uttarantaravāsako.
সঙ্কচ্চুদকসাটি চ, আচিক্খিত্ৰান পেসযে।
Saṅkaccudakasāṭi ca, ācikkhitvāna pesaye;
বালা অসম্মতেকতো, যাচে পুচ্ছন্তরাযিকা॥
Bālā asammatekato, yāce pucchantarāyikā.
একতোউপসম্পন্না, ভিক্খুসঙ্ঘে তথা পুন।
Ekatoupasampannā, bhikkhusaṅghe tathā puna;
ছাযা উতু দিৰসা চ, সঙ্গীতি তযো নিস্সযে॥
Chāyā utu divasā ca, saṅgīti tayo nissaye.
অট্ঠ অকরণীযানি, কালং সব্বত্থ অট্ঠেৰ।
Aṭṭha akaraṇīyāni, kālaṃ sabbattha aṭṭheva;
ন পৰারেন্তি ভিক্খুনী, ভিক্খুসঙ্ঘং তথেৰ চ॥
Na pavārenti bhikkhunī, bhikkhusaṅghaṃ tatheva ca.
কোলাহলং পুরেভত্তং, ৰিকালে চ কোলাহলং।
Kolāhalaṃ purebhattaṃ, vikāle ca kolāhalaṃ;
উপোসথং পৰারণং, সৰচনীযানুৰাদনং॥
Uposathaṃ pavāraṇaṃ, savacanīyānuvādanaṃ.
ওকাসং চোদে সারেন্তি, পটিক্খিত্তং মহেসিনা।
Okāsaṃ code sārenti, paṭikkhittaṃ mahesinā;
তথেৰ ভিক্খু ভিক্খুনী, অনুঞ্ঞাতং মহেসিনা॥
Tatheva bhikkhu bhikkhunī, anuññātaṃ mahesinā.
যানং গিলানযুত্তঞ্চ, যানুগ্ঘাতড্ঢকাসিকা।
Yānaṃ gilānayuttañca, yānugghātaḍḍhakāsikā;
ভিক্খু সিক্খা সামণের, সামণেরী চ বালায॥
Bhikkhu sikkhā sāmaṇera, sāmaṇerī ca bālāya.
অরঞ্ঞে উপাসকেন, উদ্দোসিতো উপস্সযং।
Araññe upāsakena, uddosito upassayaṃ;
ন সম্মতি নৰকম্মং, নিসিন্নগব্ভএকিকা॥
Na sammati navakammaṃ, nisinnagabbhaekikā.
সাগারঞ্চ গরুধম্মং, পচ্চক্খায চ সঙ্কমি।
Sāgārañca garudhammaṃ, paccakkhāya ca saṅkami;
অভিৰাদনকেসা চ, নখা চ ৰণকম্মনা॥
Abhivādanakesā ca, nakhā ca vaṇakammanā.
পল্লঙ্কেন গিলানা চ, ৰচ্চং চুণ্ণেন ৰাসিতং।
Pallaṅkena gilānā ca, vaccaṃ cuṇṇena vāsitaṃ;
জন্তাঘরে পটিসোতে, অতিত্থে পুরিসেন চ॥
Jantāghare paṭisote, atitthe purisena ca.
মহাগোতমী আযাচি, আনন্দো চাপি যোনিসো।
Mahāgotamī āyāci, ānando cāpi yoniso;
পরিসা চতস্সো হোন্তি, পব্বজ্জা জিনসাসনে॥
Parisā catasso honti, pabbajjā jinasāsane.
সংৰেগজননত্থায , সদ্ধম্মস্স চ ৰুদ্ধিযা।
Saṃvegajananatthāya , saddhammassa ca vuddhiyā;
আতুরস্সাৰ ভেসজ্জং, এৰং বুদ্ধেন দেসিতং॥
Āturassāva bhesajjaṃ, evaṃ buddhena desitaṃ.
এৰং ৰিনীতা সদ্ধম্মে, মাতুগামাপি ইতরা।
Evaṃ vinītā saddhamme, mātugāmāpi itarā;
যাযন্তি 37 অচ্চুতং ঠানং, যত্থ গন্ত্ৰা ন সোচরেতি॥
Yāyanti 38 accutaṃ ṭhānaṃ, yattha gantvā na socareti.
ভিক্খুনিক্খন্ধকং নিট্ঠিতং।
Bhikkhunikkhandhakaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / ভিক্খুনীউপসম্পদানুজাননকথা • Bhikkhunīupasampadānujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ভিক্খুনীউপসম্পন্নানুজাননকথাৰণ্ণনা • Bhikkhunīupasampannānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ভিক্খুনীউপসম্পদানুজাননকথাৰণ্ণনা • Bhikkhunīupasampadānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ভিক্খুনীউপসম্পদানুজাননকথাৰণ্ণনা • Bhikkhunīupasampadānujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ভিক্খুনীউপসম্পদানুজাননকথা • Bhikkhunīupasampadānujānanakathā
