| Library / Tipiṭaka / д̇ибидага • Tipiṭaka / жуул̣аваг̇г̇абаал̣и • Cūḷavaggapāḷi |
3. д̇ад̇ияабхаан̣авааро
3. Tatiyabhāṇavāro
319. д̇зна ко бана самаязна ааяасмаа убананд̣̇о сагяабуд̇д̇о саавад̇т̇ияам̣ сзнаасанам̣ г̇ахзд̇ваа ан̃н̃ад̇арам̣ г̇аамагааваасам̣ аг̇амааси. д̇ад̇т̇аби сзнаасанам̣ аг̇г̇ахзси. ат̇а ко д̇зсам̣ бхигкуунам̣ зд̇ад̣̇ахоси – ‘‘аяам̣, аавусо, ааяасмаа убананд̣̇о сагяабуд̇д̇о бхан̣д̣анагаараго галахагаараго виваад̣̇агаараго бхассагаараго сан̇гхз ад̇хигаран̣агаараго. сажааяам̣ ид̇ха вассам̣ васиссад̇и, саб̣б̣зва маяам̣ на паасу бхависсаама. ханд̣̇а нам̣ бужчаамаа’’д̇и. ат̇а ко д̇з бхигкуу ааяасманд̇ам̣ убананд̣̇ам̣ сагяабуд̇д̇ам̣ зд̇ад̣̇авожум̣ – ‘‘нану д̇аяаа, аавусо убананд̣̇а, саавад̇т̇ияам̣ сзнаасанам̣ г̇ахид̇а’’нд̇и? ‘‘звамаавусо’’д̇и. ‘‘гим̣ бана д̇вам̣, аавусо убананд̣̇а, зго д̣̇вз бадиб̣аахасий’’д̇и? ‘‘ид̇хад̣̇аанаахам̣ аавусо, мун̃жаами; д̇ад̇т̇а г̇ан̣хаамий’’д̇и. яз д̇з бхигкуу аббижчаа…бз… д̇з уж̇жхааяанд̇и кияяанд̇и вибаажзнд̇и – ‘‘гат̇ан̃хи наама ааяасмаа убананд̣̇о сагяабуд̇д̇о зго д̣̇вз бадиб̣аахзссад̇ий’’д̇и! бхаг̇авад̇о зд̇амад̇т̇ам̣ аарожзсум̣…бз… ‘‘сажжам̣ гира д̇вам̣, убананд̣̇а, зго д̣̇вз бадиб̣аахасий’’д̇и? ‘‘сажжам̣ бхаг̇аваа’’д̇и. виг̇арахи б̣уд̣̇д̇хо бхаг̇аваа…бз… ‘‘гат̇ан̃хи наама д̇вам̣, могхабуриса, зго д̣̇вз бадиб̣аахиссаси? д̇ад̇т̇а д̇аяаа, могхабуриса, г̇ахид̇ам̣ ид̇ха муд̇д̇ам̣, ид̇ха д̇аяаа г̇ахид̇ам̣ д̇ад̇ра муд̇д̇ам̣. звам̣ ко д̇вам̣, могхабуриса, убхаяад̇т̇а бариб̣аахиро. нзд̇ам̣, могхабуриса, аббасаннаанам̣ ваа басаад̣̇ааяа…бз… виг̇арахид̇ваа…бз… д̇хаммим̣ гат̇ам̣ гад̇ваа бхигкуу ааманд̇зси – ‘‘на, бхигкавз, згзна д̣̇вз бадиб̣аахзд̇аб̣б̣аа. яо бадиб̣аахзяяа, аабад̇д̇и д̣̇уггадассаа’’д̇и.
319. Tena kho pana samayena āyasmā upanando sakyaputto sāvatthiyaṃ senāsanaṃ gahetvā aññataraṃ gāmakāvāsaṃ agamāsi. Tatthapi senāsanaṃ aggahesi. Atha kho tesaṃ bhikkhūnaṃ etadahosi – ‘‘ayaṃ, āvuso, āyasmā upanando sakyaputto bhaṇḍanakārako kalahakārako vivādakārako bhassakārako saṅghe adhikaraṇakārako. Sacāyaṃ idha vassaṃ vasissati, sabbeva mayaṃ na phāsu bhavissāma. Handa naṃ pucchāmā’’ti. Atha kho te bhikkhū āyasmantaṃ upanandaṃ sakyaputtaṃ etadavocuṃ – ‘‘nanu tayā, āvuso upananda, sāvatthiyaṃ senāsanaṃ gahita’’nti? ‘‘Evamāvuso’’ti. ‘‘Kiṃ pana tvaṃ, āvuso upananda, eko dve paṭibāhasī’’ti? ‘‘Idhadānāhaṃ āvuso, muñcāmi; tattha gaṇhāmī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā upanando sakyaputto eko dve paṭibāhessatī’’ti! Bhagavato etamatthaṃ ārocesuṃ…pe… ‘‘saccaṃ kira tvaṃ, upananda, eko dve paṭibāhasī’’ti? ‘‘Saccaṃ bhagavā’’ti. Vigarahi buddho bhagavā…pe… ‘‘kathañhi nāma tvaṃ, moghapurisa, eko dve paṭibāhissasi? Tattha tayā, moghapurisa, gahitaṃ idha muttaṃ, idha tayā gahitaṃ tatra muttaṃ. Evaṃ kho tvaṃ, moghapurisa, ubhayattha paribāhiro. Netaṃ, moghapurisa, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘na, bhikkhave, ekena dve paṭibāhetabbā. Yo paṭibāheyya, āpatti dukkaṭassā’’ti.
320. 1 д̇зна ко бана самаязна бхаг̇аваа бхигкуунам̣ анзгабарияааязна винаяагат̇ам̣ гат̇зд̇и, винаяасса ван̣н̣ам̣ бхаасад̇и, винаяабарияад̇д̇ияаа ван̣н̣ам̣ бхаасад̇и, аад̣̇исса аад̣̇исса ааяасмад̇о убаалисса ван̣н̣ам̣ бхаасад̇и. бхигкуунам̣ зд̇ад̣̇ахоси – ‘‘бхаг̇аваа ко анзгабарияааязна винаяагат̇ам̣ гат̇зд̇и, винаяасса ван̣н̣ам̣ бхаасад̇и, винаяабарияад̇д̇ияаа ван̣н̣ам̣ бхаасад̇и, аад̣̇исса аад̣̇исса ааяасмад̇о убаалисса ван̣н̣ам̣ бхаасад̇и. ханд̣̇а маяам̣, аавусо, ааяасмад̇о убаалисса санд̇игз винаяам̣ барияаабун̣аамаа’’д̇и. д̇зд̇ха 2 б̣ахуу бхигкуу т̇зраа жа наваа жа маж̇жхимаа жа ааяасмад̇о убаалисса санд̇игз винаяам̣ барияаабун̣анд̇и. ааяасмаа убаали тид̇агова уд̣̇д̣̇исад̇и т̇зраанам̣ бхигкуунам̣ г̇ааравзна. т̇зрааби бхигкуу тид̇агаава уд̣̇д̣̇исаабзнд̇и д̇хаммаг̇ааравзна. д̇ад̇т̇а т̇зраа жзва бхигкуу гиламанд̇и, ааяасмаа жа убаали гиламад̇и. бхаг̇авад̇о зд̇амад̇т̇ам̣ аарожзсум̣. ‘‘ануж̇аанаами, бхигкавз, навагзна бхигкунаа уд̣̇д̣̇исанд̇зна самагз ваа аасанз нисийд̣̇ид̇ум̣, ужжад̇арз ваа д̇хаммаг̇ааравзна; т̇зрзна бхигкунаа уд̣̇д̣̇исаабзнд̇зна самагз ваа аасанз нисийд̣̇ид̇ум̣, нийжад̇арз ваа д̇хаммаг̇ааравзнаа’’д̇и.
320.3 Tena kho pana samayena bhagavā bhikkhūnaṃ anekapariyāyena vinayakathaṃ katheti, vinayassa vaṇṇaṃ bhāsati, vinayapariyattiyā vaṇṇaṃ bhāsati, ādissa ādissa āyasmato upālissa vaṇṇaṃ bhāsati. Bhikkhūnaṃ etadahosi – ‘‘bhagavā kho anekapariyāyena vinayakathaṃ katheti, vinayassa vaṇṇaṃ bhāsati, vinayapariyattiyā vaṇṇaṃ bhāsati, ādissa ādissa āyasmato upālissa vaṇṇaṃ bhāsati. Handa mayaṃ, āvuso, āyasmato upālissa santike vinayaṃ pariyāpuṇāmā’’ti. Tedha 4 bahū bhikkhū therā ca navā ca majjhimā ca āyasmato upālissa santike vinayaṃ pariyāpuṇanti. Āyasmā upāli ṭhitakova uddisati therānaṃ bhikkhūnaṃ gāravena. Therāpi bhikkhū ṭhitakāva uddisāpenti dhammagāravena. Tattha therā ceva bhikkhū kilamanti, āyasmā ca upāli kilamati. Bhagavato etamatthaṃ ārocesuṃ. ‘‘Anujānāmi, bhikkhave, navakena bhikkhunā uddisantena samake vā āsane nisīdituṃ, uccatare vā dhammagāravena; therena bhikkhunā uddisāpentena samake vā āsane nisīdituṃ, nīcatare vā dhammagāravenā’’ti.
д̇зна ко бана самаязна б̣ахуу бхигкуу ааяасмад̇о убаалисса санд̇игз тид̇агаа уд̣̇д̣̇зсам̣ бадимаанзнд̇аа гиламанд̇и. бхаг̇авад̇о зд̇амад̇т̇ам̣ аарожзсум̣. ‘‘ануж̇аанаами, бхигкавз, самаанаасанигзхи саха нисийд̣̇ид̇у’’нд̇и. ат̇а ко бхигкуунам̣ зд̇ад̣̇ахоси – ‘‘гид̇д̇аавад̇аа ну ко самаанаасаниго ход̇ий’’д̇и? бхаг̇авад̇о зд̇амад̇т̇ам̣ аарожзсум̣ – ‘‘ануж̇аанаами, бхигкавз, д̇ивассанд̇арзна саха нисийд̣̇ид̇у’’нд̇и.
Tena kho pana samayena bahū bhikkhū āyasmato upālissa santike ṭhitakā uddesaṃ paṭimānentā kilamanti. Bhagavato etamatthaṃ ārocesuṃ. ‘‘Anujānāmi, bhikkhave, samānāsanikehi saha nisīditu’’nti. Atha kho bhikkhūnaṃ etadahosi – ‘‘kittāvatā nu kho samānāsaniko hotī’’ti? Bhagavato etamatthaṃ ārocesuṃ – ‘‘anujānāmi, bhikkhave, tivassantarena saha nisīditu’’nti.
д̇зна ко бана самаязна самб̣ахулаа бхигкуу самаанаасанигаа ман̃жз 5 нисийд̣̇ид̇ваа ман̃жам̣ бхинд̣̇им̣су, бийтз 6 нисийд̣̇ид̇ваа бийтам̣ бхинд̣̇им̣су. бхаг̇авад̇о зд̇амад̇т̇ам̣ аарожзсум̣. ‘‘ануж̇аанаами, бхигкавз, д̇иваг̇г̇асса ман̃жам̣, д̇иваг̇г̇асса бийта’’нд̇и. д̇иваг̇г̇оби ман̃жз нисийд̣̇ид̇ваа ман̃жам̣ бхинд̣̇и, бийтз нисийд̣̇ид̇ваа бийтам̣ бхинд̣̇и…бз… ‘‘ануж̇аанаами, бхигкавз, д̣̇уваг̇г̇асса ман̃жам̣, д̣̇уваг̇г̇асса бийта’’нд̇и.
Tena kho pana samayena sambahulā bhikkhū samānāsanikā mañce 7 nisīditvā mañcaṃ bhindiṃsu, pīṭhe 8 nisīditvā pīṭhaṃ bhindiṃsu. Bhagavato etamatthaṃ ārocesuṃ. ‘‘Anujānāmi, bhikkhave, tivaggassa mañcaṃ, tivaggassa pīṭha’’nti. Tivaggopi mañce nisīditvā mañcaṃ bhindi, pīṭhe nisīditvā pīṭhaṃ bhindi…pe… ‘‘anujānāmi, bhikkhave, duvaggassa mañcaṃ, duvaggassa pīṭha’’nti.
д̇зна ко бана самаязна бхигкуу асамаанаасанигзхи саха д̣̇ийгхаасанз нисийд̣̇ид̇ум̣ гуггужжааяанд̇и. бхаг̇авад̇о зд̇амад̇т̇ам̣ аарожзсум̣. ‘‘ануж̇аанаами, бхигкавз, табзд̇ваа бан̣д̣агам̣, маад̇уг̇аамам̣, убхад̇об̣яан̃ж̇анагам̣, асамаанаасанигзхи саха д̣̇ийгхаасанз нисийд̣̇ид̇у’’нд̇и. ат̇а ко бхигкуунам̣ зд̇ад̣̇ахоси – ‘‘гид̇д̇агам̣ бажчимам̣ ну ко д̣̇ийгхаасанам̣ ход̇ий’’д̇и? бхаг̇авад̇о зд̇амад̇т̇ам̣ аарожзсум̣. ‘‘ануж̇аанаами, бхигкавз, яам̣ д̇ин̣н̣ам̣ баход̇и, зд̇д̇агам̣ бажчимам̣ д̣̇ийгхаасана’’нд̇и.
Tena kho pana samayena bhikkhū asamānāsanikehi saha dīghāsane nisīdituṃ kukkuccāyanti. Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā paṇḍakaṃ, mātugāmaṃ, ubhatobyañjanakaṃ, asamānāsanikehi saha dīghāsane nisīditu’’nti. Atha kho bhikkhūnaṃ etadahosi – ‘‘kittakaṃ pacchimaṃ nu kho dīghāsanaṃ hotī’’ti? Bhagavato etamatthaṃ ārocesuṃ. ‘‘Anujānāmi, bhikkhave, yaṃ tiṇṇaṃ pahoti, ettakaṃ pacchimaṃ dīghāsana’’nti.
д̇зна ко бана самаязна висаакаа миг̇аарамаад̇аа сан̇гхасса ад̇т̇ааяа саал̣инд̣̇ам̣ баасаад̣̇ам̣ гаараабзд̇угаамаа ход̇и хад̇т̇инакагам̣. ат̇а ко бхигкуунам̣ зд̇ад̣̇ахоси – ‘‘гим̣ ну ко бхаг̇авад̇аа баасаад̣̇абарибхог̇о анун̃н̃аад̇о гим̣ ананун̃н̃аад̇о’’д̇и? бхаг̇авад̇о зд̇амад̇т̇ам̣ аарожзсум̣. ‘‘ануж̇аанаами, бхигкавз, саб̣б̣ам̣ баасаад̣̇абарибхог̇а’’нд̇и.
Tena kho pana samayena visākhā migāramātā saṅghassa atthāya sāḷindaṃ pāsādaṃ kārāpetukāmā hoti hatthinakhakaṃ. Atha kho bhikkhūnaṃ etadahosi – ‘‘kiṃ nu kho bhagavatā pāsādaparibhogo anuññāto kiṃ ananuññāto’’ti? Bhagavato etamatthaṃ ārocesuṃ. ‘‘Anujānāmi, bhikkhave, sabbaṃ pāsādaparibhoga’’nti.
д̇зна ко бана самаязна ран̃н̃о басзнад̣̇исса госаласса аяяигаа гаалан̇гад̇аа ход̇и. д̇асса гаалан̇гирияааяа сан̇гхасса б̣ахум̣ агаббияабхан̣д̣ам̣ уббаннам̣ ход̇и, сзяяат̇ид̣̇ам̣ – аасанд̣̇и, баллан̇го, г̇онаго , жид̇д̇аго, бадигаа, бадалигаа, д̇уулигаа, вигад̇игаа, уд̣̇д̣̇аломий, зганд̇аломий, гаддиссам̣, госзяяам̣, гуд̇д̇агам̣, хад̇т̇ад̇т̇арам̣, ассад̇т̇арам̣, рат̇ад̇т̇арам̣, аж̇инаббавзн̣и, гад̣̇алимиг̇аббаварабажжад̇т̇аран̣ам̣, сауд̇д̇аражчад̣̇ам̣, убхад̇олохид̇агуубад̇хаанам̣. бхаг̇авад̇о зд̇амад̇т̇ам̣ аарожзсум̣. ‘‘ануж̇аанаами, бхигкавз, аасанд̣̇ияаа баад̣̇з чинд̣̇ид̇ваа барибхун̃ж̇ид̇ум̣, баллан̇гасса ваал̣з бхинд̣̇ид̇ваа барибхун̃ж̇ид̇ум̣, д̇уулигам̣ виж̇адзд̇ваа б̣иб̣б̣оханам̣ гаад̇ум̣, авасзсам̣ бхуумад̇т̇аран̣ам̣ 9 гаад̇у’’нд̇и.
Tena kho pana samayena rañño pasenadissa kosalassa ayyikā kālaṅkatā hoti. Tassa kālaṅkiriyāya saṅghassa bahuṃ akappiyabhaṇḍaṃ uppannaṃ hoti, seyyathidaṃ – āsandi, pallaṅko, gonako , cittako, paṭikā, paṭalikā, tūlikā, vikatikā, uddalomī, ekantalomī, kaṭṭissaṃ, koseyyaṃ, kuttakaṃ, hatthattharaṃ, assattharaṃ, rathattharaṃ, ajinappaveṇi, kadalimigappavarapaccattharaṇaṃ, sauttaracchadaṃ, ubhatolohitakūpadhānaṃ. Bhagavato etamatthaṃ ārocesuṃ. ‘‘Anujānāmi, bhikkhave, āsandiyā pāde chinditvā paribhuñjituṃ, pallaṅkassa vāḷe bhinditvā paribhuñjituṃ, tūlikaṃ vijaṭetvā bibbohanaṃ kātuṃ, avasesaṃ bhūmattharaṇaṃ 10 kātu’’nti.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / жуул̣аваг̇г̇а-адтагат̇аа • Cūḷavagga-aṭṭhakathā / убананд̣̇авад̇т̇угат̇аа • Upanandavatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / убананд̣̇авад̇т̇угат̇ааван̣н̣анаа • Upanandavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / убананд̣̇авад̇т̇угат̇ааван̣н̣анаа • Upanandavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / убананд̣̇авад̇т̇угат̇ааван̣н̣анаа • Upanandavatthukathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / убананд̣̇авад̇т̇угат̇аа • Upanandavatthukathā
