| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗಪಾಳಿ • Cūḷavaggapāḷi |
೩. ತತಿಯಭಾಣವಾರೋ
3. Tatiyabhāṇavāro
೪೨೩. ತೇನ ಖೋ ಪನ ಸಮಯೇನ ಉಪಸಮ್ಪನ್ನಾಯೋ ದಿಸ್ಸನ್ತಿ – ಅನಿಮಿತ್ತಾಪಿ, ನಿಮಿತ್ತಮತ್ತಾಪಿ, ಅಲೋಹಿತಾಪಿ, ಧುವಲೋಹಿತಾಪಿ, ಧುವಚೋಳಾಪಿ, ಪಗ್ಘರನ್ತೀಪಿ, ಸಿಖರಿಣೀಪಿ, ಇತ್ಥಿಪಣ್ಡಕಾಪಿ, ವೇಪುರಿಸಿಕಾಪಿ, ಸಮ್ಭಿನ್ನಾಪಿ, ಉಭತೋಬ್ಯಞ್ಜನಾಪಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಉಪಸಮ್ಪಾದೇನ್ತಿಯಾ ಚತುವೀಸತಿ ಅನ್ತರಾಯಿಕೇ ಧಮ್ಮೇ ಪುಚ್ಛಿತುಂ। ಏವಞ್ಚ ಪನ , ಭಿಕ್ಖವೇ, ಪುಚ್ಛಿತಬ್ಬಾ – ‘ನಸಿ ಅನಿಮಿತ್ತಾ, ನಸಿ ನಿಮಿತ್ತಮತ್ತಾ, ನಸಿ ಅಲೋಹಿತಾ, ನಸಿ ಧುವಲೋಹಿತಾ, ನಸಿ ಧುವಚೋಳಾ, ನಸಿ ಪಗ್ಘರನ್ತೀ, ನಸಿ ಸಿಖರಣೀ 1, ನಸಿ ಇತ್ಥಿಪಣ್ಡಕಾ, ನಸಿ ವೇಪುರಿಸಿಕಾ, ನಸಿ ಸಮ್ಭಿನ್ನಾ, ನಸಿ ಉಭತೋಬ್ಯಞ್ಜನಾ? ಸನ್ತಿ ತೇ ಏವರೂಪಾ ಆಬಾಧಾ – ಕುಟ್ಠಂ, ಗಣ್ಡೋ, ಕಿಲಾಸೋ, ಸೋಸೋ, ಅಪಮಾರೋ? ಮನುಸ್ಸಾಸಿ, ಇತ್ಥೀಸಿ, ಭುಜಿಸ್ಸಾಸಿ, ಅಣಣಾಸಿ, ನಸಿ ರಾಜಭಟೀ? ಅನುಞ್ಞಾತಾಸಿ ಮಾತಾಪಿತೂಹಿ, ಸಾಮಿಕೇನ? ಪರಿಪುಣ್ಣವೀಸತಿವಸ್ಸಾಸಿ, ಪರಿಪುಣ್ಣಂ ತೇ ಪತ್ತಚೀವರಂ, ಕಿನ್ನಾಮಾಸಿ, ಕಾನಾಮಾ ತೇ ಪವತ್ತಿನೀ’’ತಿ?
423. Tena kho pana samayena upasampannāyo dissanti – animittāpi, nimittamattāpi, alohitāpi, dhuvalohitāpi, dhuvacoḷāpi, paggharantīpi, sikhariṇīpi, itthipaṇḍakāpi, vepurisikāpi, sambhinnāpi, ubhatobyañjanāpi. Bhagavato etamatthaṃ ārocesuṃ. ‘‘Anujānāmi, bhikkhave, upasampādentiyā catuvīsati antarāyike dhamme pucchituṃ. Evañca pana , bhikkhave, pucchitabbā – ‘nasi animittā, nasi nimittamattā, nasi alohitā, nasi dhuvalohitā, nasi dhuvacoḷā, nasi paggharantī, nasi sikharaṇī 2, nasi itthipaṇḍakā, nasi vepurisikā, nasi sambhinnā, nasi ubhatobyañjanā? Santi te evarūpā ābādhā – kuṭṭhaṃ, gaṇḍo, kilāso, soso, apamāro? Manussāsi, itthīsi, bhujissāsi, aṇaṇāsi, nasi rājabhaṭī? Anuññātāsi mātāpitūhi, sāmikena? Paripuṇṇavīsativassāsi, paripuṇṇaṃ te pattacīvaraṃ, kinnāmāsi, kānāmā te pavattinī’’ti?
ತೇನ ಖೋ ಪನ ಸಮಯೇನ ಭಿಕ್ಖೂ ಭಿಕ್ಖುನೀನಂ ಅನ್ತರಾಯಿಕೇ ಧಮ್ಮೇ ಪುಚ್ಛನ್ತಿ। ಉಪಸಮ್ಪದಾಪೇಕ್ಖಾಯೋ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ, ನ ಸಕ್ಕೋನ್ತಿ ವಿಸ್ಸಜ್ಜೇತುಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಏಕತೋಉಪಸಮ್ಪನ್ನಾಯ ಭಿಕ್ಖುನಿಸಙ್ಘೇ ವಿಸುದ್ಧಾಯ ಭಿಕ್ಖುಸಙ್ಘೇ ಉಪಸಮ್ಪಾದೇತು’’ನ್ತಿ।
Tena kho pana samayena bhikkhū bhikkhunīnaṃ antarāyike dhamme pucchanti. Upasampadāpekkhāyo vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. ‘‘Anujānāmi, bhikkhave, ekatoupasampannāya bhikkhunisaṅghe visuddhāya bhikkhusaṅghe upasampādetu’’nti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅನನುಸಿಟ್ಠಾ ಉಪಸಮ್ಪದಾಪೇಕ್ಖಾಯೋ ಅನ್ತರಾಯಿಕೇ ಧಮ್ಮೇ ಪುಚ್ಛನ್ತಿ। ಉಪಸಮ್ಪದಾಪೇಕ್ಖಾಯೋ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ, ನ ಸಕ್ಕೋನ್ತಿ ವಿಸ್ಸಜ್ಜೇತುಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಪಠಮಂ ಅನುಸಾಸಿತ್ವಾ ಪಚ್ಛಾ ಅನ್ತರಾಯಿಕೇ ಧಮ್ಮೇ ಪುಚ್ಛಿತು’’ನ್ತಿ।
Tena kho pana samayena bhikkhuniyo ananusiṭṭhā upasampadāpekkhāyo antarāyike dhamme pucchanti. Upasampadāpekkhāyo vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. ‘‘Anujānāmi, bhikkhave, paṭhamaṃ anusāsitvā pacchā antarāyike dhamme pucchitu’’nti.
ತತ್ಥೇವ ಸಙ್ಘಮಜ್ಝೇ ಅನುಸಾಸನ್ತಿ। ಉಪಸಮ್ಪದಾಪೇಕ್ಖಾಯೋ ತಥೇವ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ , ನ ಸಕ್ಕೋನ್ತಿ ವಿಸ್ಸಜ್ಜೇತುಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಏಕಮನ್ತಂ ಅನುಸಾಸಿತ್ವಾ ಸಙ್ಘಮಜ್ಝೇ ಅನ್ತರಾಯಿಕೇ ಧಮ್ಮೇ ಪುಚ್ಛಿತುಂ। ಏವಞ್ಚ ಪನ, ಭಿಕ್ಖವೇ, ಅನುಸಾಸಿತಬ್ಬಾ।
Tattheva saṅghamajjhe anusāsanti. Upasampadāpekkhāyo tatheva vitthāyanti, maṅkū honti , na sakkonti vissajjetuṃ. Bhagavato etamatthaṃ ārocesuṃ. ‘‘Anujānāmi, bhikkhave, ekamantaṃ anusāsitvā saṅghamajjhe antarāyike dhamme pucchituṃ. Evañca pana, bhikkhave, anusāsitabbā.
೪೨೪. ‘‘ಪಠಮಂ ಉಪಜ್ಝಂ ಗಾಹಾಪೇತಬ್ಬಾ। ಉಪಜ್ಝಂ ಗಾಹಾಪೇತ್ವಾ ಪತ್ತಚೀವರಂ ಆಚಿಕ್ಖಿತಬ್ಬಂ – ‘ಅಯಂ ತೇ ಪತ್ತೋ, ಅಯಂ ಸಙ್ಘಾಟಿ, ಅಯಂ ಉತ್ತರಾಸಙ್ಗೋ, ಅಯಂ ಅನ್ತರವಾಸಕೋ, ಇದಂ ಸಂಕಚ್ಚಿಕಂ 3, ಅಯಂ ಉದಕಸಾಟಿಕಾ; ಗಚ್ಛ ಅಮುಮ್ಹಿ ಓಕಾಸೇ ತಿಟ್ಠಾಹೀ’’ತಿ।
424. ‘‘Paṭhamaṃ upajjhaṃ gāhāpetabbā. Upajjhaṃ gāhāpetvā pattacīvaraṃ ācikkhitabbaṃ – ‘ayaṃ te patto, ayaṃ saṅghāṭi, ayaṃ uttarāsaṅgo, ayaṃ antaravāsako, idaṃ saṃkaccikaṃ 4, ayaṃ udakasāṭikā; gaccha amumhi okāse tiṭṭhāhī’’ti.
ಬಾಲಾ ಅಬ್ಯತ್ತಾ ಅನುಸಾಸನ್ತಿ। ದುರನುಸಿಟ್ಠಾ ಉಪಸಮ್ಪದಾಪೇಕ್ಖಾಯೋ ವಿತ್ಥಾಯನ್ತಿ, ಮಙ್ಕೂ ಹೋನ್ತಿ, ನ ಸಕ್ಕೋನ್ತಿ ವಿಸ್ಸಜ್ಜೇತುಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಬಾಲಾಯ ಅಬ್ಯತ್ತಾಯ ಅನುಸಾಸಿತಬ್ಬಾ। ಯಾ ಅನುಸಾಸೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಅನುಸಾಸಿತು’’ನ್ತಿ।
Bālā abyattā anusāsanti. Duranusiṭṭhā upasampadāpekkhāyo vitthāyanti, maṅkū honti, na sakkonti vissajjetuṃ. Bhagavato etamatthaṃ ārocesuṃ. ‘‘Na, bhikkhave, bālāya abyattāya anusāsitabbā. Yā anusāseyya, āpatti dukkaṭassa. Anujānāmi, bhikkhave, byattāya bhikkhuniyā paṭibalāya anusāsitu’’nti.
ಅಸಮ್ಮತಾ ಅನುಸಾಸನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಅಸಮ್ಮತಾಯ ಅನುಸಾಸಿತಬ್ಬಾ। ಯಾ ಅನುಸಾಸೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಸಮ್ಮತಾಯ ಅನುಸಾಸಿತುಂ। ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ – ಅತ್ತನಾ ವಾ ಅತ್ತಾನಂ ಸಮ್ಮನ್ನಿತಬ್ಬಂ, ಪರಾಯ ವಾ ಪರಾ ಸಮ್ಮನ್ನಿತಬ್ಬಾ।
Asammatā anusāsanti. Bhagavato etamatthaṃ ārocesuṃ. ‘‘Na, bhikkhave, asammatāya anusāsitabbā. Yā anusāseyya, āpatti dukkaṭassa. Anujānāmi, bhikkhave, sammatāya anusāsituṃ. Evañca pana, bhikkhave, sammannitabbā – attanā vā attānaṃ sammannitabbaṃ, parāya vā parā sammannitabbā.
‘‘ಕಥಞ್ಚ ಅತ್ತನಾವ 5 ಅತ್ತಾನಂ ಸಮ್ಮನ್ನಿತಬ್ಬಂ? ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ – ‘ಸುಣಾತು ಮೇ, ಅಯ್ಯೇ, ಸಙ್ಘೋ। ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಇತ್ಥನ್ನಾಮಾ ಇತ್ಥನ್ನಾಮಂ ಅನುಸಾಸೇಯ್ಯ’ನ್ತಿ। ಏವಂ ಅತ್ತನಾವ ಅತ್ತಾನಂ ಸಮ್ಮನ್ನಿತಬ್ಬಂ।
‘‘Kathañca attanāva 6 attānaṃ sammannitabbaṃ? Byattāya bhikkhuniyā paṭibalāya saṅgho ñāpetabbo – ‘suṇātu me, ayye, saṅgho. Itthannāmā itthannāmāya ayyāya upasampadāpekkhā. Yadi saṅghassa pattakallaṃ, ahaṃ itthannāmā itthannāmaṃ anusāseyya’nti. Evaṃ attanāva attānaṃ sammannitabbaṃ.
‘‘ಕಥಞ್ಚ ಪರಾಯ 7 ಪರಾ ಸಮ್ಮನ್ನಿತಬ್ಬಾ? ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ – ‘ಸುಣಾತು ಮೇ, ಅಯ್ಯೇ, ಸಙ್ಘೋ। ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಇತ್ಥನ್ನಾಮಾ ಇತ್ಥನ್ನಾಮಂ ಅನುಸಾಸೇಯ್ಯಾ’ತಿ। ಏವಂ ಪರಾಯ ಪರಾ ಸಮ್ಮನ್ನಿತಬ್ಬಾ।
‘‘Kathañca parāya 8 parā sammannitabbā? Byattāya bhikkhuniyā paṭibalāya saṅgho ñāpetabbo – ‘suṇātu me, ayye, saṅgho. Itthannāmā itthannāmāya ayyāya upasampadāpekkhā. Yadi saṅghassa pattakallaṃ, itthannāmā itthannāmaṃ anusāseyyā’ti. Evaṃ parāya parā sammannitabbā.
‘‘ತಾಯ ಸಮ್ಮತಾಯ ಭಿಕ್ಖುನಿಯಾ ಉಪಸಮ್ಪದಾಪೇಕ್ಖಂ ಉಪಸಙ್ಕಮಿತ್ವಾ ಏವಮಸ್ಸ ವಚನೀಯಾ – ‘ಸುಣಸಿ ಇತ್ಥನ್ನಾಮೇ। ಅಯಂ ತೇ ಸಚ್ಚಕಾಲೋ, ಭೂತಕಾಲೋ। ಯಂ ಜಾತಂ ತಂ ಸಙ್ಘಮಜ್ಝೇ ಪುಚ್ಛನ್ತೇ ಸನ್ತಂ ಅತ್ಥೀತಿ ವತ್ತಬ್ಬಂ, ಅಸನ್ತಂ ನತ್ಥೀತಿ ವತ್ತಬ್ಬಂ। ಮಾ ಖೋ ವಿತ್ಥಾಯಿ 9, ಮಾ ಖೋ ಮಙ್ಕು ಅಹೋಸಿ। ಏವಂ ತಂ ಪುಚ್ಛಿಸ್ಸನ್ತಿ – ನಸಿ ಅನಿಮಿತ್ತಾ, ನಸಿ ನಿಮಿತ್ತಮತ್ತಾ, ನಸಿ ಅಲೋಹಿತಾ, ನಸಿ ಧುವಲೋಹಿತಾ, ನಸಿ ಧುವಚೋಳಾ, ನಸಿ ಪಗ್ಘರನ್ತೀ, ನಸಿ ಸಿಖರಿಣೀ, ನಸಿ ಇತ್ಥಿಪಣ್ಡಕಾ, ನಸಿ ವೇಪುರಿಸಿಕಾ, ನಸಿ ಸಮ್ಭಿನ್ನಾ, ನಸಿ ಉಭತೋಬ್ಯಞ್ಜನಾ? ಸನ್ತಿ ತೇ ಏವರೂಪಾ ಆಬಾಧಾ – ಕುಟ್ಠಂ, ಗಣ್ಡೋ, ಕಿಲಾಸೋ, ಸೋಸೋ, ಅಪಮಾರೋ? ಮನುಸ್ಸಾಸಿ, ಇತ್ಥೀಸಿ, ಭುಜಿಸ್ಸಾಸಿ, ಅಣಣಾಸಿ, ನಸಿ ರಾಜಭಟೀ? ಅನುಞ್ಞಾತಾಸಿ ಮಾತಾಪಿತೂಹಿ, ಸಾಮಿಕೇನ? ಪರಿಪುಣ್ಣವೀಸತಿವಸ್ಸಾಸಿ, ಪರಿಪುಣ್ಣಂ ತೇ ಪತ್ತಚೀವರಂ, ಕಿನ್ನಾಮಾಸಿ, ಕಾನಾಮಾ ತೇ ಪವತ್ತಿನೀ’ತಿ ?
‘‘Tāya sammatāya bhikkhuniyā upasampadāpekkhaṃ upasaṅkamitvā evamassa vacanīyā – ‘suṇasi itthannāme. Ayaṃ te saccakālo, bhūtakālo. Yaṃ jātaṃ taṃ saṅghamajjhe pucchante santaṃ atthīti vattabbaṃ, asantaṃ natthīti vattabbaṃ. Mā kho vitthāyi 10, mā kho maṅku ahosi. Evaṃ taṃ pucchissanti – nasi animittā, nasi nimittamattā, nasi alohitā, nasi dhuvalohitā, nasi dhuvacoḷā, nasi paggharantī, nasi sikhariṇī, nasi itthipaṇḍakā, nasi vepurisikā, nasi sambhinnā, nasi ubhatobyañjanā? Santi te evarūpā ābādhā – kuṭṭhaṃ, gaṇḍo, kilāso, soso, apamāro? Manussāsi, itthīsi, bhujissāsi, aṇaṇāsi, nasi rājabhaṭī? Anuññātāsi mātāpitūhi, sāmikena? Paripuṇṇavīsativassāsi, paripuṇṇaṃ te pattacīvaraṃ, kinnāmāsi, kānāmā te pavattinī’ti ?
‘‘ಏಕತೋ ಆಗಚ್ಛನ್ತಿ। ನ ಏಕತೋ ಆಗನ್ತಬ್ಬಂ। ಅನುಸಾಸಿಕಾಯ ಪಠಮತರಂ ಆಗನ್ತ್ವಾ ಸಙ್ಘೋ ಞಾಪೇತಬ್ಬೋ – ‘ಸುಣಾತು ಮೇ, ಅಯ್ಯೇ, ಸಙ್ಘೋ। ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಅನುಸಿಟ್ಠಾ ಸಾ ಮಯಾ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಇತ್ಥನ್ನಾಮಾ ಆಗಚ್ಛೇಯ್ಯಾ’ತಿ। ‘ಆಗಚ್ಛಾಹೀ’ತಿ ವತ್ತಬ್ಬಾ।
‘‘Ekato āgacchanti. Na ekato āgantabbaṃ. Anusāsikāya paṭhamataraṃ āgantvā saṅgho ñāpetabbo – ‘suṇātu me, ayye, saṅgho. Itthannāmā itthannāmāya ayyāya upasampadāpekkhā. Anusiṭṭhā sā mayā. Yadi saṅghassa pattakallaṃ, itthannāmā āgaccheyyā’ti. ‘Āgacchāhī’ti vattabbā.
‘‘ಏಕಂಸಂ ಉತ್ತರಾಸಙ್ಗಂ ಕಾರಾಪೇತ್ವಾ ಭಿಕ್ಖುನೀನಂ ಪಾದೇ ವನ್ದಾಪೇತ್ವಾ ಉಕ್ಕುಟಿಕಂ ನಿಸೀದಾಪೇತ್ವಾ ಅಞ್ಜಲಿಂ ಪಗ್ಗಣ್ಹಾಪೇತ್ವಾ ಉಪಸಮ್ಪದಂ ಯಾಚಾಪೇತಬ್ಬಾ – ‘ಸಙ್ಘಂ, ಅಯ್ಯೇ, ಉಪಸಮ್ಪದಂ ಯಾಚಾಮಿ। ಉಲ್ಲುಮ್ಪತು ಮಂ, ಅಯ್ಯೇ, ಸಙ್ಘೋ ಅನುಕಮ್ಪಂ ಉಪಾದಾಯ। ದುತಿಯಮ್ಪಿ, ಅಯ್ಯೇ, ಸಙ್ಘಂ ಉಪಸಮ್ಪದಂ ಯಾಚಾಮಿ। ಉಲ್ಲುಮ್ಪತು ಮಂ, ಅಯ್ಯೇ, ಸಙ್ಘೋ ಅನುಕಮ್ಪಂ ಉಪಾದಾಯ। ತತಿಯಮ್ಪಿ, ಅಯ್ಯೇ, ಸಙ್ಘಂ ಉಪಸಮ್ಪದಂ ಯಾಚಾಮಿ। ಉಲ್ಲುಮ್ಪತು ಮಂ, ಅಯ್ಯೇ, ಸಙ್ಘೋ ಅನುಕಮ್ಪಂ ಉಪಾದಾಯಾ’ತಿ। ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
‘‘Ekaṃsaṃ uttarāsaṅgaṃ kārāpetvā bhikkhunīnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā upasampadaṃ yācāpetabbā – ‘saṅghaṃ, ayye, upasampadaṃ yācāmi. Ullumpatu maṃ, ayye, saṅgho anukampaṃ upādāya. Dutiyampi, ayye, saṅghaṃ upasampadaṃ yācāmi. Ullumpatu maṃ, ayye, saṅgho anukampaṃ upādāya. Tatiyampi, ayye, saṅghaṃ upasampadaṃ yācāmi. Ullumpatu maṃ, ayye, saṅgho anukampaṃ upādāyā’ti. Byattāya bhikkhuniyā paṭibalāya saṅgho ñāpetabbo –
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಇತ್ಥನ್ನಾಮಂ ಅನ್ತರಾಯಿಕೇ ಧಮ್ಮೇ ಪುಚ್ಛೇಯ್ಯನ್ತಿ।
‘‘Suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā. Yadi saṅghassa pattakallaṃ, ahaṃ itthannāmaṃ antarāyike dhamme puccheyyanti.
‘‘ಸುಣಸಿ ಇತ್ಥನ್ನಾಮೇ। ಅಯಂ ತೇ ಸಚ್ಚಕಾಲೋ, ಭೂತಕಾಲೋ। ಯಂ ಜಾತಂ ತಂ ಪುಚ್ಛಾಮಿ ಸನ್ತಂ ಅತ್ಥೀತಿ ವತ್ತಬ್ಬಂ, ಅಸನ್ತಂ ನತ್ಥೀತಿ ವತ್ತಬ್ಬಂ। ನಸಿ ಅನಿಮಿತ್ತಾ…ಪೇ॰… ಕಿನ್ನಾಮಾಸಿ, ಕಾನಾಮಾ ತೇ ಪವತ್ತಿನೀತಿ। ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
‘‘Suṇasi itthannāme. Ayaṃ te saccakālo, bhūtakālo. Yaṃ jātaṃ taṃ pucchāmi santaṃ atthīti vattabbaṃ, asantaṃ natthīti vattabbaṃ. Nasi animittā…pe… kinnāmāsi, kānāmā te pavattinīti. Byattāya bhikkhuniyā paṭibalāya saṅgho ñāpetabbo –
೪೨೫. ‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಪರಿಸುದ್ಧಾ ಅನ್ತರಾಯಿಕೇಹಿ ಧಮ್ಮೇಹಿ, ಪರಿಪುಣ್ಣಸ್ಸಾ ಪತ್ತಚೀವರಂ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇಯ್ಯ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ। ಏಸಾ ಞತ್ತಿ।
425. ‘‘Suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā. Parisuddhā antarāyikehi dhammehi, paripuṇṇassā pattacīvaraṃ. Itthannāmā saṅghaṃ upasampadaṃ yācati itthannāmāya ayyāya pavattiniyā. Yadi saṅghassa pattakallaṃ, saṅgho itthannāmaṃ upasampādeyya itthannāmāya ayyāya pavattiniyā. Esā ñatti.
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ । ಪರಿಸುದ್ಧಾ ಅನ್ತರಾಯಿಕೇಹಿ ಧಮ್ಮೇಹಿ, ಪರಿಪುಣ್ಣಸ್ಸಾ ಪತ್ತಚೀವರಂ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ। ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ। ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ।
‘‘Suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā . Parisuddhā antarāyikehi dhammehi, paripuṇṇassā pattacīvaraṃ. Itthannāmā saṅghaṃ upasampadaṃ yācati itthannāmāya ayyāya pavattiniyā. Saṅgho itthannāmaṃ upasampādeti itthannāmāya ayyāya pavattiniyā. Yassā ayyāya khamati itthannāmāya upasampadā itthannāmāya ayyāya pavattiniyā, sā tuṇhassa; yassā nakkhamati, sā bhāseyya.
‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ॰… ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಅಯ್ಯೇ, ಸಙ್ಘೋ। ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಪರಿಸುದ್ಧಾ ಅನ್ತರಾಯಿಕೇಹಿ ಧಮ್ಮೇಹಿ, ಪರಿಪುಣ್ಣಸ್ಸಾ ಪತ್ತಚೀವರಂ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ। ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ। ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ।
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, ayye, saṅgho. Ayaṃ itthannāmā itthannāmāya ayyāya upasampadāpekkhā. Parisuddhā antarāyikehi dhammehi, paripuṇṇassā pattacīvaraṃ. Itthannāmā saṅghaṃ upasampadaṃ yācati itthannāmāya ayyāya pavattiniyā. Saṅgho itthannāmaṃ upasampādeti itthannāmāya ayyāya pavattiniyā. Yassā ayyāya khamati itthannāmāya upasampadā itthannāmāya ayyāya pavattiniyā, sā tuṇhassa; yassā nakkhamati, sā bhāseyya.
‘‘ಉಪಸಮ್ಪನ್ನಾ ಸಙ್ಘೇನ ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಪವತ್ತಿನಿಯಾ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।
‘‘Upasampannā saṅghena itthannāmā itthannāmāya ayyāya pavattiniyā. Khamati saṅghassa, tasmā tuṇhī, evametaṃ dhārayāmīti.
‘‘ತಾವದೇವ ತಂ ಆದಾಯ ಭಿಕ್ಖುಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕಾರಾಪೇತ್ವಾ ಭಿಕ್ಖೂನಂ ಪಾದೇ ವನ್ದಾಪೇತ್ವಾ ಉಕ್ಕುಟಿಕಂ ನಿಸೀದಾಪೇತ್ವಾ ಅಞ್ಜಲಿಂ ಪಗ್ಗಣ್ಹಾಪೇತ್ವಾ ಉಪಸಮ್ಪದಂ ಯಾಚಾಪೇತಬ್ಬಾ – ‘ಅಹಂ, ಅಯ್ಯಾ, ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ । ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ; ಸಙ್ಘಂ, ಅಯ್ಯಾ, ಉಪಸಮ್ಪದಂ ಯಾಚಾಮಿ। ಉಲ್ಲುಮ್ಪತು ಮಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ। ಅಹಂ, ಅಯ್ಯಾ, ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ದುತಿಯಮ್ಪಿ, ಅಯ್ಯಾ, ಸಙ್ಘಂ ಉಪಸಮ್ಪದಂ ಯಾಚಾಮಿ। ಉಲ್ಲುಮ್ಪತು ಮಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ। ಅಹಂ, ಅಯ್ಯಾ, ಇತ್ಥನ್ನಾಮಾ ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ತತಿಯಮ್ಪಿ, ಅಯ್ಯಾ, ಸಙ್ಘಂ ಉಪಸಮ್ಪದಂ ಯಾಚಾಮಿ। ಉಲ್ಲುಮ್ಪತು ಮಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯಾ’ತಿ। ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –
‘‘Tāvadeva taṃ ādāya bhikkhusaṅghaṃ upasaṅkamitvā ekaṃsaṃ uttarāsaṅgaṃ kārāpetvā bhikkhūnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā upasampadaṃ yācāpetabbā – ‘ahaṃ, ayyā, itthannāmā itthannāmāya ayyāya upasampadāpekkhā . Ekatoupasampannā bhikkhunisaṅghe, visuddhā; saṅghaṃ, ayyā, upasampadaṃ yācāmi. Ullumpatu maṃ, ayyā, saṅgho anukampaṃ upādāya. Ahaṃ, ayyā, itthannāmā itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Dutiyampi, ayyā, saṅghaṃ upasampadaṃ yācāmi. Ullumpatu maṃ, ayyā, saṅgho anukampaṃ upādāya. Ahaṃ, ayyā, itthannāmā itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Tatiyampi, ayyā, saṅghaṃ upasampadaṃ yācāmi. Ullumpatu maṃ, ayyā, saṅgho anukampaṃ upādāyā’ti. Byattena bhikkhunā paṭibalena saṅgho ñāpetabbo –
‘‘ಸುಣಾತು ಮೇ, ಭನ್ತೇ, ಸಙ್ಘೋ। ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇಯ್ಯ, ಇತ್ಥನ್ನಾಮಾಯ ಪವತ್ತಿನಿಯಾ। ಏಸಾ ಞತ್ತಿ।
‘‘Suṇātu me, bhante, saṅgho. Ayaṃ itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Itthannāmā saṅghaṃ upasampadaṃ yācati itthannāmāya pavattiniyā. Yadi saṅghassa pattakallaṃ, saṅgho itthannāmaṃ upasampādeyya, itthannāmāya pavattiniyā. Esā ñatti.
‘‘ಸುಣಾತು ಮೇ, ಭನ್ತೇ, ಸಙ್ಘೋ। ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ। ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ। ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ।
‘‘Suṇātu me, bhante, saṅgho. Ayaṃ itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ॰… ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಭನ್ತೇ, ಸಙ್ಘೋ। ಅಯಂ ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ। ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ। ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ।
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘ಉಪಸಮ್ಪನ್ನಾ ಸಙ್ಘೇನ ಇತ್ಥನ್ನಾಮಾ ಇತ್ಥನ್ನಾಮಾಯ ಪವತ್ತಿನಿಯಾ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।
‘‘Upasampannā saṅghena itthannāmā itthannāmāya pavattiniyā. Khamati saṅghassa, tasmā tuṇhī, evametaṃ dhārayāmīti.
‘‘ತಾವದೇವ ಛಾಯಾ ಮೇತಬ್ಬಾ, ಉತುಪ್ಪಮಾಣಂ ಆಚಿಕ್ಖಿತಬ್ಬಂ, ದಿವಸಭಾಗೋ ಆಚಿಕ್ಖಿತಬ್ಬೋ, ಸಙ್ಗೀತಿ ಆಚಿಕ್ಖಿತಬ್ಬಾ, ಭಿಕ್ಖುನಿಯೋ ವತ್ತಬ್ಬಾ – ಇಮಿಸ್ಸಾ ತಯೋ ಚ ನಿಸ್ಸಯೇ, ಅಟ್ಠ ಚ ಅಕರಣೀಯಾನಿ ಆಚಿಕ್ಖೇಯ್ಯಾಥಾ’’ತಿ।
‘‘Tāvadeva chāyā metabbā, utuppamāṇaṃ ācikkhitabbaṃ, divasabhāgo ācikkhitabbo, saṅgīti ācikkhitabbā, bhikkhuniyo vattabbā – imissā tayo ca nissaye, aṭṭha ca akaraṇīyāni ācikkheyyāthā’’ti.
೪೨೬. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭತ್ತಗ್ಗೇ ಆಸನಂ ಸಂಕಸಾಯನ್ತಿಯೋ ಕಾಲಂ ವೀತಿನಾಮೇಸುಂ। ಭಗವತೋ ಏತಮತ್ಥಂ ಆರೋಚೇಸುಂ । ‘‘ಅನುಜಾನಾಮಿ, ಭಿಕ್ಖವೇ, ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢಂ, ಅವಸೇಸಾನಂ ಯಥಾಗತಿಕ’’ನ್ತಿ।
426. Tena kho pana samayena bhikkhuniyo bhattagge āsanaṃ saṃkasāyantiyo kālaṃ vītināmesuṃ. Bhagavato etamatthaṃ ārocesuṃ . ‘‘Anujānāmi, bhikkhave, aṭṭhannaṃ bhikkhunīnaṃ yathāvuḍḍhaṃ, avasesānaṃ yathāgatika’’nti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ – ಭಗವತಾ ಅನುಞ್ಞಾತಂ ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢಂ, ಅವಸೇಸಾನಂ ಯಥಾಗತಿಕನ್ತಿ – ಸಬ್ಬತ್ಥ ಅಟ್ಠೇವ ಭಿಕ್ಖುನಿಯೋ ಯಥಾವುಡ್ಢಂ ಪಟಿಬಾಹನ್ತಿ, ಅವಸೇಸಾಯೋ ಯಥಾಗತಿಕಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಭತ್ತಗ್ಗೇ ಅಟ್ಠನ್ನಂ ಭಿಕ್ಖುನೀನಂ ಯಥಾವುಡ್ಢಂ, ಅವಸೇಸಾನಂ ಯಥಾಗತಿಕಂ; ಅಞ್ಞತ್ಥ ಸಬ್ಬತ್ಥ ಯಥಾವುಡ್ಢಂ 11 ನ ಪಟಿಬಾಹಿತಬ್ಬಂ। ಯಾ ಪಟಿಬಾಹೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena bhikkhuniyo – bhagavatā anuññātaṃ aṭṭhannaṃ bhikkhunīnaṃ yathāvuḍḍhaṃ, avasesānaṃ yathāgatikanti – sabbattha aṭṭheva bhikkhuniyo yathāvuḍḍhaṃ paṭibāhanti, avasesāyo yathāgatikaṃ. Bhagavato etamatthaṃ ārocesuṃ. ‘‘Anujānāmi, bhikkhave, bhattagge aṭṭhannaṃ bhikkhunīnaṃ yathāvuḍḍhaṃ, avasesānaṃ yathāgatikaṃ; aññattha sabbattha yathāvuḍḍhaṃ 12 na paṭibāhitabbaṃ. Yā paṭibāheyya, āpatti dukkaṭassā’’ti.
೪೨೭. 13 ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ನ ಪವಾರೇನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ನ ಪವಾರೇತಬ್ಬಂ। ಯಾ ನ ಪವಾರೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ।
427.14 Tena kho pana samayena bhikkhuniyo na pavārenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā na pavāretabbaṃ. Yā na pavāreyya, yathādhammo kāretabbo’’ti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅತ್ತನಾ ಪವಾರೇತ್ವಾ ಭಿಕ್ಖುಸಙ್ಘಂ ನ ಪವಾರೇನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅತ್ತನಾ ಪವಾರೇತ್ವಾ ಭಿಕ್ಖುಸಙ್ಘೋ ನ ಪವಾರೇತಬ್ಬೋ। ಯಾ ನ ಪವಾರೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ।
Tena kho pana samayena bhikkhuniyo attanā pavāretvā bhikkhusaṅghaṃ na pavārenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā attanā pavāretvā bhikkhusaṅgho na pavāretabbo. Yā na pavāreyya, yathādhammo kāretabbo’’ti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭಿಕ್ಖೂಹಿ ಸದ್ಧಿಂ ಏಕತೋ ಪವಾರೇನ್ತಿಯೋ ಕೋಲಾಹಲಂ ಅಕಂಸು। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖೂಹಿ ಸದ್ಧಿಂ ಏಕತೋ ಪವಾರೇತಬ್ಬಂ। ಯಾ ಪವಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena bhikkhuniyo bhikkhūhi saddhiṃ ekato pavārentiyo kolāhalaṃ akaṃsu. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhūhi saddhiṃ ekato pavāretabbaṃ. Yā pavāreyya, āpatti dukkaṭassā’’ti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪುರೇಭತ್ತಂ ಪವಾರೇನ್ತಿಯೋ ಕಾಲಂ ವೀತಿನಾಮೇಸುಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಪಚ್ಛಾಭತ್ತಂ 15 ಪವಾರೇತು’’ನ್ತಿ। ಪಚ್ಛಾಭತ್ತಂ ಪವಾರೇನ್ತಿಯೋ ವಿಕಾಲೇ 16 ಅಹೇಸುಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಅಜ್ಜತನಾ ಭಿಕ್ಖುನಿಸಙ್ಘಂ 17 ಪವಾರೇತ್ವಾ ಅಪರಜ್ಜು ಭಿಕ್ಖುಸಙ್ಘಂ ಪವಾರೇತು’’ನ್ತಿ।
Tena kho pana samayena bhikkhuniyo purebhattaṃ pavārentiyo kālaṃ vītināmesuṃ. Bhagavato etamatthaṃ ārocesuṃ. ‘‘Anujānāmi, bhikkhave, pacchābhattaṃ 18 pavāretu’’nti. Pacchābhattaṃ pavārentiyo vikāle 19 ahesuṃ. Bhagavato etamatthaṃ ārocesuṃ. ‘‘Anujānāmi, bhikkhave, ajjatanā bhikkhunisaṅghaṃ 20 pavāretvā aparajju bhikkhusaṅghaṃ pavāretu’’nti.
ತೇನ ಖೋ ಪನ ಸಮಯೇನ ಸಬ್ಬೋ ಭಿಕ್ಖುನಿಸಙ್ಘೋ ಪವಾರೇನ್ತೋ ಕೋಲಾಹಲಂ ಅಕಾಸಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಏಕಂ ಭಿಕ್ಖುನಿಂ ಬ್ಯತ್ತಂ ಪಟಿಬಲಂ ಸಮ್ಮನ್ನಿತುಂ – ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ। ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ। ಪಠಮಂ ಭಿಕ್ಖುನೀ ಯಾಚಿತಬ್ಬಾ, ಯಾಚಿತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
Tena kho pana samayena sabbo bhikkhunisaṅgho pavārento kolāhalaṃ akāsi. Bhagavato etamatthaṃ ārocesuṃ. ‘‘Anujānāmi, bhikkhave, ekaṃ bhikkhuniṃ byattaṃ paṭibalaṃ sammannituṃ – bhikkhunisaṅghassa atthāya bhikkhusaṅghaṃ pavāretuṃ. Evañca pana, bhikkhave, sammannitabbā. Paṭhamaṃ bhikkhunī yācitabbā, yācitvā byattāya bhikkhuniyā paṭibalāya saṅgho ñāpetabbo –
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನೇಯ್ಯ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ। ಏಸಾ ಞತ್ತಿ।
‘‘Suṇātu me, ayye, saṅgho. Yadi saṅghassa pattakallaṃ, saṅgho itthannāmaṃ bhikkhuniṃ sammanneyya bhikkhunisaṅghassa atthāya bhikkhusaṅghaṃ pavāretuṃ. Esā ñatti.
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನತಿ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ। ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮ್ಮುತಿ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ।
‘‘Suṇātu me, ayye, saṅgho. Saṅgho itthannāmaṃ bhikkhuniṃ sammannati bhikkhunisaṅghassa atthāya bhikkhusaṅghaṃ pavāretuṃ. Yassā ayyāya khamati itthannāmāya bhikkhuniyā sammuti bhikkhunisaṅghassa atthāya bhikkhusaṅghaṃ pavāretuṃ, sā tuṇhassa; yassā nakkhamati, sā bhāseyya.
‘‘ಸಮ್ಮತಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ಭಿಕ್ಖುನಿಸಙ್ಘಸ್ಸ ಅತ್ಥಾಯ ಭಿಕ್ಖುಸಙ್ಘಂ ಪವಾರೇತುಂ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।
‘‘Sammatā saṅghena itthannāmā bhikkhunī bhikkhunisaṅghassa atthāya bhikkhusaṅghaṃ pavāretuṃ. Khamati saṅghassa, tasmā tuṇhī, evametaṃ dhārayāmīti.
‘‘ತಾಯ ಸಮ್ಮತಾಯ ಭಿಕ್ಖುನಿಯಾ ಭಿಕ್ಖುನಿಸಙ್ಘಂ ಆದಾಯ ಭಿಕ್ಖುಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಭಿಕ್ಖುನೀಸಙ್ಘೋ , ಅಯ್ಯಾ, ಭಿಕ್ಖುಸಙ್ಘಂ ಪವಾರೇತಿ – ದಿಟ್ಠೇನ ವಾ, ಸುತೇನ ವಾ ಪರಿಸಙ್ಕಾಯ ವಾ। ವದತು 21, ಅಯ್ಯಾ, ಭಿಕ್ಖುಸಙ್ಘೋ ಭಿಕ್ಖುನಿಸಙ್ಘಂ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸತಿ। ದುತಿಯಮ್ಪಿ, ಅಯ್ಯಾ…ಪೇ॰… ತತಿಯಮ್ಪಿ, ಅಯ್ಯಾ, ಭಿಕ್ಖುನಿಸಙ್ಘೋ ಭಿಕ್ಖುಸಙ್ಘಂ ಪವಾರೇತಿ – ದಿಟ್ಠೇನ ವಾ, ಸುತೇನ ವಾ, ಪರಿಸಙ್ಕಾಯ ವಾ। ವದತು, ಅಯ್ಯಾ, ಭಿಕ್ಖುಸಙ್ಘೋ ಭಿಕ್ಖುನಿಸಙ್ಘಂ ಅನುಕಮ್ಪಂ ಉಪಾದಾಯ, ಪಸ್ಸನ್ತೋ ಪಟಿಕರಿಸ್ಸತೀ’’ತಿ।
‘‘Tāya sammatāya bhikkhuniyā bhikkhunisaṅghaṃ ādāya bhikkhusaṅghaṃ upasaṅkamitvā ekaṃsaṃ uttarāsaṅgaṃ karitvā bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘bhikkhunīsaṅgho , ayyā, bhikkhusaṅghaṃ pavāreti – diṭṭhena vā, sutena vā parisaṅkāya vā. Vadatu 22, ayyā, bhikkhusaṅgho bhikkhunisaṅghaṃ anukampaṃ upādāya, passanto paṭikarissati. Dutiyampi, ayyā…pe… tatiyampi, ayyā, bhikkhunisaṅgho bhikkhusaṅghaṃ pavāreti – diṭṭhena vā, sutena vā, parisaṅkāya vā. Vadatu, ayyā, bhikkhusaṅgho bhikkhunisaṅghaṃ anukampaṃ upādāya, passanto paṭikarissatī’’ti.
೪೨೮. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಭಿಕ್ಖೂನಂ ಉಪೋಸಥಂ ಠಪೇನ್ತಿ, ಪವಾರಣಂ ಠಪೇನ್ತಿ, ಸವಚನೀಯಂ ಕರೋನ್ತಿ, ಅನುವಾದಂ ಪಟ್ಠಪೇನ್ತಿ, ಓಕಾಸಂ ಕಾರೇನ್ತಿ, ಚೋದೇನ್ತಿ, ಸಾರೇನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಭಿಕ್ಖುಸ್ಸ ಉಪೋಸಥೋ ಠಪೇತಬ್ಬೋ; ಠಪಿತೋಪಿ ಅಟ್ಠಪಿತೋ; ಠಪೇನ್ತಿಯಾ ಆಪತ್ತಿ ದುಕ್ಕಟಸ್ಸ। ನ ಪವಾರಣಾ ಠಪೇತಬ್ಬಾ; ಠಪಿತಾಪಿ ಅಟ್ಠಪಿತಾ; ಠಪೇನ್ತಿಯಾ ಆಪತ್ತಿ ದುಕ್ಕಟಸ್ಸ। ನ ಸವಚನೀಯಂ ಕಾತಬ್ಬಂ; ಕತಮ್ಪಿ ಅಕತಂ; ಕರೋನ್ತಿಯಾ ಆಪತ್ತಿ ದುಕ್ಕಟಸ್ಸ। ನ ಅನುವಾದೋ ಪಟ್ಠಪೇತಬ್ಬೋ; ಪಟ್ಠಪಿತೋಪಿ ಅಪ್ಪಟ್ಠಪಿತೋ; ಪಟ್ಠಪೇನ್ತಿಯಾ ಆಪತ್ತಿ ದುಕ್ಕಟಸ್ಸ। ನ ಓಕಾಸೋ ಕಾರೇತಬ್ಬೋ ; ಕಾರಿತೋಪಿ ಅಕಾರಿತೋ; ಕಾರೇನ್ತಿಯಾ ಆಪತ್ತಿ ದುಕ್ಕಟಸ್ಸ। ನ ಚೋದೇತಬ್ಬೋ; ಚೋದಿತೋಪಿ ಅಚೋದಿತೋ; ಚೋದೇನ್ತಿಯಾ ಆಪತ್ತಿ ದುಕ್ಕಟಸ್ಸ । ನ ಸಾರೇತಬ್ಬೋ; ಸಾರಿತೋಪಿ ಅಸಾರಿತೋ; ಸಾರೇನ್ತಿಯಾ ಆಪತ್ತಿ ದುಕ್ಕಟಸ್ಸಾ’’ತಿ।
428. Tena kho pana samayena bhikkhuniyo bhikkhūnaṃ uposathaṃ ṭhapenti, pavāraṇaṃ ṭhapenti, savacanīyaṃ karonti, anuvādaṃ paṭṭhapenti, okāsaṃ kārenti, codenti, sārenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā bhikkhussa uposatho ṭhapetabbo; ṭhapitopi aṭṭhapito; ṭhapentiyā āpatti dukkaṭassa. Na pavāraṇā ṭhapetabbā; ṭhapitāpi aṭṭhapitā; ṭhapentiyā āpatti dukkaṭassa. Na savacanīyaṃ kātabbaṃ; katampi akataṃ; karontiyā āpatti dukkaṭassa. Na anuvādo paṭṭhapetabbo; paṭṭhapitopi appaṭṭhapito; paṭṭhapentiyā āpatti dukkaṭassa. Na okāso kāretabbo ; kāritopi akārito; kārentiyā āpatti dukkaṭassa. Na codetabbo; coditopi acodito; codentiyā āpatti dukkaṭassa . Na sāretabbo; sāritopi asārito; sārentiyā āpatti dukkaṭassā’’ti.
ತೇನ ಖೋ ಪನ ಸಮಯೇನ ಭಿಕ್ಖೂ ಭಿಕ್ಖುನೀನಂ ಉಪೋಸಥಂ ಠಪೇನ್ತಿ, ಪವಾರಣಂ ಠಪೇನ್ತಿ, ಸವಚನೀಯಂ ಕರೋನ್ತಿ, ಅನುವಾದಂ ಪಟ್ಠಪೇನ್ತಿ, ಓಕಾಸಂ ಕಾರೇನ್ತಿ, ಚೋದೇನ್ತಿ, ಸಾರೇನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ ಭಿಕ್ಖುನಾ ಭಿಕ್ಖುನಿಯಾ ಉಪೋಸಥಂ ಠಪೇತುಂ; ಠಪಿತೋಪಿ ಸುಟ್ಠಪಿತೋ; ಠಪೇನ್ತಸ್ಸ ಅನಾಪತ್ತಿ। ಪವಾರಣಂ ಠಪೇತುಂ; ಠಪಿತಾಪಿ ಸುಟ್ಠಪಿತಾ; ಠಪೇನ್ತಸ್ಸ ಅನಾಪತ್ತಿ। ಸವಚನೀಯಂ ಕಾತುಂ; ಕತಮ್ಪಿ ಸುಕತಂ; ಕರೋನ್ತಸ್ಸ ಅನಾಪತ್ತಿ। ಅನುವಾದಂ ಪಟ್ಠಪೇತುಂ; ಪಟ್ಠಪಿತೋಪಿ ಸುಪ್ಪಟ್ಠಪಿತೋ; ಪಟ್ಠಪೇನ್ತಸ್ಸ ಅನಾಪತ್ತಿ। ಓಕಾಸಂ ಕಾರೇತುಂ; ಕಾರಿತೋಪಿ ಸುಕಾರಿತೋ; ಕಾರೇನ್ತಸ್ಸ ಅನಾಪತ್ತಿ। ಚೋದೇತುಂ; ಚೋದಿತಾಪಿ ಸುಚೋದಿತಾ; ಚೋದೇನ್ತಸ್ಸ ಅನಾಪತ್ತಿ। ಸಾರೇತುಂ; ಸಾರಿತಾಪಿ ಸುಸಾರಿತಾ; ಸಾರೇನ್ತಸ್ಸ ಅನಾಪತ್ತೀ’’ತಿ।
Tena kho pana samayena bhikkhū bhikkhunīnaṃ uposathaṃ ṭhapenti, pavāraṇaṃ ṭhapenti, savacanīyaṃ karonti, anuvādaṃ paṭṭhapenti, okāsaṃ kārenti, codenti, sārenti. Bhagavato etamatthaṃ ārocesuṃ. ‘‘Anujānāmi, bhikkhave bhikkhunā bhikkhuniyā uposathaṃ ṭhapetuṃ; ṭhapitopi suṭṭhapito; ṭhapentassa anāpatti. Pavāraṇaṃ ṭhapetuṃ; ṭhapitāpi suṭṭhapitā; ṭhapentassa anāpatti. Savacanīyaṃ kātuṃ; katampi sukataṃ; karontassa anāpatti. Anuvādaṃ paṭṭhapetuṃ; paṭṭhapitopi suppaṭṭhapito; paṭṭhapentassa anāpatti. Okāsaṃ kāretuṃ; kāritopi sukārito; kārentassa anāpatti. Codetuṃ; coditāpi sucoditā; codentassa anāpatti. Sāretuṃ; sāritāpi susāritā; sārentassa anāpattī’’ti.
೪೨೯. 23 ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖುನಿಯೋ ಯಾನೇನ ಯಾಯನ್ತಿ – ಇತ್ಥಿಯುತ್ತೇನಪಿ ಪುರಿಸನ್ತರೇನ, ಪುರಿಸಯುತ್ತೇನಪಿ ಇತ್ಥನ್ತರೇನ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ॰… ‘‘ಸೇಯ್ಯಥಾಪಿ ಗಙ್ಗಾಮಹಿಯಾಯಾ’’ತಿ 24। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಯಾನೇನ ಯಾಯಿತಬ್ಬಂ। ಯಾ ಯಾಯೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ।
429.25 Tena kho pana samayena chabbaggiyā bhikkhuniyo yānena yāyanti – itthiyuttenapi purisantarena, purisayuttenapi itthantarena. Manussā ujjhāyanti khiyyanti vipācenti…pe… ‘‘seyyathāpi gaṅgāmahiyāyā’’ti 26. Bhagavato etamatthaṃ ārocesuṃ. ‘‘Na, bhikkhave, bhikkhuniyā yānena yāyitabbaṃ. Yā yāyeyya, yathādhammo kāretabbo’’ti.
ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗಿಲಾನಾ ಹೋತಿ, ನ ಸಕ್ಕೋತಿ ಪದಸಾ ಗನ್ತುಂ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ , ಭಿಕ್ಖವೇ, ಗಿಲಾನಾಯ ಯಾನ’’ನ್ತಿ। ಅಥ ಖೋ ಭಿಕ್ಖುನೀನಂ ಏತದಹೋಸಿ – ‘‘ಇತ್ಥಿಯುತ್ತಂ ನು ಖೋ, ಪುರಿಸಯುತ್ತಂ ನು ಖೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಇತ್ಥಿಯುತ್ತಂ ಪುರಿಸಯುತ್ತಂ ಹತ್ಥವಟ್ಟಕ’’ನ್ತಿ।
Tena kho pana samayena aññatarā bhikkhunī gilānā hoti, na sakkoti padasā gantuṃ. Bhagavato etamatthaṃ ārocesuṃ. ‘‘Anujānāmi , bhikkhave, gilānāya yāna’’nti. Atha kho bhikkhunīnaṃ etadahosi – ‘‘itthiyuttaṃ nu kho, purisayuttaṃ nu kho’’ti? Bhagavato etamatthaṃ ārocesuṃ. ‘‘Anujānāmi, bhikkhave, itthiyuttaṃ purisayuttaṃ hatthavaṭṭaka’’nti.
ತೇನ ಖೋ ಪನ ಸಮಯೇನ ಅಞ್ಞತರಿಸ್ಸಾ ಭಿಕ್ಖುನಿಯಾ ಯಾನುಗ್ಘಾತೇನ ಬಾಳ್ಹತರಂ ಅಫಾಸು ಅಹೋಸಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಸಿವಿಕಂ ಪಾಟಙ್ಕಿ’’ನ್ತಿ।
Tena kho pana samayena aññatarissā bhikkhuniyā yānugghātena bāḷhataraṃ aphāsu ahosi. Bhagavato etamatthaṃ ārocesuṃ. ‘‘Anujānāmi, bhikkhave, sivikaṃ pāṭaṅki’’nti.
೪೩೦. ತೇನ ಖೋ ಪನ ಸಮಯೇನ ಅಡ್ಢಕಾಸೀ ಗಣಿಕಾ ಭಿಕ್ಖುನೀಸು ಪಬ್ಬಜಿತಾ ಹೋತಿ। ಸಾ ಚ ಸಾವತ್ಥಿಂ ಗನ್ತುಕಾಮಾ ಹೋತಿ – ‘ಭಗವತೋ ಸನ್ತಿಕೇ ಉಪಸಮ್ಪಜ್ಜಿಸ್ಸಾಮೀ’ತಿ। ಅಸ್ಸೋಸುಂ ಖೋ ಧುತ್ತಾ – ‘ಅಡ್ಢಕಾಸೀ ಕಿರ ಗಣಿಕಾ ಸಾವತ್ಥಿಂ ಗನ್ತುಕಾಮಾ’ತಿ। ತೇ ಮಗ್ಗೇ ಪರಿಯುಟ್ಠಿಂಸು। ಅಸ್ಸೋಸಿ ಖೋ ಅಡ್ಢಕಾಸೀ ಗಣಿಕಾ – ‘ಧುತ್ತಾ ಕಿರ ಮಗ್ಗೇ ಪರಿಯುಟ್ಠಿತಾ’ತಿ। ಭಗವತೋ ಸನ್ತಿಕೇ ದೂತಂ ಪಾಹೇಸಿ – ‘‘ಅಹಞ್ಹಿ ಉಪಸಮ್ಪಜ್ಜಿತುಕಾಮಾ; ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ದೂತೇನಪಿ ಉಪಸಮ್ಪಾದೇತು’’ನ್ತಿ।
430. Tena kho pana samayena aḍḍhakāsī gaṇikā bhikkhunīsu pabbajitā hoti. Sā ca sāvatthiṃ gantukāmā hoti – ‘bhagavato santike upasampajjissāmī’ti. Assosuṃ kho dhuttā – ‘aḍḍhakāsī kira gaṇikā sāvatthiṃ gantukāmā’ti. Te magge pariyuṭṭhiṃsu. Assosi kho aḍḍhakāsī gaṇikā – ‘dhuttā kira magge pariyuṭṭhitā’ti. Bhagavato santike dūtaṃ pāhesi – ‘‘ahañhi upasampajjitukāmā; kathaṃ nu kho mayā paṭipajjitabba’’nti? Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, dūtenapi upasampādetu’’nti.
ಭಿಕ್ಖುದೂತೇನ ಉಪಸಮ್ಪಾದೇನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುದೂತೇನ ಉಪಸಮ್ಪಾದೇತಬ್ಬಾ। ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ। ಸಿಕ್ಖಮಾನದೂತೇನ ಉಪಸಮ್ಪಾದೇನ್ತಿ…ಪೇ॰… ಸಾಮಣೇರದೂತೇನ ಉಪಸಮ್ಪಾದೇನ್ತಿ…ಪೇ॰… ಸಾಮಣೇರಿದೂತೇನ ಉಪಸಮ್ಪಾದೇನ್ತಿ…ಪೇ॰… ಬಾಲಾಯ ಅಬ್ಯತ್ತಾಯ ದೂತೇನ ಉಪಸಮ್ಪಾದೇನ್ತಿ। ‘‘ನ, ಭಿಕ್ಖವೇ, ಬಾಲಾಯ ಅಬ್ಯತ್ತಾಯ ದೂತೇನ ಉಪಸಮ್ಪಾದೇತಬ್ಬಾ। ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ದೂತೇನ ಉಪಸಮ್ಪಾದೇತುನ್ತಿ।
Bhikkhudūtena upasampādenti. Bhagavato etamatthaṃ ārocesuṃ. ‘‘Na, bhikkhave, bhikkhudūtena upasampādetabbā. Yo upasampādeyya, āpatti dukkaṭassā’’ti. Sikkhamānadūtena upasampādenti…pe… sāmaṇeradūtena upasampādenti…pe… sāmaṇeridūtena upasampādenti…pe… bālāya abyattāya dūtena upasampādenti. ‘‘Na, bhikkhave, bālāya abyattāya dūtena upasampādetabbā. Yo upasampādeyya, āpatti dukkaṭassa. Anujānāmi, bhikkhave, byattāya bhikkhuniyā paṭibalāya dūtena upasampādetunti.
‘‘ತಾಯ ದೂತಾಯ ಭಿಕ್ಖುನಿಯಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಇತ್ಥನ್ನಾಮಾ, ಅಯ್ಯಾ, ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ। ಇತ್ಥನ್ನಾಮಾ, ಅಯ್ಯಾ, ಸಙ್ಘಂ ಉಪಸಮ್ಪದಂ ಯಾಚತಿ। ಉಲ್ಲುಮ್ಪತು ತಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ। ಇತ್ಥನ್ನಾಮಾ, ಅಯ್ಯಾ, ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ। ದುತಿಯಮ್ಪಿ, ಅಯ್ಯಾ, ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ। ಉಲ್ಲುಮ್ಪತು ತಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯ। ಇತ್ಥನ್ನಾಮಾ, ಅಯ್ಯಾ, ಇತ್ಥನ್ನಾಮಾಯ ಅಯ್ಯಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ। ತತಿಯಮ್ಪಿ, ಅಯ್ಯಾ, ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ। ಉಲ್ಲುಮ್ಪತು ತಂ, ಅಯ್ಯಾ, ಸಙ್ಘೋ ಅನುಕಮ್ಪಂ ಉಪಾದಾಯಾ’ತಿ । ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –
‘‘Tāya dūtāya bhikkhuniyā saṅghaṃ upasaṅkamitvā ekaṃsaṃ uttarāsaṅgaṃ karitvā bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ‘itthannāmā, ayyā, itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā, ayyā, saṅghaṃ upasampadaṃ yācati. Ullumpatu taṃ, ayyā, saṅgho anukampaṃ upādāya. Itthannāmā, ayyā, itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Dutiyampi, ayyā, itthannāmā saṅghaṃ upasampadaṃ yācati. Ullumpatu taṃ, ayyā, saṅgho anukampaṃ upādāya. Itthannāmā, ayyā, itthannāmāya ayyāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Tatiyampi, ayyā, itthannāmā saṅghaṃ upasampadaṃ yācati. Ullumpatu taṃ, ayyā, saṅgho anukampaṃ upādāyā’ti . Byattena bhikkhunā paṭibalena saṅgho ñāpetabbo –
‘‘ಸುಣಾತು ಮೇ, ಭನ್ತೇ, ಸಙ್ಘೋ। ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇಯ್ಯ ಇತ್ಥನ್ನಾಮಾಯ ಪವತ್ತಿನಿಯಾ। ಏಸಾ ಞತ್ತಿ।
‘‘Suṇātu me, bhante, saṅgho. Itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā saṅghaṃ upasampadaṃ yācati itthannāmāya pavattiniyā. Yadi saṅghassa pattakallaṃ, saṅgho itthannāmaṃ upasampādeyya itthannāmāya pavattiniyā. Esā ñatti.
‘‘ಸುಣಾತು ಮೇ , ಭನ್ತೇ, ಸಙ್ಘೋ। ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ। ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ। ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ।
‘‘Suṇātu me , bhante, saṅgho. Itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ॰… ತತಿಯಮ್ಪಿ ಏತಮತ್ಥಂ ವದಾಮಿ। ಸುಣಾತು ಮೇ, ಭನ್ತೇ, ಸಙ್ಘೋ। ಇತ್ಥನ್ನಾಮಾ ಇತ್ಥನ್ನಾಮಾಯ ಉಪಸಮ್ಪದಾಪೇಕ್ಖಾ। ಏಕತೋಉಪಸಮ್ಪನ್ನಾ ಭಿಕ್ಖುನಿಸಙ್ಘೇ, ವಿಸುದ್ಧಾ। ಸಾ ಕೇನಚಿದೇವ ಅನ್ತರಾಯೇನ ನ ಆಗಚ್ಛತಿ। ಇತ್ಥನ್ನಾಮಾ ಸಙ್ಘಂ ಉಪಸಮ್ಪದಂ ಯಾಚತಿ ಇತ್ಥನ್ನಾಮಾಯ ಪವತ್ತಿನಿಯಾ। ಸಙ್ಘೋ ಇತ್ಥನ್ನಾಮಂ ಉಪಸಮ್ಪಾದೇತಿ ಇತ್ಥನ್ನಾಮಾಯ ಪವತ್ತಿನಿಯಾ। ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಾಯ ಉಪಸಮ್ಪದಾ ಇತ್ಥನ್ನಾಮಾಯ ಪವತ್ತಿನಿಯಾ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ।
‘‘Dutiyampi etamatthaṃ vadāmi…pe… tatiyampi etamatthaṃ vadāmi. Suṇātu me, bhante, saṅgho. Itthannāmā itthannāmāya upasampadāpekkhā. Ekatoupasampannā bhikkhunisaṅghe, visuddhā. Sā kenacideva antarāyena na āgacchati. Itthannāmā saṅghaṃ upasampadaṃ yācati itthannāmāya pavattiniyā. Saṅgho itthannāmaṃ upasampādeti itthannāmāya pavattiniyā. Yassāyasmato khamati itthannāmāya upasampadā itthannāmāya pavattiniyā, so tuṇhassa; yassa nakkhamati, so bhāseyya.
‘‘ಉಪಸಮ್ಪನ್ನಾ ಸಙ್ಘೇನ ಇತ್ಥನ್ನಾಮಾ ಇತ್ಥನ್ನಾಮಾಯ ಪವತ್ತಿನಿಯಾ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ।
‘‘Upasampannā saṅghena itthannāmā itthannāmāya pavattiniyā. Khamati saṅghassa, tasmā tuṇhī, evametaṃ dhārayāmīti.
‘‘ತಾವದೇವ ಛಾಯಾ ಮೇತಬ್ಬಾ, ಉತುಪ್ಪಮಾಣಂ ಆಚಿಕ್ಖಿತಬ್ಬಂ, ದಿವಸಭಾಗೋ ಆಚಿಕ್ಖಿತಬ್ಬೋ, ಸಙ್ಗೀತಿ ಆಚಿಕ್ಖಿತಬ್ಬಾ, ಭಿಕ್ಖುನಿಯೋ ವತ್ತಬ್ಬಾ – ತಸ್ಸಾ ತಯೋ ಚ ನಿಸ್ಸಯೇ, ಅಟ್ಠ ಚ ಅಕರಣೀಯಾನಿ ಆಚಿಕ್ಖೇಯ್ಯಾಥಾ’’ತಿ।
‘‘Tāvadeva chāyā metabbā, utuppamāṇaṃ ācikkhitabbaṃ, divasabhāgo ācikkhitabbo, saṅgīti ācikkhitabbā, bhikkhuniyo vattabbā – tassā tayo ca nissaye, aṭṭha ca akaraṇīyāni ācikkheyyāthā’’ti.
೪೩೧. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅರಞ್ಞೇ ವಿಹರನ್ತಿ। ಧುತ್ತಾ ದೂಸೇನ್ತಿ। ಭಗವತೋ ಏತಮತ್ಥಂ, ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅರಞ್ಞೇ ವತ್ಥಬ್ಬಂ। ಯಾ ವಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
431. Tena kho pana samayena bhikkhuniyo araññe viharanti. Dhuttā dūsenti. Bhagavato etamatthaṃ, ārocesuṃ. ‘‘Na, bhikkhave, bhikkhuniyā araññe vatthabbaṃ. Yā vaseyya, āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರೇನ ಉಪಾಸಕೇನ ಭಿಕ್ಖುನಿಸಙ್ಘಸ್ಸ ಉದ್ದೋಸಿತೋ ದಿನ್ನೋ ಹೋತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಉದ್ದೋಸಿತ’’ನ್ತಿ। ಉದ್ದೋಸಿತೋ ನ ಸಮ್ಮತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಉಪಸ್ಸಯ’’ನ್ತಿ। ಉಪಸ್ಸಯೋ ನ ಸಮ್ಮತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ನವಕಮ್ಮ’’ನ್ತಿ। ನವಕಮ್ಮಂ ನ ಸಮ್ಮತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಪುಗ್ಗಲಿಕಮ್ಪಿ ಕಾತು’’ನ್ತಿ।
Tena kho pana samayena aññatarena upāsakena bhikkhunisaṅghassa uddosito dinno hoti. Bhagavato etamatthaṃ ārocesuṃ. ‘‘Anujānāmi, bhikkhave, uddosita’’nti. Uddosito na sammati. Bhagavato etamatthaṃ ārocesuṃ. ‘‘Anujānāmi, bhikkhave, upassaya’’nti. Upassayo na sammati. Bhagavato etamatthaṃ ārocesuṃ. ‘‘Anujānāmi, bhikkhave, navakamma’’nti. Navakammaṃ na sammati. Bhagavato etamatthaṃ ārocesuṃ. ‘‘Anujānāmi, bhikkhave, puggalikampi kātu’’nti.
೪೩೨. ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಸನ್ನಿಸಿನ್ನಗಬ್ಭಾ ಭಿಕ್ಖುನೀಸು ಪಬ್ಬಜಿತಾ ಹೋತಿ। ತಸ್ಸಾ ಪಬ್ಬಜಿತಾಯ ಗಬ್ಭೋ ವುಟ್ಠಾತಿ। ಅಥ ಖೋ ತಸ್ಸಾ ಭಿಕ್ಖುನಿಯಾ ಏತದಹೋಸಿ – ‘‘ಕಥಂ ನು ಖೋ ಮಯಾ ಇಮಸ್ಮಿಂ ದಾರಕೇ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ । ‘‘ಅನುಜಾನಾಮಿ, ಭಿಕ್ಖವೇ, ಪೋಸೇತುಂ, ಯಾವ ಸೋ ದಾರಕೋ ವಿಞ್ಞುತಂ ಪಾಪುಣಾತೀ’’ತಿ।
432. Tena kho pana samayena aññatarā itthī sannisinnagabbhā bhikkhunīsu pabbajitā hoti. Tassā pabbajitāya gabbho vuṭṭhāti. Atha kho tassā bhikkhuniyā etadahosi – ‘‘kathaṃ nu kho mayā imasmiṃ dārake paṭipajjitabba’’nti? Bhagavato etamatthaṃ ārocesuṃ . ‘‘Anujānāmi, bhikkhave, posetuṃ, yāva so dārako viññutaṃ pāpuṇātī’’ti.
ಅಥ ಖೋ ತಸ್ಸಾ ಭಿಕ್ಖುನಿಯಾ ಏತದಹೋಸಿ – ‘‘ಮಯಾ ಚ ನ ಲಬ್ಭಾ ಏಕಿಕಾಯ ವತ್ಥುಂ, ಅಞ್ಞಾಯ ಚ ಭಿಕ್ಖುನಿಯಾ ನ ಲಬ್ಭಾ ದಾರಕೇನ ಸಹ ವತ್ಥುಂ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಏಕಂ ಭಿಕ್ಖುನಿಂ ಸಮ್ಮನ್ನಿತ್ವಾ ತಸ್ಸಾ ಭಿಕ್ಖುನಿಯಾ ದುತಿಯಂ ದಾತುಂ। ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ। ಪಠಮಂ ಭಿಕ್ಖುನೀ ಯಾಚಿತಬ್ಬಾ, ಯಾಚಿತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
Atha kho tassā bhikkhuniyā etadahosi – ‘‘mayā ca na labbhā ekikāya vatthuṃ, aññāya ca bhikkhuniyā na labbhā dārakena saha vatthuṃ, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, ekaṃ bhikkhuniṃ sammannitvā tassā bhikkhuniyā dutiyaṃ dātuṃ. Evañca pana, bhikkhave, sammannitabbā. Paṭhamaṃ bhikkhunī yācitabbā, yācitvā byattāya bhikkhuniyā paṭibalāya saṅgho ñāpetabbo –
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನೇಯ್ಯ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಂ। ಏಸಾ ಞತ್ತಿ।
‘‘Suṇātu me, ayye, saṅgho. Yadi saṅghassa pattakallaṃ, saṅgho itthannāmaṃ bhikkhuniṃ sammanneyya itthannāmāya bhikkhuniyā dutiyaṃ. Esā ñatti.
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನತಿ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಂ। ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮ್ಮುತಿ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಾಯ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ।
‘‘Suṇātu me, ayye, saṅgho. Saṅgho itthannāmaṃ bhikkhuniṃ sammannati itthannāmāya bhikkhuniyā dutiyaṃ. Yassā ayyāya khamati itthannāmāya bhikkhuniyā sammuti itthannāmāya bhikkhuniyā dutiyāya, sā tuṇhassa; yassā nakkhamati, sā bhāseyya.
‘‘ಸಮ್ಮತಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಾ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ।
‘‘Sammatā saṅghena itthannāmā bhikkhunī itthannāmāya bhikkhuniyā dutiyā. Khamati saṅghassa, tasmā tuṇhī, evametaṃ dhārayāmī’’ti.
ಅಥ ಖೋ ತಸ್ಸಾ ದುತಿಯಿಕಾಯ ಭಿಕ್ಖುನಿಯಾ ಏತದಹೋಸಿ – ‘‘ಕಥಂ ನು ಖೋ ಮಯಾ ಇಮಸ್ಮಿಂ ದಾರಕೇ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಠಪೇತ್ವಾ ಸಾಗಾರಂ ಯಥಾ ಅಞ್ಞಸ್ಮಿಂ ಪುರಿಸೇ ಪಟಿಪಜ್ಜನ್ತಿ 27 ಏವಂ ತಸ್ಮಿಂ ದಾರಕೇ ಪಟಿಪಜ್ಜಿತು’’ನ್ತಿ।
Atha kho tassā dutiyikāya bhikkhuniyā etadahosi – ‘‘kathaṃ nu kho mayā imasmiṃ dārake paṭipajjitabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, ṭhapetvā sāgāraṃ yathā aññasmiṃ purise paṭipajjanti 28 evaṃ tasmiṃ dārake paṭipajjitu’’nti.
೪೩೩. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗರುಧಮ್ಮಂ ಅಜ್ಝಾಪನ್ನಾ ಹೋತಿ ಮಾನತ್ತಚಾರಿನೀ। ಅಥ ಖೋ ತಸ್ಸಾ ಭಿಕ್ಖುನಿಯಾ ಏತದಹೋಸಿ – ‘‘ಮಯಾ ಚ ನ ಲಬ್ಭಾ ಏಕಿಕಾಯ ವತ್ಥುಂ, ಅಞ್ಞಾಯ ಚ ಭಿಕ್ಖುನಿಯಾ ನ ಲಬ್ಭಾ ಸಹ ಮಯಾ ವತ್ಥುಂ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಏಕಂ ಭಿಕ್ಖುನಿಂ ಸಮ್ಮನ್ನಿತ್ವಾ ತಸ್ಸಾ ಭಿಕ್ಖುನಿಯಾ ದುತಿಯಂ ದಾತುಂ। ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಾ। ಪಠಮಂ ಭಿಕ್ಖುನೀ ಯಾಚಿತಬ್ಬಾ, ಯಾಚಿತ್ವಾ ಬ್ಯತ್ತಾಯ ಭಿಕ್ಖುನಿಯಾ ಪಟಿಬಲಾಯ ಸಙ್ಘೋ ಞಾಪೇತಬ್ಬೋ –
433. Tena kho pana samayena aññatarā bhikkhunī garudhammaṃ ajjhāpannā hoti mānattacārinī. Atha kho tassā bhikkhuniyā etadahosi – ‘‘mayā ca na labbhā ekikāya vatthuṃ, aññāya ca bhikkhuniyā na labbhā saha mayā vatthuṃ, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. ‘‘Anujānāmi, bhikkhave, ekaṃ bhikkhuniṃ sammannitvā tassā bhikkhuniyā dutiyaṃ dātuṃ. Evañca pana, bhikkhave, sammannitabbā. Paṭhamaṃ bhikkhunī yācitabbā, yācitvā byattāya bhikkhuniyā paṭibalāya saṅgho ñāpetabbo –
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನೇಯ್ಯ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಂ। ಏಸಾ ಞತ್ತಿ।
‘‘Suṇātu me, ayye, saṅgho. Yadi saṅghassa pattakallaṃ, saṅgho itthannāmaṃ bhikkhuniṃ sammanneyya itthannāmāya bhikkhuniyā dutiyaṃ. Esā ñatti.
‘‘ಸುಣಾತು ಮೇ, ಅಯ್ಯೇ, ಸಙ್ಘೋ। ಸಙ್ಘೋ ಇತ್ಥನ್ನಾಮಂ ಭಿಕ್ಖುನಿಂ ಸಮ್ಮನ್ನತಿ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಂ। ಯಸ್ಸಾ ಅಯ್ಯಾಯ ಖಮತಿ ಇತ್ಥನ್ನಾಮಾಯ ಭಿಕ್ಖುನಿಯಾ ಸಮ್ಮುತಿ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಾಯ, ಸಾ ತುಣ್ಹಸ್ಸ; ಯಸ್ಸಾ ನಕ್ಖಮತಿ, ಸಾ ಭಾಸೇಯ್ಯ।
‘‘Suṇātu me, ayye, saṅgho. Saṅgho itthannāmaṃ bhikkhuniṃ sammannati itthannāmāya bhikkhuniyā dutiyaṃ. Yassā ayyāya khamati itthannāmāya bhikkhuniyā sammuti itthannāmāya bhikkhuniyā dutiyāya, sā tuṇhassa; yassā nakkhamati, sā bhāseyya.
‘‘ಸಮ್ಮತಾ ಸಙ್ಘೇನ ಇತ್ಥನ್ನಾಮಾ ಭಿಕ್ಖುನೀ ಇತ್ಥನ್ನಾಮಾಯ ಭಿಕ್ಖುನಿಯಾ ದುತಿಯಾ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ।
‘‘Sammatā saṅghena itthannāmā bhikkhunī itthannāmāya bhikkhuniyā dutiyā. Khamati saṅghassa, tasmā tuṇhī, evametaṃ dhārayāmī’’ti.
೪೩೪. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಸಿಕ್ಖಂ ಪಚ್ಚಕ್ಖಾಯ ವಿಬ್ಭಮಿ। ಸಾ ಪುನ ಪಚ್ಚಾಗನ್ತ್ವಾ ಭಿಕ್ಖುನಿಯೋ ಉಪಸಮ್ಪದಂ ಯಾಚಿ । ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಸಿಕ್ಖಾಪಚ್ಚಕ್ಖಾನಂ; ಯದೇವ ಸಾ ವಿಬ್ಭನ್ತಾ ತದೇವ ಸಾ ಅಭಿಕ್ಖುನೀ’’ತಿ।
434. Tena kho pana samayena aññatarā bhikkhunī sikkhaṃ paccakkhāya vibbhami. Sā puna paccāgantvā bhikkhuniyo upasampadaṃ yāci . Bhagavato etamatthaṃ ārocesuṃ. ‘‘Na, bhikkhave, bhikkhuniyā sikkhāpaccakkhānaṃ; yadeva sā vibbhantā tadeva sā abhikkhunī’’ti.
ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಸಕಾವಾಸಾ ತಿತ್ಥಾಯತನಂ ಸಙ್ಕಮಿ। ಸಾ ಪುನ ಪಚ್ಚಾಗನ್ತ್ವಾ ಭಿಕ್ಖುನಿಯೋ ಉಪಸಮ್ಪದಂ ಯಾಚಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಯಾ ಸಾ, ಭಿಕ್ಖವೇ, ಭಿಕ್ಖುನೀ ಸಕಾವಾಸಾ ತಿತ್ಥಾಯತನಂ ಸಙ್ಕನ್ತಾ, ಸಾ ಆಗತಾ ನ ಉಪಸಮ್ಪಾದೇತಬ್ಬಾ’’ತಿ।
Tena kho pana samayena aññatarā bhikkhunī sakāvāsā titthāyatanaṃ saṅkami. Sā puna paccāgantvā bhikkhuniyo upasampadaṃ yāci. Bhagavato etamatthaṃ ārocesuṃ. ‘‘Yā sā, bhikkhave, bhikkhunī sakāvāsā titthāyatanaṃ saṅkantā, sā āgatā na upasampādetabbā’’ti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪುರಿಸೇಹಿ ಅಭಿವಾದನಂ , ಕೇಸಚ್ಛೇದನಂ, ನಖಚ್ಛೇದನಂ, ವಣಪ್ಪಟಿಕಮ್ಮಂ, ಕುಕ್ಕುಚ್ಚಾಯನ್ತಾ ನ ಸಾದಿಯನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಸಾದಿತು’’ನ್ತಿ 29।
Tena kho pana samayena bhikkhuniyo purisehi abhivādanaṃ , kesacchedanaṃ, nakhacchedanaṃ, vaṇappaṭikammaṃ, kukkuccāyantā na sādiyanti. Bhagavato etamatthaṃ ārocesuṃ. ‘‘Anujānāmi, bhikkhave, sāditu’’nti 30.
೪೩೫. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪಲ್ಲಙ್ಕೇನ ನಿಸೀದನ್ತಿ ಪಣ್ಹೀಸಮ್ಫಸ್ಸಂ ಸಾದಿಯನ್ತೀ 31। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಪಲ್ಲಙ್ಕೇನ ನಿಸೀದಿತಬ್ಬಂ। ಯಾ ನಿಸೀದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
435. Tena kho pana samayena bhikkhuniyo pallaṅkena nisīdanti paṇhīsamphassaṃ sādiyantī 32. Bhagavato etamatthaṃ ārocesuṃ. ‘‘Na, bhikkhave, bhikkhuniyā pallaṅkena nisīditabbaṃ. Yā nisīdeyya, āpatti dukkaṭassā’’ti.
ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಗಿಲಾನಾ ಹೋತಿ। ತಸ್ಸಾ ವಿನಾ ಪಲ್ಲಙ್ಕೇನ ನ ಫಾಸು ಹೋತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ಅನುಜಾನಾಮಿ, ಭಿಕ್ಖವೇ, ಭಿಕ್ಖುನಿಯಾ ಅಡ್ಢಪಲ್ಲಙ್ಕ’’ನ್ತಿ।
Tena kho pana samayena aññatarā bhikkhunī gilānā hoti. Tassā vinā pallaṅkena na phāsu hoti. Bhagavato etamatthaṃ ārocesuṃ. ‘‘Anujānāmi, bhikkhave, bhikkhuniyā aḍḍhapallaṅka’’nti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ವಚ್ಚಕುಟಿಯಾ ವಚ್ಚಂ ಕರೋನ್ತಿ । ಛಬ್ಬಗ್ಗಿಯಾ ಭಿಕ್ಖುನಿಯೋ ತತ್ಥೇವ ಗಬ್ಭಂ ಪಾತೇನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ವಚ್ಚಕುಟಿಯಾ ವಚ್ಚೋ ಕಾತಬ್ಬೋ। ಯಾ ಕರೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಹೇಟ್ಠಾ ವಿವಟೇ ಉಪರಿಪಟಿಚ್ಛನ್ನೇ ವಚ್ಚಂ ಕಾತು’’ನ್ತಿ।
Tena kho pana samayena bhikkhuniyo vaccakuṭiyā vaccaṃ karonti . Chabbaggiyā bhikkhuniyo tattheva gabbhaṃ pātenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā vaccakuṭiyā vacco kātabbo. Yā kareyya, āpatti dukkaṭassa. Anujānāmi, bhikkhave, heṭṭhā vivaṭe uparipaṭicchanne vaccaṃ kātu’’nti.
೪೩೬. ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಚುಣ್ಣೇನ ನಹಾಯನ್ತಿ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ॰… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ। ಭಗವತೋ ಏತಮತ್ಥಂ ಆರೋಚೇಸುಂ । ‘‘ನ, ಭಿಕ್ಖವೇ, ಭಿಕ್ಖುನಿಯಾ ಚುಣ್ಣೇನ ನಹಾಯಿತಬ್ಬಂ। ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಕುಕ್ಕುಸಂ ಮತ್ತಿಕ’’ನ್ತಿ।
436. Tena kho pana samayena bhikkhuniyo cuṇṇena nahāyanti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ . ‘‘Na, bhikkhave, bhikkhuniyā cuṇṇena nahāyitabbaṃ. Yā nahāyeyya, āpatti dukkaṭassa. Anujānāmi, bhikkhave, kukkusaṃ mattika’’nti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ವಾಸಿತಕಾಯ ಮತ್ತಿಕಾಯ ನಹಾಯನ್ತಿ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ॰… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ವಾಸಿತಕಾಯ ಮತ್ತಿಕಾಯ ನಹಾಯಿತಬ್ಬಂ। ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಪಕತಿಮತ್ತಿಕ’’ನ್ತಿ।
Tena kho pana samayena bhikkhuniyo vāsitakāya mattikāya nahāyanti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā vāsitakāya mattikāya nahāyitabbaṃ. Yā nahāyeyya, āpatti dukkaṭassa. Anujānāmi, bhikkhave, pakatimattika’’nti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಜನ್ತಾಘರೇ ನಹಾಯನ್ತಿಯೋ ಕೋಲಾಹಲಂ ಅಕಂಸು। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಜನ್ತಾಘರೇ ನಹಾಯಿತಬ್ಬಂ। ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena bhikkhuniyo jantāghare nahāyantiyo kolāhalaṃ akaṃsu. Bhagavato etamatthaṃ ārocesuṃ. ‘‘Na, bhikkhave, bhikkhuniyā jantāghare nahāyitabbaṃ. Yā nahāyeyya, āpatti dukkaṭassā’’ti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪಟಿಸೋತೇ ನಹಾಯನ್ತಿ ಧಾರಾಸಮ್ಫಸ್ಸಂ ಸಾದಿಯನ್ತೀ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ , ಭಿಕ್ಖುನಿಯಾ ಪಟಿಸೋತೇ ನಹಾಯಿತಬ್ಬಂ। ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena bhikkhuniyo paṭisote nahāyanti dhārāsamphassaṃ sādiyantī. Bhagavato etamatthaṃ ārocesuṃ. ‘‘Na, bhikkhave , bhikkhuniyā paṭisote nahāyitabbaṃ. Yā nahāyeyya, āpatti dukkaṭassā’’ti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಅತಿತ್ಥೇ ನಹಾಯನ್ತಿ। ಧುತ್ತಾ ದೂಸೇನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಅತಿತ್ಥೇ ನಹಾಯಿತಬ್ಬಂ। ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ।
Tena kho pana samayena bhikkhuniyo atitthe nahāyanti. Dhuttā dūsenti. Bhagavato etamatthaṃ ārocesuṃ. ‘‘Na, bhikkhave, bhikkhuniyā atitthe nahāyitabbaṃ. Yā nahāyeyya, āpatti dukkaṭassā’’ti.
ತೇನ ಖೋ ಪನ ಸಮಯೇನ ಭಿಕ್ಖುನಿಯೋ ಪುರಿಸತಿತ್ಥೇ ನಹಾಯನ್ತಿ। ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ॰… ಸೇಯ್ಯಥಾಪಿ ಗಿಹಿನೀ ಕಾಮಭೋಗಿನಿಯೋತಿ। ಭಗವತೋ ಏತಮತ್ಥಂ ಆರೋಚೇಸುಂ। ‘‘ನ, ಭಿಕ್ಖವೇ, ಭಿಕ್ಖುನಿಯಾ ಪುರಿಸತಿತ್ಥೇ ನಹಾಯಿತಬ್ಬಂ। ಯಾ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸ। ಅನುಜಾನಾಮಿ, ಭಿಕ್ಖವೇ, ಮಹಿಲಾತಿತ್ಥೇ ನಹಾಯಿತು’’ನ್ತಿ।
Tena kho pana samayena bhikkhuniyo purisatitthe nahāyanti. Manussā ujjhāyanti khiyyanti vipācenti…pe… seyyathāpi gihinī kāmabhoginiyoti. Bhagavato etamatthaṃ ārocesuṃ. ‘‘Na, bhikkhave, bhikkhuniyā purisatitthe nahāyitabbaṃ. Yā nahāyeyya, āpatti dukkaṭassa. Anujānāmi, bhikkhave, mahilātitthe nahāyitu’’nti.
ತತಿಯಭಾಣವಾರೋ ನಿಟ್ಠಿತೋ।
Tatiyabhāṇavāro niṭṭhito.
ಭಿಕ್ಖುನಿಕ್ಖನ್ಧಕೋ ದಸಮೋ।
Bhikkhunikkhandhako dasamo.
ಇಮಸ್ಮಿಂ ಖನ್ಧಕೇ ವತ್ಥೂ ಏಕಸತಂ।
Imasmiṃ khandhake vatthū ekasataṃ.
ತಸ್ಸುದ್ದಾನಂ –
Tassuddānaṃ –
ಪಬ್ಬಜ್ಜಂ ಗೋತಮೀ ಯಾಚಿ, ನಾನುಞ್ಞಾಸಿ ತಥಾಗತೋ।
Pabbajjaṃ gotamī yāci, nānuññāsi tathāgato;
ಕಪಿಲವತ್ಥು ವೇಸಾಲಿಂ, ಅಗಮಾಸಿ ವಿನಾಯಕೋ॥
Kapilavatthu vesāliṃ, agamāsi vināyako.
ರಜೋಕಿಣ್ಣೇನ ಕೋಟ್ಠಕೇ, ಆನನ್ದಸ್ಸ ಪವೇದಯಿ।
Rajokiṇṇena koṭṭhake, ānandassa pavedayi;
ಭಬ್ಬೋತಿ ನಯತೋ ಯಾಚಿ, ಮಾತಾತಿ ಪೋಸಿಕಾತಿ ಚ॥
Bhabboti nayato yāci, mātāti posikāti ca.
ವಸ್ಸಸತಂ ತದಹು ಚ, ಅಭಿಕ್ಖುಪಚ್ಚಾಸೀಸನಾ।
Vassasataṃ tadahu ca, abhikkhupaccāsīsanā;
ಪವಾರಣಾ ಗರುಧಮ್ಮಾ, ದ್ವೇ ವಸ್ಸಾ ಅನಕ್ಕೋಸನಾ॥
Pavāraṇā garudhammā, dve vassā anakkosanā.
ಓವಟೋ ಚ ಅಟ್ಠ ಧಮ್ಮಾ, ಯಾವಜೀವಾನುವತ್ತನಾ।
Ovaṭo ca aṭṭha dhammā, yāvajīvānuvattanā;
ಗರುಧಮ್ಮಪಟಿಗ್ಗಾಹೋ ಸಾವಸ್ಸಾ ಉಪಸಮ್ಪದಾ॥
Garudhammapaṭiggāho sāvassā upasampadā.
ವಸ್ಸಸಹಸ್ಸಂ ಪಞ್ಚೇವ, ಕುಮ್ಭಥೇನಕಸೇತಟ್ಟಿ।
Vassasahassaṃ pañceva, kumbhathenakasetaṭṭi;
ಮಞ್ಜಿಟ್ಠಿಕಉಪಮಾಹಿ, ಏವಂ ಸದ್ಧಮ್ಮಹಿಂಸನಾ॥
Mañjiṭṭhikaupamāhi, evaṃ saddhammahiṃsanā.
ಆಳಿಂ ಬನ್ಧೇಯ್ಯ ಪಾಏವ, ಪುನ ಸದ್ಧಮ್ಮಸಣ್ಠಿತಿ।
Āḷiṃ bandheyya pāeva, puna saddhammasaṇṭhiti;
ಉಪಸಮ್ಪಾದೇತುಂ ಅಯ್ಯಾ, ಯಥಾವುಡ್ಢಾಭಿವಾದನಾ॥
Upasampādetuṃ ayyā, yathāvuḍḍhābhivādanā.
ನ ಕರಿಸ್ಸನ್ತಿ ಕಿಮೇವ, ಸಾಧಾರಣಾಸಾಧಾರಣಂ।
Na karissanti kimeva, sādhāraṇāsādhāraṇaṃ;
ಓವಾದಂ ಪಾತಿಮೋಕ್ಖಞ್ಚ, ಕೇನ ನು ಖೋ ಉಪಸ್ಸಯಂ॥
Ovādaṃ pātimokkhañca, kena nu kho upassayaṃ.
ನ ಜಾನನ್ತಿ ಚ ಆಚಿಕ್ಖಿ, ನ ಕರೋನ್ತಿ ಚ ಭಿಕ್ಖುಹಿ।
Na jānanti ca ācikkhi, na karonti ca bhikkhuhi;
ಪಟಿಗ್ಗಹೇತುಂ ಭಿಕ್ಖೂಹಿ, ಭಿಕ್ಖುನೀಹಿ ಪಟಿಗ್ಗಹೋ॥
Paṭiggahetuṃ bhikkhūhi, bhikkhunīhi paṭiggaho.
ಆಚಿಕ್ಖಿ ಕಮ್ಮಂ ಭಿಕ್ಖೂಹಿ, ಉಜ್ಝಾಯನ್ತಿ ಭಿಕ್ಖುನೀಹಿ ವಾ।
Ācikkhi kammaṃ bhikkhūhi, ujjhāyanti bhikkhunīhi vā;
ಆಚಿಕ್ಖಿತುಂ ಭಣ್ಡನಞ್ಚ, ರೋಪೇತ್ವಾ ಉಪ್ಪಲಾಯ ಚ॥
Ācikkhituṃ bhaṇḍanañca, ropetvā uppalāya ca.
ಸಾವತ್ಥಿಯಾ ಕದ್ದಮೋದ, ಅವನ್ದಿ ಕಾಯ ಊರು ಚ।
Sāvatthiyā kaddamoda, avandi kāya ūru ca;
ಅಙ್ಗಜಾತಞ್ಚ ಓಭಾಸಂ, ಸಮ್ಪಯೋಜೇನ್ತಿ ವಗ್ಗಿಕಾ॥
Aṅgajātañca obhāsaṃ, sampayojenti vaggikā.
ಅವನ್ದಿಯೋ ದಣ್ಡಕಮ್ಮಂ, ಭಿಕ್ಖುನಿಯೋ ತಥಾ ಪುನ।
Avandiyo daṇḍakammaṃ, bhikkhuniyo tathā puna;
ಆವರಣಞ್ಚ ಓವಾದಂ, ಕಪ್ಪತಿ ನು ಖೋ ಪಕ್ಕಮಿ॥
Āvaraṇañca ovādaṃ, kappati nu kho pakkami.
ಬಾಲಾ ವತ್ಥುವಿನಿಚ್ಛಯಾ, ಓವಾದಂ ಸಙ್ಘೋ ಪಞ್ಚಹಿ।
Bālā vatthuvinicchayā, ovādaṃ saṅgho pañcahi;
ದುವೇ ತಿಸ್ಸೋ ನ ಗಣ್ಹನ್ತಿ, ಬಾಲಾ ಗಿಲಾನಗಮಿಕಂ॥
Duve tisso na gaṇhanti, bālā gilānagamikaṃ.
ಆರಞ್ಞಿಕೋ ನಾರೋಚೇನ್ತಿ, ನ ಪಚ್ಚಾಗಚ್ಛನ್ತಿ ಚ।
Āraññiko nārocenti, na paccāgacchanti ca;
ದೀಘಂ ವಿಲೀವಚಮ್ಮಞ್ಚ, ದುಸ್ಸಾ ಚ ವೇಣಿವಟ್ಟಿ ಚ।
Dīghaṃ vilīvacammañca, dussā ca veṇivaṭṭi ca;
ಚೋಳವೇಣಿ ಚ ವಟ್ಟಿ ಚ, ಸುತ್ತವೇಣಿ ಚ ವಟ್ಟಿಕಾ॥
Coḷaveṇi ca vaṭṭi ca, suttaveṇi ca vaṭṭikā.
ಅಟ್ಠಿಲ್ಲಂ ಗೋಹನುಕೇನ, ಹತ್ಥಕೋಚ್ಛಂ ಪಾದಂ ತಥಾ।
Aṭṭhillaṃ gohanukena, hatthakocchaṃ pādaṃ tathā;
ಊರುಂ ಮುಖಂ ದನ್ತಮಂಸಂ, ಆಲಿಮ್ಪೋಮದ್ದಚುಣ್ಣನಾ॥
Ūruṃ mukhaṃ dantamaṃsaṃ, ālimpomaddacuṇṇanā.
ಲಞ್ಛೇನ್ತಿ ಅಙ್ಗರಾಗಞ್ಚ, ಮುಖರಾಗಂ ತಥಾ ದುವೇ।
Lañchenti aṅgarāgañca, mukharāgaṃ tathā duve;
ವೇಸೀ ಪಾನಾಗಾರಂ ಸೂನಂ, ಆಪಣಂ ವಡ್ಢಿ ವಣಿಜ್ಜಾ।
Vesī pānāgāraṃ sūnaṃ, āpaṇaṃ vaḍḍhi vaṇijjā;
ದಾಸಂ ದಾಸಿಂ ಕಮ್ಮಕರಂ, ಕಮ್ಮಕಾರಿಂ ಉಪಟ್ಠಯ್ಯುಂ॥
Dāsaṃ dāsiṃ kammakaraṃ, kammakāriṃ upaṭṭhayyuṃ.
ತಿರಚ್ಛಾನಹರೀತಕಿ, ಸನ್ಧಾರಯನ್ತಿ ನಮತಕಂ।
Tiracchānaharītaki, sandhārayanti namatakaṃ;
ನೀಲಂ ಪೀತಂ ಲೋಹಿತಕಂ, ಮಞ್ಜಿಟ್ಠಕಣ್ಹಚೀವರಾ॥
Nīlaṃ pītaṃ lohitakaṃ, mañjiṭṭhakaṇhacīvarā.
ಮಹಾರಙ್ಗಮಹಾನಾಮಅಚ್ಛಿನ್ನಾ ದೀಘಮೇವ ಚ।
Mahāraṅgamahānāmaacchinnā dīghameva ca;
ಪುಪ್ಫಫಲಕಞ್ಚುಕಞ್ಚ, ತಿರೀಟಕಞ್ಚ ಧಾರಯುಂ॥
Pupphaphalakañcukañca, tirīṭakañca dhārayuṃ.
ಭಿಕ್ಖುನೀ ಸಿಕ್ಖಮಾನಾಯ, ಸಾಮಣೇರಾಯ ಅಚ್ಚಯೇ।
Bhikkhunī sikkhamānāya, sāmaṇerāya accaye;
ನಿಯ್ಯಾದಿತೇ ಪರಿಕ್ಖಾರೇ, ಭಿಕ್ಖುನಿಯೋವ ಇಸ್ಸರಾ॥
Niyyādite parikkhāre, bhikkhuniyova issarā.
ಭಿಕ್ಖುಸ್ಸ ಸಾಮಣೇರಸ್ಸ, ಉಪಾಸಕಸ್ಸುಪಾಸಿಕಾ।
Bhikkhussa sāmaṇerassa, upāsakassupāsikā;
ಅಞ್ಞೇಸಞ್ಚ ಪರಿಕ್ಖಾರೇ, ನಿಯ್ಯಾತೇ ಭಿಕ್ಖುಇಸ್ಸರಾ॥
Aññesañca parikkhāre, niyyāte bhikkhuissarā.
ಮಲ್ಲೀ ಗಬ್ಭಂ ಪತ್ತಮೂಲಂ, ಬ್ಯಞ್ಜನಂ ಆಮಿಸೇನ ಚ।
Mallī gabbhaṃ pattamūlaṃ, byañjanaṃ āmisena ca;
ಉಸ್ಸನ್ನಞ್ಚ ಬಾಳ್ಹತರಂ, ಸನ್ನಿಧಿಕತಮಾಮಿಸಂ॥
Ussannañca bāḷhataraṃ, sannidhikatamāmisaṃ.
ಭಿಕ್ಖೂನಂ ಯಾದಿಸಂ ಭೋಟ್ಠಂ 35, ಭಿಕ್ಖುನೀನಂ ತಥಾ ಕರೇ।
Bhikkhūnaṃ yādisaṃ bhoṭṭhaṃ 36, bhikkhunīnaṃ tathā kare;
ಸೇನಾಸನಂ ಉತುನಿಯೋ, ಮಕ್ಖೀಯತಿ ಪಟಾಣಿ ಚ॥
Senāsanaṃ utuniyo, makkhīyati paṭāṇi ca.
ಛಿಜ್ಜನ್ತಿ ಸಬ್ಬಕಾಲಞ್ಚ, ಅನಿಮಿತ್ತಾಪಿ ದಿಸ್ಸರೇ।
Chijjanti sabbakālañca, animittāpi dissare;
ನಿಮಿತ್ತಾ ಲೋಹಿತಾ ಚೇವ, ತಥೇವ ಧುವಲೋಹಿತಾ॥
Nimittā lohitā ceva, tatheva dhuvalohitā.
ಧುವಚೋಳಪಗ್ಘರನ್ತೀ, ಸಿಖರಣಿತ್ಥಿಪಣ್ಡಕಾ।
Dhuvacoḷapaggharantī, sikharaṇitthipaṇḍakā;
ವೇಪುರಿಸೀ ಚ ಸಮ್ಭಿನ್ನಾ, ಉಭತೋಬ್ಯಞ್ಜನಾಪಿ ಚ॥
Vepurisī ca sambhinnā, ubhatobyañjanāpi ca.
ಅನಿಮಿತ್ತಾದಿತೋ ಕತ್ವಾ, ಯಾವ ಉಭತೋಬ್ಯಞ್ಜನಾ।
Animittādito katvā, yāva ubhatobyañjanā;
ಏತಂ ಪೇಯ್ಯಾಲತೋ ಹೇಟ್ಠಾ, ಕುಟ್ಠಂ ಗಣ್ಡೋ ಕಿಲಾಸೋ ಚ॥
Etaṃ peyyālato heṭṭhā, kuṭṭhaṃ gaṇḍo kilāso ca.
ಸೋಸಾಪಮಾರೋ ಮಾನುಸೀ, ಇತ್ಥೀಸಿ ಭುಜಿಸ್ಸಾಸಿ ಚ।
Sosāpamāro mānusī, itthīsi bhujissāsi ca;
ಅಣಣಾ ನ ರಾಜಭಟೀ, ಅನುಞ್ಞಾತಾ ಚ ವೀಸತಿ॥
Aṇaṇā na rājabhaṭī, anuññātā ca vīsati.
ಪರಿಪುಣ್ಣಾ ಚ ಕಿನ್ನಾಮಾ, ಕಾನಾಮಾ ತೇ ಪವತ್ತಿನೀ।
Paripuṇṇā ca kinnāmā, kānāmā te pavattinī;
ಚತುವೀಸನ್ತರಾಯಾನಂ, ಪುಚ್ಛಿತ್ವಾ ಉಪಸಮ್ಪದಾ॥
Catuvīsantarāyānaṃ, pucchitvā upasampadā.
ವಿತ್ಥಾಯನ್ತಿ ಅನನುಸಿಟ್ಠಾ, ಸಙ್ಘಮಜ್ಝೇ ತಥೇವ ಚ।
Vitthāyanti ananusiṭṭhā, saṅghamajjhe tatheva ca;
ಉಪಜ್ಝಾಗಾಹ ಸಙ್ಘಾಟಿ, ಉತ್ತರನ್ತರವಾಸಕೋ॥
Upajjhāgāha saṅghāṭi, uttarantaravāsako.
ಸಙ್ಕಚ್ಚುದಕಸಾಟಿ ಚ, ಆಚಿಕ್ಖಿತ್ವಾನ ಪೇಸಯೇ।
Saṅkaccudakasāṭi ca, ācikkhitvāna pesaye;
ಬಾಲಾ ಅಸಮ್ಮತೇಕತೋ, ಯಾಚೇ ಪುಚ್ಛನ್ತರಾಯಿಕಾ॥
Bālā asammatekato, yāce pucchantarāyikā.
ಏಕತೋಉಪಸಮ್ಪನ್ನಾ, ಭಿಕ್ಖುಸಙ್ಘೇ ತಥಾ ಪುನ।
Ekatoupasampannā, bhikkhusaṅghe tathā puna;
ಛಾಯಾ ಉತು ದಿವಸಾ ಚ, ಸಙ್ಗೀತಿ ತಯೋ ನಿಸ್ಸಯೇ॥
Chāyā utu divasā ca, saṅgīti tayo nissaye.
ಅಟ್ಠ ಅಕರಣೀಯಾನಿ, ಕಾಲಂ ಸಬ್ಬತ್ಥ ಅಟ್ಠೇವ।
Aṭṭha akaraṇīyāni, kālaṃ sabbattha aṭṭheva;
ನ ಪವಾರೇನ್ತಿ ಭಿಕ್ಖುನೀ, ಭಿಕ್ಖುಸಙ್ಘಂ ತಥೇವ ಚ॥
Na pavārenti bhikkhunī, bhikkhusaṅghaṃ tatheva ca.
ಕೋಲಾಹಲಂ ಪುರೇಭತ್ತಂ, ವಿಕಾಲೇ ಚ ಕೋಲಾಹಲಂ।
Kolāhalaṃ purebhattaṃ, vikāle ca kolāhalaṃ;
ಉಪೋಸಥಂ ಪವಾರಣಂ, ಸವಚನೀಯಾನುವಾದನಂ॥
Uposathaṃ pavāraṇaṃ, savacanīyānuvādanaṃ.
ಓಕಾಸಂ ಚೋದೇ ಸಾರೇನ್ತಿ, ಪಟಿಕ್ಖಿತ್ತಂ ಮಹೇಸಿನಾ।
Okāsaṃ code sārenti, paṭikkhittaṃ mahesinā;
ತಥೇವ ಭಿಕ್ಖು ಭಿಕ್ಖುನೀ, ಅನುಞ್ಞಾತಂ ಮಹೇಸಿನಾ॥
Tatheva bhikkhu bhikkhunī, anuññātaṃ mahesinā.
ಯಾನಂ ಗಿಲಾನಯುತ್ತಞ್ಚ, ಯಾನುಗ್ಘಾತಡ್ಢಕಾಸಿಕಾ।
Yānaṃ gilānayuttañca, yānugghātaḍḍhakāsikā;
ಭಿಕ್ಖು ಸಿಕ್ಖಾ ಸಾಮಣೇರ, ಸಾಮಣೇರೀ ಚ ಬಾಲಾಯ॥
Bhikkhu sikkhā sāmaṇera, sāmaṇerī ca bālāya.
ಅರಞ್ಞೇ ಉಪಾಸಕೇನ, ಉದ್ದೋಸಿತೋ ಉಪಸ್ಸಯಂ।
Araññe upāsakena, uddosito upassayaṃ;
ನ ಸಮ್ಮತಿ ನವಕಮ್ಮಂ, ನಿಸಿನ್ನಗಬ್ಭಏಕಿಕಾ॥
Na sammati navakammaṃ, nisinnagabbhaekikā.
ಸಾಗಾರಞ್ಚ ಗರುಧಮ್ಮಂ, ಪಚ್ಚಕ್ಖಾಯ ಚ ಸಙ್ಕಮಿ।
Sāgārañca garudhammaṃ, paccakkhāya ca saṅkami;
ಅಭಿವಾದನಕೇಸಾ ಚ, ನಖಾ ಚ ವಣಕಮ್ಮನಾ॥
Abhivādanakesā ca, nakhā ca vaṇakammanā.
ಪಲ್ಲಙ್ಕೇನ ಗಿಲಾನಾ ಚ, ವಚ್ಚಂ ಚುಣ್ಣೇನ ವಾಸಿತಂ।
Pallaṅkena gilānā ca, vaccaṃ cuṇṇena vāsitaṃ;
ಜನ್ತಾಘರೇ ಪಟಿಸೋತೇ, ಅತಿತ್ಥೇ ಪುರಿಸೇನ ಚ॥
Jantāghare paṭisote, atitthe purisena ca.
ಮಹಾಗೋತಮೀ ಆಯಾಚಿ, ಆನನ್ದೋ ಚಾಪಿ ಯೋನಿಸೋ।
Mahāgotamī āyāci, ānando cāpi yoniso;
ಪರಿಸಾ ಚತಸ್ಸೋ ಹೋನ್ತಿ, ಪಬ್ಬಜ್ಜಾ ಜಿನಸಾಸನೇ॥
Parisā catasso honti, pabbajjā jinasāsane.
ಸಂವೇಗಜನನತ್ಥಾಯ , ಸದ್ಧಮ್ಮಸ್ಸ ಚ ವುದ್ಧಿಯಾ।
Saṃvegajananatthāya , saddhammassa ca vuddhiyā;
ಆತುರಸ್ಸಾವ ಭೇಸಜ್ಜಂ, ಏವಂ ಬುದ್ಧೇನ ದೇಸಿತಂ॥
Āturassāva bhesajjaṃ, evaṃ buddhena desitaṃ.
ಏವಂ ವಿನೀತಾ ಸದ್ಧಮ್ಮೇ, ಮಾತುಗಾಮಾಪಿ ಇತರಾ।
Evaṃ vinītā saddhamme, mātugāmāpi itarā;
ಯಾಯನ್ತಿ 37 ಅಚ್ಚುತಂ ಠಾನಂ, ಯತ್ಥ ಗನ್ತ್ವಾ ನ ಸೋಚರೇತಿ॥
Yāyanti 38 accutaṃ ṭhānaṃ, yattha gantvā na socareti.
ಭಿಕ್ಖುನಿಕ್ಖನ್ಧಕಂ ನಿಟ್ಠಿತಂ।
Bhikkhunikkhandhakaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಭಿಕ್ಖುನೀಉಪಸಮ್ಪದಾನುಜಾನನಕಥಾ • Bhikkhunīupasampadānujānanakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಭಿಕ್ಖುನೀಉಪಸಮ್ಪನ್ನಾನುಜಾನನಕಥಾವಣ್ಣನಾ • Bhikkhunīupasampannānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಭಿಕ್ಖುನೀಉಪಸಮ್ಪದಾನುಜಾನನಕಥಾವಣ್ಣನಾ • Bhikkhunīupasampadānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಭಿಕ್ಖುನೀಉಪಸಮ್ಪದಾನುಜಾನನಕಥಾವಣ್ಣನಾ • Bhikkhunīupasampadānujānanakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ಭಿಕ್ಖುನೀಉಪಸಮ್ಪದಾನುಜಾನನಕಥಾ • Bhikkhunīupasampadānujānanakathā
