| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. තතියචෙතනාසුත්‌තං
10. Tatiyacetanāsuttaṃ
40. සාවත්‌ථියං විහරති…පෙ.… ‘‘යඤ්‌ච , භික්‌ඛවෙ, චෙතෙති යඤ්‌ච පකප්‌පෙති යඤ්‌ච අනුසෙති ආරම්‌මණමෙතං හොති විඤ්‌ඤාණස්‌ස ඨිතියා. ආරම්‌මණෙ සති පතිට්‌ඨා විඤ්‌ඤාණස්‌ස හොති. තස්‌මිං පතිට්‌ඨිතෙ විඤ්‌ඤාණෙ විරූළ්‌හෙ නති හොති. නතියා සති ආගතිගති හොති. ආගතිගතියා සති චුතූපපාතො හොති. චුතූපපාතෙ සති ආයතිං ජාතිජරාමරණං සොකපරිදෙවදුක්‌ඛදොමනස්‌සුපායාසා සම්‌භවන්‌ති. එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස සමුදයො හොති’’.
40. Sāvatthiyaṃ viharati…pe… ‘‘yañca , bhikkhave, ceteti yañca pakappeti yañca anuseti ārammaṇametaṃ hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe nati hoti. Natiyā sati āgatigati hoti. Āgatigatiyā sati cutūpapāto hoti. Cutūpapāte sati āyatiṃ jātijarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti’’.
‘‘නො චෙ, භික්‌ඛවෙ, චෙතෙති නො චෙ පකප්‌පෙති අථ චෙ අනුසෙති, ආරම්‌මණමෙතං හොති විඤ්‌ඤාණස්‌ස ඨිතියා. ආරම්‌මණෙ සති පතිට්‌ඨා විඤ්‌ඤාණස්‌ස හොති. තස්‌මිං පතිට්‌ඨිතෙ විඤ්‌ඤාණෙ විරූළ්‌හෙ නති හොති. නතියා සති ආගතිගති හොති. ආගතිගතියා සති චුතූපපාතො හොති. චුතූපපාතෙ සති ආයතිං ජාතිජරාමරණං සොකපරිදෙවදුක්‌ඛදොමනස්‌සුපායාසා සම්‌භවන්‌ති. එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස සමුදයො හොති.
‘‘No ce, bhikkhave, ceteti no ce pakappeti atha ce anuseti, ārammaṇametaṃ hoti viññāṇassa ṭhitiyā. Ārammaṇe sati patiṭṭhā viññāṇassa hoti. Tasmiṃ patiṭṭhite viññāṇe virūḷhe nati hoti. Natiyā sati āgatigati hoti. Āgatigatiyā sati cutūpapāto hoti. Cutūpapāte sati āyatiṃ jātijarāmaraṇaṃ sokaparidevadukkhadomanassupāyāsā sambhavanti. Evametassa kevalassa dukkhakkhandhassa samudayo hoti.
‘‘යතො ච ඛො, භික්‌ඛවෙ, නො චෙව චෙතෙති නො ච පකප්‌පෙති නො ච අනුසෙති, ආරම්‌මණමෙතං න හොති විඤ්‌ඤාණස්‌ස ඨිතියා. ආරම්‌මණෙ අසති පතිට්‌ඨා විඤ්‌ඤාණස්‌ස න හොති. තදප්‌පතිට්‌ඨිතෙ විඤ්‌ඤාණෙ අවිරූළ්‌හෙ නති න හොති. නතියා අසති ආගතිගති න හොති. ආගතිගතියා අසති චුතූපපාතො න හොති. චුතූපපාතෙ අසති ආයතිං ජාති ජරාමරණං සොකපරිදෙවදුක්‌ඛදොමනස්‌සුපායාසා නිරුජ්‌ඣන්‌ති. එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස නිරොධො හොතී’’ති. දසමං.
‘‘Yato ca kho, bhikkhave, no ceva ceteti no ca pakappeti no ca anuseti, ārammaṇametaṃ na hoti viññāṇassa ṭhitiyā. Ārammaṇe asati patiṭṭhā viññāṇassa na hoti. Tadappatiṭṭhite viññāṇe avirūḷhe nati na hoti. Natiyā asati āgatigati na hoti. Āgatigatiyā asati cutūpapāto na hoti. Cutūpapāte asati āyatiṃ jāti jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hotī’’ti. Dasamaṃ.
කළාරඛත්‌තියවග්‌ගො චතුත්‌ථො.
Kaḷārakhattiyavaggo catuttho.
තස්‌සුද්‌දානං –
Tassuddānaṃ –
භූතමිදං කළාරඤ්‌ච, දුවෙ ච ඤාණවත්‌ථූනි;
Bhūtamidaṃ kaḷārañca, duve ca ñāṇavatthūni;
අවිජ්‌ජාපච්‌චයා ච ද්‌වෙ, නතුම්‌හා චෙතනා තයොති.
Avijjāpaccayā ca dve, natumhā cetanā tayoti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. තතියචෙතනාසුත්‌තවණ්‌ණනා • 10. Tatiyacetanāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. තතියචෙතනාසුත්‌තවණ්‌ණනා • 10. Tatiyacetanāsuttavaṇṇanā
