| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. ததியதே³வசாரிகஸுத்தங்
10. Tatiyadevacārikasuttaṃ
1016. அத² கோ² ப⁴க³வா – ஸெய்யதா²பி நாம ப³லவா புரிஸோ ஸமிஞ்ஜிதங் வா பா³ஹங் பஸாரெய்ய, பஸாரிதங் வா பா³ஹங் ஸமிஞ்ஜெய்ய, ஏவமேவ – ஜேதவனே அந்தரஹிதோ தே³வேஸு தாவதிங்ஸேஸு பாதுரஹோஸி. அத² கோ² ஸம்ப³ஹுலா தாவதிங்ஸகாயிகா தே³வதாயோ யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்ட²ங்ஸு. ஏகமந்தங் டி²தா கோ² தா தே³வதாயோ ப⁴க³வா ஏதத³வோச –
1016. Atha kho bhagavā – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evameva – jetavane antarahito devesu tāvatiṃsesu pāturahosi. Atha kho sambahulā tāvatiṃsakāyikā devatāyo yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho tā devatāyo bhagavā etadavoca –
‘‘ஸாது⁴ கோ², ஆவுஸோ, பு³த்³தே⁴ அவேச்சப்பஸாதே³ன ஸமன்னாக³மனங் ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. பு³த்³தே⁴ அவேச்சப்பஸாதே³ன ஸமன்னாக³மனஹேது கோ², ஆவுஸோ, ஏவமிதே⁴கச்சே ஸத்தா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா. ஸாது⁴ கோ², ஆவுஸோ , த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³மனங் ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. அரியகந்தேஹி ஸீலேஹி ஸமன்னாக³மனஹேது கோ², ஆவுஸோ, ஏவமிதே⁴கச்சே ஸத்தா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’’தி.
‘‘Sādhu kho, āvuso, buddhe aveccappasādena samannāgamanaṃ hoti – itipi so bhagavā…pe… satthā devamanussānaṃ buddho bhagavāti. Buddhe aveccappasādena samannāgamanahetu kho, āvuso, evamidhekacce sattā sotāpannā avinipātadhammā niyatā sambodhiparāyaṇā. Sādhu kho, āvuso , dhamme…pe… saṅghe…pe… ariyakantehi sīlehi samannāgamanaṃ hoti akhaṇḍehi…pe… samādhisaṃvattanikehi. Ariyakantehi sīlehi samannāgamanahetu kho, āvuso, evamidhekacce sattā sotāpannā avinipātadhammā niyatā sambodhiparāyaṇā’’ti.
‘‘ஸாது⁴ கோ², மாரிஸ, பு³த்³தே⁴ அவேச்சப்பஸாதே³ன ஸமன்னாக³மனங் ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. பு³த்³தே⁴ அவேச்சப்பஸாதே³ன ஸமன்னாக³மனஹேது கோ², மாரிஸ, ஏவமயங் பஜா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா. ஸாது⁴ கோ², மாரிஸ, த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³மனங் ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. அரியகந்தேஹி ஸீலேஹி ஸமன்னாக³மனஹேது கோ², மாரிஸ, ஏவமயங் பஜா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’’தி. த³ஸமங்.
‘‘Sādhu kho, mārisa, buddhe aveccappasādena samannāgamanaṃ hoti – itipi so bhagavā…pe… satthā devamanussānaṃ buddho bhagavāti. Buddhe aveccappasādena samannāgamanahetu kho, mārisa, evamayaṃ pajā sotāpannā avinipātadhammā niyatā sambodhiparāyaṇā. Sādhu kho, mārisa, dhamme…pe… saṅghe…pe… ariyakantehi sīlehi samannāgamanaṃ hoti akhaṇḍehi…pe… samādhisaṃvattanikehi. Ariyakantehi sīlehi samannāgamanahetu kho, mārisa, evamayaṃ pajā sotāpannā avinipātadhammā niyatā sambodhiparāyaṇā’’ti. Dasamaṃ.
ராஜகாராமவக்³கோ³ து³தியோ.
Rājakārāmavaggo dutiyo.
தஸ்ஸுத்³தா³னங் –
Tassuddānaṃ –
ஸஹஸ்ஸப்³ராஹ்மணானந்த³ , து³க்³க³தி அபரே து³வே;
Sahassabrāhmaṇānanda , duggati apare duve;
மித்தாமச்சா து³வே வுத்தா, தயோ ச தே³வசாரிகாதி.
Mittāmaccā duve vuttā, tayo ca devacārikāti.
