| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. ততিযদেৰচারিকসুত্তং
10. Tatiyadevacārikasuttaṃ
১০১৬. অথ খো ভগৰা – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য, এৰমেৰ – জেতৰনে অন্তরহিতো দেৰেসু তাৰতিংসেসু পাতুরহোসি। অথ খো সম্বহুলা তাৰতিংসকাযিকা দেৰতাযো যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠংসু। একমন্তং ঠিতা খো তা দেৰতাযো ভগৰা এতদৰোচ –
1016. Atha kho bhagavā – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya, evameva – jetavane antarahito devesu tāvatiṃsesu pāturahosi. Atha kho sambahulā tāvatiṃsakāyikā devatāyo yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ aṭṭhaṃsu. Ekamantaṃ ṭhitā kho tā devatāyo bhagavā etadavoca –
‘‘সাধু খো, আৰুসো, বুদ্ধে অৰেচ্চপ্পসাদেন সমন্নাগমনং হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। বুদ্ধে অৰেচ্চপ্পসাদেন সমন্নাগমনহেতু খো, আৰুসো, এৰমিধেকচ্চে সত্তা সোতাপন্না অৰিনিপাতধম্মা নিযতা সম্বোধিপরাযণা। সাধু খো, আৰুসো , ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগমনং হোতি অখণ্ডেহি…পে॰… সমাধিসংৰত্তনিকেহি। অরিযকন্তেহি সীলেহি সমন্নাগমনহেতু খো, আৰুসো, এৰমিধেকচ্চে সত্তা সোতাপন্না অৰিনিপাতধম্মা নিযতা সম্বোধিপরাযণা’’তি।
‘‘Sādhu kho, āvuso, buddhe aveccappasādena samannāgamanaṃ hoti – itipi so bhagavā…pe… satthā devamanussānaṃ buddho bhagavāti. Buddhe aveccappasādena samannāgamanahetu kho, āvuso, evamidhekacce sattā sotāpannā avinipātadhammā niyatā sambodhiparāyaṇā. Sādhu kho, āvuso , dhamme…pe… saṅghe…pe… ariyakantehi sīlehi samannāgamanaṃ hoti akhaṇḍehi…pe… samādhisaṃvattanikehi. Ariyakantehi sīlehi samannāgamanahetu kho, āvuso, evamidhekacce sattā sotāpannā avinipātadhammā niyatā sambodhiparāyaṇā’’ti.
‘‘সাধু খো, মারিস, বুদ্ধে অৰেচ্চপ্পসাদেন সমন্নাগমনং হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। বুদ্ধে অৰেচ্চপ্পসাদেন সমন্নাগমনহেতু খো, মারিস, এৰমযং পজা সোতাপন্না অৰিনিপাতধম্মা নিযতা সম্বোধিপরাযণা। সাধু খো, মারিস, ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগমনং হোতি অখণ্ডেহি…পে॰… সমাধিসংৰত্তনিকেহি। অরিযকন্তেহি সীলেহি সমন্নাগমনহেতু খো, মারিস, এৰমযং পজা সোতাপন্না অৰিনিপাতধম্মা নিযতা সম্বোধিপরাযণা’’তি। দসমং।
‘‘Sādhu kho, mārisa, buddhe aveccappasādena samannāgamanaṃ hoti – itipi so bhagavā…pe… satthā devamanussānaṃ buddho bhagavāti. Buddhe aveccappasādena samannāgamanahetu kho, mārisa, evamayaṃ pajā sotāpannā avinipātadhammā niyatā sambodhiparāyaṇā. Sādhu kho, mārisa, dhamme…pe… saṅghe…pe… ariyakantehi sīlehi samannāgamanaṃ hoti akhaṇḍehi…pe… samādhisaṃvattanikehi. Ariyakantehi sīlehi samannāgamanahetu kho, mārisa, evamayaṃ pajā sotāpannā avinipātadhammā niyatā sambodhiparāyaṇā’’ti. Dasamaṃ.
রাজকারামৰগ্গো দুতিযো।
Rājakārāmavaggo dutiyo.
তস্সুদ্দানং –
Tassuddānaṃ –
সহস্সব্রাহ্মণানন্দ , দুগ্গতি অপরে দুৰে।
Sahassabrāhmaṇānanda , duggati apare duve;
মিত্তামচ্চা দুৰে ৰুত্তা, তযো চ দেৰচারিকাতি॥
Mittāmaccā duve vuttā, tayo ca devacārikāti.
