| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. ததியகி³லானஸுத்தங்
6. Tatiyagilānasuttaṃ
197. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ப⁴க³வா ஆபா³தி⁴கோ ஹோதி து³க்கி²தோ பா³ள்ஹகி³லானோ. அத² கோ² ஆயஸ்மா மஹாசுந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் மஹாசுந்த³ங் ப⁴க³வா ஏதத³வோச – ‘‘படிப⁴ந்து தங், சுந்த³, பொ³ஜ்ஜ²ங்கா³’’தி.
197. Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena bhagavā ābādhiko hoti dukkhito bāḷhagilāno. Atha kho āyasmā mahācundo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ mahācundaṃ bhagavā etadavoca – ‘‘paṭibhantu taṃ, cunda, bojjhaṅgā’’ti.
‘‘ஸத்திமே, ப⁴ந்தே, பொ³ஜ்ஜ²ங்கா³ ப⁴க³வதா ஸம்மத³க்கா²தா பா⁴விதா ப³ஹுலீகதா அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்தந்தி. கதமே ஸத்த? ஸதிஸம்பொ³ஜ்ஜ²ங்கோ³ கோ², ப⁴ந்தே, ப⁴க³வதா ஸம்மத³க்கா²தோ பா⁴விதோ ப³ஹுலீகதோ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி…பே॰… உபெக்கா²ஸம்பொ³ஜ்ஜ²ங்கோ³ கோ², ப⁴ந்தே, ப⁴க³வதா ஸம்மத³க்கா²தோ பா⁴விதோ ப³ஹுலீகதோ அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. இமே கோ², ப⁴ந்தே, ஸத்த பொ³ஜ்ஜ²ங்கா³ ப⁴க³வதா ஸம்மத³க்கா²தா பா⁴விதா ப³ஹுலீகதா அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்தந்தீ’’தி. ‘‘தக்³க⁴ , சுந்த³, பொ³ஜ்ஜ²ங்கா³; தக்³க⁴, சுந்த³, பொ³ஜ்ஜ²ங்கா³’’தி.
‘‘Sattime, bhante, bojjhaṅgā bhagavatā sammadakkhātā bhāvitā bahulīkatā abhiññāya sambodhāya nibbānāya saṃvattanti. Katame satta? Satisambojjhaṅgo kho, bhante, bhagavatā sammadakkhāto bhāvito bahulīkato abhiññāya sambodhāya nibbānāya saṃvattati…pe… upekkhāsambojjhaṅgo kho, bhante, bhagavatā sammadakkhāto bhāvito bahulīkato abhiññāya sambodhāya nibbānāya saṃvattati. Ime kho, bhante, satta bojjhaṅgā bhagavatā sammadakkhātā bhāvitā bahulīkatā abhiññāya sambodhāya nibbānāya saṃvattantī’’ti. ‘‘Taggha , cunda, bojjhaṅgā; taggha, cunda, bojjhaṅgā’’ti.
இத³மவோசாயஸ்மா சுந்தோ³. ஸமனுஞ்ஞோ ஸத்தா² அஹோஸி. வுட்ட²ஹி ச ப⁴க³வா தம்ஹா ஆபா³தா⁴. ததா²பஹீனோ ச ப⁴க³வதோ ஸோ ஆபா³தோ⁴ அஹோஸீதி. ச²ட்ட²ங்.
Idamavocāyasmā cundo. Samanuñño satthā ahosi. Vuṭṭhahi ca bhagavā tamhā ābādhā. Tathāpahīno ca bhagavato so ābādho ahosīti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-10. பட²மகி³லானஸுத்தாதி³வண்ணனா • 4-10. Paṭhamagilānasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-10. பட²மகி³லானஸுத்தாதி³வண்ணனா • 4-10. Paṭhamagilānasuttādivaṇṇanā
