| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. ততিযগিঞ্জকাৰসথসুত্তং
10. Tatiyagiñjakāvasathasuttaṃ
১০০৬. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘কক্কটো নাম, ভন্তে, ঞাতিকে উপাসকো কালঙ্কতো; তস্স কা গতি, কো অভিসম্পরাযো? কল়িভো নাম, ভন্তে, ঞাতিকে উপাসকো…পে॰… নিকতো নাম, ভন্তে, ঞাতিকে উপাসকো…পে॰… কটিস্সহো নাম, ভন্তে, ঞাতিকে উপাসকো…পে॰… তুট্ঠো নাম, ভন্তে, ঞাতিকে উপাসকো…পে॰… সন্তুট্ঠো নাম, ভন্তে, ঞাতিকে উপাসকো…পে॰… ভদ্দো নাম, ভন্তে, ঞাতিকে উপাসকো…পে॰… সুভদ্দো নাম, ভন্তে, ঞাতিকে উপাসকো কালঙ্কতো; তস্স কা গতি কো অভিসম্পরাযো’’তি?
1006. Ekamantaṃ nisinno kho āyasmā ānando bhagavantaṃ etadavoca – ‘‘kakkaṭo nāma, bhante, ñātike upāsako kālaṅkato; tassa kā gati, ko abhisamparāyo? Kaḷibho nāma, bhante, ñātike upāsako…pe… nikato nāma, bhante, ñātike upāsako…pe… kaṭissaho nāma, bhante, ñātike upāsako…pe… tuṭṭho nāma, bhante, ñātike upāsako…pe… santuṭṭho nāma, bhante, ñātike upāsako…pe… bhaddo nāma, bhante, ñātike upāsako…pe… subhaddo nāma, bhante, ñātike upāsako kālaṅkato; tassa kā gati ko abhisamparāyo’’ti?
‘‘কক্কটো , আনন্দ, উপাসকো কালঙ্কতো পঞ্চন্নং ওরম্ভাগিযানং সংযোজনানং পরিক্খযা ওপপাতিকো তত্থ পরিনিব্বাযী অনাৰত্তিধম্মো তস্মা লোকা। কল়িভো, আনন্দ …পে॰… নিকতো, আনন্দ…পে॰… কটিস্সহো, আনন্দ …পে॰… তুট্ঠো, আনন্দ…পে॰… সন্তুট্ঠো, আনন্দ…পে॰… ভদ্দো, আনন্দ…পে॰… সুভদ্দো, আনন্দ, উপাসকো কালঙ্কতো পঞ্চন্নং ওরম্ভাগিযানং সংযোজনানং পরিক্খযা ওপপাতিকো তত্থ পরিনিব্বাযী অনাৰত্তিধম্মো তস্মা লোকা। (সব্বে একগতিকা কাতব্বা)।
‘‘Kakkaṭo , ānanda, upāsako kālaṅkato pañcannaṃ orambhāgiyānaṃ saṃyojanānaṃ parikkhayā opapātiko tattha parinibbāyī anāvattidhammo tasmā lokā. Kaḷibho, ānanda …pe… nikato, ānanda…pe… kaṭissaho, ānanda …pe… tuṭṭho, ānanda…pe… santuṭṭho, ānanda…pe… bhaddo, ānanda…pe… subhaddo, ānanda, upāsako kālaṅkato pañcannaṃ orambhāgiyānaṃ saṃyojanānaṃ parikkhayā opapātiko tattha parinibbāyī anāvattidhammo tasmā lokā. (Sabbe ekagatikā kātabbā).
‘‘পরোপঞ্ঞাস, আনন্দ, ঞাতিকে উপাসকা কালঙ্কতা পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনো অনাৰত্তিধম্মা তস্মা লোকা। সাধিকনৰুতি, আনন্দ, ঞাতিকে উপাসকা কালঙ্কতা তিণ্ণং সংযোজনানং পরিক্খযা রাগদোসমোহানং তনুত্তা সকদাগামিনো; সকিদেৰ ইমং লোকং আগন্ত্ৰা দুক্খস্সন্তং করিস্সন্তি। ছাতিরেকানি খো, আনন্দ, পঞ্চসতানি ঞাতিকে উপাসকা কালঙ্কতা তিণ্ণং সংযোজনানং পরিক্খযা সোতাপন্না অৰিনিপাতধম্মা নিযতা সম্বোধিপরাযণা।
‘‘Paropaññāsa, ānanda, ñātike upāsakā kālaṅkatā pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā. Sādhikanavuti, ānanda, ñātike upāsakā kālaṅkatā tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino; sakideva imaṃ lokaṃ āgantvā dukkhassantaṃ karissanti. Chātirekāni kho, ānanda, pañcasatāni ñātike upāsakā kālaṅkatā tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyaṇā.
‘‘অনচ্ছরিযং খো পনেতং, আনন্দ, যং মনুস্সভূতো কালং করেয্য; তস্মিং তস্মিং চে মং কালঙ্কতে উপসঙ্কমিত্ৰা এতমত্থং পটিপুচ্ছিস্সথ। ৰিহেসা পেসা, আনন্দ, অস্স তথাগতস্স। তস্মাতিহানন্দ, ধম্মাদাসং নাম ধম্মপরিযাযং দেসেস্সামি; যেন সমন্নাগতো অরিযসাৰকো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’।
‘‘Anacchariyaṃ kho panetaṃ, ānanda, yaṃ manussabhūto kālaṃ kareyya; tasmiṃ tasmiṃ ce maṃ kālaṅkate upasaṅkamitvā etamatthaṃ paṭipucchissatha. Vihesā pesā, ānanda, assa tathāgatassa. Tasmātihānanda, dhammādāsaṃ nāma dhammapariyāyaṃ desessāmi; yena samannāgato ariyasāvako ākaṅkhamāno attanāva attānaṃ byākareyya – ‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’’’.
‘‘কতমো চ সো, আনন্দ, ধম্মাদাসো ধম্মপরিযাযো; যেন সমন্নাগতো অরিযসাৰকো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’।
‘‘Katamo ca so, ānanda, dhammādāso dhammapariyāyo; yena samannāgato ariyasāvako ākaṅkhamāno attanāva attānaṃ byākareyya – ‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’’’.
‘‘ইধানন্দ , অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতো হোতি অখণ্ডেহি…পে॰… সমাধিসংৰত্তনিকেহি। অযং খো সো, আনন্দ, ধম্মাদাসো ধম্মপরিযাযো; যেন সমন্নাগতো অরিযসাৰকো আকঙ্খমানো অত্তনাৰ অত্তানং ব্যাকরেয্য – ‘খীণনিরযোম্হি খীণতিরচ্ছানযোনি খীণপেত্তিৰিসযো খীণাপাযদুগ্গতিৰিনিপাতো, সোতাপন্নোহমস্মি অৰিনিপাতধম্মো নিযতো সম্বোধিপরাযণো’’’তি। দসমং।
‘‘Idhānanda , ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Ayaṃ kho so, ānanda, dhammādāso dhammapariyāyo; yena samannāgato ariyasāvako ākaṅkhamāno attanāva attānaṃ byākareyya – ‘khīṇanirayomhi khīṇatiracchānayoni khīṇapettivisayo khīṇāpāyaduggativinipāto, sotāpannohamasmi avinipātadhammo niyato sambodhiparāyaṇo’’’ti. Dasamaṃ.
ৰেল়ুদ্ৰারৰগ্গো পঠমো।
Veḷudvāravaggo paṭhamo.
তস্সুদ্দানং –
Tassuddānaṃ –
রাজা ওগধদীঘাৰু, সারিপুত্তাপরে দুৰে।
Rājā ogadhadīghāvu, sāriputtāpare duve;
থপতী ৰেল়ুদ্ৰারেয্যা, গিঞ্জকাৰসথে তযোতি॥
Thapatī veḷudvāreyyā, giñjakāvasathe tayoti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. ততিযগিঞ্জকাৰসথসুত্তৰণ্ণনা • 10. Tatiyagiñjakāvasathasuttavaṇṇanā
