| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၃. တတိယဈာနပဉ္ဟာသုတ္တံ
3. Tatiyajhānapañhāsuttaṃ
၃၃၄. ‘‘‘တတိယံ ဈာနံ, တတိယံ ဈာန’န္တိ ဝုစ္စတိ။ ကတမံ နု ခော တတိယံ ဈာနန္တိ? တသ္သ မယ္ဟံ, အာဝုသော, ဧတဒဟောသိ – ဣဓ ဘိက္ခု ပီတိယာ စ ဝိရာဂာ ဥပေက္ခကော စ ဝိဟရတိ သတော စ သမ္ပဇာနော သုခဉ္စ ကာယေန ပဋိသံဝေဒေတိ, ယံ တံ အရိယာ အာစိက္ခန္တိ – ‘ဥပေက္ခကော သတိမာ သုခဝိဟာရီ’တိ တတိယံ ဈာနံ ဥပသမ္ပဇ္ဇ ဝိဟရတိ။ ဣဒံ ဝုစ္စတိ တတိယံ ဈာနန္တိ။ သော ခ္ဝာဟံ, အာဝုသော, ပီတိယာ စ ဝိရာဂာ ဥပေက္ခကော စ ဝိဟရာမိ သတော စ သမ္ပဇာနော သုခဉ္စ ကာယေန ပဋိသံဝေဒေမိ။ ယံ တံ အရိယာ အာစိက္ခန္တိ – ‘ဥပေက္ခကော သတိမာ သုခဝိဟာရီ’တိ တတိယံ ဈာနံ ဥပသမ္ပဇ္ဇ ဝိဟရာမိ။ တသ္သ မယ္ဟံ, အာဝုသော, ဣမိနာ ဝိဟာရေန ဝိဟရတော ပီတိသဟဂတာ သညာမနသိကာရာ သမုဒာစရန္တိ။
334. ‘‘‘Tatiyaṃ jhānaṃ, tatiyaṃ jhāna’nti vuccati. Katamaṃ nu kho tatiyaṃ jhānanti? Tassa mayhaṃ, āvuso, etadahosi – idha bhikkhu pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti, yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja viharati. Idaṃ vuccati tatiyaṃ jhānanti. So khvāhaṃ, āvuso, pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi. Yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja viharāmi. Tassa mayhaṃ, āvuso, iminā vihārena viharato pītisahagatā saññāmanasikārā samudācaranti.
‘‘အထ ခော မံ, အာဝုသော, ဘဂဝာ ဣဒ္ဓိယာ ဥပသင္ကမိတ္ဝာ ဧတဒဝောစ – ‘မောဂ္ဂလ္လာန, မောဂ္ဂလ္လာန! မာ, ဗ္ရာဟ္မဏ, တတိယံ ဈာနံ ပမာဒော, တတိယေ ဈာနေ စိတ္တံ သဏ္ဌပေဟိ, တတိယေ ဈာနေ စိတ္တံ ဧကောဒိံ ကရောဟိ, တတိယေ ဈာနေ စိတ္တံ သမာဒဟာ’တိ။ သော ခ္ဝာဟံ, အာဝုသော, အပရေန သမယေန ပီတိယာ စ ဝိရာဂာ ဥပေက္ခကော စ ဝိဟရာမိ သတော စ သမ္ပဇာနော သုခဉ္စ ကာယေန ပဋိသံဝေဒေမိ, ယံ တံ အရိယာ အာစိက္ခန္တိ – ‘ဥပေက္ခကော သတိမာ သုခဝိဟာရီ’တိ တတိယံ ဈာနံ ဥပသမ္ပဇ္ဇ ဝိဟာသိံ။ ယဉ္ဟိ တံ အာဝုသော သမ္မာ ဝဒမာနော ဝဒေယ္ယ။ပေ.။ မဟာဘိညတံ ပတ္တော’’တိ။ တတိယံ။
‘‘Atha kho maṃ, āvuso, bhagavā iddhiyā upasaṅkamitvā etadavoca – ‘moggallāna, moggallāna! Mā, brāhmaṇa, tatiyaṃ jhānaṃ pamādo, tatiye jhāne cittaṃ saṇṭhapehi, tatiye jhāne cittaṃ ekodiṃ karohi, tatiye jhāne cittaṃ samādahā’ti. So khvāhaṃ, āvuso, aparena samayena pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi, yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja vihāsiṃ. Yañhi taṃ āvuso sammā vadamāno vadeyya…pe… mahābhiññataṃ patto’’ti. Tatiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၈. ပဌမဈာနပဉ္ဟာသုတ္တာဒိဝဏ္ဏနာ • 1-8. Paṭhamajhānapañhāsuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၈. ပဌမဇ္ဈာနပဉ္ဟသုတ္တာဒိဝဏ္ဏနာ • 1-8. Paṭhamajjhānapañhasuttādivaṇṇanā
