| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. තතියකණ්‌ඩකීසුත්‌තං
6. Tatiyakaṇḍakīsuttaṃ
904. සාකෙතනිදානං. එකමන්‌තං නිසින්‌නො ඛො ආයස්‌මා සාරිපුත්‌තො ආයස්‌මන්‌තං අනුරුද්‌ධං එතදවොච – ‘‘කතමෙසං ආයස්‌මා අනුරුද්‌ධො ධම්‌මානං භාවිතත්‌තා බහුලීකතත්‌තා මහාභිඤ්‌ඤතං පත්‌තො’’ති? ‘‘චතුන්‌නං ඛ්‌වාහං, ආවුසො, සතිපට්‌ඨානානං භාවිතත්‌තා බහුලීකතත්‌තා මහාභිඤ්‌ඤතං පත්‌තො . කතමෙසං චතුන්‌නං? ඉධාහං, ආවුසො, කායෙ කායානුපස්‌සී විහරාමි ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරාමි ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං – ඉමෙසං ඛ්‌වාහං, ආවුසො, චතුන්‌නං සතිපට්‌ඨානානං භාවිතත්‌තා බහුලීකතත්‌තා මහාභිඤ්‌ඤතං පත්‌තො. ඉමෙසඤ්‌ච පනාහං, ආවුසො, චතුන්‌නං සතිපට්‌ඨානානං භාවිතත්‌තා බහුලීකතත්‌තා සහස්‌සං ලොකං අභිජානාමී’’ති. ඡට්‌ඨං.
904. Sāketanidānaṃ. Ekamantaṃ nisinno kho āyasmā sāriputto āyasmantaṃ anuruddhaṃ etadavoca – ‘‘katamesaṃ āyasmā anuruddho dhammānaṃ bhāvitattā bahulīkatattā mahābhiññataṃ patto’’ti? ‘‘Catunnaṃ khvāhaṃ, āvuso, satipaṭṭhānānaṃ bhāvitattā bahulīkatattā mahābhiññataṃ patto . Katamesaṃ catunnaṃ? Idhāhaṃ, āvuso, kāye kāyānupassī viharāmi ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharāmi ātāpī sampajāno satimā, vineyya loke abhijjhādomanassaṃ – imesaṃ khvāhaṃ, āvuso, catunnaṃ satipaṭṭhānānaṃ bhāvitattā bahulīkatattā mahābhiññataṃ patto. Imesañca panāhaṃ, āvuso, catunnaṃ satipaṭṭhānānaṃ bhāvitattā bahulīkatattā sahassaṃ lokaṃ abhijānāmī’’ti. Chaṭṭhaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4-7. පඨමකණ්‌ඩකීසුත්‌තාදිවණ්‌ණනා • 4-7. Paṭhamakaṇḍakīsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4-7. පඨමකණ්‌ඩකීසුත්‌තාදිවණ්‌ණනා • 4-7. Paṭhamakaṇḍakīsuttādivaṇṇanā
