| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
3. ததியகதி²னஸிக்கா²பத³ங்
3. Tatiyakathinasikkhāpadaṃ
497. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரஸ்ஸ பி⁴க்கு²னோ அகாலசீவரங் உப்பன்னங் ஹோதி. தஸ்ஸ தங் சீவரங் கயிரமானங் நப்பஹோதி. அத² கோ² ஸோ பி⁴க்கு² தங் சீவரங் உஸ்ஸாபெத்வா புனப்புனங் விமஜ்ஜதி. அத்³த³ஸா கோ² ப⁴க³வா ஸேனாஸனசாரிகங் ஆஹிண்ட³ந்தோ தங் பி⁴க்கு²ங் தங் சீவரங் உஸ்ஸாபெத்வா புனப்புனங் விமஜ்ஜந்தங். தி³ஸ்வான யேன ஸோ பி⁴க்கு² தேனுபஸங்கமி; உபஸங்கமித்வா தங் பி⁴க்கு²ங் ஏதத³வோச – ‘‘கிஸ்ஸ த்வங், பி⁴க்கு², இமங் சீவரங் உஸ்ஸாபெத்வா புனப்புனங் விமஜ்ஜஸீ’’தி? ‘‘இத³ங் மே, ப⁴ந்தே, அகாலசீவரங் உப்பன்னங். கயிரமானங் நப்பஹோதி. தேனாஹங் இமங் சீவரங் உஸ்ஸாபெத்வா புனப்புனங் விமஜ்ஜாமீ’’தி. ‘‘அத்தி² பன தே, பி⁴க்கு², சீவரபச்சாஸா’’தி? ‘‘அத்தி², ப⁴க³வா’’தி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா, பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அகாலசீவரங் படிக்³க³ஹெத்வா சீவரபச்சாஸா நிக்கி²பிது’’ந்தி.
497. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa bhikkhuno akālacīvaraṃ uppannaṃ hoti. Tassa taṃ cīvaraṃ kayiramānaṃ nappahoti. Atha kho so bhikkhu taṃ cīvaraṃ ussāpetvā punappunaṃ vimajjati. Addasā kho bhagavā senāsanacārikaṃ āhiṇḍanto taṃ bhikkhuṃ taṃ cīvaraṃ ussāpetvā punappunaṃ vimajjantaṃ. Disvāna yena so bhikkhu tenupasaṅkami; upasaṅkamitvā taṃ bhikkhuṃ etadavoca – ‘‘kissa tvaṃ, bhikkhu, imaṃ cīvaraṃ ussāpetvā punappunaṃ vimajjasī’’ti? ‘‘Idaṃ me, bhante, akālacīvaraṃ uppannaṃ. Kayiramānaṃ nappahoti. Tenāhaṃ imaṃ cīvaraṃ ussāpetvā punappunaṃ vimajjāmī’’ti. ‘‘Atthi pana te, bhikkhu, cīvarapaccāsā’’ti? ‘‘Atthi, bhagavā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā, bhikkhū āmantesi – ‘‘anujānāmi, bhikkhave, akālacīvaraṃ paṭiggahetvā cīvarapaccāsā nikkhipitu’’nti.
498. தேன கோ² பன ஸமயேன பி⁴க்கூ² – ‘‘ப⁴க³வதா அனுஞ்ஞாதங் அகாலசீவரங் படிக்³க³ஹெத்வா சீவரபச்சாஸா நிக்கி²பிது’’ந்தி அகாலசீவரானி படிக்³க³ஹெத்வா அதிரேகமாஸங் நிக்கி²பந்தி. தானி சீவரானி சீவரவங்ஸே ப⁴ண்டி³காப³த்³தா⁴னி திட்ட²ந்தி. அத்³த³ஸா கோ² ஆயஸ்மா ஆனந்தோ³ ஸேனாஸனசாரிகங் ஆஹிண்ட³ந்தோ தானி சீவரானி சீவரவங்ஸே ப⁴ண்டி³காப³த்³தா⁴னி திட்ட²ந்தே. தி³ஸ்வான பி⁴க்கூ² ஆமந்தேஸி – ‘‘கஸ்ஸிமானி, ஆவுஸோ, சீவரானி சீவரவங்ஸே ப⁴ண்டி³காப³த்³தா⁴னி திட்ட²ந்தீ’’தி? ‘‘அம்ஹாகங், ஆவுஸோ, அகாலசீவரானி சீவரபச்சாஸா நிக்கி²த்தானீ’’தி. ‘‘கீவசிரங் பனாவுஸோ, இமானி சீவரானி நிக்கி²த்தானீ’’தி? ‘‘அதிரேகமாஸங், ஆவுஸோ’’தி. ஆயஸ்மா ஆனந்தோ³ உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கூ² அகாலசீவரங் படிக்³க³ஹெத்வா அதிரேகமாஸங் நிக்கி²பிஸ்ஸந்தீ’’தி! அத² கோ² ஆயஸ்மா ஆனந்தோ³ தே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸி…பே॰… ‘‘ஸச்சங் கிர, பி⁴க்க²வே, பி⁴க்கூ² அகாலசீவரங் படிக்³க³ஹெத்வா அதிரேகமாஸங் நிக்கி²பந்தீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தே, பி⁴க்க²வே, மோக⁴புரிஸா அகாலசீவரங் படிக்³க³ஹெத்வா அதிரேகமாஸங் நிக்கி²பிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
498. Tena kho pana samayena bhikkhū – ‘‘bhagavatā anuññātaṃ akālacīvaraṃ paṭiggahetvā cīvarapaccāsā nikkhipitu’’nti akālacīvarāni paṭiggahetvā atirekamāsaṃ nikkhipanti. Tāni cīvarāni cīvaravaṃse bhaṇḍikābaddhāni tiṭṭhanti. Addasā kho āyasmā ānando senāsanacārikaṃ āhiṇḍanto tāni cīvarāni cīvaravaṃse bhaṇḍikābaddhāni tiṭṭhante. Disvāna bhikkhū āmantesi – ‘‘kassimāni, āvuso, cīvarāni cīvaravaṃse bhaṇḍikābaddhāni tiṭṭhantī’’ti? ‘‘Amhākaṃ, āvuso, akālacīvarāni cīvarapaccāsā nikkhittānī’’ti. ‘‘Kīvaciraṃ panāvuso, imāni cīvarāni nikkhittānī’’ti? ‘‘Atirekamāsaṃ, āvuso’’ti. Āyasmā ānando ujjhāyati khiyyati vipāceti – ‘‘kathañhi nāma bhikkhū akālacīvaraṃ paṭiggahetvā atirekamāsaṃ nikkhipissantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… ‘‘saccaṃ kira, bhikkhave, bhikkhū akālacīvaraṃ paṭiggahetvā atirekamāsaṃ nikkhipantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā akālacīvaraṃ paṭiggahetvā atirekamāsaṃ nikkhipissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
499. ‘‘நிட்டி²தசீவரஸ்மிங் பி⁴க்கு²னா உப்³ப⁴தஸ்மிங் கதி²னே பி⁴க்கு²னோ பனேவ அகாலசீவரங் உப்பஜ்ஜெய்ய, ஆகங்க²மானேன பி⁴க்கு²னா படிக்³க³ஹேதப்³ப³ங். படிக்³க³ஹெத்வா கி²ப்பமேவ காரேதப்³ப³ங். நோசஸ்ஸ பாரிபூரி, மாஸபரமங் தேன பி⁴க்கு²னா தங் சீவரங் நிக்கி²பிதப்³ப³ங் ஊனஸ்ஸ பாரிபூரியா ஸதியா பச்சாஸாய. ததோ சே உத்தரி 1 நிக்கி²பெய்ய, ஸதியாபி பச்சாஸாய, நிஸ்ஸக்³கி³யங் பாசித்திய’’ந்தி.
499.‘‘Niṭṭhitacīvarasmiṃbhikkhunā ubbhatasmiṃ kathine bhikkhuno paneva akālacīvaraṃ uppajjeyya, ākaṅkhamānena bhikkhunā paṭiggahetabbaṃ. Paṭiggahetvā khippameva kāretabbaṃ. Nocassa pāripūri, māsaparamaṃ tena bhikkhunā taṃ cīvaraṃ nikkhipitabbaṃ ūnassa pāripūriyā satiyā paccāsāya. Tato ce uttari 2 nikkhipeyya, satiyāpi paccāsāya, nissaggiyaṃ pācittiya’’nti.
500. நிட்டி²தசீவரஸ்மிந்தி பி⁴க்கு²னோ சீவரங் கதங் வா ஹோதி நட்ட²ங் வா வினட்ட²ங் வா த³ட்³ட⁴ங் வா சீவராஸா வா உபச்சி²ன்னா.
500.Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
உப்³ப⁴தஸ்மிங் கதி²னேதி அட்ட²ன்னங் மாதிகானங் அஞ்ஞதராய மாதிகாய உப்³ப⁴தங் ஹோதி, ஸங்கே⁴ன வா அந்தரா உப்³ப⁴தங் ஹோதி.
Ubbhatasmiṃ kathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
அகாலசீவரங் நாம அனத்த²தே கதி²னே ஏகாத³ஸமாஸே உப்பன்னங், அத்த²தே கதி²னே ஸத்தமாஸே உப்பன்னங், காலேபி ஆதி³ஸ்ஸ தி³ன்னங், ஏதங் அகாலசீவரங் நாம.
Akālacīvaraṃ nāma anatthate kathine ekādasamāse uppannaṃ, atthate kathine sattamāse uppannaṃ, kālepi ādissa dinnaṃ, etaṃ akālacīvaraṃ nāma.
உப்பஜ்ஜெய்யாதி உப்பஜ்ஜெய்ய ஸங்க⁴தோ வா க³ணதோ வா ஞாதிதோ வா மித்ததோ வா பங்ஸுகூலங் வா அத்தனோ வா த⁴னேன.
Uppajjeyyāti uppajjeyya saṅghato vā gaṇato vā ñātito vā mittato vā paṃsukūlaṃ vā attano vā dhanena.
ஆகங்க²மானேனாதி இச்ச²மானேன படிக்³க³ஹேதப்³ப³ங்.
Ākaṅkhamānenāti icchamānena paṭiggahetabbaṃ.
படிக்³க³ஹெத்வா கி²ப்பமேவ காரேதப்³ப³ந்தி த³ஸாஹா காரேதப்³ப³ங்.
Paṭiggahetvā khippameva kāretabbanti dasāhā kāretabbaṃ.
நோ சஸ்ஸ பாரிபூரீதி கயிரமானங் நப்பஹோதி.
No cassa pāripūrīti kayiramānaṃ nappahoti.
மாஸபரமங் தேன பி⁴க்கு²னா தங் சீவரங் நிக்கி²பிதப்³ப³ந்தி மாஸபரமதா நிக்கி²பிதப்³ப³ங்.
Māsaparamaṃ tena bhikkhunā taṃ cīvaraṃ nikkhipitabbanti māsaparamatā nikkhipitabbaṃ.
ஊனஸ்ஸ பாரிபூரியாதி ஊனஸ்ஸ பாரிபூரத்தா²ய.
Ūnassa pāripūriyāti ūnassa pāripūratthāya.
ஸதியா பச்சாஸாயாதி பச்சாஸா ஹோதி ஸங்க⁴தோ வா க³ணதோ வா ஞாதிதோ வா மித்ததோ வா பங்ஸுகூலங் வா அத்தனோ வா த⁴னேன.
Satiyā paccāsāyāti paccāsā hoti saṅghato vā gaṇato vā ñātito vā mittato vā paṃsukūlaṃ vā attano vā dhanena.
ததோ சே உத்தரி நிக்கி²பெய்ய ஸதியாபி பச்சாஸாயாதி தத³ஹுப்பன்னே மூலசீவரே பச்சாஸாசீவரங் உப்பஜ்ஜதி, த³ஸாஹா காரேதப்³ப³ங். த்³வீஹுப்பன்னே மூலசீவரே பச்சாஸாசீவரங் உப்பஜ்ஜதி, த³ஸாஹா காரேதப்³ப³ங். தீஹுப்பன்னே மூலசீவரே…பே॰… சதூஹுப்பன்னே… பஞ்சாஹுப்பன்னே… சா²ஹுப்பன்னே… ஸத்தாஹுப்பன்னே… அட்டா²ஹுப்பன்னே … நவாஹுப்பன்னே… த³ஸாஹுப்பன்னே மூலசீவரே பச்சாஸாசீவரங் உப்பஜ்ஜதி, த³ஸாஹா காரேதப்³ப³ங் . ஏகாத³ஸே உப்பன்னே…பே॰… த்³வாத³ஸே உப்பன்னே… தேரஸே உப்பன்னே… சுத்³த³ஸே உப்பன்னே… பன்னரஸே உப்பன்னே… ஸோளஸே உப்பன்னே… ஸத்தரஸே உப்பன்னே… அட்டா²ரஸே உப்பன்னே… ஏகூனவீஸே உப்பன்னே… வீஸே உப்பன்னே மூலசீவரே பச்சாஸாசீவரங் உப்பஜ்ஜதி, த³ஸாஹா காரேதப்³ப³ங். ஏகவீஸே உப்பன்னே மூலசீவரே பச்சாஸாசீவரங் உப்பஜ்ஜதி, நவாஹா காரேதப்³ப³ங். த்³வாவீஸே உப்பன்னே…பே॰… தேவீஸே உப்பன்னே… சதுவீஸே உப்பன்னே… பஞ்சவீஸே உப்பன்னே… ச²ப்³பீ³ஸே உப்பன்னே… ஸத்தவீஸே உப்பன்னே… அட்ட²வீஸே உப்பன்னே… ஏகூனதிங்ஸே உப்பன்னே மூலசீவரே பச்சாஸாசீவரங் உப்பஜ்ஜதி, ஏகாஹங் காரேதப்³ப³ங்… திங்ஸே உப்பன்னே மூலசீவரே பச்சாஸாசீவரங் உப்பஜ்ஜதி , தத³ஹேவ அதி⁴ட்டா²தப்³ப³ங் விகப்பேதப்³ப³ங் விஸ்ஸஜ்ஜேதப்³ப³ங். நோ சே அதி⁴ட்டெ²ய்ய வா விகப்பெய்ய வா விஸ்ஸஜ்ஜெய்ய வா, ஏகதிங்ஸே அருணுக்³க³மனே நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, அகாலசீவரங் மாஸாதிக்கந்தங் நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Tato ce uttari nikkhipeyya satiyāpi paccāsāyāti tadahuppanne mūlacīvare paccāsācīvaraṃ uppajjati, dasāhā kāretabbaṃ. Dvīhuppanne mūlacīvare paccāsācīvaraṃ uppajjati, dasāhā kāretabbaṃ. Tīhuppanne mūlacīvare…pe… catūhuppanne… pañcāhuppanne… chāhuppanne… sattāhuppanne… aṭṭhāhuppanne … navāhuppanne… dasāhuppanne mūlacīvare paccāsācīvaraṃ uppajjati, dasāhā kāretabbaṃ . Ekādase uppanne…pe… dvādase uppanne… terase uppanne… cuddase uppanne… pannarase uppanne… soḷase uppanne… sattarase uppanne… aṭṭhārase uppanne… ekūnavīse uppanne… vīse uppanne mūlacīvare paccāsācīvaraṃ uppajjati, dasāhā kāretabbaṃ. Ekavīse uppanne mūlacīvare paccāsācīvaraṃ uppajjati, navāhā kāretabbaṃ. Dvāvīse uppanne…pe… tevīse uppanne… catuvīse uppanne… pañcavīse uppanne… chabbīse uppanne… sattavīse uppanne… aṭṭhavīse uppanne… ekūnatiṃse uppanne mūlacīvare paccāsācīvaraṃ uppajjati, ekāhaṃ kāretabbaṃ… tiṃse uppanne mūlacīvare paccāsācīvaraṃ uppajjati , tadaheva adhiṭṭhātabbaṃ vikappetabbaṃ vissajjetabbaṃ. No ce adhiṭṭheyya vā vikappeyya vā vissajjeyya vā, ekatiṃse aruṇuggamane nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, akālacīvaraṃ māsātikkantaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
விஸபா⁴கே³ உப்பன்னே மூலசீவரே பச்சாஸாசீவரங் உப்பஜ்ஜதி, ரத்தியோ ச ஸேஸா ஹொந்தி, ந அகாமா காரேதப்³ப³ங்.
Visabhāge uppanne mūlacīvare paccāsācīvaraṃ uppajjati, rattiyo ca sesā honti, na akāmā kāretabbaṃ.
501. மாஸாதிக்கந்தே அதிக்கந்தஸஞ்ஞீ, நிஸ்ஸக்³கி³யங் பாசித்தியங். மாஸாதிக்கந்தே வேமதிகோ நிஸ்ஸக்³கி³யங் பாசித்தியங். மாஸாதிக்கந்தே அனதிக்கந்தஸஞ்ஞீ நிஸ்ஸக்³கி³யங் பாசித்தியங். அனதி⁴ட்டி²தே அதி⁴ட்டி²தஸஞ்ஞீ…பே॰… அவிகப்பிதே விகப்பிதஸஞ்ஞீ… அவிஸ்ஸஜ்ஜிதே விஸ்ஸஜ்ஜிதஸஞ்ஞீ… அனட்டே² நட்ட²ஸஞ்ஞீ… அவினட்டே² வினட்ட²ஸஞ்ஞீ… அத³ட்³டே⁴ த³ட்³ட⁴ஸஞ்ஞீ… அவிலுத்தே விலுத்தஸஞ்ஞீ, நிஸ்ஸக்³கி³யங் பாசித்தியங்.
501. Māsātikkante atikkantasaññī, nissaggiyaṃ pācittiyaṃ. Māsātikkante vematiko nissaggiyaṃ pācittiyaṃ. Māsātikkante anatikkantasaññī nissaggiyaṃ pācittiyaṃ. Anadhiṭṭhite adhiṭṭhitasaññī…pe… avikappite vikappitasaññī… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī… avilutte viluttasaññī, nissaggiyaṃ pācittiyaṃ.
நிஸ்ஸக்³கி³யங் சீவரங் அனிஸ்ஸஜ்ஜித்வா பரிபு⁴ஞ்ஜதி, ஆபத்தி து³க்கடஸ்ஸ. மாஸானதிக்கந்தே அதிக்கந்தஸஞ்ஞீ, ஆபத்தி து³க்கடஸ்ஸ. மாஸானதிக்கந்தே வேமதிகோ, ஆபத்தி து³க்கடஸ்ஸ. மாஸானதிக்கந்தே அனதிக்கந்தஸஞ்ஞீ, அனாபத்தி.
Nissaggiyaṃ cīvaraṃ anissajjitvā paribhuñjati, āpatti dukkaṭassa. Māsānatikkante atikkantasaññī, āpatti dukkaṭassa. Māsānatikkante vematiko, āpatti dukkaṭassa. Māsānatikkante anatikkantasaññī, anāpatti.
502. அனாபத்தி அந்தோமாஸே அதி⁴ட்டே²தி, விகப்பேதி, விஸ்ஸஜ்ஜேதி, நஸ்ஸதி , வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸங் க³ண்ஹந்தி, உம்மத்தகஸ்ஸ, ஆதி³கம்மிகஸ்ஸாதி.
502. Anāpatti antomāse adhiṭṭheti, vikappeti, vissajjeti, nassati , vinassati, ḍayhati, acchinditvā gaṇhanti, vissāsaṃ gaṇhanti, ummattakassa, ādikammikassāti.
ததியகதி²னஸிக்கா²பத³ங் நிட்டி²தங்.
Tatiyakathinasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. ததியகதி²னஸிக்கா²பத³வண்ணனா • 3. Tatiyakathinasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. ததியகதி²னஸிக்கா²பத³வண்ணனா • 3. Tatiyakathinasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியகதி²னஸிக்கா²பத³வண்ணனா • 3. Tatiyakathinasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. ததியகதி²னஸிக்கா²பத³வண்ணனா • 3. Tatiyakathinasikkhāpadavaṇṇanā
