| Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga |
၃. တတိယကထိနသိက္ခာပဒံ
3. Tatiyakathinasikkhāpadaṃ
၄၉၇. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အညတရသ္သ ဘိက္ခုနော အကာလစီဝရံ ဥပ္ပန္နံ ဟောတိ။ တသ္သ တံ စီဝရံ ကယိရမာနံ နပ္ပဟောတိ။ အထ ခော သော ဘိက္ခု တံ စီဝရံ ဥသ္သာပေတ္ဝာ ပုနပ္ပုနံ ဝိမဇ္ဇတိ။ အဒ္ဒသာ ခော ဘဂဝာ သေနာသနစာရိကံ အာဟိဏ္ဍန္တော တံ ဘိက္ခုံ တံ စီဝရံ ဥသ္သာပေတ္ဝာ ပုနပ္ပုနံ ဝိမဇ္ဇန္တံ။ ဒိသ္ဝာန ယေန သော ဘိက္ခု တေနုပသင္ကမိ; ဥပသင္ကမိတ္ဝာ တံ ဘိက္ခုံ ဧတဒဝောစ – ‘‘ကိသ္သ တ္ဝံ, ဘိက္ခု, ဣမံ စီဝရံ ဥသ္သာပေတ္ဝာ ပုနပ္ပုနံ ဝိမဇ္ဇသီ’’တိ? ‘‘ဣဒံ မေ, ဘန္တေ, အကာလစီဝရံ ဥပ္ပန္နံ။ ကယိရမာနံ နပ္ပဟောတိ။ တေနာဟံ ဣမံ စီဝရံ ဥသ္သာပေတ္ဝာ ပုနပ္ပုနံ ဝိမဇ္ဇာမီ’’တိ။ ‘‘အတ္ထိ ပန တေ, ဘိက္ခု, စီဝရပစ္စာသာ’’တိ? ‘‘အတ္ထိ, ဘဂဝာ’’တိ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ, ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, အကာလစီဝရံ ပဋိဂ္ဂဟေတ္ဝာ စီဝရပစ္စာသာ နိက္ခိပိတု’’န္တိ။
497. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa bhikkhuno akālacīvaraṃ uppannaṃ hoti. Tassa taṃ cīvaraṃ kayiramānaṃ nappahoti. Atha kho so bhikkhu taṃ cīvaraṃ ussāpetvā punappunaṃ vimajjati. Addasā kho bhagavā senāsanacārikaṃ āhiṇḍanto taṃ bhikkhuṃ taṃ cīvaraṃ ussāpetvā punappunaṃ vimajjantaṃ. Disvāna yena so bhikkhu tenupasaṅkami; upasaṅkamitvā taṃ bhikkhuṃ etadavoca – ‘‘kissa tvaṃ, bhikkhu, imaṃ cīvaraṃ ussāpetvā punappunaṃ vimajjasī’’ti? ‘‘Idaṃ me, bhante, akālacīvaraṃ uppannaṃ. Kayiramānaṃ nappahoti. Tenāhaṃ imaṃ cīvaraṃ ussāpetvā punappunaṃ vimajjāmī’’ti. ‘‘Atthi pana te, bhikkhu, cīvarapaccāsā’’ti? ‘‘Atthi, bhagavā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā, bhikkhū āmantesi – ‘‘anujānāmi, bhikkhave, akālacīvaraṃ paṭiggahetvā cīvarapaccāsā nikkhipitu’’nti.
၄၉၈. တေန ခော ပန သမယေန ဘိက္ခူ – ‘‘ဘဂဝတာ အနုညာတံ အကာလစီဝရံ ပဋိဂ္ဂဟေတ္ဝာ စီဝရပစ္စာသာ နိက္ခိပိတု’’န္တိ အကာလစီဝရာနိ ပဋိဂ္ဂဟေတ္ဝာ အတိရေကမာသံ နိက္ခိပန္တိ။ တာနိ စီဝရာနိ စီဝရဝံသေ ဘဏ္ဍိကာဗဒ္ဓာနိ တိဋ္ဌန္တိ။ အဒ္ဒသာ ခော အာယသ္မာ အာနန္ဒော သေနာသနစာရိကံ အာဟိဏ္ဍန္တော တာနိ စီဝရာနိ စီဝရဝံသေ ဘဏ္ဍိကာဗဒ္ဓာနိ တိဋ္ဌန္တေ။ ဒိသ္ဝာန ဘိက္ခူ အာမန္တေသိ – ‘‘ကသ္သိမာနိ, အာဝုသော, စီဝရာနိ စီဝရဝံသေ ဘဏ္ဍိကာဗဒ္ဓာနိ တိဋ္ဌန္တီ’’တိ? ‘‘အမ္ဟာကံ, အာဝုသော, အကာလစီဝရာနိ စီဝရပစ္စာသာ နိက္ခိတ္တာနီ’’တိ။ ‘‘ကီဝစိရံ ပနာဝုသော, ဣမာနိ စီဝရာနိ နိက္ခိတ္တာနီ’’တိ? ‘‘အတိရေကမာသံ, အာဝုသော’’တိ။ အာယသ္မာ အာနန္ဒော ဥဇ္ဈာယတိ ခိယ္ယတိ ဝိပာစေတိ – ‘‘ကထဉ္ဟိ နာမ ဘိက္ခူ အကာလစီဝရံ ပဋိဂ္ဂဟေတ္ဝာ အတိရေကမာသံ နိက္ခိပိသ္သန္တီ’’တိ! အထ ခော အာယသ္မာ အာနန္ဒော တေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသိ။ပေ.။ ‘‘သစ္စံ ကိရ, ဘိက္ခဝေ, ဘိက္ခူ အကာလစီဝရံ ပဋိဂ္ဂဟေတ္ဝာ အတိရေကမာသံ နိက္ခိပန္တီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တေ, ဘိက္ခဝေ, မောဃပုရိသာ အကာလစီဝရံ ပဋိဂ္ဂဟေတ္ဝာ အတိရေကမာသံ နိက္ခိပိသ္သန္တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –
498. Tena kho pana samayena bhikkhū – ‘‘bhagavatā anuññātaṃ akālacīvaraṃ paṭiggahetvā cīvarapaccāsā nikkhipitu’’nti akālacīvarāni paṭiggahetvā atirekamāsaṃ nikkhipanti. Tāni cīvarāni cīvaravaṃse bhaṇḍikābaddhāni tiṭṭhanti. Addasā kho āyasmā ānando senāsanacārikaṃ āhiṇḍanto tāni cīvarāni cīvaravaṃse bhaṇḍikābaddhāni tiṭṭhante. Disvāna bhikkhū āmantesi – ‘‘kassimāni, āvuso, cīvarāni cīvaravaṃse bhaṇḍikābaddhāni tiṭṭhantī’’ti? ‘‘Amhākaṃ, āvuso, akālacīvarāni cīvarapaccāsā nikkhittānī’’ti. ‘‘Kīvaciraṃ panāvuso, imāni cīvarāni nikkhittānī’’ti? ‘‘Atirekamāsaṃ, āvuso’’ti. Āyasmā ānando ujjhāyati khiyyati vipāceti – ‘‘kathañhi nāma bhikkhū akālacīvaraṃ paṭiggahetvā atirekamāsaṃ nikkhipissantī’’ti! Atha kho āyasmā ānando te bhikkhū anekapariyāyena vigarahitvā bhagavato etamatthaṃ ārocesi…pe… ‘‘saccaṃ kira, bhikkhave, bhikkhū akālacīvaraṃ paṭiggahetvā atirekamāsaṃ nikkhipantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā akālacīvaraṃ paṭiggahetvā atirekamāsaṃ nikkhipissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
၄၉၉. ‘‘နိဋ္ဌိတစီဝရသ္မိံ ဘိက္ခုနာ ဥဗ္ဘတသ္မိံ ကထိနေ ဘိက္ခုနော ပနေဝ အကာလစီဝရံ ဥပ္ပဇ္ဇေယ္ယ, အာကင္ခမာနေန ဘိက္ခုနာ ပဋိဂ္ဂဟေတဗ္ဗံ။ ပဋိဂ္ဂဟေတ္ဝာ ခိပ္ပမေဝ ကာရေတဗ္ဗံ။ နောစသ္သ ပာရိပူရိ, မာသပရမံ တေန ဘိက္ခုနာ တံ စီဝရံ နိက္ခိပိတဗ္ဗံ ဦနသ္သ ပာရိပူရိယာ သတိယာ ပစ္စာသာယ။ တတော စေ ဥတ္တရိ 1 နိက္ခိပေယ္ယ, သတိယာပိ ပစ္စာသာယ, နိသ္သဂ္ဂိယံ ပာစိတ္တိယ’’န္တိ။
499.‘‘Niṭṭhitacīvarasmiṃbhikkhunā ubbhatasmiṃ kathine bhikkhuno paneva akālacīvaraṃ uppajjeyya, ākaṅkhamānena bhikkhunā paṭiggahetabbaṃ. Paṭiggahetvā khippameva kāretabbaṃ. Nocassa pāripūri, māsaparamaṃ tena bhikkhunā taṃ cīvaraṃ nikkhipitabbaṃ ūnassa pāripūriyā satiyā paccāsāya. Tato ce uttari 2 nikkhipeyya, satiyāpi paccāsāya, nissaggiyaṃ pācittiya’’nti.
၅၀၀. နိဋ္ဌိတစီဝရသ္မိန္တိ ဘိက္ခုနော စီဝရံ ကတံ ဝာ ဟောတိ နဋ္ဌံ ဝာ ဝိနဋ္ဌံ ဝာ ဒဍ္ဎံ ဝာ စီဝရာသာ ဝာ ဥပစ္ဆိန္နာ။
500.Niṭṭhitacīvarasminti bhikkhuno cīvaraṃ kataṃ vā hoti naṭṭhaṃ vā vinaṭṭhaṃ vā daḍḍhaṃ vā cīvarāsā vā upacchinnā.
ဥဗ္ဘတသ္မိံ ကထိနေတိ အဋ္ဌန္နံ မာတိကာနံ အညတရာယ မာတိကာယ ဥဗ္ဘတံ ဟောတိ, သင္ဃေန ဝာ အန္တရာ ဥဗ္ဘတံ ဟောတိ။
Ubbhatasmiṃ kathineti aṭṭhannaṃ mātikānaṃ aññatarāya mātikāya ubbhataṃ hoti, saṅghena vā antarā ubbhataṃ hoti.
အကာလစီဝရံ နာမ အနတ္ထတေ ကထိနေ ဧကာဒသမာသေ ဥပ္ပန္နံ, အတ္ထတေ ကထိနေ သတ္တမာသေ ဥပ္ပန္နံ, ကာလေပိ အာဒိသ္သ ဒိန္နံ, ဧတံ အကာလစီဝရံ နာမ။
Akālacīvaraṃ nāma anatthate kathine ekādasamāse uppannaṃ, atthate kathine sattamāse uppannaṃ, kālepi ādissa dinnaṃ, etaṃ akālacīvaraṃ nāma.
ဥပ္ပဇ္ဇေယ္ယာတိ ဥပ္ပဇ္ဇေယ္ယ သင္ဃတော ဝာ ဂဏတော ဝာ ဉာတိတော ဝာ မိတ္တတော ဝာ ပံသုကူလံ ဝာ အတ္တနော ဝာ ဓနေန။
Uppajjeyyāti uppajjeyya saṅghato vā gaṇato vā ñātito vā mittato vā paṃsukūlaṃ vā attano vā dhanena.
အာကင္ခမာနေနာတိ ဣစ္ဆမာနေန ပဋိဂ္ဂဟေတဗ္ဗံ။
Ākaṅkhamānenāti icchamānena paṭiggahetabbaṃ.
ပဋိဂ္ဂဟေတ္ဝာ ခိပ္ပမေဝ ကာရေတဗ္ဗန္တိ ဒသာဟာ ကာရေတဗ္ဗံ။
Paṭiggahetvā khippameva kāretabbanti dasāhā kāretabbaṃ.
နော စသ္သ ပာရိပူရီတိ ကယိရမာနံ နပ္ပဟောတိ။
No cassa pāripūrīti kayiramānaṃ nappahoti.
မာသပရမံ တေန ဘိက္ခုနာ တံ စီဝရံ နိက္ခိပိတဗ္ဗန္တိ မာသပရမတာ နိက္ခိပိတဗ္ဗံ။
Māsaparamaṃ tena bhikkhunā taṃ cīvaraṃ nikkhipitabbanti māsaparamatā nikkhipitabbaṃ.
ဦနသ္သ ပာရိပူရိယာတိ ဦနသ္သ ပာရိပူရတ္ထာယ။
Ūnassa pāripūriyāti ūnassa pāripūratthāya.
သတိယာ ပစ္စာသာယာတိ ပစ္စာသာ ဟောတိ သင္ဃတော ဝာ ဂဏတော ဝာ ဉာတိတော ဝာ မိတ္တတော ဝာ ပံသုကူလံ ဝာ အတ္တနော ဝာ ဓနေန။
Satiyā paccāsāyāti paccāsā hoti saṅghato vā gaṇato vā ñātito vā mittato vā paṃsukūlaṃ vā attano vā dhanena.
တတော စေ ဥတ္တရိ နိက္ခိပေယ္ယ သတိယာပိ ပစ္စာသာယာတိ တဒဟုပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ, ဒသာဟာ ကာရေတဗ္ဗံ။ ဒ္ဝီဟုပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ, ဒသာဟာ ကာရေတဗ္ဗံ။ တီဟုပ္ပန္နေ မူလစီဝရေ။ပေ.။ စတူဟုပ္ပန္နေ။ ပဉ္စာဟုပ္ပန္နေ။ ဆာဟုပ္ပန္နေ။ သတ္တာဟုပ္ပန္နေ။ အဋ္ဌာဟုပ္ပန္နေ ။ နဝာဟုပ္ပန္နေ။ ဒသာဟုပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ, ဒသာဟာ ကာရေတဗ္ဗံ ။ ဧကာဒသေ ဥပ္ပန္နေ။ပေ.။ ဒ္ဝာဒသေ ဥပ္ပန္နေ။ တေရသေ ဥပ္ပန္နေ။ စုဒ္ဒသေ ဥပ္ပန္နေ။ ပန္နရသေ ဥပ္ပန္နေ။ သောဠသေ ဥပ္ပန္နေ။ သတ္တရသေ ဥပ္ပန္နေ။ အဋ္ဌာရသေ ဥပ္ပန္နေ။ ဧကူနဝီသေ ဥပ္ပန္နေ။ ဝီသေ ဥပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ, ဒသာဟာ ကာရေတဗ္ဗံ။ ဧကဝီသေ ဥပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ, နဝာဟာ ကာရေတဗ္ဗံ။ ဒ္ဝာဝီသေ ဥပ္ပန္နေ။ပေ.။ တေဝီသေ ဥပ္ပန္နေ။ စတုဝီသေ ဥပ္ပန္နေ။ ပဉ္စဝီသေ ဥပ္ပန္နေ။ ဆဗ္ဗီသေ ဥပ္ပန္နေ။ သတ္တဝီသေ ဥပ္ပန္နေ။ အဋ္ဌဝီသေ ဥပ္ပန္နေ။ ဧကူနတိံသေ ဥပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ, ဧကာဟံ ကာရေတဗ္ဗံ။ တိံသေ ဥပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ , တဒဟေဝ အဓိဋ္ဌာတဗ္ဗံ ဝိကပ္ပေတဗ္ဗံ ဝိသ္သဇ္ဇေတဗ္ဗံ။ နော စေ အဓိဋ္ဌေယ္ယ ဝာ ဝိကပ္ပေယ္ယ ဝာ ဝိသ္သဇ္ဇေယ္ယ ဝာ, ဧကတိံသေ အရုဏုဂ္ဂမနေ နိသ္သဂ္ဂိယံ ဟောတိ။ နိသ္သဇ္ဇိတဗ္ဗံ သင္ဃသ္သ ဝာ ဂဏသ္သ ဝာ ပုဂ္ဂလသ္သ ဝာ။ ဧဝဉ္စ ပန, ဘိက္ခဝေ, နိသ္သဇ္ဇိတဗ္ဗံ။ပေ.။ ဣဒံ မေ, ဘန္တေ, အကာလစီဝရံ မာသာတိက္ကန္တံ နိသ္သဂ္ဂိယံ, ဣမာဟံ သင္ဃသ္သ နိသ္သဇ္ဇာမီတိ။ပေ.။ ဒဒေယ္ယာတိ။ပေ.။ ဒဒေယ္ယုန္တိ။ပေ.။ အာယသ္မတော ဒမ္မီတိ။
Tato ce uttari nikkhipeyya satiyāpi paccāsāyāti tadahuppanne mūlacīvare paccāsācīvaraṃ uppajjati, dasāhā kāretabbaṃ. Dvīhuppanne mūlacīvare paccāsācīvaraṃ uppajjati, dasāhā kāretabbaṃ. Tīhuppanne mūlacīvare…pe… catūhuppanne… pañcāhuppanne… chāhuppanne… sattāhuppanne… aṭṭhāhuppanne … navāhuppanne… dasāhuppanne mūlacīvare paccāsācīvaraṃ uppajjati, dasāhā kāretabbaṃ . Ekādase uppanne…pe… dvādase uppanne… terase uppanne… cuddase uppanne… pannarase uppanne… soḷase uppanne… sattarase uppanne… aṭṭhārase uppanne… ekūnavīse uppanne… vīse uppanne mūlacīvare paccāsācīvaraṃ uppajjati, dasāhā kāretabbaṃ. Ekavīse uppanne mūlacīvare paccāsācīvaraṃ uppajjati, navāhā kāretabbaṃ. Dvāvīse uppanne…pe… tevīse uppanne… catuvīse uppanne… pañcavīse uppanne… chabbīse uppanne… sattavīse uppanne… aṭṭhavīse uppanne… ekūnatiṃse uppanne mūlacīvare paccāsācīvaraṃ uppajjati, ekāhaṃ kāretabbaṃ… tiṃse uppanne mūlacīvare paccāsācīvaraṃ uppajjati , tadaheva adhiṭṭhātabbaṃ vikappetabbaṃ vissajjetabbaṃ. No ce adhiṭṭheyya vā vikappeyya vā vissajjeyya vā, ekatiṃse aruṇuggamane nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, akālacīvaraṃ māsātikkantaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
ဝိသဘာဂေ ဥပ္ပန္နေ မူလစီဝရေ ပစ္စာသာစီဝရံ ဥပ္ပဇ္ဇတိ, ရတ္တိယော စ သေသာ ဟောန္တိ, န အကာမာ ကာရေတဗ္ဗံ။
Visabhāge uppanne mūlacīvare paccāsācīvaraṃ uppajjati, rattiyo ca sesā honti, na akāmā kāretabbaṃ.
၅၀၁. မာသာတိက္ကန္တေ အတိက္ကန္တသညီ, နိသ္သဂ္ဂိယံ ပာစိတ္တိယံ။ မာသာတိက္ကန္တေ ဝေမတိကော နိသ္သဂ္ဂိယံ ပာစိတ္တိယံ။ မာသာတိက္ကန္တေ အနတိက္ကန္တသညီ နိသ္သဂ္ဂိယံ ပာစိတ္တိယံ။ အနဓိဋ္ဌိတေ အဓိဋ္ဌိတသညီ။ပေ.။ အဝိကပ္ပိတေ ဝိကပ္ပိတသညီ။ အဝိသ္သဇ္ဇိတေ ဝိသ္သဇ္ဇိတသညီ။ အနဋ္ဌေ နဋ္ဌသညီ။ အဝိနဋ္ဌေ ဝိနဋ္ဌသညီ။ အဒဍ္ဎေ ဒဍ္ဎသညီ။ အဝိလုတ္တေ ဝိလုတ္တသညီ, နိသ္သဂ္ဂိယံ ပာစိတ္တိယံ။
501. Māsātikkante atikkantasaññī, nissaggiyaṃ pācittiyaṃ. Māsātikkante vematiko nissaggiyaṃ pācittiyaṃ. Māsātikkante anatikkantasaññī nissaggiyaṃ pācittiyaṃ. Anadhiṭṭhite adhiṭṭhitasaññī…pe… avikappite vikappitasaññī… avissajjite vissajjitasaññī… anaṭṭhe naṭṭhasaññī… avinaṭṭhe vinaṭṭhasaññī… adaḍḍhe daḍḍhasaññī… avilutte viluttasaññī, nissaggiyaṃ pācittiyaṃ.
နိသ္သဂ္ဂိယံ စီဝရံ အနိသ္သဇ္ဇိတ္ဝာ ပရိဘုဉ္ဇတိ, အာပတ္တိ ဒုက္ကဋသ္သ။ မာသာနတိက္ကန္တေ အတိက္ကန္တသညီ, အာပတ္တိ ဒုက္ကဋသ္သ။ မာသာနတိက္ကန္တေ ဝေမတိကော, အာပတ္တိ ဒုက္ကဋသ္သ။ မာသာနတိက္ကန္တေ အနတိက္ကန္တသညီ, အနာပတ္တိ။
Nissaggiyaṃ cīvaraṃ anissajjitvā paribhuñjati, āpatti dukkaṭassa. Māsānatikkante atikkantasaññī, āpatti dukkaṭassa. Māsānatikkante vematiko, āpatti dukkaṭassa. Māsānatikkante anatikkantasaññī, anāpatti.
၅၀၂. အနာပတ္တိ အန္တောမာသေ အဓိဋ္ဌေတိ, ဝိကပ္ပေတိ, ဝိသ္သဇ္ဇေတိ, နသ္သတိ , ဝိနသ္သတိ, ဍယ္ဟတိ, အစ္ဆိန္ဒိတ္ဝာ ဂဏ္ဟန္တိ, ဝိသ္သာသံ ဂဏ္ဟန္တိ, ဥမ္မတ္တကသ္သ, အာဒိကမ္မိကသ္သာတိ။
502. Anāpatti antomāse adhiṭṭheti, vikappeti, vissajjeti, nassati , vinassati, ḍayhati, acchinditvā gaṇhanti, vissāsaṃ gaṇhanti, ummattakassa, ādikammikassāti.
တတိယကထိနသိက္ခာပဒံ နိဋ္ဌိတံ။
Tatiyakathinasikkhāpadaṃ niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၃. တတိယကထိနသိက္ခာပဒဝဏ္ဏနာ • 3. Tatiyakathinasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. တတိယကထိနသိက္ခာပဒဝဏ္ဏနာ • 3. Tatiyakathinasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၃. တတိယကထိနသိက္ခာပဒဝဏ္ဏနာ • 3. Tatiyakathinasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၃. တတိယကထိနသိက္ခာပဒဝဏ္ဏနာ • 3. Tatiyakathinasikkhāpadavaṇṇanā
