| Library / Tipiṭaka / д̇ибидага • Tipiṭaka / махаавибхан̇г̇а-адтагат̇аа • Mahāvibhaṅga-aṭṭhakathā |
3. д̇ад̇ияагат̇инасигкаабад̣̇аван̣н̣анаа
3. Tatiyakathinasikkhāpadavaṇṇanā
497. д̇зна самаязнаад̇и д̇ад̇ияагат̇инасигкаабад̣̇ам̣. д̇ад̇т̇а уссаабзд̇ваа бунаббунам̣ вимаж̇ж̇ад̇ийд̇и ‘‘валийсу надтаасу ид̣̇ам̣ маханд̇ам̣ бхависсад̇ий’’д̇и ман̃н̃амаано уд̣̇агзна син̃жид̇ваа баад̣̇зхи аггамид̇ваа хад̇т̇зхи уссаабзд̇ваа угкибид̇ваа бидтияам̣ гхам̣сад̇и, д̇ам̣ аад̇абз сугкам̣ батамаббамаан̣амзва ход̇и. со бунаби д̇ат̇аа гарод̇и, д̇зна вуд̇д̇ам̣ – ‘‘уссаабзд̇ваа бунаббунам̣ вимаж̇ж̇ад̇ий’’д̇и. д̇ам̣ звам̣ гиламанд̇ам̣ бхаг̇аваа г̇анд̇хагудияам̣ нисиннова д̣̇исваа нигкамид̇ваа сзнаасанажааригам̣ аахин̣д̣анд̇о вияа д̇ад̇т̇а аг̇амааси. д̇зна вуд̇д̇ам̣ – ‘‘ад̣̇д̣̇аса ко бхаг̇аваа’’д̇иаад̣̇и.
497.Tena samayenāti tatiyakathinasikkhāpadaṃ. Tattha ussāpetvā punappunaṃ vimajjatīti ‘‘valīsu naṭṭhāsu idaṃ mahantaṃ bhavissatī’’ti maññamāno udakena siñcitvā pādehi akkamitvā hatthehi ussāpetvā ukkhipitvā piṭṭhiyaṃ ghaṃsati, taṃ ātape sukkhaṃ paṭhamappamāṇameva hoti. So punapi tathā karoti, tena vuttaṃ – ‘‘ussāpetvā punappunaṃ vimajjatī’’ti. Taṃ evaṃ kilamantaṃ bhagavā gandhakuṭiyaṃ nisinnova disvā nikkhamitvā senāsanacārikaṃ āhiṇḍanto viya tattha agamāsi. Tena vuttaṃ – ‘‘addasa kho bhagavā’’tiādi.
499-500. згаад̣̇асамаасзд̇и згам̣ бажчимагад̇д̇игамаасам̣ табзд̇ваа сзсз згаад̣̇асамаасз. сад̇д̇амаасзд̇и гад̇д̇игамаасам̣ хзманд̇игз жа жад̇д̇аарод̇и бан̃жамаасз табзд̇ваа сзсз сад̇д̇амаасз. гаалзби аад̣̇исса д̣̇иннанд̇и сан̇гхасса ваа ‘‘ид̣̇ам̣ агаалажийвара’’нд̇и уд̣̇д̣̇исид̇ваа д̣̇иннам̣, згабуг̇г̇аласса ваа ‘‘ид̣̇ам̣ д̇уяхам̣ д̣̇аммий’’д̇и д̣̇иннам̣.
499-500.Ekādasamāseti ekaṃ pacchimakattikamāsaṃ ṭhapetvā sese ekādasamāse. Sattamāseti kattikamāsaṃ hemantike ca cattāroti pañcamāse ṭhapetvā sese sattamāse. Kālepi ādissa dinnanti saṅghassa vā ‘‘idaṃ akālacīvara’’nti uddisitvā dinnaṃ, ekapuggalassa vā ‘‘idaṃ tuyhaṃ dammī’’ti dinnaṃ.
сан̇гхад̇о ваад̇и ад̇д̇ано бад̇д̇абхааг̇авасзна сан̇гхад̇о ваа уббаж̇ж̇зяяа. г̇ан̣ад̇о ваад̇и ид̣̇ам̣ суд̇д̇анд̇игаг̇ан̣асса д̣̇зма, ид̣̇ам̣ аабхид̇хаммигаг̇ан̣ассаад̇и звам̣ г̇ан̣асса д̣̇знд̇и. д̇ад̇о ад̇д̇ано бад̇д̇абхааг̇авасзна г̇ан̣ад̇о ваа уббаж̇ж̇зяяа.
Saṅghato vāti attano pattabhāgavasena saṅghato vā uppajjeyya. Gaṇato vāti idaṃ suttantikagaṇassa dema, idaṃ ābhidhammikagaṇassāti evaṃ gaṇassa denti. Tato attano pattabhāgavasena gaṇato vā uppajjeyya.
но жасса баарибуурийд̇и но жз баарибуурий бхавзяяа, яад̇д̇агзна гаяирамаанам̣ ад̇хидтаанажийварам̣ баход̇и, д̇ан̃жз жийварам̣ д̇ад̇д̇агам̣ на бхавзяяа, уунагам̣ бхавзяяаад̇и ад̇т̇о.
No cassa pāripūrīti no ce pāripūrī bhaveyya, yattakena kayiramānaṃ adhiṭṭhānacīvaraṃ pahoti, tañce cīvaraṃ tattakaṃ na bhaveyya, ūnakaṃ bhaveyyāti attho.
бажжаасаа ход̇и сан̇гхад̇о ваад̇иаад̣̇ийсу асугад̣̇ивасам̣ наама сан̇гхо жийвараани лабхиссад̇и, г̇ан̣о лабхиссад̇и, д̇ад̇о мз жийварам̣ уббаж̇ж̇иссад̇ийд̇и звам̣ сан̇гхад̇о ваа г̇ан̣ад̇о ваа бажжаасаа ход̇и. н̃аад̇агзхи мз жийварад̇т̇ааяа бзсид̇ам̣, мид̇д̇зхи бзсид̇ам̣, д̇з ааг̇ад̇аа жийварз д̣̇ассанд̇ийд̇и звам̣ н̃аад̇ид̇о ваа мид̇д̇ад̇о ваа бажжаасаа ход̇и. бам̣сугуулам̣ ваад̇и зд̇т̇а бана бам̣сугуулам̣ ваа лажчаамийд̇и звам̣ бажжаасаа ход̇ийд̇и яож̇зд̇аб̣б̣ам̣. ад̇д̇ано ваа д̇ханзнаад̇и ад̇д̇ано габбаасасуд̇д̇аад̣̇инаа д̇ханзна, асугад̣̇ивасам̣ наама лажчаамийд̇и звам̣ ваа бажжаасаа ход̇ийд̇и ад̇т̇о.
Paccāsā hoti saṅghato vātiādīsu asukadivasaṃ nāma saṅgho cīvarāni labhissati, gaṇo labhissati, tato me cīvaraṃ uppajjissatīti evaṃ saṅghato vā gaṇato vā paccāsā hoti. Ñātakehi me cīvaratthāya pesitaṃ, mittehi pesitaṃ, te āgatā cīvare dassantīti evaṃ ñātito vā mittato vā paccāsā hoti. Paṃsukūlaṃ vāti ettha pana paṃsukūlaṃ vā lacchāmīti evaṃ paccāsā hotīti yojetabbaṃ. Attano vā dhanenāti attano kappāsasuttādinā dhanena, asukadivasaṃ nāma lacchāmīti evaṃ vā paccāsā hotīti attho.
д̇ад̇о жз уд̇д̇ари нигкибзяяа сад̇ияааби бажжаасааяаад̇и маасабарамад̇о жз уд̇д̇ари нигкибзяяа, ниссаг̇г̇ияам̣ баажид̇д̇ияанд̇и ад̇т̇о. звам̣ бана авад̇ваа яасмаа анд̇араа уббаж̇ж̇амаанз бажжаасаажийварз муулажийварасса уббаннад̣̇ивасад̇о яаава вийсад̇имо д̣̇ивасо д̇аава уббаннам̣ бажжаасаажийварам̣ муулажийварам̣ ад̇д̇ано г̇ад̇игам̣ гарод̇и, д̇ад̇о уд̣̇д̇хам̣ муулажийварам̣ бажжаасаажийварам̣ ад̇д̇ано г̇ад̇игам̣ гарод̇и. д̇асмаа д̇ам̣ висзсам̣ д̣̇ассзд̇ум̣ ‘‘д̇ад̣̇ахуббаннз муулажийварз’’д̇иаад̣̇инаа наязна бад̣̇абхааж̇анам̣ вуд̇д̇ам̣, д̇ам̣ уд̇д̇аанад̇т̇амзва.
Tato ce uttari nikkhipeyya satiyāpi paccāsāyāti māsaparamato ce uttari nikkhipeyya, nissaggiyaṃ pācittiyanti attho. Evaṃ pana avatvā yasmā antarā uppajjamāne paccāsācīvare mūlacīvarassa uppannadivasato yāva vīsatimo divaso tāva uppannaṃ paccāsācīvaraṃ mūlacīvaraṃ attano gatikaṃ karoti, tato uddhaṃ mūlacīvaraṃ paccāsācīvaraṃ attano gatikaṃ karoti. Tasmā taṃ visesaṃ dassetuṃ ‘‘tadahuppanne mūlacīvare’’tiādinā nayena padabhājanaṃ vuttaṃ, taṃ uttānatthameva.
висабхааг̇з уббаннз муулажийварзд̇и яад̣̇и муулажийварам̣ сан̣хам̣, бажжаасаажийварам̣ т̇уулам̣, на саггаа яож̇зд̇ум̣. рад̇д̇ияо жа сзсаа хонд̇и, на д̇аава маасо буурад̇и , на агаамаа ниг̇г̇ахзна жийварам̣ гаарзд̇аб̣б̣ам̣. ан̃н̃ам̣ бажжаасаажийварам̣ лабхид̇вааязва гаалаб̣бханд̇арз гаарзд̇аб̣б̣ам̣. бажжаасаажийварамби баригкааражол̣ам̣ ад̇хидтаад̇аб̣б̣ам̣. ат̇а муулажийварам̣ т̇уулам̣ ход̇и, бажжаасаажийварам̣ сан̣хам̣, муулажийварам̣ баригкааражол̣ам̣ ад̇хидтахид̇ваа бажжаасаажийварамзва муулажийварам̣ гад̇ваа табзд̇аб̣б̣ам̣. д̇ам̣ буна маасабарихаарам̣ лабхад̇и, зд̇знубааязна яаава ижчад̇и д̇аава ан̃н̃аман̃н̃ам̣ муулажийварам̣ гад̇ваа табзд̇ум̣ ваддад̇ийд̇и. сзсам̣ уд̇д̇аанамзва.
Visabhāge uppanne mūlacīvareti yadi mūlacīvaraṃ saṇhaṃ, paccāsācīvaraṃ thūlaṃ, na sakkā yojetuṃ. Rattiyo ca sesā honti, na tāva māso pūrati , na akāmā niggahena cīvaraṃ kāretabbaṃ. Aññaṃ paccāsācīvaraṃ labhitvāyeva kālabbhantare kāretabbaṃ. Paccāsācīvarampi parikkhāracoḷaṃ adhiṭṭhātabbaṃ. Atha mūlacīvaraṃ thūlaṃ hoti, paccāsācīvaraṃ saṇhaṃ, mūlacīvaraṃ parikkhāracoḷaṃ adhiṭṭhahitvā paccāsācīvarameva mūlacīvaraṃ katvā ṭhapetabbaṃ. Taṃ puna māsaparihāraṃ labhati, etenupāyena yāva icchati tāva aññamaññaṃ mūlacīvaraṃ katvā ṭhapetuṃ vaṭṭatīti. Sesaṃ uttānameva.
самудтаанаад̣̇ийни батамагат̇инасад̣̇исаанзваад̇и.
Samuṭṭhānādīni paṭhamakathinasadisānevāti.
д̇ад̇ияагат̇инасигкаабад̣̇аван̣н̣анаа нидтид̇аа.
Tatiyakathinasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 3. д̇ад̇ияагат̇инасигкаабад̣̇ам̣ • 3. Tatiyakathinasikkhāpadaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 3. д̇ад̇ияагат̇инасигкаабад̣̇аван̣н̣анаа • 3. Tatiyakathinasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 3. д̇ад̇ияагат̇инасигкаабад̣̇аван̣н̣анаа • 3. Tatiyakathinasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 3. д̇ад̇ияагат̇инасигкаабад̣̇аван̣н̣анаа • 3. Tatiyakathinasikkhāpadavaṇṇanā
