| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. තතියකොට්‌ඨිකසුත්‌තං
10. Tatiyakoṭṭhikasuttaṃ
135. තඤ්‌ඤෙව නිදානං. එකමන්‌තං නිසින්‌නො ඛො ආයස්‌මා සාරිපුත්‌තො ආයස්‌මන්‌තං මහාකොට්‌ඨිකං එතදවොච – ‘‘‘අවිජ්‌ජා, අවිජ්‌ජා’ති, ආවුසො කොට්‌ඨික, වුච්‌චති. කතමා නු ඛො, ආවුසො, අවිජ්‌ජා, කිත්‌තාවතා ච අවිජ්‌ජාගතො හොතී’’ති?
135. Taññeva nidānaṃ. Ekamantaṃ nisinno kho āyasmā sāriputto āyasmantaṃ mahākoṭṭhikaṃ etadavoca – ‘‘‘avijjā, avijjā’ti, āvuso koṭṭhika, vuccati. Katamā nu kho, āvuso, avijjā, kittāvatā ca avijjāgato hotī’’ti?
‘‘ඉධාවුසො, අස්‌සුතවා පුථුජ්‌ජනො රූපං නප්‌පජානාති, රූපසමුදයං නප්‌පජානාති, රූපනිරොධං නප්‌පජානාති, රූපනිරොධගාමිනිං පටිපදං නප්‌පජානාති. වෙදනං නප්‌පජානාති…පෙ.… සඤ්‌ඤං… සඞ්‌ඛාරෙ… විඤ්‌ඤාණං නප්‌පජානාති, විඤ්‌ඤාණසමුදයං නප්‌පජානාති, විඤ්‌ඤාණනිරොධං නප්‌පජානාති, විඤ්‌ඤාණනිරොධගාමිනිං පටිපදං නප්‌පජානාති. අයං වුච්‌චතාවුසො, අවිජ්‌ජා; එත්‌තාවතා ච අවිජ්‌ජාගතො හොතී’’ති.
‘‘Idhāvuso, assutavā puthujjano rūpaṃ nappajānāti, rūpasamudayaṃ nappajānāti, rūpanirodhaṃ nappajānāti, rūpanirodhagāminiṃ paṭipadaṃ nappajānāti. Vedanaṃ nappajānāti…pe… saññaṃ… saṅkhāre… viññāṇaṃ nappajānāti, viññāṇasamudayaṃ nappajānāti, viññāṇanirodhaṃ nappajānāti, viññāṇanirodhagāminiṃ paṭipadaṃ nappajānāti. Ayaṃ vuccatāvuso, avijjā; ettāvatā ca avijjāgato hotī’’ti.
එවං වුත්‌තෙ, ආයස්‌මා සාරිපුත්‌තො ආයස්‌මන්‌තං මහාකොට්‌ඨිකං එතදවොච – ‘‘‘විජ්‌ජා, විජ්‌ජා’ති, ආවුසො කොට්‌ඨික, වුච්‌චති. කතමා නු ඛො, ආවුසො, විජ්‌ජා, කිත්‌තාවතා ච විජ්‌ජාගතො හොතී’’ති? ‘‘ඉධාවුසො, සුතවා අරියසාවකො රූපං පජානාති, රූපසමුදයං පජානාති, රූපනිරොධං පජානාති, රූපනිරොධගාමිනිං පටිපදං පජානාති. වෙදනං… සඤ්‌ඤං… සඞ්‌ඛාරෙ… විඤ්‌ඤාණං පජානාති, විඤ්‌ඤාණසමුදයං පජානාති, විඤ්‌ඤාණනිරොධං පජානාති , විඤ්‌ඤාණනිරොධගාමිනිං පටිපදං පජානාති. අයං වුච්‌චතාවුසො, විජ්‌ජා; එත්‌තාවතා ච විජ්‌ජාගතො හොතී’’ති. දසමං.
Evaṃ vutte, āyasmā sāriputto āyasmantaṃ mahākoṭṭhikaṃ etadavoca – ‘‘‘vijjā, vijjā’ti, āvuso koṭṭhika, vuccati. Katamā nu kho, āvuso, vijjā, kittāvatā ca vijjāgato hotī’’ti? ‘‘Idhāvuso, sutavā ariyasāvako rūpaṃ pajānāti, rūpasamudayaṃ pajānāti, rūpanirodhaṃ pajānāti, rūpanirodhagāminiṃ paṭipadaṃ pajānāti. Vedanaṃ… saññaṃ… saṅkhāre… viññāṇaṃ pajānāti, viññāṇasamudayaṃ pajānāti, viññāṇanirodhaṃ pajānāti , viññāṇanirodhagāminiṃ paṭipadaṃ pajānāti. Ayaṃ vuccatāvuso, vijjā; ettāvatā ca vijjāgato hotī’’ti. Dasamaṃ.
අවිජ්‌ජාවග්‌ගො තෙරසමො.
Avijjāvaggo terasamo.
තස්‌සුද්‌දානං –
Tassuddānaṃ –
සමුදයධම්‌මෙ තීණි, අස්‌සාදො අපරෙ දුවෙ;
Samudayadhamme tīṇi, assādo apare duve;
සමුදයෙ ච ද්‌වෙ වුත්‌තා, කොට්‌ඨිකෙ අපරෙ තයොති.
Samudaye ca dve vuttā, koṭṭhike apare tayoti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-10. සමුදයධම්‌මසුත්‌තාදිවණ්‌ණනා • 1-10. Samudayadhammasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-10. සමුදයධම්‌මසුත්‌තාදිවණ්‌ණනා • 1-10. Samudayadhammasuttādivaṇṇanā
