| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๑๐. ตติยกุกฺกุฎารามสุตฺตํ
10. Tatiyakukkuṭārāmasuttaṃ
๒๐. ปาฎลิปุตฺตนิทานํฯ ‘‘‘พฺรหฺมจริยํ, พฺรหฺมจริย’นฺติ, อาวุโส อานนฺท, วุจฺจติฯ กตมํ นุ โข, อาวุโส, พฺรหฺมจริยํ, กตโม พฺรหฺมจารี, กตมํ พฺรหฺมจริยปริโยสาน’’นฺติ? ‘‘สาธุ สาธุ, อาวุโส ภทฺท! ภทฺทโก โข เต, อาวุโส ภทฺท, อุมฺมโงฺค, ภทฺทกํ ปฎิภานํ, กลฺยาณี ปริปุจฺฉาฯ เอวญฺหิ ตฺวํ, อาวุโส ภทฺท, ปุจฺฉสิ – ‘พฺรหฺมจริยํ, พฺรหฺมจริยนฺติ, อาวุโส อานนฺท, วุจฺจติฯ กตมํ นุ โข, อาวุโส, พฺรหฺมจริยํ, กตโม พฺรหฺมจารี, กตมํ พฺรหฺมจริยปริโยสาน’’’นฺติ? ‘‘เอวมาวุโส’’ติฯ ‘‘อยเมว โข, อาวุโส, อริโย อฎฺฐงฺคิโก มโคฺค พฺรหฺมจริยํ, เสยฺยถิทํ – สมฺมาทิฎฺฐิ…เป.… สมฺมาสมาธิฯ โย โข, อาวุโส, อิมินา อริเยน อฎฺฐงฺคิเกน มเคฺคน สมนฺนาคโต – อยํ วุจฺจติ พฺรหฺมจารีฯ โย โข, อาวุโส, ราคกฺขโย โทสกฺขโย โมหกฺขโย – อิทํ พฺรหฺมจริยปริโยสาน’’นฺติฯ ทสมํฯ
20. Pāṭaliputtanidānaṃ. ‘‘‘Brahmacariyaṃ, brahmacariya’nti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’nti? ‘‘Sādhu sādhu, āvuso bhadda! Bhaddako kho te, āvuso bhadda, ummaṅgo, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘brahmacariyaṃ, brahmacariyanti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’’nti? ‘‘Evamāvuso’’ti. ‘‘Ayameva kho, āvuso, ariyo aṭṭhaṅgiko maggo brahmacariyaṃ, seyyathidaṃ – sammādiṭṭhi…pe… sammāsamādhi. Yo kho, āvuso, iminā ariyena aṭṭhaṅgikena maggena samannāgato – ayaṃ vuccati brahmacārī. Yo kho, āvuso, rāgakkhayo dosakkhayo mohakkhayo – idaṃ brahmacariyapariyosāna’’nti. Dasamaṃ.
ตีณิ สุตฺตนฺตานิ เอกนิทานานิฯวิหารวโคฺค ทุติโยฯ
Tīṇi suttantāni ekanidānāni.Vihāravaggo dutiyo.
ตสฺสุทฺทานํ –
Tassuddānaṃ –
เทฺว วิหารา จ เสโกฺข จ, อุปฺปาทา อปเร ทุเว;
Dve vihārā ca sekkho ca, uppādā apare duve;
ปริสุเทฺธน เทฺว วุตฺตา, กุกฺกุฎาราเมน ตโยติฯ
Parisuddhena dve vuttā, kukkuṭārāmena tayoti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๘-๑๐. ปฐมกุกฺกุฎารามสุตฺตาทิวณฺณนา • 8-10. Paṭhamakukkuṭārāmasuttādivaṇṇanā
