| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೧೦. ತತಿಯಕುಕ್ಕುಟಾರಾಮಸುತ್ತಂ
10. Tatiyakukkuṭārāmasuttaṃ
೨೦. ಪಾಟಲಿಪುತ್ತನಿದಾನಂ। ‘‘‘ಬ್ರಹ್ಮಚರಿಯಂ, ಬ್ರಹ್ಮಚರಿಯ’ನ್ತಿ, ಆವುಸೋ ಆನನ್ದ, ವುಚ್ಚತಿ। ಕತಮಂ ನು ಖೋ, ಆವುಸೋ, ಬ್ರಹ್ಮಚರಿಯಂ, ಕತಮೋ ಬ್ರಹ್ಮಚಾರೀ, ಕತಮಂ ಬ್ರಹ್ಮಚರಿಯಪರಿಯೋಸಾನ’’ನ್ತಿ? ‘‘ಸಾಧು ಸಾಧು, ಆವುಸೋ ಭದ್ದ! ಭದ್ದಕೋ ಖೋ ತೇ, ಆವುಸೋ ಭದ್ದ, ಉಮ್ಮಙ್ಗೋ, ಭದ್ದಕಂ ಪಟಿಭಾನಂ, ಕಲ್ಯಾಣೀ ಪರಿಪುಚ್ಛಾ। ಏವಞ್ಹಿ ತ್ವಂ, ಆವುಸೋ ಭದ್ದ, ಪುಚ್ಛಸಿ – ‘ಬ್ರಹ್ಮಚರಿಯಂ, ಬ್ರಹ್ಮಚರಿಯನ್ತಿ, ಆವುಸೋ ಆನನ್ದ, ವುಚ್ಚತಿ। ಕತಮಂ ನು ಖೋ, ಆವುಸೋ, ಬ್ರಹ್ಮಚರಿಯಂ, ಕತಮೋ ಬ್ರಹ್ಮಚಾರೀ, ಕತಮಂ ಬ್ರಹ್ಮಚರಿಯಪರಿಯೋಸಾನ’’’ನ್ತಿ? ‘‘ಏವಮಾವುಸೋ’’ತಿ। ‘‘ಅಯಮೇವ ಖೋ, ಆವುಸೋ, ಅರಿಯೋ ಅಟ್ಠಙ್ಗಿಕೋ ಮಗ್ಗೋ ಬ್ರಹ್ಮಚರಿಯಂ, ಸೇಯ್ಯಥಿದಂ – ಸಮ್ಮಾದಿಟ್ಠಿ…ಪೇ॰… ಸಮ್ಮಾಸಮಾಧಿ। ಯೋ ಖೋ, ಆವುಸೋ, ಇಮಿನಾ ಅರಿಯೇನ ಅಟ್ಠಙ್ಗಿಕೇನ ಮಗ್ಗೇನ ಸಮನ್ನಾಗತೋ – ಅಯಂ ವುಚ್ಚತಿ ಬ್ರಹ್ಮಚಾರೀ। ಯೋ ಖೋ, ಆವುಸೋ, ರಾಗಕ್ಖಯೋ ದೋಸಕ್ಖಯೋ ಮೋಹಕ್ಖಯೋ – ಇದಂ ಬ್ರಹ್ಮಚರಿಯಪರಿಯೋಸಾನ’’ನ್ತಿ। ದಸಮಂ।
20. Pāṭaliputtanidānaṃ. ‘‘‘Brahmacariyaṃ, brahmacariya’nti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’nti? ‘‘Sādhu sādhu, āvuso bhadda! Bhaddako kho te, āvuso bhadda, ummaṅgo, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘brahmacariyaṃ, brahmacariyanti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’’nti? ‘‘Evamāvuso’’ti. ‘‘Ayameva kho, āvuso, ariyo aṭṭhaṅgiko maggo brahmacariyaṃ, seyyathidaṃ – sammādiṭṭhi…pe… sammāsamādhi. Yo kho, āvuso, iminā ariyena aṭṭhaṅgikena maggena samannāgato – ayaṃ vuccati brahmacārī. Yo kho, āvuso, rāgakkhayo dosakkhayo mohakkhayo – idaṃ brahmacariyapariyosāna’’nti. Dasamaṃ.
ತೀಣಿ ಸುತ್ತನ್ತಾನಿ ಏಕನಿದಾನಾನಿ।ವಿಹಾರವಗ್ಗೋ ದುತಿಯೋ।
Tīṇi suttantāni ekanidānāni.Vihāravaggo dutiyo.
ತಸ್ಸುದ್ದಾನಂ –
Tassuddānaṃ –
ದ್ವೇ ವಿಹಾರಾ ಚ ಸೇಕ್ಖೋ ಚ, ಉಪ್ಪಾದಾ ಅಪರೇ ದುವೇ।
Dve vihārā ca sekkho ca, uppādā apare duve;
ಪರಿಸುದ್ಧೇನ ದ್ವೇ ವುತ್ತಾ, ಕುಕ್ಕುಟಾರಾಮೇನ ತಯೋತಿ॥
Parisuddhena dve vuttā, kukkuṭārāmena tayoti.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮-೧೦. ಪಠಮಕುಕ್ಕುಟಾರಾಮಸುತ್ತಾದಿವಣ್ಣನಾ • 8-10. Paṭhamakukkuṭārāmasuttādivaṇṇanā
