| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. තතියකුක්‌කුටාරාමසුත්‌තං
10. Tatiyakukkuṭārāmasuttaṃ
20. පාටලිපුත්‌තනිදානං. ‘‘‘බ්‍රහ්‌මචරියං, බ්‍රහ්‌මචරිය’න්‌ති, ආවුසො ආනන්‌ද, වුච්‌චති. කතමං නු ඛො, ආවුසො, බ්‍රහ්‌මචරියං, කතමො බ්‍රහ්‌මචාරී, කතමං බ්‍රහ්‌මචරියපරියොසාන’’න්‌ති? ‘‘සාධු සාධු, ආවුසො භද්‌ද! භද්‌දකො ඛො තෙ, ආවුසො භද්‌ද, උම්‌මඞ්‌ගො, භද්‌දකං පටිභානං, කල්‍යාණී පරිපුච්‌ඡා. එවඤ්‌හි ත්‌වං, ආවුසො භද්‌ද, පුච්‌ඡසි – ‘බ්‍රහ්‌මචරියං, බ්‍රහ්‌මචරියන්‌ති, ආවුසො ආනන්‌ද, වුච්‌චති. කතමං නු ඛො, ආවුසො, බ්‍රහ්‌මචරියං, කතමො බ්‍රහ්‌මචාරී, කතමං බ්‍රහ්‌මචරියපරියොසාන’’’න්‌ති? ‘‘එවමාවුසො’’ති. ‘‘අයමෙව ඛො, ආවුසො, අරියො අට්‌ඨඞ්‌ගිකො මග්‌ගො බ්‍රහ්‌මචරියං, සෙය්‍යථිදං – සම්‌මාදිට්‌ඨි…පෙ.… සම්‌මාසමාධි. යො ඛො, ආවුසො, ඉමිනා අරියෙන අට්‌ඨඞ්‌ගිකෙන මග්‌ගෙන සමන්‌නාගතො – අයං වුච්‌චති බ්‍රහ්‌මචාරී. යො ඛො, ආවුසො, රාගක්‌ඛයො දොසක්‌ඛයො මොහක්‌ඛයො – ඉදං බ්‍රහ්‌මචරියපරියොසාන’’න්‌ති. දසමං.
20. Pāṭaliputtanidānaṃ. ‘‘‘Brahmacariyaṃ, brahmacariya’nti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’nti? ‘‘Sādhu sādhu, āvuso bhadda! Bhaddako kho te, āvuso bhadda, ummaṅgo, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘brahmacariyaṃ, brahmacariyanti, āvuso ānanda, vuccati. Katamaṃ nu kho, āvuso, brahmacariyaṃ, katamo brahmacārī, katamaṃ brahmacariyapariyosāna’’’nti? ‘‘Evamāvuso’’ti. ‘‘Ayameva kho, āvuso, ariyo aṭṭhaṅgiko maggo brahmacariyaṃ, seyyathidaṃ – sammādiṭṭhi…pe… sammāsamādhi. Yo kho, āvuso, iminā ariyena aṭṭhaṅgikena maggena samannāgato – ayaṃ vuccati brahmacārī. Yo kho, āvuso, rāgakkhayo dosakkhayo mohakkhayo – idaṃ brahmacariyapariyosāna’’nti. Dasamaṃ.
තීණි සුත්‌තන්‌තානි එකනිදානානි.විහාරවග්‌ගො දුතියො.
Tīṇi suttantāni ekanidānāni.Vihāravaggo dutiyo.
තස්‌සුද්‌දානං –
Tassuddānaṃ –
ද්‌වෙ විහාරා ච සෙක්‌ඛො ච, උප්‌පාදා අපරෙ දුවෙ;
Dve vihārā ca sekkho ca, uppādā apare duve;
පරිසුද්‌ධෙන ද්‌වෙ වුත්‌තා, කුක්‌කුටාරාමෙන තයොති.
Parisuddhena dve vuttā, kukkuṭārāmena tayoti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8-10. පඨමකුක්‌කුටාරාමසුත්‌තාදිවණ්‌ණනා • 8-10. Paṭhamakukkuṭārāmasuttādivaṇṇanā
