| Library / Tipiṭaka / திபிடக • Tipiṭaka / விமானவத்து²-அட்ட²கதா² • Vimānavatthu-aṭṭhakathā |
12. ததியனாக³விமானவண்ணனா
12. Tatiyanāgavimānavaṇṇanā
கோ நு தி³ப்³பே³ன யானேனாதி ததியனாக³விமானங். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே கலந்த³கனிவாபே. தேன ஸமயேன தயோ கீ²ணாஸவத்தே²ரா கா³மகாவாஸே வஸ்ஸங் உபக³ச்சி²ங்ஸு. தே வுத்த²வஸ்ஸா பவாரெத்வா ‘‘ப⁴க³வந்தங் வந்தி³ஸ்ஸாமா’’தி ராஜக³ஹங் உத்³தி³ஸ்ஸ க³ச்ச²ந்தா அந்தராமக்³கே³ ஸாயங் அஞ்ஞதரஸ்மிங் கா³மகே மிச்சா²தி³ட்டி²கப்³ராஹ்மணஸ்ஸ உச்சு²கெ²த்தஸமீபங் க³ந்த்வா உச்சு²பாலங் புச்சி²ங்ஸு ‘‘ஆவுஸோ, ஸக்கா அஜ்ஜ ராஜக³ஹங் பாபுணிது’’ந்தி. ‘‘ந ஸக்கா, ப⁴ந்தே, இதோ அட்³ட⁴யோஜனே ராஜக³ஹங், இதே⁴வ வஸித்வா ஸ்வே க³ச்ச²தா²’’தி ஆஹ. ‘‘அத்தெ²த்த² கோசி வஸனயொக்³கோ³ ஆவாஸோ’’தி? ‘‘நத்தி², ப⁴ந்தே, அஹங் பன வோ வஸனட்டா²னங் ஜானிஸ்ஸாமீ’’தி. தே²ரா அதி⁴வாஸேஸுங்.
Konu dibbena yānenāti tatiyanāgavimānaṃ. Tassa kā uppatti? Bhagavā rājagahe viharati veḷuvane kalandakanivāpe. Tena samayena tayo khīṇāsavattherā gāmakāvāse vassaṃ upagacchiṃsu. Te vutthavassā pavāretvā ‘‘bhagavantaṃ vandissāmā’’ti rājagahaṃ uddissa gacchantā antarāmagge sāyaṃ aññatarasmiṃ gāmake micchādiṭṭhikabrāhmaṇassa ucchukhettasamīpaṃ gantvā ucchupālaṃ pucchiṃsu ‘‘āvuso, sakkā ajja rājagahaṃ pāpuṇitu’’nti. ‘‘Na sakkā, bhante, ito aḍḍhayojane rājagahaṃ, idheva vasitvā sve gacchathā’’ti āha. ‘‘Atthettha koci vasanayoggo āvāso’’ti? ‘‘Natthi, bhante, ahaṃ pana vo vasanaṭṭhānaṃ jānissāmī’’ti. Therā adhivāsesuṃ.
ஸோ உச்சூ²ஸுயேவ யதா²டி²தேஸு ஸாகா²மண்ட³பாகாரேன த³ண்ட³கானி ப³ந்தி⁴த்வா உச்சு²பண்ணேஹி சா²தெ³த்வா ஹெட்டா² பலாலங் அத்த²ரித்வா ஏகஸ்ஸ தே²ரஸ்ஸ அதா³ஸி, து³தியஸ்ஸ தே²ரஸ்ஸ தீஹி உச்சூ²ஹி த³ண்ட³கஸங்கே²பேன ப³ந்தி⁴த்வா திணேன சா²தெ³த்வா ஹெட்டா² ச திணஸந்த²ரங் கத்வா அதா³ஸி, இதரஸ்ஸ அத்தனோ குடியங் த்³வே தயோ த³ண்ட³கே ஸாகா²யோ ச நீஹரித்வா சீவரேன படிச்சா²தெ³ந்தோ சீவரகுடிங் கத்வா அதா³ஸி. தே தத்த² வஸிங்ஸு. அத² விபா⁴தாய ரத்தியா காலஸ்ஸேவ ப⁴த்தங் பசித்வா த³ந்தகட்ட²ஞ்ச முகோ²த³கஞ்ச த³த்வா ஸஹ உச்சு²ரஸேன ப⁴த்தங் அதா³ஸி. தேஸங் பு⁴ஞ்ஜித்வா அனுமோத³னங் கத்வா க³ச்ச²ந்தானங் ஏகேகங் உச்சு²ங் அதா³ஸி ‘‘மய்ஹங் பா⁴கோ³ ப⁴விஸ்ஸதீ’’தி. ஸோ தோ²கங் மக்³க³ங் தே²ரே அனுக³ந்த்வா நிவத்தந்தோ அத்தனோ வெய்யாவச்சஞ்ச தா³னஞ்ச ஆரப்³ப⁴ உளாரங் பீதிஸோமனஸ்ஸங் படிஸங்வேதெ³ந்தோ நிவத்தி.
So ucchūsuyeva yathāṭhitesu sākhāmaṇḍapākārena daṇḍakāni bandhitvā ucchupaṇṇehi chādetvā heṭṭhā palālaṃ attharitvā ekassa therassa adāsi, dutiyassa therassa tīhi ucchūhi daṇḍakasaṅkhepena bandhitvā tiṇena chādetvā heṭṭhā ca tiṇasantharaṃ katvā adāsi, itarassa attano kuṭiyaṃ dve tayo daṇḍake sākhāyo ca nīharitvā cīvarena paṭicchādento cīvarakuṭiṃ katvā adāsi. Te tattha vasiṃsu. Atha vibhātāya rattiyā kālasseva bhattaṃ pacitvā dantakaṭṭhañca mukhodakañca datvā saha ucchurasena bhattaṃ adāsi. Tesaṃ bhuñjitvā anumodanaṃ katvā gacchantānaṃ ekekaṃ ucchuṃ adāsi ‘‘mayhaṃ bhāgo bhavissatī’’ti. So thokaṃ maggaṃ there anugantvā nivattanto attano veyyāvaccañca dānañca ārabbha uḷāraṃ pītisomanassaṃ paṭisaṃvedento nivatti.
கெ²த்தஸாமிகோ பன க³ச்ச²ந்தானங் பி⁴க்கூ²னங் படிபதே²ன ஆக³ச்ச²ந்தோ பி⁴க்கூ² புச்சி² ‘‘குதோ வோ உச்சு² லத்³தா⁴’’தி? ‘‘உச்சு²பாலகேன தி³ன்னா’’தி. தங் ஸுத்வா ப்³ராஹ்மணோ குபிதோ அனத்தமனோ தடதடாயமானோ கோதா⁴பி⁴பூ⁴தோ தஸ்ஸ பிட்டி²தோ உபதா⁴வித்வா முக்³க³ரேன தங் பஹரந்தோ ஏகப்பஹாரேனேவ ஜீவிதா வோரோபேஸி. ஸோ அத்தனா கதபுஞ்ஞகம்மமேவ அனுஸ்ஸரந்தோ காலங் கத்வா ஸுத⁴ம்மாதே³வஸபா⁴யங் நிப்³ப³த்தி. தஸ்ஸ புஞ்ஞானுபா⁴வேன ஸப்³ப³ஸேதோ மஹந்தோ தி³ப்³ப³வரவாரணோ நிப்³ப³த்தி.
Khettasāmiko pana gacchantānaṃ bhikkhūnaṃ paṭipathena āgacchanto bhikkhū pucchi ‘‘kuto vo ucchu laddhā’’ti? ‘‘Ucchupālakena dinnā’’ti. Taṃ sutvā brāhmaṇo kupito anattamano taṭataṭāyamāno kodhābhibhūto tassa piṭṭhito upadhāvitvā muggarena taṃ paharanto ekappahāreneva jīvitā voropesi. So attanā katapuññakammameva anussaranto kālaṃ katvā sudhammādevasabhāyaṃ nibbatti. Tassa puññānubhāvena sabbaseto mahanto dibbavaravāraṇo nibbatti.
உச்சு²பாலகஸ்ஸ மரணங் ஸுத்வா தஸ்ஸ மாதாபிதரோ சேவ ஞாதிமித்தா ச அஸ்ஸுமுகா² ரோத³மானா தங் டா²னங் அக³மங்ஸு, ஸப்³பே³ ச கா³மவாஸினோ ஸன்னிபதிங்ஸு. தத்ரஸ்ஸ மாதாபிதரோ ஸரீரகிச்சங் காதுங் ஆரபி⁴ங்ஸு. தஸ்மிங் க²ணே ஸோ தே³வபுத்தோ தங் தி³ப்³ப³ஹத்தி²ங் அபி⁴ருஹித்வா ஸப்³ப³தாளாவசரபரிவுதோ பஞ்சங்கி³கேன தூரியேன பவஜ்ஜமானேன மஹந்தேன பரிவாரேன மஹதியா தே³வித்³தி⁴யா தே³வலோகதோ ஆக³ந்த்வா தாய பரிஸாய தி³ஸ்ஸமானரூபோ ஆகாஸே அட்டா²ஸி. அத² நங் தத்த² பண்டி³தஜாதிகோ புரிஸோ இமாஹி கா³தா²ஹி தேன கதபுஞ்ஞகம்மங் புச்சி² –
Ucchupālakassa maraṇaṃ sutvā tassa mātāpitaro ceva ñātimittā ca assumukhā rodamānā taṃ ṭhānaṃ agamaṃsu, sabbe ca gāmavāsino sannipatiṃsu. Tatrassa mātāpitaro sarīrakiccaṃ kātuṃ ārabhiṃsu. Tasmiṃ khaṇe so devaputto taṃ dibbahatthiṃ abhiruhitvā sabbatāḷāvacaraparivuto pañcaṅgikena tūriyena pavajjamānena mahantena parivārena mahatiyā deviddhiyā devalokato āgantvā tāya parisāya dissamānarūpo ākāse aṭṭhāsi. Atha naṃ tattha paṇḍitajātiko puriso imāhi gāthāhi tena katapuññakammaṃ pucchi –
976.
976.
‘‘கோ நு தி³ப்³பே³ன யானேன, ஸப்³ப³ஸேதேன ஹத்தி²னா;
‘‘Ko nu dibbena yānena, sabbasetena hatthinā;
தூரியதாளிதனிக்³கோ⁴ஸோ, அந்தலிக்கே² மஹீயதி.
Tūriyatāḷitanigghoso, antalikkhe mahīyati.
977.
977.
‘‘தே³வதா நுஸி க³ந்த⁴ப்³போ³, அது³ ஸக்கோ புரிந்த³தோ³;
‘‘Devatā nusi gandhabbo, adu sakko purindado;
அஜானந்தா தங் புச்சா²ம, கத²ங் ஜானேமு தங் மய’’ந்தி.
Ajānantā taṃ pucchāma, kathaṃ jānemu taṃ maya’’nti.
ஸோபிஸ்ஸ இமாஹி கா³தா²ஹி ஏதமத்த²ங் ப்³யாகாஸி –
Sopissa imāhi gāthāhi etamatthaṃ byākāsi –
978.
978.
‘‘நாம்ஹி தே³வோ ந க³ந்த⁴ப்³போ³, நாபி ஸக்கோ புரிந்த³தோ³;
‘‘Nāmhi devo na gandhabbo, nāpi sakko purindado;
ஸுத⁴ம்மா நாம யே தே³வா, தேஸங் அஞ்ஞதரோ அஹ’’ந்தி.
Sudhammā nāma ye devā, tesaṃ aññataro aha’’nti.
979.
979.
‘‘புச்சா²ம தே³வங் ஸுத⁴ம்மங், புது²ங் கத்வான அஞ்ஜலிங்;
‘‘Pucchāma devaṃ sudhammaṃ, puthuṃ katvāna añjaliṃ;
கிங் கத்வா மானுஸே கம்மங், ஸுத⁴ம்மங் உபபஜ்ஜதீ’’தி – புனபி புச்சி²;
Kiṃ katvā mānuse kammaṃ, sudhammaṃ upapajjatī’’ti – punapi pucchi;
980.
980.
‘‘உச்சா²கா³ரங் திணாகா³ரங், வத்தா²கா³ரஞ்ச யோ த³தே³;
‘‘Ucchāgāraṃ tiṇāgāraṃ, vatthāgārañca yo dade;
திண்ணங் அஞ்ஞதரங் த³த்வா, ஸுத⁴ம்மங் உபபஜ்ஜதீ’’தி. – புனபி ப்³யாகாஸி;
Tiṇṇaṃ aññataraṃ datvā, sudhammaṃ upapajjatī’’ti. – punapi byākāsi;
976. தத்த² தூரியதாளிதனிக்³கோ⁴ஸோதி தாளிதபஞ்சங்கி³ததி³ப்³ப³தூரியனிக்³கோ⁴ஸோ அத்தானங் உத்³தி³ஸ்ஸ பவஜ்ஜமானதி³ப்³ப³தூரியஸத்³தோ³ . அந்தலிக்கே² மஹீயதீதி ஆகாஸே ட²த்வா ஆகாஸட்டே²னேவ மஹதா பரிவாரேன பூஜீயதி.
976. Tattha tūriyatāḷitanigghosoti tāḷitapañcaṅgitadibbatūriyanigghoso attānaṃ uddissa pavajjamānadibbatūriyasaddo . Antalikkhe mahīyatīti ākāse ṭhatvā ākāsaṭṭheneva mahatā parivārena pūjīyati.
977. தே³வதா நுஸீதி தே³வதா நு அஸி, கிங் நு த்வங் தே³வோஸீதி அத்தோ². க³ந்த⁴ப்³போ³தி க³ந்த⁴ப்³ப³காயிகதே³வோ அஸீதி அத்தோ². அது³ ஸக்கோ புரிந்த³தோ³தி உதா³ஹு புரே த³தா³தீதி ‘‘புரிந்த³தோ³’’தி விஸ்ஸுதோ ஸக்கோ நுஸி, அத² ஸக்கோ தே³வராஜா அஸீதி அத்தோ². எத்த² ச ஸதிபி ஸக்கக³ந்த⁴ப்³பா³னங் தே³வபா⁴வே தேஸங் விஸுங் க³ஹிதத்தா கோ³ப³லிப³த்³த⁴ஞாயேன தத³ஞ்ஞதே³வவாசகோ தே³வஸத்³தோ³ த³ட்ட²ப்³போ³.
977.Devatānusīti devatā nu asi, kiṃ nu tvaṃ devosīti attho. Gandhabboti gandhabbakāyikadevo asīti attho. Adu sakko purindadoti udāhu pure dadātīti ‘‘purindado’’ti vissuto sakko nusi, atha sakko devarājā asīti attho. Ettha ca satipi sakkagandhabbānaṃ devabhāve tesaṃ visuṃ gahitattā gobalibaddhañāyena tadaññadevavācako devasaddo daṭṭhabbo.
978. அத² தே³வபுத்தோ ‘‘விஸ்ஸஜ்ஜனங் நாம புச்சா²ஸபா⁴கே³ன ஹோதீ’’தி தேஹி புச்சி²தங் தே³வக³ந்த⁴ப்³ப³ஸக்கபா⁴வங் படிக்கி²பித்வா அத்தானங் ஆசிக்க²ந்தோ ‘‘நம்ஹி தே³வோ ந க³ந்த⁴ப்³போ³’’திஆதி³மாஹ. தத்த² நம்ஹி தே³வோதி தயா ஆஸங்கிதோ யோ கோசி தே³வோ ந ஹோமி ந க³ந்த⁴ப்³போ³ ந ஸக்கோ, அபிச கோ² ஸுத⁴ம்மா நாம யே தே³வா, தேஸங் அஞ்ஞதரோ அஹங், ஸுத⁴ம்மா தே³வதா நாம தாவதிங்ஸதே³வனிகாயஸ்ஸேவ அஞ்ஞதரதே³வனிகாயோ. ஸோ கிர உச்சு²பாலோ தேஸங் தே³வானங் ஸம்பத்திங் ஸுத்வா பகே³வ தத்த² சித்தங் பணிதா⁴ய டி²தோதி கேசி வத³ந்தி.
978. Atha devaputto ‘‘vissajjanaṃ nāma pucchāsabhāgena hotī’’ti tehi pucchitaṃ devagandhabbasakkabhāvaṃ paṭikkhipitvā attānaṃ ācikkhanto ‘‘namhi devo na gandhabbo’’tiādimāha. Tattha namhi devoti tayā āsaṅkito yo koci devo na homi na gandhabbo na sakko, apica kho sudhammā nāma ye devā, tesaṃ aññataro ahaṃ, sudhammā devatā nāma tāvatiṃsadevanikāyasseva aññataradevanikāyo. So kira ucchupālo tesaṃ devānaṃ sampattiṃ sutvā pageva tattha cittaṃ paṇidhāya ṭhitoti keci vadanti.
979. புது²ந்தி மஹந்தங், பரிபுண்ணங் கத்வாதி அத்தோ². ஸக்கச்சகிரியாதீ³பனத்த²ஞ்ஹேதங் வுத்தங்.
979.Puthunti mahantaṃ, paripuṇṇaṃ katvāti attho. Sakkaccakiriyādīpanatthañhetaṃ vuttaṃ.
980. ஸுத⁴ம்மாதே³வயானங் புட்டோ² தே³வபுத்தோ ககண்டகனிமித்தங் வத³ந்தோ விய தி³ட்ட²மத்தமேவ க³ஹெத்வா அத்தனா கதபுஞ்ஞங் ஆசிக்க²ந்தோ ‘‘உச்சா²கா³ர’’ந்தி கா³த²மாஹ. தத்த² திண்ணங் அஞ்ஞதரங் த³த்வாதி யதி³பி மயா தீணி அகா³ரானி தி³ன்னானி, தீஸு பன அஞ்ஞதரேனாதி அயமத்தோ²பி ஸிஜ்ஜ²தீதி நயக்³கா³ஹேன தே³வபுத்தோ ஏவமாஹ. ஸேஸங் ஸுவிஞ்ஞெய்யமேவ.
980. Sudhammādevayānaṃ puṭṭho devaputto kakaṇṭakanimittaṃ vadanto viya diṭṭhamattameva gahetvā attanā katapuññaṃ ācikkhanto ‘‘ucchāgāra’’nti gāthamāha. Tattha tiṇṇaṃ aññataraṃ datvāti yadipi mayā tīṇi agārāni dinnāni, tīsu pana aññatarenāti ayamatthopi sijjhatīti nayaggāhena devaputto evamāha. Sesaṃ suviññeyyameva.
ஏவங் ஸோ தேன புச்சி² தமத்த²ங் விஸ்ஸஜ்ஜெத்வா ரதனத்தயகு³ணங் பகாஸெந்தோ மாதாபிதூஹி ஸத்³தி⁴ங் ஸம்மோத³னங் கத்வா தே³வலோகமேவ க³தோ. மனுஸ்ஸா தே³வபுத்தஸ்ஸ வசனங் ஸுத்வா ப⁴க³வதி பி⁴க்கு²ஸங்கே⁴ ச ஸஞ்ஜாதபஸாத³ப³ஹுமானா ப³ஹுங் தா³னூபகரணங் ஸஜ்ஜெத்வா ஸகடானங் பூரெத்வா வேளுவனங் க³ந்த்வா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ மஹாதா³னங் த³த்வா ஸத்து² தங் பவத்திங் ஆரோசயிங்ஸு. ஸத்தா² தங் புச்சா²விஸ்ஸஜ்ஜனங் ததே²வ வத்வா தமேவ அத்த²ங் அட்டு²ப்பத்திங் கத்வா வித்தா²ரேன த⁴ம்மங் தே³ஸெத்வா தே ஸரணேஸு ச ஸீலேஸு ச பதிட்டா²பேஸி. தே ச பதிட்டி²தஸத்³தா⁴ ப⁴க³வந்தங் வந்தி³த்வா அத்தனோ கா³மங் உபக³ந்த்வா உச்சு²பாலஸ்ஸ மதட்டா²னே விஹாரங் காரயிங்ஸூதி.
Evaṃ so tena pucchi tamatthaṃ vissajjetvā ratanattayaguṇaṃ pakāsento mātāpitūhi saddhiṃ sammodanaṃ katvā devalokameva gato. Manussā devaputtassa vacanaṃ sutvā bhagavati bhikkhusaṅghe ca sañjātapasādabahumānā bahuṃ dānūpakaraṇaṃ sajjetvā sakaṭānaṃ pūretvā veḷuvanaṃ gantvā buddhappamukhassa bhikkhusaṅghassa mahādānaṃ datvā satthu taṃ pavattiṃ ārocayiṃsu. Satthā taṃ pucchāvissajjanaṃ tatheva vatvā tameva atthaṃ aṭṭhuppattiṃ katvā vitthārena dhammaṃ desetvā te saraṇesu ca sīlesu ca patiṭṭhāpesi. Te ca patiṭṭhitasaddhā bhagavantaṃ vanditvā attano gāmaṃ upagantvā ucchupālassa mataṭṭhāne vihāraṃ kārayiṃsūti.
ததியனாக³விமானவண்ணனா நிட்டி²தா.
Tatiyanāgavimānavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / விமானவத்து²பாளி • Vimānavatthupāḷi / 12. ததியனாக³விமானவத்து² • 12. Tatiyanāgavimānavatthu
