| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
6. д̇ад̇ияанаанаад̇ид̇т̇ияасуд̇д̇аван̣н̣анаа
6. Tatiyanānātitthiyasuttavaṇṇanā
56. чадтз саб̣б̣ам̣ хздтаа вуд̇д̇анаяамзва. имам̣ уд̣̇аананд̇и зд̇т̇а бана д̣̇идтид̇ан̣хаамаанзсу д̣̇осам̣ д̣̇исваа д̇з д̣̇уурад̇о важ̇ж̇зд̇ваа сан̇каарз яат̇аабхууд̇ам̣ бассад̇о жа д̇ад̇т̇а анаад̣̇ийнавад̣̇ассид̇ааяа мижчаабхинивидтасса яат̇аабхууд̇ам̣ абассад̇о жа яат̇ааггамам̣ сам̣саарад̇о ад̇ивад̇д̇анаанад̇ивад̇д̇анад̣̇ийбагам̣ имам̣ уд̣̇аанам̣ уд̣̇аанзсийд̇и ад̇т̇о яож̇зд̇аб̣б̣о.
56. Chaṭṭhe sabbaṃ heṭṭhā vuttanayameva. Imaṃ udānanti ettha pana diṭṭhitaṇhāmānesu dosaṃ disvā te dūrato vajjetvā saṅkhāre yathābhūtaṃ passato ca tattha anādīnavadassitāya micchābhiniviṭṭhassa yathābhūtaṃ apassato ca yathākkamaṃ saṃsārato ativattanānativattanadīpakaṃ imaṃ udānaṃ udānesīti attho yojetabbo.
д̇ад̇т̇а ахан̇гаарабасуд̇ааяам̣ баж̇аад̇и ‘‘саяам̣гад̇о ад̇д̇аа жа лого жаа’’д̇и звам̣ вуд̇д̇асаяам̣гаарасан̇каад̇ам̣ ахан̇гаарам̣ д̇ат̇аабавад̇д̇ам̣ д̣̇идтим̣ басуд̇аа ануяуд̇д̇аа аяам̣ баж̇аа мижчаабхинивидто сад̇д̇агааяо. барам̣гааруубасам̣хид̇аад̇и баро ан̃н̃о иссараад̣̇иго саб̣б̣ам̣ гарод̇ийд̇и звам̣ бавад̇д̇абарам̣гаарад̣̇идтисанниссид̇аа д̇ааяа убасам̣хид̇аад̇и барам̣гааруубасам̣хид̇аа. зд̇ад̣̇згз нааб̣бхан̃н̃ам̣сууд̇и зд̇ам̣ д̣̇идтид̣̇ваяам̣ згз саман̣аб̣раахман̣аа д̇ад̇т̇а д̣̇осад̣̇ассино худ̇ваа наануж̇ааним̣су. гат̇ам̣? сад̇и хи саяам̣гаарз гаамагаарад̇о сад̇д̇аанам̣ идтзнзва бхавид̇аб̣б̣ам̣, на анидтзна. на хи гожи ад̇д̇ано д̣̇угкам̣ ижчад̇и, бхавад̇и жа анидтам̣, д̇асмаа на саяам̣гааро. барам̣гаароби яад̣̇и иссарахзд̇уго, свааяам̣ иссаро ад̇д̇ад̇т̇ам̣ ваа гарзяяа барад̇т̇ам̣ ваа. д̇ад̇т̇а яад̣̇и ад̇д̇ад̇т̇ам̣, ад̇д̇анаа агад̇агижжо сияаа асид̣̇д̇хасса саад̇ханад̇о. ат̇а ваа барад̇т̇ам̣ саб̣б̣зсам̣ хид̇асукамзва нибпаж̇ж̇зяяа, на ахид̇ам̣ д̣̇угкам̣ нибпаж̇ж̇ад̇и, д̇асмаа иссаравасзна на барам̣гааро сиж̇жхад̇и. яад̣̇и жа иссарасан̇каад̇ам̣ ан̃н̃анирабзгкам̣ нижжамзгагааран̣ам̣ бавад̇д̇ияаа сияаа, гаммзна уббад̇д̇и на сияаа, саб̣б̣зхзва згаж̇жхам̣ уббаж̇ж̇ид̇аб̣б̣ам̣ гааран̣асса саннихид̇ад̇д̇аа. ат̇асса ан̃н̃амби сахагаарийгааран̣ам̣ ижчид̇ам̣, д̇ан̃н̃зва хзд̇у, гим̣ иссарзна абаринидтид̇асаамад̇т̇иязна баригаббид̇зна. яат̇аа жа иссарахзд̇уго барам̣гааро на сиж̇жхад̇и, звам̣ баж̇аабад̇ибурисабагад̇иб̣рахмагаалаад̣̇ихзд̇уд̇оби на сиж̇жхад̇зва д̇зсамби асид̣̇д̇хад̇д̇аа вуд̇д̇ад̣̇осаанад̇ивад̇д̇анад̇о жа. д̇зна вуд̇д̇ам̣ ‘‘зд̇ад̣̇згз нааб̣бхан̃н̃ам̣суу’’д̇и. яз бана яат̇аавуд̇д̇з саяам̣гаарабарам̣гаарз наануж̇аананд̇ааби ад̇хижжасамуббаннам̣ ад̇д̇аанан̃жа логан̃жа бан̃н̃абзнд̇и, д̇зби на нам̣ салланд̇и ад̣̇д̣̇асум̣ ад̇хижжасамуббаннанд̇иваад̣̇иноби мижчаабхинивзсам̣ анад̇иггаманад̇о яат̇аабхууд̇ам̣ аж̇аананд̇аанам̣ д̣̇идтиг̇ад̇ам̣ д̇ад̇т̇а д̇ад̇т̇а д̣̇угкуббаад̣̇анад̇о виж̇жханадтзна ‘‘салла’’нд̇и на бассим̣су.
Tattha ahaṅkārapasutāyaṃ pajāti ‘‘sayaṃkato attā ca loko cā’’ti evaṃ vuttasayaṃkārasaṅkhātaṃ ahaṅkāraṃ tathāpavattaṃ diṭṭhiṃ pasutā anuyuttā ayaṃ pajā micchābhiniviṭṭho sattakāyo. Paraṃkārūpasaṃhitāti paro añño issarādiko sabbaṃ karotīti evaṃ pavattaparaṃkāradiṭṭhisannissitā tāya upasaṃhitāti paraṃkārūpasaṃhitā. Etadeke nābbhaññaṃsūti etaṃ diṭṭhidvayaṃ eke samaṇabrāhmaṇā tattha dosadassino hutvā nānujāniṃsu. Kathaṃ? Sati hi sayaṃkāre kāmakārato sattānaṃ iṭṭheneva bhavitabbaṃ, na aniṭṭhena. Na hi koci attano dukkhaṃ icchati, bhavati ca aniṭṭhaṃ, tasmā na sayaṃkāro. Paraṃkāropi yadi issarahetuko, svāyaṃ issaro attatthaṃ vā kareyya paratthaṃ vā. Tattha yadi attatthaṃ, attanā akatakicco siyā asiddhassa sādhanato. Atha vā paratthaṃ sabbesaṃ hitasukhameva nipphajjeyya, na ahitaṃ dukkhaṃ nipphajjati, tasmā issaravasena na paraṃkāro sijjhati. Yadi ca issarasaṅkhātaṃ aññanirapekkhaṃ niccamekakāraṇaṃ pavattiyā siyā, kammena uppatti na siyā, sabbeheva ekajjhaṃ uppajjitabbaṃ kāraṇassa sannihitattā. Athassa aññampi sahakārīkāraṇaṃ icchitaṃ, taññeva hetu, kiṃ issarena apariniṭṭhitasāmatthiyena parikappitena. Yathā ca issarahetuko paraṃkāro na sijjhati, evaṃ pajāpatipurisapakatibrahmakālādihetutopi na sijjhateva tesampi asiddhattā vuttadosānativattanato ca. Tena vuttaṃ ‘‘etadeke nābbhaññaṃsū’’ti. Ye pana yathāvutte sayaṃkāraparaṃkāre nānujānantāpi adhiccasamuppannaṃ attānañca lokañca paññapenti, tepi na naṃ sallanti addasuṃ adhiccasamuppannantivādinopi micchābhinivesaṃ anatikkamanato yathābhūtaṃ ajānantānaṃ diṭṭhigataṃ tattha tattha dukkhuppādanato vijjhanaṭṭhena ‘‘salla’’nti na passiṃsu.
зд̇ан̃жа саллам̣ бадигажжа бассад̇од̇и яо бана аарад̣̇д̇хавибассаго бан̃жаби убаад̣̇аанагканд̇хз анижжад̇о д̣̇угкад̇о анад̇д̇ад̇о саманубассад̇и, со зд̇ан̃жа д̇ивид̇хам̣ вибарийд̇ад̣̇ассанам̣ ан̃н̃ан̃жа сагалам̣ мижчаабхинивзсам̣ д̇зсан̃жа ниссаяабхууд̇з бан̃жубаад̣̇аанагканд̇хзби д̇уж̇ж̇анад̇о д̣̇уруд̣̇д̇хаарад̇о жа ‘‘салла’’нд̇и бадигажжа буб̣б̣зязва вибассанаабан̃н̃ааяа бассад̇и. звам̣ бассад̇о арияамаг̇г̇агкан̣з зганд̇знзва ахам̣ гаромийд̇и на д̇асса ход̇и. яат̇аа жа ад̇д̇ано гаарагабхааво д̇асса на убадтаад̇и, звам̣ баро гарод̇ийд̇и на д̇асса ход̇и, гзвалам̣ бана анижжасан̇каад̇ам̣ бадижжасамуббаннад̇хаммамад̇д̇амзва ход̇и. зд̇д̇аавад̇аа саммаабадибаннасса саб̣б̣ат̇ааби д̣̇идтимаанаабхаавова д̣̇ассид̇о. д̇зна жа арахад̇д̇аббад̇д̇ияаа сам̣саарасамад̇иггамо багаасид̇о ход̇и.
Etañca sallaṃ paṭikacca passatoti yo pana āraddhavipassako pañcapi upādānakkhandhe aniccato dukkhato anattato samanupassati, so etañca tividhaṃ viparītadassanaṃ aññañca sakalaṃ micchābhinivesaṃ tesañca nissayabhūte pañcupādānakkhandhepi tujjanato duruddhārato ca ‘‘salla’’nti paṭikacca pubbeyeva vipassanāpaññāya passati. Evaṃ passato ariyamaggakkhaṇe ekanteneva ahaṃ karomīti na tassa hoti. Yathā ca attano kārakabhāvo tassa na upaṭṭhāti, evaṃ paro karotīti na tassa hoti, kevalaṃ pana aniccasaṅkhātaṃ paṭiccasamuppannadhammamattameva hoti. Ettāvatā sammāpaṭipannassa sabbathāpi diṭṭhimānābhāvova dassito. Tena ca arahattappattiyā saṃsārasamatikkamo pakāsito hoti.
ид̣̇аани яо д̣̇идтиг̇ад̇з аллийно, на со сам̣саарад̇о сийсам̣ угкибид̇ум̣ саггод̇и, д̇ам̣ д̣̇ассзд̇ум̣ ‘‘маанубзд̇аа’’д̇и г̇аат̇амааха. д̇ад̇т̇а маанубзд̇аа аяам̣ баж̇аад̇и аяам̣ саб̣б̣ааби д̣̇идтиг̇ад̇игасан̇каад̇аа баж̇аа сад̇д̇агааяо ‘‘маяхам̣ д̣̇идти сунд̣̇араа, маяхам̣ аад̣̇аано сунд̣̇аро’’д̇и ад̇д̇ано г̇аахасса сам̣баг̇г̇ахалагкан̣зна маанзна убзд̇аа саманнааг̇ад̇аа. маанаг̇ант̇аа маанавиниб̣ад̣̇д̇хаад̇и д̇ад̇о зва д̇зна абараабарам̣ уббаж̇ж̇амаанзна яат̇аа д̇ам̣ д̣̇идтим̣ на бадиниссаж̇ж̇ад̇и, звам̣ ад̇д̇ано санд̇аанасса г̇ант̇ид̇ад̇д̇аа виниб̣ад̣̇д̇хад̇д̇аа жа маанаг̇ант̇аа маанавиниб̣ад̣̇д̇хаа. д̣̇идтийсу саарамбхагат̇аа, сам̣саарам̣ наад̇ивад̇д̇ад̇ийд̇и ‘‘ид̣̇амзва сажжам̣ могхаман̃н̃а’’нд̇и ад̇д̇уггам̣санабаравамбханавасзна ад̇д̇ано д̣̇идтаабхинивзсзна барзсам̣ д̣̇идтийсу саарамбхагат̇аа вирод̇хагат̇аа сам̣сааранааяигаанам̣ авиж̇ж̇аад̇ан̣хаанам̣ аббахаанад̇о сам̣саарам̣ наад̇ивад̇д̇ад̇и, на ад̇иггамад̇ийд̇и ад̇т̇о.
Idāni yo diṭṭhigate allīno, na so saṃsārato sīsaṃ ukkhipituṃ sakkoti, taṃ dassetuṃ ‘‘mānupetā’’ti gāthamāha. Tattha mānupetā ayaṃ pajāti ayaṃ sabbāpi diṭṭhigatikasaṅkhātā pajā sattakāyo ‘‘mayhaṃ diṭṭhi sundarā, mayhaṃ ādāno sundaro’’ti attano gāhassa saṃpaggahalakkhaṇena mānena upetā samannāgatā. Mānaganthā mānavinibaddhāti tato eva tena aparāparaṃ uppajjamānena yathā taṃ diṭṭhiṃ na paṭinissajjati, evaṃ attano santānassa ganthitattā vinibaddhattā ca mānaganthā mānavinibaddhā. Diṭṭhīsu sārambhakathā, saṃsāraṃ nātivattatīti ‘‘idameva saccaṃ moghamañña’’nti attukkaṃsanaparavambhanavasena attano diṭṭhābhinivesena paresaṃ diṭṭhīsu sārambhakathā virodhakathā saṃsāranāyikānaṃ avijjātaṇhānaṃ appahānato saṃsāraṃ nātivattati, na atikkamatīti attho.
чадтасуд̇д̇аван̣н̣анаа нидтид̇аа.
Chaṭṭhasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 6. д̇ад̇ияанаанаад̇ид̇т̇ияасуд̇д̇ам̣ • 6. Tatiyanānātitthiyasuttaṃ
