| Library / Tipiṭaka / তিপিটক • Tipiṭaka / ৰিমানৰত্থুপাল়ি • Vimānavatthupāḷi |
৮. ততিযনাৰাৰিমানৰত্থু
8. Tatiyanāvāvimānavatthu
৬৩.
63.
‘‘সুৰণ্ণচ্ছদনং নাৰং, নারি আরুয্হ তিট্ঠসি।
‘‘Suvaṇṇacchadanaṃ nāvaṃ, nāri āruyha tiṭṭhasi;
ওগাহসি পোক্খরণিং, পদ্মং ছিন্দসি পাণিনা॥
Ogāhasi pokkharaṇiṃ, padmaṃ chindasi pāṇinā.
৬৪.
64.
‘‘কূটাগারা নিৰেসা তে, ৰিভত্তা ভাগসো মিতা।
‘‘Kūṭāgārā nivesā te, vibhattā bhāgaso mitā;
৬৫.
65.
‘‘কেন তেতাদিসো ৰণ্ণো, কেন তে ইধ মিজ্ঝতি।
‘‘Kena tetādiso vaṇṇo, kena te idha mijjhati;
উপ্পজ্জন্তি চ তে ভোগা, যে কেচি মনসো পিযা॥
Uppajjanti ca te bhogā, ye keci manaso piyā.
৬৬.
66.
‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং।
‘‘Pucchāmi taṃ devi mahānubhāve, manussabhūtā kimakāsi puññaṃ;
কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
৬৭.
67.
সা দেৰতা অত্তমনা, সম্বুদ্ধেনেৰ পুচ্ছিতা।
Sā devatā attamanā, sambuddheneva pucchitā;
পঞ্হং পুট্ঠা ৰিযাকাসি, যস্স কম্মস্সিদং ফলং॥
Pañhaṃ puṭṭhā viyākāsi, yassa kammassidaṃ phalaṃ.
৬৮.
68.
‘‘অহং মনুস্সেসু মনুস্সভূতা, পুরিমায জাতিযা মনুস্সলোকে।
‘‘Ahaṃ manussesu manussabhūtā, purimāya jātiyā manussaloke;
দিস্ৰান ভিক্খূ তসিতে কিলন্তে, উট্ঠায পাতুং উদকং অদাসিং॥
Disvāna bhikkhū tasite kilante, uṭṭhāya pātuṃ udakaṃ adāsiṃ.
৬৯.
69.
‘‘যো ৰে কিলন্তান পিপাসিতানং, উট্ঠায পাতুং উদকং দদাতি।
‘‘Yo ve kilantāna pipāsitānaṃ, uṭṭhāya pātuṃ udakaṃ dadāti;
সীতোদকা তস্স ভৰন্তি নজ্জো, পহূতমল্যা বহুপুণ্ডরীকা॥
Sītodakā tassa bhavanti najjo, pahūtamalyā bahupuṇḍarīkā.
৭০.
70.
‘‘তং আপগা অনুপরিযন্তি সব্বদা, সীতোদকা ৰালুকসন্থতা নদী।
‘‘Taṃ āpagā anupariyanti sabbadā, sītodakā vālukasanthatā nadī;
অম্বা চ সালা তিলকা চ জম্বুযো, উদ্দালকা পাটলিযো চ ফুল্লা॥
Ambā ca sālā tilakā ca jambuyo, uddālakā pāṭaliyo ca phullā.
৭১.
71.
‘‘তং ভূমিভাগেহি উপেতরূপং, ৰিমানসেট্ঠং ভুসসোভমানং।
‘‘Taṃ bhūmibhāgehi upetarūpaṃ, vimānaseṭṭhaṃ bhusasobhamānaṃ;
তস্সীধ কম্মস্স অযং ৰিপাকো, এতাদিসং পুঞ্ঞকতা লভন্তি॥
Tassīdha kammassa ayaṃ vipāko, etādisaṃ puññakatā labhanti.
৭২.
72.
‘‘কূটাগারা নিৰেসা মে, ৰিভত্তা ভাগসো মিতা।
‘‘Kūṭāgārā nivesā me, vibhattā bhāgaso mitā;
দদ্দল্লমানা আভন্তি, সমন্তা চতুরো দিসা॥
Daddallamānā ābhanti, samantā caturo disā.
৭৩.
73.
‘‘তেন মেতাদিসো ৰণ্ণো, তেন মে ইধ মিজ্ঝতি।
‘‘Tena metādiso vaṇṇo, tena me idha mijjhati;
উপ্পজ্জন্তি চ মে ভোগা, যে কেচি মনসো পিযা॥
Uppajjanti ca me bhogā, ye keci manaso piyā.
৭৪.
74.
‘‘অক্খামি তে বুদ্ধ মহানুভাৰ, মনুস্সভূতা যমকাসি পুঞ্ঞং।
‘‘Akkhāmi te buddha mahānubhāva, manussabhūtā yamakāsi puññaṃ;
তেনম্হি এৰং জলিতানুভাৰা, ৰণ্ণো চ মে সব্বদিসা পভাসতি।
Tenamhi evaṃ jalitānubhāvā, vaṇṇo ca me sabbadisā pabhāsati;
এতস্স কম্মস্স ফলং মমেদং, অত্থায বুদ্ধো উদকং অপাযী’’তি 3॥
Etassa kammassa phalaṃ mamedaṃ, atthāya buddho udakaṃ apāyī’’ti 4.
ততিযনাৰাৰিমানং অট্ঠমং।
Tatiyanāvāvimānaṃ aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ৰিমানৰত্থু-অট্ঠকথা • Vimānavatthu-aṭṭhakathā / ৮. ততিযনাৰাৰিমানৰণ্ণনা • 8. Tatiyanāvāvimānavaṇṇanā
