| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
८. ततियनावाविमानवत्थु
8. Tatiyanāvāvimānavatthu
६३.
63.
‘‘सुवण्णच्छदनं नावं, नारि आरुय्ह तिट्ठसि।
‘‘Suvaṇṇacchadanaṃ nāvaṃ, nāri āruyha tiṭṭhasi;
ओगाहसि पोक्खरणिं, पद्मं छिन्दसि पाणिना॥
Ogāhasi pokkharaṇiṃ, padmaṃ chindasi pāṇinā.
६४.
64.
‘‘कूटागारा निवेसा ते, विभत्ता भागसो मिता।
‘‘Kūṭāgārā nivesā te, vibhattā bhāgaso mitā;
६५.
65.
‘‘केन तेतादिसो वण्णो, केन ते इध मिज्झति।
‘‘Kena tetādiso vaṇṇo, kena te idha mijjhati;
उप्पज्जन्ति च ते भोगा, ये केचि मनसो पिया॥
Uppajjanti ca te bhogā, ye keci manaso piyā.
६६.
66.
‘‘पुच्छामि तं देवि महानुभावे, मनुस्सभूता किमकासि पुञ्ञं।
‘‘Pucchāmi taṃ devi mahānubhāve, manussabhūtā kimakāsi puññaṃ;
केनासि एवं जलितानुभावा, वण्णो च ते सब्बदिसा पभासती’’ति॥
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
६७.
67.
सा देवता अत्तमना, सम्बुद्धेनेव पुच्छिता।
Sā devatā attamanā, sambuddheneva pucchitā;
पञ्हं पुट्ठा वियाकासि, यस्स कम्मस्सिदं फलं॥
Pañhaṃ puṭṭhā viyākāsi, yassa kammassidaṃ phalaṃ.
६८.
68.
‘‘अहं मनुस्सेसु मनुस्सभूता, पुरिमाय जातिया मनुस्सलोके।
‘‘Ahaṃ manussesu manussabhūtā, purimāya jātiyā manussaloke;
दिस्वान भिक्खू तसिते किलन्ते, उट्ठाय पातुं उदकं अदासिं॥
Disvāna bhikkhū tasite kilante, uṭṭhāya pātuṃ udakaṃ adāsiṃ.
६९.
69.
‘‘यो वे किलन्तान पिपासितानं, उट्ठाय पातुं उदकं ददाति।
‘‘Yo ve kilantāna pipāsitānaṃ, uṭṭhāya pātuṃ udakaṃ dadāti;
सीतोदका तस्स भवन्ति नज्जो, पहूतमल्या बहुपुण्डरीका॥
Sītodakā tassa bhavanti najjo, pahūtamalyā bahupuṇḍarīkā.
७०.
70.
‘‘तं आपगा अनुपरियन्ति सब्बदा, सीतोदका वालुकसन्थता नदी।
‘‘Taṃ āpagā anupariyanti sabbadā, sītodakā vālukasanthatā nadī;
अम्बा च साला तिलका च जम्बुयो, उद्दालका पाटलियो च फुल्ला॥
Ambā ca sālā tilakā ca jambuyo, uddālakā pāṭaliyo ca phullā.
७१.
71.
‘‘तं भूमिभागेहि उपेतरूपं, विमानसेट्ठं भुससोभमानं।
‘‘Taṃ bhūmibhāgehi upetarūpaṃ, vimānaseṭṭhaṃ bhusasobhamānaṃ;
तस्सीध कम्मस्स अयं विपाको, एतादिसं पुञ्ञकता लभन्ति॥
Tassīdha kammassa ayaṃ vipāko, etādisaṃ puññakatā labhanti.
७२.
72.
‘‘कूटागारा निवेसा मे, विभत्ता भागसो मिता।
‘‘Kūṭāgārā nivesā me, vibhattā bhāgaso mitā;
दद्दल्लमाना आभन्ति, समन्ता चतुरो दिसा॥
Daddallamānā ābhanti, samantā caturo disā.
७३.
73.
‘‘तेन मेतादिसो वण्णो, तेन मे इध मिज्झति।
‘‘Tena metādiso vaṇṇo, tena me idha mijjhati;
उप्पज्जन्ति च मे भोगा, ये केचि मनसो पिया॥
Uppajjanti ca me bhogā, ye keci manaso piyā.
७४.
74.
‘‘अक्खामि ते बुद्ध महानुभाव, मनुस्सभूता यमकासि पुञ्ञं।
‘‘Akkhāmi te buddha mahānubhāva, manussabhūtā yamakāsi puññaṃ;
तेनम्हि एवं जलितानुभावा, वण्णो च मे सब्बदिसा पभासति।
Tenamhi evaṃ jalitānubhāvā, vaṇṇo ca me sabbadisā pabhāsati;
एतस्स कम्मस्स फलं ममेदं, अत्थाय बुद्धो उदकं अपायी’’ति 3॥
Etassa kammassa phalaṃ mamedaṃ, atthāya buddho udakaṃ apāyī’’ti 4.
ततियनावाविमानं अट्ठमं।
Tatiyanāvāvimānaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / ८. ततियनावाविमानवण्णना • 8. Tatiyanāvāvimānavaṇṇanā
